Yoʻlovchilar va yuklarni avtomobil transportida xalqaro tashishlar toʻgʻrisida

02.03.1999

Oʻzbekiston Respublikasi Hukumati bilan Gretsiya Respublikasi Hukumati oʻrtasida

Bitim

Oʻzbekiston Respublikasi Hukumati va Gretsiya Respublikasi Hukumati, bundan keyin Ahdlashuvchi Tomonlar deb ataluvchilar,

iqtisodiy va savdo aloqalari rivojlanishiga koʻmaklashishni, ikki mamlakat oʻrtasida yoʻlovchilar va yuklarni tashishni hamda ularning hududlaridan tranzit oʻtkazishni yengillatishni istab,

quyidagilar toʻgʻrisida kelishib oldilar:

1-modda Qoʻllash sohasi

Ushbu Bitim quyidagilarga taalluqli boʻladi:

1. Ahdlashuvchi Tomonlar davlatlari oʻrtasida yoʻlovchilar va yuklarni avtomobilda tashishlarga va ularning hududidan tranzit oʻtishlarga.

2. Mazkur tashishlarga bogʻliq boʻlgan boʻsh transport vositalarining oʻtishiga.

2-modda Taʼriflar

Ushbu Bitimni amalga oshirish maqsadida:

1. “Tashuvchi” atamasi Ahdlashuvchi Tomonlardan biri davlatining hududida tegishli Ahdlashuvchi Tomon milliy qonunlariga muvofiq taʼsis etilgan, yoʻlovchilar va yuklarni yoʻllarda tashish huquqiga ega boʻlgan jismoniy yoki yuridik shaxsni anglatadi.

2. “Transport vositasi” atamasi:

a) yuklarni tashishda: avtotransport vositasi yoki transport vositalarining yigʻmasini anglatadi, ulardan kamida avtotransport vositasi istalgan Ahdlashuvchi Tomon davlati hududida roʻyxatga olingan va faqat yuk tashish uchun ishlatilishi, yuk tashishga mos jihozlangan boʻlishi kerak;

b) yoʻlovchilarni tashishda: Ahdlashuvchi Tomonlar davlatlarining biri hududida roʻyxatga olingan, oʻz konstruksiyasiga koʻra, haydovchi oʻrnini ham qoʻshib hisoblaganda toʻqqizdan ortiq oʻrindiqqa ega boʻlgan har qanday mexanik transport vositalari (avtobuslar)ni anglatadi.

3. “Tranzit” atamasi Ahdlashuvchi Tomonlardan birining tashuvchisi boshqa Ahdlashuvchi Tomon davlati hududi oralab yoʻlovchilar va yuklarni tashishini anglatadi.

4. “Ruxsatnoma/ijozat” atamasi Ahdlashuvchi Tomonlarning vakolatli maʼmurlari tarafidan ularning milliy qonunlariga muvofiq boshqa Ahdlashuvchi Tomon tashuvchilariga birinchi Ahdlashuvchi Tomon davlati hududida yoki uning hududi orqali yoʻlovchilar va yuklarni tashish huquqini beradigan hujjatni anglatadi.

I. YOʻLOVChILARNI TAShISh A. Faoliyat sohasi va taʼriflar 3-modda

Ushbu Bitim yoʻlovchilarni tashishda quyidagi sohalarda amal qiladi:

1. Transport vositalarida yollash evaziga, yoʻlkira yoki oʻz hisobidan Ahdlashuvchi Tomonlar davlatlari orasida yoki ularning hududlaridan yoʻlovchilarni tranzit tashish boʻyicha har qanday xizmatlarni bajarishda.

“Yoʻlovchilarni oʻz hisobidan tashish” atamasi korxona tomonidan oʻz xizmatchilarini yoki tijoratga aloqasiz tashkilotning oʻz aʼzolarini jamoatchilik maqsadlarida tashishini anglatadi, shunda ham:

— tashishlar korxona yoki tashkilot uchun faqat qoʻshimcha faoliyat hisoblansa;

— foydalanilayotgan transport vositasi shu korxona yoki tashkilotning mulki boʻlsa yoki imtiyozli asosda sotib olingan boʻlsa yoxud lizing boʻyicha uzoq muddatli kontraktga daxldor boʻlib, korxona yoki tashkilot xodimi tomonidan boshqarilsa.

2. Shunday xizmatlarni bajarishga aloqador transport vositalarining boʻsh qatnovlarida.

4-modda

Yoʻlovchilarni tashishga doir:

1. “Muntazam tashishlar” atamasi yoʻlovchilarni muayyan davriylikda muayyan qatnovlar boʻylab tashishni anglatadi, bunda avvaldan belgilangan toʻxtash joylarida yoʻlovchilarni chiqarish va tushirish amalga oshirilishi mumkin. Muntazam tashishlar avvaldan belgilangan qatʼiy tariflar va qatnov jadvaliga muvofiq amalga oshiriladi.

2. “Mokisimon tashishlar” atamasi yoʻlovchilarning oldindan uyushtirilgan guruhlarini tegishli Ahdlashuvchi Tomon davlati hududining muayyan joʻnash joyidan boshqa Ahdlashuvchi Tomon davlati hududining muayyan yetib borish joyiga koʻp marotaba ikkiyoqlama tashishlarni anglatadi. Bunda har bir guruh yetib borish joyiga safar qilib, keyingi reysda joʻnash joyiga qaytib keladigan yoʻlovchilardan iborat boʻladi.

a) Mokisimon tashishlarda qatnov davomida bironta yoʻlovchini chiqarish yoki tushirib qoldirish mumkin emas.

b) Mokisimon tashishlarda qaytish yoʻnalishidagi birinchi reys va yetib borish joyiga oxirgi reys boʻsh boʻlishi kerak.

3. Muntazam va mokisimon qatnashlar hamda ularni amalga oshirishga doir shart-sharoitlar ushbu Bitimning vakolatli maʼmurlari oʻrtasidagi umumiy kelishuvga koʻra bevosita tarzda yoki ushbu Bitim 13-moddasiga muvofiq taʼsis etiladigan Qoʻshma Komissiyaning xulosalari asosida belgilanadi.

4. “Tranzit tashishlar” atamasi transport vositasi roʻyxatga olingan Ahdlashuvchi Tomon davlati hududidan yoʻlovchilarni boshqa Ahdlashuvchi Tomon davlati hududi orqali biron yoʻlovchini chiqarmagan va tushirmagan holda tashishni anglatadi.

5. “Tasodifiy tashishlar” atamasi quyidagilarni anglatadi:

a) Yopiq eshikli qatnashlar, yaʼni bir transport vositasining oʻzida bir yoʻlovchilar guruhining oʻzini transport vositasi roʻyxatga olingan Ahdlashuvchi Tomon davlatidagi joʻnash joyidan ikkinchi Ahdlashuvchi Tomon davlatidagi yetib borish joyiga va undan orqaga qaytib kelish tarzida tashishlarni.

b) Etib borish joyigacha boʻlgan qatnov yukli, qaytish esa boʻsh holda boʻlgan tashishlarni.

s) Etib borish joyigacha boʻlgan qatnov — boʻsh, qaytish esa transport vositasi roʻyxatga olinmagan mamlakatdagi joydan oʻtirgan yoʻlovchilarni tashishlarni, bunda yoʻlovchilar:

(1) olib-ketiladigan Ahdlashuvchi Tomon davlati hududiga yetib kelishlaridan avval tuzilgan tashish boʻyicha kontraktlarga muvofiq, uyushtirilgan guruhlardan iborat boʻlsa; yoki

(2) ushbu modda 2-bandining “b” kichik bandidagi shartlarga muvofiq va tashishlarni amalga oshirayotgan korxona joylashgan mamlakat hududiga qayta olib ketish sharti bilan, oʻsha tashuvchining oʻzi tomonidan yetkazib kelingan boʻlsa;

(3) tashishlarni amalga oshirayotgan korxona joylashgan mamlakat hududida sayohat qilishga taklif etilgan boʻlib, taklifnomani yuborgan shaxs transport xizmatlari uchun haqni toʻlagan boʻlsa.

V. Bozorga kirib borish 5-modda

1. 4-moddaning 5“a” bandida sanab oʻtilgan tasodifiy tashishlar transport vositasi roʻyxatga olinmagan Ahdlashuvchi Tomon davlati hududida tashishlarni amalga oshirish uchun har qanday ruxsatnoma olish zaruratidan ozod qilinishi kerak.

2. Tasodifiy tashishlar nazorat hujjati doirasida amalga oshirilishi kerak.

3. Yoʻl varaqasi nazorat hujjati hisoblanadi, unda quyidagi maʼlumotlar boʻlishi kerak:

a) tashishlar turi;

b) asosiy qatnov;

s) jalb etilgan tashuvchi(lar);

d) yoʻlovchilarning toʻliq roʻyxati.

4. Yoʻl varaqalari daftari transport vositasi roʻyxatga olingan Ahdlashuvchi Tomonlarning vakolatli maʼmurlari yoki bu maʼmurlar tayinlagan organlar tarafidan taʼminlanadi.

5. 4-moddaning 5-bandida koʻrsatilgan tasodifiy tashishlar transport vositasi roʻyxatga olinmagan Ahdlashuvchi Tomon davlati hududida tashishlarni amalga oshirish uchun har qanday ruxsatnoma olish zaruratidan ozod qilinadi.

4-modda 5 “s” (1) bandida koʻrsatilgan hollarda tashishlar uchun kontraktning nusxasi boʻlishi kerak.

4-modda 5 “s” (2) bandida koʻrsatilgan hollarda yetib borish joyiga yukli borishda va qaytish yoʻnalishida boʻsh kelishda tegishli hujjat boʻlishi talab qilinadi.

6. Tranzit tashishlar boʻyicha muntazam qatnovlar bir Ahdlashuvchi Tomon vakolatli maʼmurlarining barcha zarur hujjatlar ilova etilgani holda yozma ravishda qilgan murojaati asosida hududidan tranzit oʻtadigan Ahdlashuvchi Tomon vakolatli maʼmurlari beradigan ruxsatnoma asosida amalga oshiriladi. Ruxsatnomaning amal qilish muddati bir yildan kam boʻlmasligi va bepul berilishi kerak.

7. Boshqa Ahdlashuvchi Tomonda roʻyxatga olingan transport vositasida amalga oshirilayotgan tasodifiy tashishlarda tranzit hech qanday ruxsatnomasiz amalga oshiriladi.

8. Tranzit tashishlarda qatnov davomida hech bir yoʻlovchi chiqarib olinmasligi yoki tushirilmasligi kerak, bundan Ahdlashuvchi Tomonlarning 13-moddada koʻrsatib oʻtiladigan Qoʻshma Komissiyasida boshqacha tarzda qaror chiqarilganligi holatlari bundan mustasno.

9. Ishdan chiqqan avtobusni almashtirish uchun, shuningdek boʻsh transport vositalarini tashishda, agar ular 3-moddada koʻrsatib oʻtilgan tashuvlarni amalga oshirayotgan boʻlsa, ruxsatnoma talab qilinmaydi.

10. Yoʻlovchilarni oʻz hisobidan tashish amalga oshirilayotgan boʻlsa, Ahdlashuvchi Tomonlarning vakolatli maʼmurlari tomonidan beriladigan ruxsatnoma kerak boʻladi.

6-modda

1. Muntazam va mokisimon qatnovlar ruxsatnomalar boʻyicha amalga oshiriladi.

2. Ruxsatnomalar transport korxonasi nomiga beriladi. Mazkur transport korxonasi ularni boshqa uchinchi tomonga berishi mumkin emas. Biroq ruxsat olgan tashuvchi subpudratchi orqali tashishlarni amalga oshirishi mumkin, agar bu hududida subpudratchi taʼsis etilgan Ahdlashuvchi Tomon davlatining qonunlari bilan koʻzda tutilgan boʻlsa.

3. Muntazam va mokisimon qatnovlar uchun beriladigan ruxsatnomalarning amal qilish muddati bir yildan kam boʻlmasligi kerak.

4. Ruxsatnomalarda quyidagilar aniq belgilangan boʻlishi lozim:

a) tashishlar turi;

b) ruxsatnomaning amal qilish muddati;

s) joʻnash va yetib borish punktlari, shuningdek kesib oʻtiladigan chegara punktlari aniq koʻrsatilgan tashishlar qatnovi.

Ruxsatnomaga Qoʻshma Komissiya tomonidan belgilanadigan zarur qoʻshimcha hujjatlar ilova qilinadi.

Mazkur hujjatlar tasdiqlanadi va ularning amal qilishi ularni bergan vakolatli organ tomonidan tasdiqlab beriladi.

5. Ruxsatnoma olish uchun ariza hududida transport vositasi roʻyxatga olingan Ahdlashuvchi Tomonning vakolatli maʼmurlariga beriladi. Ahdlashuvchi Tomonlarning vakolatli maʼmurlari oʻzaro kelishgan holda, qatnovning oʻz davlatlari hududidan oʻtadigan qismiga ruxsatnoma beradilar.

6. Ariza ikki nusxada yozilib, unda milliy qonunlarga koʻra talab etiladigan maʼlumotlar bilan birga avtobus bekatlari va oraliq masofa aniq koʻrsatilgan yoʻl tarhi boʻlishi kerak. Vakolatli organlar tashuvchilardan ishga daxldor va zarur boʻlgan har qanday maʼlumotlarni talab qilishga haqli.

7. Qatnov davomida ruxsatnomaning uni bergan tashkilot tomonidan tasdiqlangan nusxasi yoki asliyati transport vositasida mavjud boʻlishi kerak.

8. Ushbu Bitimning 13-moddasida koʻrsatib oʻtilgan Qoʻshma Komissiya ruxsatnomalar nusxasini tasdiqlaydi va ularni oʻzgartirishga haqli boʻladi.

7-modda

Ikkala Ahdlashuvchi Tomonning vakolatli maʼmurlari barcha zarur ilovalari bilan alohida ruxsatnomalarni almashganlaridan keyin muntazam tashishlarga ijozat beriladi va shundan soʻng tashishlarni boshlash mumkin.

8-modda

Har bir taqvimiy yilning dastlabki uch oyi ichida tashuvchilar oʻz mamlakatlarining vakolatli maʼmurlariga oʻtgan yil yuzasidan quyidagi maʼlumotlarni taqdim etishlari kerak:

a) qatnovlar miqdori va kilometraj;

b) yoʻlovchilar miqdori.

Ahdlashuvchi Tomonlarning vakolatli maʼmurlari mazkur maʼlumotlarni almashishlari kerak.

II. YuKLARNI TAShISh 9-modda

1. Ahdlashuvchi Tomonlardan biri davlatining hududida roʻyxatga olingan tashuvchilarga boshqa Ahdlashuvchi Tomon vakolatli maʼmurlari tomonidan berilgan ruxsatnomalardan foydalanib Ahdlashuvchi Tomonlar davlatlari orasida (ikki tomonlama tashishlar), shuningdek ularning hududlari orqali boshqa mamlakatlarga (tranzit tashishlar) yuklarni yollanish asosida yoki haq evaziga xalqaro tashishni amalga oshirishga ruxsat beriladi.

2. Ushbu moddaning 1-bandida koʻzda tutilgan ruxsatnomalar miqdori cheklanmaydi.

3. Yuklarni avtomobillarda tashishda Ahdlashuvchi Tomonlardan birining tashuvchilari ikkinchi Ahdlashuvchi Tomon davlati hududidan uchinchi mamlakatga (uch tomonlama tashish) yoʻl olayotganida davlatidan joʻnab ketilayotgan yoki davlatiga kirib kelinayotgan Ahdlashuvchi Tomonning vakolatli maʼmurlari tomonidan maxsus ruxsatnoma berilishi kerak. Bunday maxsus ruxsatnomalar kimning nomiga yozilgan boʻlsa, faqat oʻsha tashuvchi tomonidan foydalanilishi va hech kimga berib yuborilmasligi kerak. Bunday xildagi ruxsatnomalarni berish mumkinligi, shuningdek ularning miqdori ushbu Bitimning 13-moddasida eslatib oʻtilgan Qoʻshma Komissiya tomonidan belgilanadi.

10-modda

9-moddada tilga olingan ruxsatnomalarning turi Ahdlashuvchi Tomonlarning vakolatli maʼmurlari tarafidan bevosita yoki ushbu Bitimning 13-moddasida eslatib oʻtilgan Qoʻshma Komissiya xulosasi asosida belgilanishi kerak.

11-modda

1. Ushbu Bitim 9-moddasining 1-bandiga asosan, ikkala Ahdlashuvchi Tomonning vakolatli maʼmurlari har yili diplomatik kanallar orqali yoki ushbu Bitimning 13-moddasiga binoan ish yuritadigan Qoʻshma Komissiya tomonidan belgilangan protseduraga muvofiq soʻrab olinadigan ruxsatnomalarni almashadilar.

2. Ushbu Bitim amal qila boshlagan dastlabki vaqtlarda, aynan esa 13-moddada koʻrsatilgan Qoʻshma Komissiya aʼzolarining birinchi uchrashuviga qadar ikkala Ahdlashuvchi Tomon diplomatik kanallar orqali ularning vakolatli maʼmurlarini xabardor qilgan holda yuklarni ikki tomonlama va tranzit tashilishlarni amalga oshirishga ahdlashib oladilar.

12-modda

1. Quyidagi hollarda ruxsatnoma talab qilinmaydi:

a) samolyot halokatga yoki har qanday tarzdagi avariyaga uchragan, yo yoʻlini oʻzgartirganligi sababli qoʻnishi shart boʻlgan, yoki favqulodda hodisa, yoxud uchish bekor qilingan hollarda narsalarni davlat aeroportidan yoinki davlat aeroportiga tashishda;

b) ishdan chiqqan transport vositasi va uning tirkamasini tashishda;

s) oʻlik koʻmishga borayotganlarni tashishda;

d) maxsus transport vositalarida koʻchayotib, shaxsiy buyumlarni tashishda;

e) pochtani tashishda;

f ) yarmarka va koʻrgazmalar uchun yuk tashishda;

g) teatrlar, musiqaviy va boshqa madaniy tadbirlar, sirk tomoshalari va kinokoʻrsatuvlar, radioeshittirish va telekoʻrsatuvlar uchun dekoratsiyalar va boshqa yuklarni tashishda;

h) tabiat hodisalaridan kelib chiqqan ofatlardan jabr chekkanlarga yordam uchun dori-darmonlarni va boshqa narsalarni tashishda;

i) avariyaga uchragan avtomobillar tashiy olmaydigan yuklarni olish uchun boʻsh transport vositalari kiritilganda;

j) avariyaga uchragan avtomobillarga texnik xizmat koʻrsatish yoki ularni taʼmirlash uchun transport vositalari kiritilganda (avtomobillarga xizmat va ularni taʼmirlash);

k) boshqa Ahdlashuvchi Tomon davlati hududida ishdan chiqqan transport vositasini almashtirish maqsadida boshqa transport vositasi kiritilganda;

l) oʻlgan jonivorlarni tashishda, ulardan xomashyo sifatida foydalanish hollari bundan mustasno;

m) asalari ini va baliq chavoqlarini tashishda;

n) gullar va boshqa manzarali oʻsimliklarni tashishda;

o) maorif va reklama maqsadlarida ishlatiladigan yuklarni tashishda.

2. Ushbu moddada koʻrsatilgan tashishlarni amalga oshirish uchun haydovchi eslatib oʻtilgan hollardan bittasini aniq koʻrsatadigan hamma hujjatlarga ega boʻlishi kerak.

3. 13-moddada eslatib oʻtilgan Qoʻshma Komissiya ushbu moddada koʻrsatilgan roʻyxatiga qoʻshimchalar kiritishga vakolatdir.

III. UMUMIY QOIDALAR 13-modda

1. Ushbu Bitimni amalga oshirish va qoʻllash natijasida yuzaga keladigan barcha masalalarni hal qilish maqsadida Qoʻshma Komissiya tuziladi.

2. Bu Komissiya ikki Ahdlashuvchi Tomon vakillaridan iborat boʻlib, ular oʻz yigʻilishlariga avtomobil transporti sanoati vakillarini taklif etishlari ham mumkin.

3. Qoʻshma Komissiya yiliga bir marta, yoki Ahdlashuvchi Tomonlardan birining iltimosiga koʻra, lozim topilgan vaqtda, navbati bilan Ahdlashuvchi Tomonlardan har birining mamlakatida oʻtkaziladi. Kun tartibi qabul qiluvchi, yoki soʻrovnomaga koʻra soʻrovchi Ahdlashuvchi Tomon tarafidan yigʻilishdan kamida ikki hafta ilgari taqdim etiladi.

4. Har bir yigʻilish yakunida Protokol qabul qilinadi va uni ikkala Ahdlashuvchi Tomon delegatsiyalarining rahbarlari imzolaydilar.

5. Qoʻshma Komissiya oʻz ish tartibini, maʼlumotlar va boshqa zarur hujjatlarni almashish yoʻllarini belgilaydi.

14-modda

Ahdlashuvchi Tomonlar bir-birlariga ushbu Bitim qoidalarini bajarishga aloqador masalalarni hal etish uchun quyidagilar vakolatli maʼmur etib tayinlanganligini bildiradilar;

— Oʻzbekiston Respublikasi uchun, Oʻzbekiston avtomobil va daryo transporti agentligi,

— Gretsiya Respublikasi uchun, Transport va kommunikatsiya vazirligi.

15-modda

1. Ahdlashuvchi Tomonlar ularning birida roʻyxatga olingan transport vositalarida Ahdlashuvchi Tomonlarning davlatlari hududiga olib kiriladigan quyidagi materiallar barcha soliqlar, bojxona bojlari va boshqa yigʻimlardan ozod qilinadi, deb ahdlashib oldilar:

a) transport vositasining standart idishlarida mavjud boʻlgan yonilgʻi;

b) tashish davomida ishlatishga yetarli miqdordagi moylash materiallari;

s) tashishni bajarayotgan transport vositasining ehtiyot qismlari va asbob-uskunalar.

2. Ishlatilmagan ehtiyot qismlar qaytarib olib chiqilishi, almashtirilgan ehtiyot qismlar esa mamlakatdan olib chiqilishi yo yoʻqotilishi yoki tegishli mamlakat hududida belgilangan tartibda topshirilishi kerak.

3. Ushbu Bitimga muvofiq tashishlarni amalga oshirayotgan transport vositalari quyidagi hollardan tashqari hamma vaziyatlarda barcha soliq va yigʻimlarni toʻlashdan ozod etiladi:

a) Ahdlashuvchi Tomonlarning tashuvchilari orasida biron-bir xilda kamsitish yuzaga chiqarilmagani holda pullik yoʻllar, koʻpriklar va koʻchalardan foydalanganlik uchun;

b) oʻlchamlari katta yuklarni tashish uchun maxsus ruxsatnomadan foydalanganlik uchun.

16-modda

Bir Ahdlashuvchi Tomonning boshqa Ahdlashuvchi Tomon davlati hududida turgan tashuvchilari va ular transport vositalarining ekipajlari shu Ahdlashuvchi Tomonning milliy qonunlariga amal qilishga majbur.

17-modda Sugʻurta

Ahdlashuvchi Tomonlarning xalqaro tashishlarni amalga oshiruvchi transport vositalari tranzit mamlakatlarida va yetib borish mamlakatida sugʻurta qilingan boʻlishi kerak.

18-modda Kabotaj

Yoʻlovchilar va yuklarni transport vositalarida kabotaj tashishlarga yoʻl qoʻyilmaydi.

19-modda Bojxona va sanitariya nazorati

Ahdlashuvchi Tomonlar qatnashgan xalqaro konvensiyalarning qoidalari Ahdlashuvchi Tomonlar davlatlarining chegaralaridagi bojxona punktlarida amalga oshiriladigan bojxona va sanitariya nazoratiga ham qoʻllanadi.

Mazkur nazorat, imkoniyatga qarab, birinchi galda bemorlar, jonivorlar va tez buziladigan tovarlar tashilayotganda amalga oshiriladi.

20-modda Transport vositalarini texnikaviy nazoratdan oʻtkazish

1. Boshqa Ahdlashuvchi Tomon davlati hududida ikki tomonlama va tranzit tashishlarni amalga oshiradigan Ahdlashuvchi Tomonning har qanday transport vositasiga davlat organi transport vositasining texnikaviy holati haqida amalda boʻlgan hujjat berishi kerak.

2. Oʻz davlat hududida tashishlar amalga oshirilayotgan Ahdlashuvchi Tomonning vakolatli maʼmurlari boshqa Ahdlashuvchi Tomon transport vositalarining texnikaviy koʻrikdan oʻtishini soʻrashlari mumkin.

3. Transport vositalarining ogʻirligi va oʻlchamlari borasida Ahdlashuvchi Tomonlar boshqa Ahdlashuvchi Tomonning transport vositalariga oʻz davlatlari hududida roʻyxatga olingan transport vositalariga tatbiq etiladiganidan kamroq boʻlgan qulay rejimni tatbiq etmaslik majburiyatini oladilar.

4. Ahdlashuvchi Tomonlardan biriga qarashli yukli yoki boʻsh transport vositasining ogʻirligi yoki oʻlchamlari boshqa Ahdlashuvchi Tomon davlati milliy qonunlariga muvofiq uning hududida belgilab qoʻyilgan mavjud cheklardan ortiq boʻlsa, tashuvchi bu Ahdlashuvchi Tomonning vakolatli maʼmurlaridan maxsus ruxsatnoma olishi kerak.

5. Bir Ahdlashuvchi Tomonning boshqa Ahdlashuvchi Tomon davlati hududida ikki tomonlama va tranzit tashishlarni amalga oshirib, xavfli yuklarni tashiyotgan har qanday transport vositasi oʻsha Ahdlashuvchi Tomonning milliy qonunlarida koʻzda tutilgan barcha hujjatlarga ega boʻlishi kerak.

21-modda

Ushbu Bitim Ahdlashuvchi Tomonlarning boshqa xalqaro shartnomalaridan kelib chiqadigan huquq va majburiyatlariga daxl qilmaydi.

22-modda

Ahdlashuvchi Tomonlar oʻzaro ravishda, bir-birlari tomonidan beriladigan va yuklarni, yoʻlovchilar hamda bagajlarni tashishda foydalaniladigan transport vositalarining toifasiga muvofiq boʻlgan, Yoʻl harakati toʻgʻrisida 1968-yilda imzolangan konvensiya talablariga toʻgʻri keladigan haydovchilik guvohnomalarini tan oladilar.

23-modda

Ahdlashuvchi Tomonlar oʻzaro ravishda bir-birlari tarafidan beriladigan, Yoʻl harakati toʻgʻrisida 1968-yilda imzolangan konvensiya talablariga toʻgʻri keladigan transport vositalarining texnik holati toʻgʻrisidagi guvohnomalarni tan oladilar.

Ahdlashuvchi Tomonlar muntazam ravishda oʻz transport vositalarini texnik koʻrikdan oʻtkazib turish majburiyatini oladilar.

24-modda

1. Ushbu Bitim Ahdlashuvchi Tomonlarning uni kuchga kiritish uchun zarur davlat ichki protseduralarini bajarganliklari toʻgʻrisida oxirgi bildirishnoma olingan sanadan oʻttiz (30) kun oʻtgach kuchga kiradi.

2. Ushbu Bitim bir yil davomida amalda boʻladi va agar Ahdlashuvchi Tomonlardan birontasi ikkinchi Ahdlashuvchi Tomonni oʻzining ushbu Bitim faoliyatiga barham berish niyati toʻgʻrisida tegishli muddat tugashidan kamida olti oy ilgari yozma ravishda xabardor qilmasa, uning faoliyati oʻz-oʻzidan keyingi bir yillik davrlarga uzayadi.

3. Ahdlashuvchi Tomonlarning kelishuviga binoan ushbu Bitimga oʻzgartish va qoʻshimchalar kiritilishi mumkin.

Toshkent shahrida 1999-yil 2-martda ikki nusxada, har biri oʻzbek, grek va ingliz tillarida tuzildi, bunda barcha matnlar bir xil kuchga ega.

Ushbu Bitim qoidalarini talqin qilishda kelishmovchiliklar yuzaga chiqsa, ingliz tilidagi matn ustuvor boʻladi.

Yuqoridagilarni tasdiqlab, lozim tartibda vakolat berilganlar ushbu Bitimni imzoladilar.

(imzolar)