Pochta va telekommunikatsiya sohasida hamkorlik toʻgʻrisida

08.11.1999

Oʻzbekiston Respublikasi Hukumati bilan Xitoy Xalq Respublikasi Hukumati oʻrtasida

Bitim

Oʻzbekiston Respublikasi Hukumati bilan Xitoy Xalq Respublikasi Hukumati, bundan keyin Tomonlar deb ataluvchilar,

ikki mamlakat oʻrtasida yaxshi qoʻshnichilik munosabatlarini rivojlantirishga intilib,

teng va oʻzaro manfaatli asosda pochta hamda telekommunikatsiya sohasida hamkorlikni rivojlantirish istagida,

quyidagilar toʻgʻrisida ahdlashib oldilar:

1-modda

Oʻzbekiston Respublikasi bilan Xitoy Xalq Respublikasi oʻrtasida pochta va telekommunikatsiya sohasidagi aloqalar Butunjahon pochta ittifoqi va Xalqaro elektr aloqasi ittifoqi qoidalariga muvofiq ravishda, shuningdek ikkala davlatning qonunlari hamda ushbu Bitimga muvofiq olib boriladi.

2-modda

Tomonlarning tegishli korxonalari ushbu Bitim doirasida telekommunikatsiya tarmoqlarini tashkil etish hamda ulardan foydalanishning shakllari va metodlarini almashishlari, lozim topilsa, mazkur hamkorlik miqyosida alohida shartnomalar tuzishlari mumkin.

3-modda

Tomonlar ikkala mamlakat oʻrtasidagi telekommunikatsiyalar taraqqiyotini muvofiqlashtiradilar, zaruratga koʻra, oʻz vakolatlari doirasida elektr aloqasining yuksak sifatli xizmatlariga oshib borayotgan talablarni qondirish choralarini koʻradilar.

Tomonlar bir-biriga shartnoma asosida umumiy foydalanish tarmogʻi orqali oʻz davlati ichida hamda davlatlar oʻrtasida xizmatlar koʻrsatadilar.

4-modda

Tomonlar quyidagilarni amalga oshirishga alohida eʼtibor beradilar:

1) axborotni ishonchli va tezkor yetkazishni taʼminlash uchun ekspress pochta, xalqaro faksimil aloqa xizmatini taqdim etish boʻyicha tarmoq tashkil etish;

2) pochta joʻnatmalarini eng qisqa va qulay yoʻnalishlar boʻylab yuborish orqali pochta xizmatini yaxshilash;

3) bir-biriga mahalliy va xalqaro ekstren pochta hamda pul joʻnatmalarini almashtirish xizmatlarini taqdim etish;

4) mutaxassislarni tajriba almashish uchun bir-biriga yuborish.

5-modda

Tomonlar filateliya va pochta markalari sohasida hamkorlik qiladilar, navbatma-navbat filateliya koʻrgazmalarini tashkil etadilar, bir-biriga filateliya boʻyicha delegatsiyalar yuboradilar, oʻzaro kelishilgan mavzularda markalar chiqaradilar.

6-modda

Tomonlar tyenglik va oʻzaro manfaatli hamkorlik asosida radiochastotalardan foydalanish va kelishtirish sohasida barcha buyurtmalarni ishlab chiqishni taʼminlaydilar. Tomonlar zarur hollarda radiochastota spektridan kelishib foydalanish masalalari boʻyicha maxsus kengashlar oʻtkazadilar.

7-modda

Tomonlar ikki davlat telekommunikatsiya xizmatlari va qurilmalarini standartlashtirish sohasida ularni belgilangan xalqaro andozalarga yaqinlashtirish maqsadida hamkorlik qiladilar.

8-modda

Tomonlar telekommunikatsiya sohasi kadrlarini tayyorlashda hamkorlik qiladilar. Xitoy Xalq Respublikasi oʻzbek mutaxassislarini oʻz oʻquv muassasalarida oʻqitish uchun zarur shart-sharoitlarni barpo etadi.

9-modda

Tomonlar oʻz milliy qonunlariga muvofiq telekommunikatsiya qurilmalarini ishlab chiqarish boʻyicha qoʻshma korxonalarni tashkil etish masalalarini koʻrib chiqadilar.

10-modda

Tomonlar ushbu Bitimga muvofiq pochta va telekommunikatsiya sohasidagi xalqaro tashkilotlardagi faoliyat toʻgʻrisida axborot almashib turadilar.

11-modda

Tomonlarning oʻzaro kelishuviga binoan ushbu Bitimga alohida bayonnomalar tarzida rasmiylashtiriladigan va ushbu Bitimning tarkibiy qismi hisoblanadigan muhim oʻzgartish va qoʻshimchalar kiritilishi mumkin.

Ushbu Bitimni amalga oshirishda Tomonlar oʻrtasida kelib chiqadigan bahs va kelishmovchiliklar muzokara va maslahatlashuvlar orqali hal etiladi.

12-modda

1. Ushbu Bitim Tomonlar uni kuchga kiritish uchun zarur davlat ichki protseduralarini bajarganliklari toʻgʻrisidagi oxirgi xabarnoma sanasidan 30 kun oʻtgach kuchga kiradi.

2. Ushbu Bitimning amal qilish muddati cheklanmagan. Tomonlardan har biri diplomatik kanallar orqali boshqa Tomonni ushbu Bitim faoliyatini toʻxtatish toʻgʻrisidagi niyatidan yozma ravishda xabardor qilishi mumkin. Ushbu Bitim boshqa Tomon ana shunday xabarnomani olganidan olti oy oʻtgach oʻz kuchini yoʻqotadi.

3. Ushbu Bitim faoliyatining toʻxtashi, agar Tomonlar boshqacha kelishib olmasalar, ushbu Bitim doirasida amalga oshirilib, yakuniga etmagan hamkorlik mavzulariga daxl qilmaydi.

Pekin shahrida, 1999-yil 8-noyabrda, ikki nusxada, har biri oʻzbek, xitoy va rus tillarida tuzildi, bunda barcha matnlar bir xil kuchga ega.

Ushbu Bitim qoidalarini talqin qilishda har xilliklar yuzaga chiqsa, rus tilidagi matndan foydalaniladi.

(imzolar)