2013 yilda ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish toʻgʻrisida (Q-553-son)
03.10.2012
NAVOIY VILOYaTI Navbahor tumani hokimining
QARORI
Oʻzbekiston Respublikasi “Aholini ish bilan taʼminlash toʻgʻrisida”gi Qonunining 17-moddasi, “Nogironlarni ijtimoiy himoya qilish toʻgʻrisida”gi Qonunining 25-moddasi, Oʻzbekiston Respublikasi Vazirlar Mahkamasining 2008-yil 20-avgustdagi 186-sonli Qarori bilan tasdiqlangan “Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish tartibi toʻgʻrisida”gi Nizomga asoslanib qaror qilaman:
1. Oʻzbekiston Respublikasi Prezidentining 2007-yil 6-apreldagi PQ-616-sonli qarori, Oʻzbekiston Respublikasi Vazirlar Mahkamasining 2008-yil 20-avgustdagi 186-sonli qarori bilan tasdiqlangan “Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish tartibi toʻgʻrisida”gi Nizomni tasdiqlash haqidagi qarori rahbarlik va ijro uchun qabul qilinsin.
2. Oʻzbekiston Respublikasining “Aholini ish bilan taʼminlash toʻgʻrisida”gi qonunining 17-moddasiga asosan ijtimoiy muhofazaga muhtoj, ish topishda qiynalayotgan shaxslarni ishga joylashtirish uchun tumandagi korxonalar, tashkilotlar va muassasalar uchun xodimlarning roʻyxatdagi oʻrtacha sonidan 284 kishini tashkil etadigan 4.2 foiz miqdorida (1-ilovaga* muvofiq),
shu jumladan;
Oʻn toʻrt yoshgacha bolalari va nogiron bolalari boʻlgan yolgʻiz ota, yolgʻiz ona va koʻp bolali ota-onalar uchun 19.7 foiz (56 kishi);
Taʼlim muassasasini tugatgan yoshlar uchun 43 foiz (122 kishi);
Muddatli harbiy xizmatdan boʻshatilgan shaxslar uchun 8.1 foiz (23 kishi);
Nogironlar uchun 3.2 foiz (9 kishi);
Tuman Bandlikka koʻmaklashish va aholini ijtimoiy muhofaza qilish markazida ish qidiruvchi sifatida hisobda turgan pensiya yoshiga yaqinlashib qolgan shaxslar 2.8 foiz (8 kishi);
Jazoni oʻtash muassasalaridan boʻshatilgan, jazoni oʻtayotgan yoki sud qaroriga koʻra tibbiy xarakterdagi majburiy choralar koʻrilgan shaxslar uchun 4.2 foiz (12 kishi);
Ijtimoiy muhofazaga muhtoj shaxslarning boshqa toifalari uchun, shu jumladan safarbarlik chaqiruvi zaxirasiga kiritilgan shaxslar, kichik yoshli bolalari boʻlgan ishlamayotgan ayollar, atrofdagilar uchun xavfli boʻlmagan ijtimoiy ahamiyatli kasalliklar bilan ogʻriyotgan shaxslar uchun 19 foiz (54 kishi) miqdorida ish oʻrinlari zaxirasi belgilansin.
3. Tumandagi korxonalar, tashkilotlar va muassasalar rahbarlariga ijtimoiy muhofazaga muhtoj va ish topishda qiynalayotgan shaxslarni ish bilan taʼminlash maqsadida 2012-yil yakunlanishidan 10 kun oldin har bir korxona, tashkilot va muassasa kvotalangan ish joylarining umumiy miqdorining kamida 25 foizi uchun, 2013-yilning 10-aprelidan kechikmasdan ish joylarining qolgan 75 foizini yaratish (band qilib qoʻyilganligi) toʻgʻrisidagi, yaʼni xar bir kvota toifasi boʻyicha ish oʻrinlari band qilib qoʻyiladigan kasblar va lavozimlar, mutaxassisliklar kesimidagi maʼlumotlarni va buyruq nusxalarini Navbahor tuman hokimligi Bandlikka koʻmaklashish va aholini ijtimoiy muhofaza qilish markaziga taqdim etish vazifalari topshirilsin.
4. Tumandagi korxona, tashkilot va muassasalar rahbarlari ijtimoiy muhofazaga muhtoj shaxslar uchun ish joylarining koʻrsatib oʻtilgan miqdorini Oʻzbekiston Respublikasi Vazirlar Mahkamasining 2008-yil 20-avgustdagi 186-sonli qarori bilan tasdiqlangan ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish tartibi toʻgʻrisida”gi Nizomiga muvofiq belgilangan muddatlarda va tartibda barpo etilishini (band etib qoʻyilishini yoki ajratilishini) hamda ish joylari sanitariya-gigiyena qoidalariga va xodim oʻz mehnat majburiyatlarini bemalol bajarishini taʼminlaydigan mehnat sharoitlariga muvofiq boʻlishini taʼminlasinlar.
5. Ushbu qaror bajarilmagan yoki oʻz vaqtida bajarilmagan taqdirda korxona, tashkilot va muassasaning mansabdor shaxslariga ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish tartibi toʻgʻrisidagi Nizomning 15-bandiga muvofiq jarima solinishiga sabab boʻladi.
6. Tuman Bandlikka koʻmaklashish va aholini ijtimoiy muhofaza qilish markazi (Oʻ. Mavlyanov) bir hafta muddatda mazkur qarorning 1-ilovasida* koʻrsatilgan korxona, tashkilot va muassasalar rahbarlari eʼtiboriga yetkazsin va qarorning bajarilishi ustidan qatʼiy nazorat oʻrnatilishini taʼminlasin.
* 1-ilova berilmaydi.
7. Tuman hokimining 2012-yil 1-avgustdagi K-479-sonli “2012-yilda ijtimoiy muhofazaga muhtoj shaxslar uchun va ish topishda qiynalayotgan shaxslarni ishga joylashtirish uchun ish oʻrinlarini band qilib toʻgʻrisida”gi qarori 2013-yil 1-yanvardan boshlab oʻz kuchini yoʻqotgan deb hisoblansin.
8. Oʻzbekiston Respublikasi Vazirlar Mahkamasining 2008-yil 20-avgustdagi 186-sonli Qarori bilan tasdiqlangan “Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish tartibi toʻgʻrisida”gi Nizomga asosan ijtimoiy muhofazaga muhtoj va ish topishda qiynalayotgan shaxslar uchun band qilib qoʻyiladigan ish oʻrinlarini tuman hokimi tomonidan belgilangan miqdordan ortiqcha tashkil etishga sarflangan mablagʻlarning bir qismini Bandlikka koʻmaklashish va aholini ijtimoiy muhofaza qilish tuman markazi bilan tuzilgan shartnoma asosida Bandlikka koʻmaklashish va aholini ijtimoiy muhofaza qilish jamgʻarmasi mablagʻlari hisobidan qoplash huquqiga ega ekanliklari inobatga olinsin.
9. Mazkur qaror 2012-yil 5-oktabrdan kuchga kirishi belgilansin hamda tuman rasmiy nashrida eʼlon qilinishi taʼminlansin.
10. Ushbu qarorning bajarilishini nazorat qilish tuman hokimining oʻrinbosari A. Karaboyev zimmasiga yuklatilsin.
Navbahor tumani hokimi A. NARZIYEV
Navbahor t.,
2012-yil 3-oktabr,
Q-553-son