Sogʻliqni saqlash va tibbiyot sohasidagi hamkorlik toʻgʻrisida

18.11.1997

Oʻzbekiston Respublikasi Hukumati va Turkiya Jumhuriyati Hukumati oʻrtasida

Bitim

Oʻzbekiston Respublikasi Hukumati va Turkiya Jumhuriyati Hukumati, bundan keyin Tomonlar deb ataluvchilar,

ikki mamlakat xalqlari oʻrtasidagi anʼanaviy doʻstona munosabatlarni eʼtiborga olib,

ikkala Tomonning sogʻliqni saqlash sohasidagi oʻzaro foydali va teng huquqli hamkorlikdan manfaatdor ekanligidan kelib chiqib,

quyidagilar toʻgʻrisida ahdlashib oldilar:

1-modda

Tomonlar sogʻliqni saqlash va tibbiyot sohasidagi hamkorlikni kengaytirishga milliy qonunlari doirasida koʻmaklashadilar. Hamkorlikning aniq sohalari ikkala Tomonning manfaatlaridan kelib chiqqan holda oʻzaro kelishuv boʻyicha aniqlanadi.

2-modda

Hamkorlik Tomonlarning oʻzaro kelishuvi boʻyicha quyidagi yoʻllar bilan amalga oshiriladi:

axborot almashish;

taʼlim, oʻrgatish, professional darajasini oshirish qisqa muddatli kurslarini amalga oshirish va maslahat xizmatlarining darajasini mukammallashtirish maqsadida mutaxassislar bilan almashish;

tegishli muassasa, institut va tashkilotlar oʻrtasida bevosita aloqalarni taʼminlash;

konferensiya, simpozium va seminarlar tashkil etish;

sogʻliqni saqlash va tibbiyot sohasida oʻzaro kelishuv boʻyicha aniqlanadigan hamkorlikning boshqa shakllari.

3-modda

Tabiiy ofatlar va favqulodda vaziyatlarda Tomonlar oʻz imkoniyatlari doirasida hamkorlikni amalga oshiradilar. Bundan tashqari, Tomonlarning yozma soʻrovi va kelishuvi boʻyicha, ikkala mamlakatning sogʻliqni saqlash rasmiy organlari kasallarga tijorat asosida tibbiy yordam koʻrsatishlari mumkin.

4-modda

Tomonlar sogʻliqni saqlash, tibbiyot, farmatsevtika va davolash turizmi sohalarida hamkorlikni rivojlantirishga va tijorat aloqalarini oʻrnatishga koʻmaklashadilar.

5-modda

Ushbu Bitim doirasidagi ikkala mamlakat ekspertlari va boshqa mutaxassislarining tashriflari quyidagi shartlarda amalga oshiriladi:

yuboruvchi Tomon qabul qiluvchi Tomon mamlakatiga borish va kelish safari uchun chiptaga haq toʻlaydi;

qabul qiluvchi Tomon ovqatlanish va yashash bilan, shuningdek, zarurat boʻlganida, oʻz mamlakati ichida koʻchish bilan bogʻliq boʻlgan xarajatlarni oʻz zimmasiga oladi. Boʻlish davri ikki haftadan oshmasligi kerak;

favqulodda vaziyatlarda qabul qiluvchi Tomon kelgan ekspertlarga tibbiy xizmat koʻrsatishni (tishlarni protez qilishdan tashqari) taʼminlaydi.

6-modda

Ushbu Bitim qoidalarini amalga oshirish uchun Oʻzbekiston Respublikasi Sogʻliqni saqlash vazirligi va Turkiya Jumhuriyati Sogʻliqni saqlash vazirligi tayinlanadi.

7-modda

Hamkorlikning ushbu Bitim bilan koʻzda tutilgan soha va shartlari faoliyatning tayyorlanayotgan rejalarida va amalga oshirilayotgan dasturlarda Tomonlar zarur deb hisoblaydigan muddat va hajmlarda aniqlanadi.

8-modda

Tomonlar ushbu Bitim kuchga kirishi uchun zarur boʻlgan davlat ichki protseduralari milliy qonunlarga muvofiq bajarilganligi toʻgʻrisida diplomatik kanallar orqali bir-birini xabardor qiladilar.

Ushbu Bitim shunday ikkinchi bildirish xati olingan sanadan boshlab kuchga kiradi va besh yil davomida amal qiladi.

Agar Tomonlardan hech biri oʻzining ushbu Bitimni bekor qilish niyati toʻgʻrisida uning amal qilish muddati tugashi sanasidan olti oy ilgari boshqa Tomonni xabardor qilmasa, Bitim keyingi bir yillik davrlarga uzaytiriladi.

Ushbu Bitim denonsatsiyasi, agar Tomonlar boshqa kelishuvga erishmasalar, Bitimning amal qilish davrida aniqlangan dastur va loyihalarning bajarilishiga taʼsir qilmaydi.

Anqara shahrida 1997-yil 18-noyabrda ikki nusxada, har biri oʻzbek, turk va ingliz tillarida tuzildi, barcha matnlar bir xil kuchga ega. Kelishmovchiliklar yuzaga kelgan holda ingliz tilidagi matn ustuvor kuchga ega boʻladi.

(imzolar)