Temir yoʻl transporti sohasida hamkorlik toʻgʻrisida

20.02.1997

Oʻzbekiston Respublikasi Hukumati va Litva Respublikasi Hukumati oʻrtasida

Bitim

Oʻzbekiston Respublikasi Hukumati va Litva Respublikasi Hukumati, bundan keyin Tomonlar deb ataluvchilar,

oʻzaro hurmat va teng huquqlilik tamoyillariga asoslanib,

temir yoʻl transportiga egalik huquqining daxlsizligini tasdiqlab,

Tomonlar oʻrtasida hamda uchinchi davlatlar orasida yuk va yoʻlovchilarni tashish oʻta muhimligini hisobga olib,

ikkala davlat temir yoʻl transportining birgalikdagi faoliyati va koordinatsiyasiga ahamiyat berib,

quyidagilar toʻgʻrisida kelishdilar:

1-modda

Ikki davlat temir yoʻllarining faoliyati, hamda harakatdagi sostav, texnikaviy vositalarni tayyorlash va saqlash, harakat xavfsizligini va mehnat sharoitlari bilan taʼminlash, tashish ishlarini tashkil qilish, yuklarni saqlash, temir yoʻl transportining uning xizmatidan foydalanuvchilar va boshqa transport turlari bilan oʻzaro aloqasi Tomonlarning amaldagi huquqiy aktlari boʻyicha amalga oshiriladi.

2-modda

Yoʻlovchi va yuklarni temir yoʻl transporti bilan tashish Tomonlar tarafidan, oʻzlari ishtirokchilari boʻlib hisoblangan, temir yoʻl transporti sohasidagi xalqaro konvensiyalar va bitimlarga binoan amalga oshiriladi.

Tomonlar, ikkinchi Tomonning asosiy manfaatlariga daxl qilmay, uchinchi davlat bilan temir yoʻl transporti sohasida bitim tuzish huquqiga ega.

3-modda

Birinchi Tomon yoʻlovchilari ikkinchi Tomon hududiga tegishli bitimlar asosida belgilangan amaldagi xalqaro davlatlar chegaralarining kesishuv joylari orqali kiradilar va chiqadilar.

Bir Tomon yoʻlovchilari ikkinchi Tomon hududida boʻlgan paytda, shu davlat qonun va meʼyorlarini, hamda chet el davlatlari fuqarolari uchun belgilangan tranzit holda borish-kelish qoidalariga rioya qilishlari kerak.

4-modda

Tomonlar tarif siyosatini muvofiqlashtirishni zarur deb tan oladilar. Xalqaro temir yoʻl aloqalaridagi tariflar va hisob-kitob tartibi Tomonlar temir yoʻllari oʻrtasidagi maxsus bitimlar bilan belgilanadi.

5-modda

Tomonlarning har biri milliy qonunchiligi va amaldagi xalqaro qoidalar doirasida yoʻlovchilarni, yuklarni tashishga, harakatdagi sostavning ikkala davlat oʻrtasida, shuningdek ular hududlari orqali uchinchi davlatlarga oʻtishiga zarur sharoitlar bilan taʼminlaydilar. Tranzit tashishlar masalalarini tezkor hal qilish uchun Tomonlar bir-birlarining hududlarida oʻz vakolatxonalarini ochishlari mumkin.

6-modda

Tomonlar temir yoʻllarining korxona va tashkilotlari, moddiy-texnikaviy taʼminot organlari temir yoʻl transporti ehtiyojlari uchun kelishilgan hajmda moddiy resurslar va ehtiyot qismlar, asbob-uskuna, texnikani oʻzaro etkazib berishni taʼminlaydilar.

7-modda

Tomonlar bir-birlariga temir yoʻl transporti xodimlarining ijtimoiy masalalarini hal etish sohasida axborot berib turadilar.

8-modda

Tomonlar temir yoʻl transporti ilmiy-texnikaviy taraqqiyotiga yordam beradilar va oʻzaro foydali asosda oʻz faoliyatlarini muvofiqlashtiradilar.

9-modda

Tomonlar muhandislar, texniklar, shuningdek boshqa temir yoʻl kasblari xodimlarini oʻqitish na ularni tayyorlash darajasiga zarur boʻlgan talablarni ishlab chiqish sohasida hamkorlik qilishadi. Bu maqsadlarda mutaxassislar, zarur axborot va materiallar bilan muntazam almashib turiladi.

10-modda

Ushbu Bitimni talqin qilish va qoʻllash natijasida paydo boʻladigan hamma munozarali masalalar Tomonlarning Qoʻshma komissiyasi maslahatlashuvlari va muzokaralari yoʻli bilan hal etiladi. Agar Tomonlar muzokaralarda bir fikrga erisha olmasalar, munozara diplomatik yoʻllar boʻyicha hal etiladi.

Ushbu Bitimga qoʻshimcha va oʻzgartirishlar kiritish toʻgʻrisidagi masalalar Tomonlarning Qoʻshma komissiyasi muzokaralari yoʻli bilan hal etiladi. Ushbu Bitimning oʻzgartirish va qoʻshimchalari Bitimning ajralmas qismi hisoblangan protokollar bilan rasmiylashtiriladi.

11-modda

Ushbu Bitim, Tomonlar diplomatik kanallar boʻyicha Bitim kuchga kirishi uchun ularning hamma davlat ichki talablari bajarilganligi toʻgʻrisida bir-birlarini xabardor qilgan oxirgi yozma bildirishnoma yuborilgan kundan boshlab kuchga kiradi.

Bitim 5 (besh) yilga tuzilgan. Agar Tomonlarning hech biri ushbu besh yillik muddat tugashidan 6 (olti) oy oldin boshqa Tomonni ushbu Bitim faoliyatini uzatish niyati toʻgʻrisida xabardor qilmasa, u nomaʼlum muddatga uzaytirilgan hisoblanadi va Tomonlarning biri ikkinchisini uni bekor qilishdan 6 (olti) oy avval bu haqda xabardor qilmaguncha faoliyatini davom ettiraveradi.

Toshkent shahrida 1997-yil 20-fevralda ikki nusxada, har biri oʻzbek, litva va rus tillarida tuzildi, bunda hamma matnlar bir xil kuchga ega. Ushbu Bitim matnini talqin qilishda kelishmovchiliklar yuzaga kelgan hollarda rus tilidagi matn asos qilib olinadi.

(imzolar)