Oʻzbekiston Respublikasida tovarlar va transport vositalarini vaqtinchalik chetdan olib kelish (chetga olib chiqish) shartlari toʻgʻrisida (106-son)

13.04.2013

Oʻzbekiston Respublikasi Vazirlar Mahkamasining

qarori

Oʻzbekiston Respublikasining Bojxona kodeksi qoidalarini amalga oshirish hamda tovarlar va transport vositalarini vaqtinchalik chetdan olib kelish (chetga olib chiqish)ni yanada tartibga solish maqsadida Vazirlar Mahkamasi qaror qiladi:

1. Quyidagilar:

Tovarlar va transport vositalarini vaqtinchalik chetdan olib kelish (chetga olib chiqish) bojxona rejimiga qoʻyish qoidalari 1-ilovaga muvofiq;

Tovarlar va transport vositalarini yuk bojxona deklaratsiyasi rasmiylashtirmasdan vaqtinchalik chetdan olib kelish (chetga olib chiqish) qoidalari 2-ilovaga muvofiq tasdiqlansin.

2. Belgilab qoʻyilsinki, quyidagi tovarlar vaqtinchalik chetdan olib kelinmaydi (chetga olib chiqilmaydi):

Oʻzbekiston Respublikasiga chetdan olib kelish va Oʻzbekiston Respublikasidan chetga olib chiqish taqiqlangan tovarlar;

chiqindilar;

elektr energiyasi, suv, quvurlar orqali yetkazib beriladigan tovarlar (neft, gaz), shuningdek yoqilgʻi;

chetdan olib kelinishi (chetga olib chiqilishi) kvotalanadigan tovarlar;

sarflanadigan materiallar va sarflanadigan namunalar, xomashyo, yarim tayyor mahsulotlar;

bir marta qoʻllash uchun moʻljallangan tovarlar;

Oʻzbekiston Respublikasining jismoniy va yuridik shaxslari tomonidan chetdan olib kelinadigan avtotransport vositalari, xalqaro yuk tashuvlarini amalga oshirish, shuningdek Oʻzbekiston Respublikasi qonun hujjatlari va xalqaro shartnomalarida belgilangan holatlar bundan mustasno.

3. Qonun hujjatlariga muvofiq chetdan olib kelishda (chetga olib chiqishda) alohida ruxsatnomalar olish talab qilinadigan tovarlarni vaqtinchalik chetdan olib kelishga (chetga olib chiqishda) faqat bunday ruxsatnomalar mavjud boʻlgan taqdirda yoʻl qoʻyiladi.

4. Vazirlar Mahkamasining “Oʻzbekiston Respublikasi hududiga tovarlar va transport vositalarini chetdan vaqtinchalik olib kelish shartlari toʻgʻrisida” 2004-yil 17-avgustdagi 399-son qarori (Oʻzbekiston Respublikasi QT, 2004-y., 8-son, 85-modda) oʻz kuchini yoʻqotgan deb hisoblansin.

5. Oʻzbekiston Respublikasi Davlat bojxona qoʻmitasi manfaatdor vazirliklar va idoralar bilan birgalikda bir oy muddatda oʻz idoraviy normativ-huquqiy hujjatlarini ushbu qarorga muvofiqlashtirsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2013-yil 13-aprel,

106-son

Vazirlar Mahkamasining 2013-yil 13-apreldagi 106-son qaroriga 1-ILOVA

Tovarlar va transport vositalarini vaqtinchalik chetdan olib kelish (chetga olib chiqish) bojxona rejimiga qoʻyish

QOIDALARI

I. Umumiy qoidalar

1. Ushbu Qoidalar vaqtinchalik chetdan olib kelish (chetga olib chiqish) bojxona rejimida tovarlar va transport vositalarini Oʻzbekiston Respublikasi hududiga vaqtinchalik chetdan olib kelish va Oʻzbekiston Respublikasi hududidan vaqtinchalik chetga olib chiqish shartlarini belgilaydi.

2.Ushbu Qoidalarda quyidagi mazmundagi asosiy tushunchalardan foydalaniladi:

a) davlat bojxona xizmatining hududiy organlari — Davlat bojxona qoʻmitasining Qoraqalpogʻiston Respublikasi, viloyatlar va Toshkent shahri boʻyicha boshqarmalari va “Toshkent-AERO” ixtisoslashtirilgan bojxona kompleksi;

b) tovarga nisbatan vakolatli shaxs — tovarlar va transport vositalarining mulkdori, ularning egasi yoxud qonun hujjatlariga muvofiq tovarlar bilan vaqtinchalik chetdan olib kelish (chetga olib chiqish) bojxona rejimida nazarda tutilgan xatti-harakatlarni yetarlicha sodir etish uchun ish koʻruvchi shaxs;

v) vaqtinchalik chetdan olib kelish (chetga olib chiqish) bojxona rejimining amal qilishini toʻxtatib turish — vaqtinchalik chetdan olib kelish (chetga olib chiqish) bojxona rejimining amal qilishini muayyan davrda toʻxtatib turish, shundan keyin ushbu bojxona rejimining amal qilishi tiklanadi;

g) vaqtinchalik chetdan olib kelish (chetga olib chiqish) bojxona rejimi amal qilishining tugashi — vaqtinchalik chetdan olib kelish (chetga olib chiqish) bojxona rejimi amal qilishining tiklash imkoniyatisiz uzil-kesil tugashi.

3. Vaqtinchalik chetdan olib kelish (chetga olib chiqish) bojxona rejimiga qoʻyilgan tovarlar va transport vositalari oʻzgarishsiz holatda qaytarilishi kerak, transportda tashish, saqlash va foydalanishning normal shart-sharoitlarida tabiiy eskirish yoxud kamayish oqibatidagi oʻzgarishlar bundan mustasno.

4. Vaqtinchalik chetdan olib kelishga (chetga olib chiqishga) tovarlar va transport vositalari ularni aksincha olib chiqib ketishda (olib kirishda) davlat bojxona xizmati organlari tomonidan identifikatsiya qilinishi va tovarga nisbatan vakolatli va bojxona rejimi shartlariga rioya etish uchun javobgarlikni oʻz zimmasiga oladigan shaxs Oʻzbekiston Respublikasining vakolatli organlarida roʻyxatdan oʻtkazilishi (akkreditatsiya qilinishi) sharti bilan yoʻl qoʻyiladi.

5. Tovarga nisbatan vakolatli shaxsga vaqtinchalik chetdan olib kelishga (chetga olib chiqishga) ruxsatnoma bunday vaqtinchalik chetdan olib kelish (chetga olib chiqish)ning maqsadlari va holatlaridan kelib chiqqan holda davlat bojxona xizmatining hududiy organi tomonidan beriladi.

Vaqtinchalik chetdan olib kelishga (chetga olib chiqishga) ruxsatnoma olish uchun tovarga nisbatan vakolatli shaxs ushbu Qoidalarga 1-ilovaga muvofiq vaqtinchalik chetdan olib kelishga (chetga olib chiqishga) ruxsatnomaning soʻralayotgan muddatini koʻrsatgan holda ariza beradi.

Arizaga quyidagi hujjatlarning nusxalari ilova qilinadi:

a) tovarni yetkazib berish yoki berish toʻgʻrisidagi kontrakt (shartnoma, bitim) nusxasi (ijara shartnomasi, lizing, kafolatli xizmat koʻrsatish va investitsiya loyihasi doirasida tovarlar vaqtincha chetdan olib kelingan (chetga olib chiqilgan) hollarda);

b) transport hujjatlari va tovarga ilova qilingan hujjatlar nusxalari;

v) vakolatli organlarning ruxsatnomalari (agar tovar qonun hujjatlariga muvofiq vakolatli organlar tomonidan nazorat qilinishi kerak boʻlsa).

Ariza besh ish kuni mobaynida koʻrib chiqiladi.

Masala ijobiy hal etilgan taqdirda ariza beruvchiga ushbu Qoidalarga 2-ilovaga muvofiq shakl boʻyicha tovarni vaqtinchalik chetdan olib kirishga (chetga olib chiqishga) ruxsatnoma beriladi.

6. Tovarlarni vaqtinchalik chetdan olib kelish (chetga olib chiqish) muddatlarini uzaytirish uchun shaxs ushbu Qoidalarga 1-ilovaga muvofiq shakl boʻyicha chetdan olib kelish (chetga olib chiqish)ning cheklangan muddati tugashidan oldin oʻttiz kundan kechikmay davlat bojxona xizmati organlariga ariza bilan murojaat qiladi. Arizaga quyidagi hujjatlarning nusxalari ilova qilinadi:

tovarni yetkazib berish yoki berish toʻgʻrisidagi kontrakt (shartnoma, bitim) nusxasi (ijara shartnomasi, lizing, kafolatli xizmat koʻrsatish va investitsiya loyihasi doirasida tovarlar vaqtincha chetdan olib kelingan (chetga olib chiqilgan) hollarda;

yuk bojxona deklaratsiyasi nusxasi;

vakolatli organlarning ruxsatnomalari (agar tovar qonun hujjatlariga muvofiq vakolatli organlar tomonidan nazorat qilinishi kerak boʻlsa);

bojxona toʻlovlari toʻlanganligini tasdiqlaydigan hujjat nusxasi (agar qonun hujjatlarida bojxona toʻlovlari toʻlash nazarda tutilgan boʻlsa);

vakolatli bank tomonidan beriladigan (tovarlarni ijara shartnomasi (lizing va shu kabilar) boʻyicha vaqtinchalik chetga olib chiqishda) ijara shartnomasi (lizing va shu kabilar) doirasida valyuta mablagʻlari tushganligini tasdiqlaydigan hujjat nusxasi, tovarlar va xizmatlarning eksport kontraktlari boʻyicha kafolat muddati mobaynida xizmat koʻrsatish va nuqsonlarni bartaraf etish uchun tovarlarni vaqtinchalik chetga olib chiqish hollari bundan mustasno.

7. Quyidagilar:

ariza beruvchi tomonidan zarur tarzda rasmiylashtirilmagan hujjatlar taqdim etilishi;

ariza beruvchi tomonidan taqdim etilgan hujjatlarda ishonchsiz yoki buzilgan maʼlumotlarning mavjudligi;

ushbu Qoidalarning 16 va 34-bandlarida koʻrsatilgan shartlarning bajarilmasligi;

shaxs tomonidan oldin vaqtinchalik chetdan olib kelingan (chetga olib chiqilgan) tovarlar boʻyicha majburiyatlarning bajarilmasligi vaqtinchalik chetdan olib kelishga (chetga olib chiqishga) va uning amal qilish muddatini uzaytirishga ruxsatnoma berish rad etilishi uchun asos hisoblanadi.

Boshqa asoslar boʻyicha, shu jumladan ruxsatnoma berish maqsadga muvofiq emasligi motivlari boʻyicha vaqtinchalik chetdan olib kelishga (chetga olib chiqishga) ruxsatnoma berishning rad etilishiga yoʻl qoʻyilmaydi.

8. Davlat bojxona xizmati organlariga ariza berilishi vaqtinchalik chetdan olib kelish (chetga olib chiqish) muddatlarini toʻxtatib qoʻymaydi va toʻxtatib turmaydi.

9. Tovarlarni vaqtinchalik chetdan olib kelish (chetga olib chiqish) bojxona rejimiga qoʻyishning belgilangan muddati yuk bojxona deklaratsiyasida koʻrsatiladi.

10. Tovarlarni vaqtinchalik chetdan olib kelish (chetga olib chiqish) bojxona rejimiga qoʻyishda yuk bojxona deklaratsiyasi ushbu Qoidalarga 3-ilovaga muvofiq toʻldiriladi.

11. Vaqtinchalik chetdan olib kelinadigan (chetga olib chiqiladigan) tovarlarning bojxona identifikatsiyasi tamgʻalar, muhrlar bosish, raqamli, harfli belgilar va boshqa markirovkalash, identifikatsiyalash belgilari qoʻyish, shtamplar bosish, proba va namunalar olish, tovarlar va transport vositalarini tasniflash, chizmalar tuzish, koʻlamli tasvirlar, fotosuratlar va illyustratsiyalar tayyorlash, tovarga ilova qilinadigan hujjatlardan va boshqa hujjatlardan, shuningdek identifikatsiyalashning boshqa vositalaridan foydalanish yoʻli bilan taʼminlanadi.

12. Identifikatsiya vositalari faqat Oʻzbekiston Respublikasi davlat bojxona xizmati organi tomonidan yoki uning ruxsati bilan oʻzgartirilishi, olib tashlanishi yoki yoʻq qilinishi mumkin, tovarlar va transport vositalarining qaytarilmaydigan holda yoʻqotilishi yoki jiddiy ravishda buzilishining real xavfi mavjud boʻlgan hollar bundan mustasno. Identifikatsiyalashni amalga oshiruvchi davlat bojxona xizmati organiga identifikatsiyalash vositalari oʻzgarishi, olib tashlanishi yoki yoʻq qilinishi toʻgʻrisida darhol xabar qilinadi va koʻrsatib oʻtilgan xavf mavjudligining isboti taqdim etiladi.

13. Ushbu Qoidalarga muvofiq rasmiylashtirilgan yuk bojxona deklaratsiyasi shaxsning vaqtinchalik chetdan olib kelingan (chetga olib chiqilgan) tovarni qaytarib olib chiqish (olib kelish) toʻgʻrisidagi majburiyati hisoblanadi.

14. Vaqtinchalik chetdan olib kelingan (chetga olib chiqilgan) tovarlardan vaqtinchalik chetdan olib kelishga (chetga olib chiqishga) davlat bojxona xizmati organlarining ruxsatnomasini olgan shaxs foydalanishi mumkin.

15. Tovarlar vaqtinchalik chetdan olib kelish (chetga olib chiqish) bojxona rejimiga qoʻyilishi mumkin boʻlgan muddat davlat bojxona xizmatining hududiy organi tomonidan bunday chetdan olib kelish (chetga olib chiqish)ning maqsadlari va holatlaridan kelib chiqqan holda belgilanadi va uzaytiriladi, biroq tovarlarning bojxona rejimida boʻlishining umumiy muddati ikki yildan ortiq boʻlishi mumkin emas.

Ushbu Qoidalarga 4-ilovada koʻrsatilgan tovarlar uchun vaqtinchalik chetdan olib kelish (chetga olib chiqish)ning koʻproq muddatlari belgilanishi mumkin.

II. Tovarlarni vaqtinchalik chetdan olib kelish bojxona rejimiga qoʻyish shartlari

16. Quyidagilar tovarlarni vaqtinchalik chetdan olib kelish bojxona rejimiga qoʻyishning shartlari hisoblanadi:

tovarlarga belgilangan tartibga muvofiq deklaratsiya toʻldirish;

ushbu tovarlarni identifikatsiyalash imkoniyatini taʼminlash;

bojxona toʻlovlari toʻlashni taʼminlash (agar qonun hujjatlarida bojxona toʻlovlari toʻlash nazarda tutilgan boʻlsa);

agar tovar vakolatli organlar tomonidan nazorat qilinishi kerak boʻlsa, ularning ruxsatnomalarini taqdim etish.

17. Vaqtinchalik chetdan olib kelishga ruxsatnoma olgan shaxs vaqtinchalik chetdan olib kelish muddati tamom boʻlgunga qadar vaqtinchalik chetdan olib kelingan tovarlarning qaytarib olib ketilishini yoki vaqtincha chetdan olib kelish muddati uzaytirilishiga ruxsatnoma olishni yoxud vaqtinchalik chetdan olib kelingan tovarlarni boshqa bojxona rejimlariga qoʻyishni taʼminlaydi. Ushbu talablarga rioya etilmagan taqdirda tovar “vaqtinchalik saqlash” bojxona rejimida bojxona omboriga joylashtiriladi.

18. Vaqtinchalik chetdan olib kelishga ruxsatnoma olgan shaxsning iltimosiga koʻra vaqtinchalik chetdan olib kelingan tovarlarni “vaqtinchalik saqlash” va “bojxona ombori” bojxona rejimlariga qoʻyishda vaqtinchalik chetdan olib kelish bojxona rejimining amal qilishi ushbu bojxona rejimlariga bojxonada rasmiylashtirilgan kundan boshlab toʻxtatib turiladi.

Vaqtinchalik chetdan olib kelishning bojxona rejimi amal qilishi toʻxtatib turilishi davrida davriy bojxona toʻlovlari hisoblab yozilmaydi va toʻlanmaydi.

19. Vaqtinchalik chetdan olib kelish bojxona rejimining amal qilishi quyidagi hollarda tugaydi:

vaqtincha chetdan olib kelingan tovarlar olib chiqilganda yoki ular boshqa bojxona rejimlariga qoʻyilganda, “vaqtincha saqlash” va “bojxona ombori” bojxona rejimlari bundan mustasno;

qonun hujjatlariga muvofiq vaqtinchalik chetdan olib kelingan tovarlarga arest belgilanganda yoki ular olib qoʻyilgan va davlat daromadiga oʻtkazilganda (arest bekor qilingan va olib qoʻyilgan vaqtinchalik chetdan olib kelingan tovarlar qaytarilgan hollar bundan mustasno). Arest bekor qilingan va olib qoʻyilgan chetdan olib kelingan tovarlar qaytarilgan hollarda, vaqtinchalik chetdan olib kelishga ruxsatnoma olgan shaxs bojxonada rasmiylashtirishni amalga oshiruvchi davlat bojxona xizmati organiga arest bekor qilinganligi toʻgʻrisida maʼlum qilishi va tovarlarning bundan keyin tegishli bojxona rejimiga bojxonada rasmiylashtirilishini taʼminlashi kerak;

tovar avariya yoki yengib boʻlmaydigan kuch taʼsiri oqibatida yoʻq qilingan yoki qaytarib boʻlmaydigan tarzda yoʻqotilgan hollarda, bu tegishli vakolatli davlat organi tomonidan berilgan hujjatlar bilan tasdiqlanishi kerak;

vaqtinchalik chetdan olib kelingan tovarlar yoʻqotilganda va tashkilotning tugatilishi yoki shaxsning vafot etganligi munosabati bilan vaqtinchalik chetdan olib kelishga ruxsatnoma olgan shaxsni aniqlash imkoniyati mavjud boʻlmaganda vaqtinchalik chetdan olib kelish bojxona rejimi amal qilishini tugallash boʻyicha koʻrilgan chora-tadbirlar natija bermagan hollarda.

Ushbu bandning toʻrtinchi va beshinchi xatboshilarida koʻrsatilgan hollarda vaqtinchalik chetdan olib kelingan tovarlarni nazorat qilish davlat bojxona xizmatining hududiy organi xulosasi asosida tugallanadi.

III. Davriy bojxona toʻlovlarini vaqtinchalik chetdan olib kelingan tovarlarga qoʻllash tartibi

20. Tovarlarni vaqtincha chetdan olib kelishda ular vaqtinchalik chetdan olib kelish bojxona rejimida rasmiylashtirilgan paytdan boshlab bojxona bojlari va soliqlar toʻlashdan qisman ozod etish qoʻllaniladi, ushbu Qoidalarning 32-bandida koʻrsatilgan holatlar bundan mustasno. Bojxona bojlari va soliqlarni toʻlashdan qisman ozod qilishda davriy bojxona toʻlovlari undiriladi.

21. Davriy bojxona toʻlovlari:

tovarlarning vaqtinchalik chetdan olib kelish bojxona rejimida turgan har bir toʻliq va notoʻliq kalendar oy uchun bojxona bojlari va soliqlar summasining 5 foizi miqdorida xorijiy valyutada hisoblab yoziladi, ular ushbu tovarlar bojxona rejimida turganda ularning vaqtinchalik chetdan olib kelish rejimida bojxonada rasmiylashtirish kunida erkin muomala uchun chiqarishning (import) bojxona rejimiga qoʻyilganda toʻlanishi mumkin;

milliy valyutada — soʻmda Oʻzbekiston Respublikasi Markaziy banki tomonidan ularni toʻlash kunida belgilangan kurs boʻyicha toʻlanadi;

belgilangan tartibda Oʻzbekiston Respublikasi Davlat budjetiga oʻtkaziladi.

Davriy bojxona toʻlovlari tovarlar vaqtinchalik chetdan olib kelishning bojxona rejimiga qoʻyilganda vaqtinchalik chetdan olib kelishning butun davri uchun toʻliq yoki chetdan olib kelishga ruxsatnoma olgan shaxsning tanlashi boʻyicha davriy toʻlanadi. Koʻrsatib oʻtilgan toʻlovlarni davriy toʻlash chetdan olib kelishga ruxsatnoma olgan shaxs tomonidan, davlat bojxona xizmati organining toʻlov tartibi toʻgʻrisidagi bildirishnomasi bilan belgilanadi. Davriy bojxona toʻlovlarini toʻlash tegishli davr boshlangungacha amalga oshirilishi kerak.

Davriy bojxona toʻlovlari toʻlangan davrdan oldingi oyning oxirgi ish kuni davriy bojxona toʻlovlari toʻlashning navbatdagi davr uchun cheklangan muddati hisoblanadi.

22. Davriy bojxona toʻlovlarining toʻlangan summalari:

vaqtincha chetdan olib kelingan tovarlar chetga olib chiqilgan yoxud ular boshqa bojxona rejimlariga qoʻyilgan taqdirda qaytarilmaydi;

ushbu tovarlar erkin muomala uchun chiqarishning (import) bojxona rejimiga qoʻyilganda toʻlanishi kerak boʻlgan bojxona toʻlovlari summasiga hisoblanadi.

23. Vaqtinchalik chetdan olib kelishga ruxsatnoma olgan shaxs davriy bojxona toʻlovlarini toʻlash uchun javob beradi.

24. Vaqtinchalik chetdan olib kelishga ruxsatnoma bergan davlat bojxona xizmatining hududiy organi davriy bojxona toʻlovlari summasining amalda tushishini nazorat qiladi.

25. Bojxona toʻlovlarini toʻlash boʻyicha muddatni kechiktirish va boʻlib-boʻlib toʻlash Oʻzbekiston Respublikasining Bojxona kodeksida tartibga solinadi.

26. Tovarlar bojxona bojlari, soliqlar toʻlashdan ozod etish shaklida bojxona imtiyozlaridan foydalaniladigan shaxslar tomonidan vaqtincha chetdan olib kelingan taqdirda ularni toʻlovdan ozod qilish bunday imtiyozlarning amal qilish davrida qoʻllaniladi.

27. Vaqtinchalik chetdan olib kelish bojxona rejimiga qoʻyilgan tovarlar uchun davriy bojxona toʻlovlari toʻlanganligini tasdiqlash maqsadida davlat bojxona xizmatining hududiy organlariga davriy bojxona toʻlovi toʻlanganligini tasdiqlaydigan hujjat (toʻlov topshiriqnomasi yoki bojxona toʻlovlari muddatini kechiktirishga, boʻlib-boʻlib toʻlashga ruxsatnoma) taqdim etilishi kerak.

28. Vaqtinchalik chetdan olib kelish bojxona rejimiga qoʻyilgan tovarlar va transport vositalariga davriy bojxona toʻlovlari tushumini hisobga olish ushbu Qoidalarga 5-ilovaga muvofiq shakl boʻyicha davlat bojxona xizmatining hududiy organlarida shaxsiy kartochkalar ochish yoʻli bilan amalga oshiriladi.

29. Shaxsiy kartochkalarda tushgan davriy bojxona toʻlovlari aks ettiriladi.

30. Tovarlar erkin muomala uchun chiqarilganda (import) va toʻlanishi kerak boʻlgan barcha davriy bojxona toʻlovlari toʻlanganda vaqtinchalik chetdan olib kelish bojxona rejimini tugallashda tovarlarni erkin muomala uchun chiqarishning (import) bojxona rejimiga qoʻyish uchun yuk bojxona deklaratsiyasi rasmiylashtiriladi.

31. Bojxona toʻlovlari vaqtinchalik chetdan olib kelishning bojxona rejimida rasmiylashtirilgan yuk bojxona deklaratsiyasi asosida undiriladi. Yuk bojxona deklaratsiyasini erkin muomala uchun chiqarishning (import) bojxona rejimiga rasmiylashtirishda faqat bojxona yigʻimlari undiriladi.

IV. Vaqtinchalik chetdan olib kelinadigan tovarlar va transport vositalarini bojxona bojlari va soliqlardan toʻliq ozod qilish shartlari

32. Quyidagilar vaqtinchalik chetdan olib kelingan hollarda bojxona bojlari va soliqlardan toʻliq ozod qilinadi:

a) xorijiy davlatlar diplomatik va konsullik vakolatxonalarining hamda ularga tenglashtirilgan vakolatxonalarning Oʻzbekiston Respublikasi hududida normal faoliyat koʻrsatishini taʼminlash uchun moʻljallangan, shuningdek ushbu vakolatxonalarning diplomatik agentlari hamda maʼmuriy-texnik xodimlari hamda Oʻzbekiston Respublikasi hududida doimiy yashash joyiga ega boʻlmagan ularning oila aʼzolari tomonidan shaxsiy foydalanish uchun olib kelinadigan tovarlar.

Avtotransport vositalarini vaqtinchalik chetdan olib kelishga:

ushbu kichik bandning birinchi xatboshida koʻrsatilgan vakolatxonalar uchun, — bir xodimga 1 (bir) avtotransport vositasi hisobidan;

ushbu kichik bandning birinchi xatboshida koʻrsatilgan jismoniy shaxslarning shaxsiy foydalanilishi uchun, — vakolatxonaning bir xodimiga va uning oila aʼzosining voyaga yetgan aʼzosiga 1 (bir) avtotransport vositasi hisobidan yoʻl qoʻyiladi, biroq oilaga 2 (ikki) avtotransport vositasidan ortiq emas.

Avtotransport vositalarini vaqtinchalik chetdan olib kelishga miqdoriy cheklashlar Oʻzbekiston Respublikasining erishilgan ahdlashuvlaridan kelib chiqib, shuningdek tenglik shartlarida yoki insonparvarlik loyihalarini va texnik koʻmaklashish loyihalarini amalga oshirish uchun oʻzgartirilishi mumkin. Miqdoriy cheklovni oʻzgartirish toʻgʻrisidagi qaror, keyinchalik Oʻzbekiston Respublikasi Vazirlar Mahkamasini xabardor qilgan holda, akkreditatsiya boʻyicha vakolatli organning birinchi rahbari tomonidan qabul qilinadi;

b) xorijiy davlatlar ommaviy axborot vositalarining akkreditatsiya qilingan muxbirlari va muxbirlik punktlarining oʻz ehtiyojlari uchun chetdan olib kelinadigan avtotransport vositalari.

Avtotransport vositalarini vaqtinchalik chetdan olib kelishga xorijiy davlatning ommaviy axborot vositalari har bir akkreditatsiya qilingan muxbiri va muxbirlik punkti xodimiga 1 (bir) avtotransport vositasi hisobidan yoʻl qoʻyiladi;

v) ularga nisbatan Oʻzbekiston Respublikasi qonun hujjatlarida bojxona bojlari va soliqlardan toʻliq ozod qilish nazarda tutilgan tovarlar;

g) koʻrgazmalar, yarmarkalar, xalqaro uchrashuvlarda va shunga oʻxshash boshqa tadbirlarda namoyish qilishga moʻljallangan tovarlar (chetdan olib kelingan tovarlarni sotish maqsadida oʻtkaziladigan ishlab chiqarish faoliyati yoki boshqa tijorat faoliyati amalga oshiriladigan joylardagi koʻrgazmalardan tashqari), shuningdek ushbu tadbirlarda foydalanish uchun moʻljallangan yordamchi asbob-uskunalar va materiallar;

d) faqat mana shunday tipdagi tovarlarga buyurtmalar olish maqsadlari uchun moʻljallangan va boshqa maqsadlarda foydalanish uchun yaroqsiz boʻlgan tovarlarning namunalari, bu ularga raqamli, harfli va boshqa markirovkalash, yoriqlar, teshiklar oʻyish yoki boshqa usul bilan shikast yetkazish yoʻli bilan taʼminlanadi, har bir tip, marka, model, artikul, fason, boʻyash va hokazolarning tovar namunalari ikki nusxasidan ortiq boʻlmaydi;

e) xorijiy shaxslar tomonidan olib kelinadigan reklama materiallari (kataloglar, preyskurantlar va tijorat prospektlari, modellar, plakatlar, planshetlar, risolalar) — agar har bir oluvchi uchun ushbu materiallar 2 nusxadan ortiq olib kelinmasa yoxud ularning umumiy brutto ogʻirligi 50 kilogrammdan ortiq boʻlmasa;

j) reklama filmlari, shuningdek tovarlarning xossalari yoki vazifasini ochib beruvchi reklama uchun moʻljallangan kompyuterda tashiladigan axborot — agar ushbu filmlar va axborot tashuvchilar xorijiy shaxsning mulki boʻlib qolsa, xorijiy shaxs tomonidan taklif etilayotgan xorijiy tovarlarga tegishli boʻlsa, faqat tovarlarning ehtimol tutilgan sotib oluvchilariga koʻrsatish uchun moʻljallangan boʻlsa, bir nusxada olib kelinsa va ulardan foydalanish daromad olish maqsadini koʻzlamasa;

z) sinovlar, tekshirishlar, eksperimentlar oʻtkazish hamda xossalari va tavsiflarini koʻrsatish uchun moʻljallangan tovarlar — agar ulardan foydalanish daromad olish maqsadini koʻzlamagan taqdirda;

i) kasb asbob-uskunalari (sanoat ishlab chiqarishi, tovarlarni oʻrash yoki tabiat resurslaridan foydalanish, yer ishlarini bajarish, binolar, imoratlar, inshootlar qurish va taʼmirlash hamda shunga oʻxshash ishlarni bajarish uchun foydalaniladigan asbob-uskunalardan tashqari) va instrumentlar (shu jumladan yordamchi apparatlar va anjomlar) — agar vaqtincha chetdan olib kelingan kasb asbob-uskunalari va instrumentlar xorijiy shaxsning mulki boʻlib qolsa, ular tomonidan olib kelinsa va ularga Oʻzbekiston Respublikasi hududida aniq ishni bajarish uchun zarur boʻlsa;

y) ishlab chiqarish kooperatsiyasi doirasida chetdan olib kelinadigan chizmalar, rejalar, modellar, shtamplar, matritsalar, klishelar, bosma shakllar va shunga oʻxshash boshqa buyumlar, nazorat-oʻlchash asboblari va instrumentlar — agar koʻrsatib oʻtilgan tovarlardan asosan eksportga moʻljallangan tovarlarni ishlab chiqarish munosabati bilan foydalanilsa, xorijiy shaxsning mulki boʻlib qolsa, biroq Oʻzbekiston Respublikasining yuridik yoki jismoniy shaxsi tomonidan foydalanish uchun moʻljallangan boʻlsa;

k) madaniyat va kinematografiya sohalarida ilmiy-tadqiqot, taʼlim maqsadlari uchun foydalaniladigan asbob-uskunalar (shu jumladan restavratsiya asbob-uskunalari) va materiallar, vaqtincha chetdan olib kelingan asbob-uskunalar va materiallarni, anjomlarni taʼmirlashga moʻljallangan ehtiyot qismlar, shuningdek bunday asbob-uskunalar va materiallarni sozlash, nazorat qilish va taʼmirlash uchun moʻljallangan instrumentlar — agar vaqtincha chetdan olib kelingan asbob-uskunalar, materiallar, ehtiyot qismlar, anjomlar va instrumentlar xorijiy shaxsning mulki boʻlib qolsa va ulardan foydalanish daromad olish maqsadini koʻzlamasa;

l) kinoga olish, tomoshalar, spektakllar va shunga oʻxshash tadbirlarni oʻtkazish uchun moʻljallangan, madaniyat muassasalari, kinematografiya tashkilotlariga vaqtincha foydalanish uchun tekin beriladigan teatr (sirk, kino) kostyumlari, sahna asbob-uskunalari, partitura, musiqa asboblari va boshqa teatr (sirk) rekvizitlari;

m) kino va videofilmlar, slaydlar, fotosuratlar, plakatlar, kino va videofilmlarning montaj va muloqotli sahifalari hamda foto va kinotanlovlarda, kinofestivallarda, kinohaftaliklarida va boshqa shunga oʻxshash tadbirlarda namoyish qilish uchun tasvir yozilgan boshqa axborot tashuvchilar — agar bunday tovarlardan foydalanish daromad olish maqsadini koʻzlamasa;

n) Oʻzbekiston Respublikasi hududida sport musobaqalari, koʻrgazmali sport tadbirlari yoki mashqlar oʻtkazish uchun moʻljallangan tovarlar — agar bunday tovarlar xorijiy shaxsning mulki boʻlib qolsa va ularning vazifasiga muvofiq miqdorda olib kelinsa;

o) kurort ishi va turizm boʻyicha tanishtirish materiallari — agar vaqtincha chetdan olib kelingan materiallar xorijiy shaxsning mulki boʻlib qolsa va ularning vazifasiga muvofiq miqdorda olib kelinsa;

p) madaniyat boyliklari (sanʼat asarlari, kolleksiyalash va antikvariat buyumlari boʻlgan tovarlar, shuningdek olib chiqib ketilishi va olib kelinishi Oʻzbekiston Respublikasi qonun hujjatlari bilan tartibga solinadigan boshqa tovarlar), — agar bunday tovarlar xorijiy shaxsning mulki boʻlib qolsa;

r) taʼlim, fan va madaniyat bilan bogʻliq boʻlgan kitoblar, davriy nashrlar, materiallar va hujjatlar (shu jumladan ularning bosma usuldan boshqa usulda koʻpaytirilganlari), — agar bunday tovarlar xorijiy shaxsning mulki boʻlib qolsa;

s) Oʻzbekiston Respublikasi Favqulodda vaziyatlar vazirligining va (yoki) oʻq-dorilar va atom energetikasini ishlab chiqish, ishlab chiqarish va utilizatsiya qilish sohasida davlat siyosatini amalga oshiradigan, atom energiyasidan foydalanishning davlat boshqaruvini amalga oshiradigan, shuningdek Oʻzbekiston Respublikasi qonunlarida, Oʻzbekiston Respublikasi Prezidentining farmonlarida va Oʻzbekiston Respublikasi Vazirlar Mahkamasining qarorlarida belgilangan hollarda ushbu sohada ijro etuvchi hokimiyatning boshqa organlari faoliyatini muvofiqlashtiradigan boshqa vakolatli organning sabablari koʻrsatilgan taqdimnomasi boʻyicha vaqtincha foydalanish uchun davlat organlari va davlat muassasalariga tekin beriladigan, xorijiy shaxs tomonidan olib kelinadigan tabiiy va texnogen xususiyatga ega boʻlgan favqulodda vaziyatlarning oldini olish va ularning oqibatlarini bartaraf etish uchun moʻljallangan tovarlar, shu jumladan transport vositalari, — agar vaqtincha chetdan olib kelingan tovarlar va transport vositalari xorijiy shaxsning mulki boʻlib qolsa, shu jumladan:

transport vositalari bilan birga olib kelinadigan yonilgʻi-moylash materiallari, suv, ishlab chiqaruvchi tomonidan nazarda tutilgan konstruktiv idishlardagi boshqa suyuqliklar, ehtiyot qismlar, koʻrsatib oʻtilgan transport vositalarining odatdagi anjomlari va aslahalari, shu jumladan yuklar, konteynerlar va boshqa transport asbob-uskunasini yuklash, tushirish, ishlov berish va himoya qilish uchun maxsus asbob-uskuna, agar bunday transport vositalari xorijiy davlat hududida roʻyxatdan oʻtkazilgan boʻlsa, xorijiy shaxs tomonidan olib kirilsa;

tovarlarni transportda tashish, yer qazish ishlari, binolar, imoratlar va inshootlarni qurish, taʼmirlash va ulardan foydalanish va shunga oʻxshash ishlarni bajarish uchun moʻljallangan asbob-uskunalar va instrumentlar, shu jumladan yordamchi apparatlar, agregatlar, ehtiyot qismlar va anjomlar;

t) qutqarish, davolash muassasalariga hamda boshqa tibbiyot muassasalari va tashkilotlariga vaqtincha foydalanish uchun tekin beriladigan qutqarish, tibbiyot va laboratoriya asbob-uskunasi — agar vaqtincha chetdan olib kelingan asbob-uskuna ushbu muassasalar va tashkilotlar tomonidan muruvvat, qutqaruv, tashxis qoʻyish yoki davolash maqsadlarida foydalanish uchun moʻljallangan boʻlsa, xorijiy shaxsning mulki boʻlib qolsa va uni yetkazib berish Oʻzbekiston Respublikasi Vazirlar Mahkamasining qaroriga koʻra amalga oshirilsa;

u) xorijiy havo kemalari ekipajlarining ijtimoiy-maishiy hayot sharoitlarini taʼminlash va ularning madaniyat, taʼlim, dam olish, din va sport sohasidagi ehtiyojlarini qondirish uchun moʻljallangan tovarlar — agar vaqtincha chetdan olib kelingan tovarlar xorijiy shaxsning mulki boʻlib qolsa va ulardan foydalanish daromad olish maqsadini koʻzlamasa;

f) professional kinematografiya asbob-uskunasi, matbuot, radio yoki televideniye jihozi, koʻrsatib oʻtilgan asbob-uskunalarga yordamchi qurilmalar va anjomlar — agar vaqtinchalik chetdan olib kelingan professional asbob-uskunalar, qurilmalar va anjomlar xorijiy shaxsning mulki boʻlib qolsa, ular tomonidan Oʻzbekiston Respublikasi hududida aniq ishni bajarish uchun zarur boʻlsa;

x) boqish, oʻrgatish, urchitish, veterinariya yoʻli bilan davolash, sinovlar oʻtkazish, turistik tadbirlar, gumanitar va qutqarish operatsiyalari, maxsus funksiyalarni amalga oshirish (militsiya otlari va itlari, izlovchi kuchuklar, koʻzi ojizlarni yetaklab yuradigan kuchuklar va boshqalar), koʻrgazmalar, tanlovlar, musobaqalar, namoyishlar, spektakllar, tomoshalar va shunga oʻxshash daromad olish bilan bogʻliq boʻlmagan tadbirlarda ishtirok etish uchun, shuningdek tibbiyot maqsadlarida va chegara hududida foydalanish uchun moʻljallangan ish mollari sifatida (tegishli jihozlar bilan birgalikda) xorijiy shaxsning mulki boʻlib qoladigan hayvonlar.

33. Ushbu Qoidalarning 32-bandi “g” — “x” kichik bandlarida koʻrsatilgan tovarlarni vaqtinchalik chetdan olib kelishga bir yilgacha boʻlgan muddatda bojxona bojlari va soliqlardan toʻliq ozod etilgan holda ruxsat beriladi. Ushbu muddat tugagandan keyin koʻrsatib oʻtilgan tovarlarga vaqtinchalik chetdan olib kelishning bundan keyingi muddatiga davriy bojxona toʻlovlari qoʻllaniladi.

V. Tovarlar va transport vositalarini vaqtinchalik chetga olib chiqishning bojxona rejimiga qoʻyish shartlari

34. Quyidagilar tovarlar va transport vositalarini vaqtinchalik chetga olib chiqishning bojxona rejimiga qoʻyish shartlari hisoblanadi:

tovarlarga belgilangan tartibga muvofiq deklaratsiya toʻldirish;

ushbu tovarlarning identifikatsiya qilinishi imkoniyatini taʼminlash;

agar tovar vakolatli organlar tomonidan nazorat qilinishi kerak boʻlsa, ushbu organlarning ruxsatnomalarini taqdim etish.

35. Vaqtinchalik chetga olib chiqishga ruxsatnoma olgan shaxs vaqtinchalik chetga olib chiqish muddati tugagunga qadar vaqtinchalik chetga olib chiqilgan tovarlar qaytarib olib kelinishini yoki vaqtinchalik chetga olib chiqish muddati uzaytirilishiga ruxsatnoma olinishini yoxud vaqtinchalik chetga olib chiqilgan tovarlar boshqa bojxona rejimlariga qoʻyilishini taʼminlashi kerak.

36. Vaqtinchalik chetga olib chiqish bojxona rejimining amal qilishi:

vaqtinchalik chetga olib chiqilgan tovarlar Oʻzbekiston Respublikasining bojxona hududiga qaytarib olib kelinganda yoki ular boshqa bojxona rejimlariga qoʻyilganda;

agar vaqtinchalik chetga olib chiqilgan tovar avariya yoki boshqa yengib boʻlmaydigan kuch oqibatida yoʻq qilingan yoki qaytarilmas tarzda yoʻqotilgan, yoxud xorijiy davlatning organlari yoki mansabdor shaxslarining Oʻzbekiston Respublikasi qonun hujjatlari boʻyicha noqonuniy xatti-harakatlari natijasida egalik qilishdan chiqqan hollarda tugaydi. Bunda avariya yoki yengib boʻlmas kuch amal qilishi, tabiiy eskirish yoki transportda tashish va saqlashning normal sharoitlarida kamayish tufayli kamomadlar oqibatida, yoxud xorijiy davlatning organlari yoki mansabdor shaxslarining Oʻzbekiston Respublikasi qonun hujjatlari boʻyicha noqonuniy xatti-harakatlari natijasida vaqtinchalik chetga olib chiqilgan tovar yoʻq qilingan yoki qaytarilmas tarzda yoʻqotilgan hollarda Oʻzbekiston Respublikasining chet eldagi diplomatik vakolatxonalari yoki konsullik muassasalari tomonidan tasdiqlanishi kerak.

37. Davlat bojxona xizmati organining ruxsati bilan vaqtinchalik chetga olib chiqilgan tovarlarni qaytarib olib kelmasdan boshqa shaxsga berishga va eksportning bojxona rejimida rasmiylashtirishga yoʻl qoʻyiladi.

VI. Yakunlovchi qoidalar

38. Davlat bojxona xizmati organlari respublikaga vaqtinchalik chetdan olib kelingan va respublikadan vaqtinchalik chetga olib chiqilgan tovarlar hisobini yuritadi.

39. Ushbu Qoidalarning buzilishida aybdor boʻlgan shaxslar qonun hujjatlariga muvofiq javob beradi.

Tovarlar va transport vositalarini vaqtinchalik chetdan olib kelish (chetga olib chiqish) bojxona rejimiga qoʻyish qoidalariga 1-ILOVA

Izoh: arizadagi tovarlar nomi koʻp boʻlgan taqdirda ular alohida spetsifikatsiyada koʻrsatilishi mumkin.

Tovarlar va transport vositalarini vaqtinchalik chetdan olib kelish (chetga olib chiqish) bojxona rejimiga qoʻyish qoidalariga 2-ILOVA

Tovarlar va transport vositalarini vaqtinchalik chetdan olib kelish (chetga olib chiqish) bojxona rejimiga qoʻyish qoidalariga 3-ILOVA

Tovarlarni vaqtinchalik chetdan olib kelish (chetga olib chiqish) bojxona rejimiga qoʻyishda yuk bojxona deklaratsiyasini toʻldirish

TARTIBI

Vaqtinchalik chetdan olib kelish (chetga olib chiqish) rejimida yuk bojxona deklaratsiyasini rasmiylashtirishda deklaratsiya ustunlari qonun hujjatlariga muvofiq toʻldiriladi. Bunda 1, 9, 28, 36, 44, 47 va S-ustunlarini toʻldirish quyidagi xususiyatlarga ega:

1-ustun. “Deklaratsiya tipi”

Ustunning birinchi kichik boʻlimida:

Oʻzbekiston Respublikasining bojxona hududidan olib chiqiladigan tovarlarga nisbatan “EK” koʻrsatiladi;

Oʻzbekiston Respublikasining bojxona hududiga olib kelinadigan tovarlarga nisbatan – “IM” koʻrsatiladi.

Ikkinchi kichik boʻlimda bojxona rejimining ikki belgili kodi – “31” koʻrsatiladi.

9-ustun. “Moliyaviy tartibga solish uchun masʼul shaxs”

Ustunda yuk bojxona deklaratsiyasini toʻldirish boʻyicha Yoʻriqnomada nazarda tutilgan tartibda tovarlarni koʻchiruvchi (tovarlarni vaqtinchalik chetdan olib kelishga (chetga olib chiqishga) ruxsatnoma olgan) shaxs toʻgʻrisidagi maʼlumotlar koʻrsatiladi.

28-ustun. “Moliyaviy maʼlumotlar va bank maʼlumotlari”

Ustunda (rekvizitlarning har birini yangi satrdan boshlab va ularning har biri oldiga tartib raqami qoʻyib):

1 – soʻmlarda hisob-kitob schyoti raqami, KTUT kodi va 9-ustunda koʻrsatilgan shaxsning hisob-kitob schyoti ochilgan bankning qisqacha nomi koʻrsatiladi;

2 – xorijiy valyutadagi schyot raqami, KTUT kodi va 9-ustunda koʻrsatilgan shaxsning hisob-kitob schyoti ochilgan bankning qisqacha nomi koʻrsatiladi.

Xorijiy firmalarning (tashkilotlarning) vakolatxonalarida moliyaviy maʼlumotlar va bank maʼlumotlari mavjud boʻlmagan taqdirda ustun toʻldirilmaydi.

36-ustun. “Preferensiyalar”

Bojxona toʻlovlarini toʻlashdan qisman ozod etilgan taqdirda ustunda tegishli pozitsiyalarda “0” qoʻyiladi.

Vaqtinchalik chetdan olib kelingan (chetga olib chiqilgan) tovarlar qaytarib chetdan olib kelinganda (chetga olib chiqilganda) ustun toʻldirilmaydi.

Bojxona toʻlovlari toʻlashdan toʻliq ozod etilganda ustun yuk bojxona deklaratsiyasini toʻldirish boʻyicha Yoʻriqnomaga muvofiq toʻldiriladi.

44-ustun. “Qoʻshimcha maʼlumotlar taqdim etiladigan hujjatlar”

Ijaraga olingan tovarlar vaqtinchalik chetdan olib kelinganda (chetga olib chiqilganda) 3 raqamida yuk bojxona deklaratsiyasida ijara shartnomasi toʻgʻrisidagi maʼlumotlar (raqami, tuzilgan sanasi va amal qilish muddati) koʻrsatiladi.

8 raqamida vaqtinchalik chetdan olib kelish (chetga olib chiqish)ning bojxona rejimiga qoʻyiladigan tovarlar qaytarib chetga olib ketilishi (chetdan olib kelinishi) yoxud boshqa bojxona rejimiga oʻtkazilishi kerak boʻlgan muddat quyidagi shaklda koʻrsatiladi:

8 – “201__” “___” “____” gacha “Tovarlarni qaytarib chetdan olib kelish (chetga olib chiqish) yoxud boshqa bojxona rejimiga oʻtkazish majburiyatini olaman”.

47-ustun. “Bojxona bojlari va yigʻimlarni hisoblab chiqish”

Bojxona bojlari va soliqlar summasini hisoblab chiqishda “TU” (toʻlov usuli) ustunining beshinchi kichik ustunida stunni toʻldirishda harfli kod “ShHYo” – shartli hisoblab yozish — bojxona toʻlovlarining shartli hisoblab yozilishi qoʻyiladi.

S-ustuni

Ustunda:

4-bandda — vaqtinchalik chetdan olib kelish (chetga olib chiqish) muddatlari uzaytirilganda yuk bojxona deklaratsiyasining 1 va 5-nusxalarida “201__” “____” “____” dagi ___-son ruxsatnoma asosida “Muddat “201__” “____” “____” gacha uzaytirilgan” yozuvi qayd etiladi.

Yuk bojxona deklaratsiyasining orqa tomonini toʻldirish namunasi

Yuk bojxona deklaratsiyasining orqa tomonida quyidagi maʼlumotlar koʻrsatiladi:

1. Shartli hisoblab yozilgan bojxona bojlari va soliqlar summasi _____ AQSh dollari.

2. Davriy bojxona toʻlovi miqdori _____ AQSh dollari.

3. Davriy bojxona toʻlovini toʻlash muddati “201__” “____” “____”gacha.

4. Toʻlov “201__” “____” “____”dan “201__” “____” “____”gacha boʻlgan davr uchun amalga oshirildi.

kurs boʻyicha ___ AQSh dollari ______ soʻm summaga “201__” “________”dagi ____-son toʻlov topshirigʻi.

Davlat bojxona xizmati organi mansabdor shaxsining F.I.O., imzosi, shaxsiy raqamli muhr.

Tovarlar va transport vositalarini vaqtinchalik chetdan olib kelish (chetga olib chiqish) bojxona rejimiga qoʻyish qoidalariga 4-ILOVA

Vaqtinchalik chetdan olib kelish va vaqtinchalik chetga olib chiqishning ular uchun koʻproq muddatlari belgilanishi mumkin boʻlgan tovarlar

ROʻYXATI

I. Oʻzbekiston Respublikasi norezidentlarining mulki boʻlgan vaqtinchalik chetdan olib kelishning ular uchun koʻproq muddatlari belgilanishi mumkin boʻlgan tovarlar roʻyxati

1. Xorijiy davlatlar diplomatik va konsullik vakolatxonalarining hamda ularga tenglashtirilgan vakolatxonalarning Oʻzbekiston Respublikasi hududida normal faoliyat koʻrsatishini taʼminlash uchun ushbu vakolatxonalarning diplomatik agentlari hamda maʼmuriy-texnik xodimlari hamda Oʻzbekiston Respublikasi hududida doimiy yashash joyiga ega boʻlmagan ularning oila aʼzolari tomonidan shaxsiy foydalanish uchun olib kelinadigan tovarlar, shuningdek xorijiy davlatlar ommaviy axborot vositalarining akkreditatsiya qilingan muxbirlari va muxbirlik punktlarining oʻz ehtiyojlari uchun olib kelinadigan avtotransport vositalari.

Bunday tovarlarni vaqtinchalik chetdan olib kelishga ruxsatnoma Oʻzbekiston Respublikasi vakolatli organlari tomonidan yuqorida koʻrsatib oʻtilgan vakolatxonalar va shaxslarning akkreditatsiya muddatiga beriladi hamda ularning akkreditatsiyasini uzaytirish muddatlaridan kelib chiqib uzaytiriladi.

Vaqtinchalik chetdan olib kelingan tovarlarni nazorat qilish uchun Oʻzbekiston Respublikasi Tashqi ishlar vazirligi xorijiy davlatlar diplomatik va konsullik vakolatxonalarining hamda ularga tenglashtirilgan vakolatxonalarning Oʻzbekiston Respublikasi hududidagi faoliyati toʻxtatilganligi toʻgʻrisida Davlat bojxona qoʻmitasini oʻz vaqtida xabardor qiladi.

2. Oʻzbekiston Respublikasining yuridik shaxslari bilan xorijiy davlatlarning yuridik shaxslari oʻrtasidagi ijara shartnomalari asosida vaqtinchalik chetdan olib kelinadigan temir yoʻl transporti vositalari, shuningdek ularga ehtiyot qismlar va ularga xizmat koʻrsatish uchun transport asbob-uskunasi. Vaqtinchalik chetdan olib kelish muddati ijara shartnomasi muddatlaridan kelib chiqib belgilanadi.

3. Oʻzbekiston Respublikasining yuridik shaxslari bilan xorijiy davlatlarning yuridik shaxslari oʻrtasidagi ijara shartnomalari asosida vaqtinchalik chetdan olib kelinadigan havo transporti vositalari, shuningdek ularga ehtiyot qismlar va ularga xizmat koʻrsatish uchun transport asbob-uskunasi. Vaqtinchalik chetdan olib kelish muddati ijara shartnomasi muddatlaridan kelib chiqib belgilanadi.

4. Lizing shartnomalari asosida chetdan olib kelinadigan tovarlar.

Bunday tovarlarni vaqtinchalik chetdan olib kelishga lizing shartnomasining amal qilish muddatiga ruxsat beriladi.

5. Oʻzbekiston Respublikasining xalqaro shartnomalariga muvofiq Oʻzbekiston Respublikasi hududiga chetdan olib kelinadigan tovarlar. Vaqtinchalik chetdan olib kelish muddati xalqaro shartnomaning amal qilish muddatidan kelib chiqib belgilanadi.

6. Mahsulot taqsimoti toʻgʻrisidagi bitimlar va geologiya-razvedka ishlarini olib borish toʻgʻrisidagi bitimlar asosida chetdan olib kelinadigan tovarlar.

Bunday tovarlarni vaqtinchalik chetdan olib kelishga ushbu bitimlarning amal qilish muddatiga ruxsat beriladi.

7. Davriy bojxona toʻlovlari ular uchun toʻliq toʻlangan tovarlar.

Vaqtinchalik chetdan olib kelish muddatini uzaytirishga ruxsatnoma Oʻzbekiston Respublikasi Bojxona kodeksining 16-moddasiga muvofiq Oʻzbekiston Respublikasining norezidentlarida tovarlarga boʻlgan mulk huquqi qoldirilgan va tovarga nisbatan vakolatli shaxsning tovarni vaqtinchalik chetdan olib kelishning bojxona rejimida qoldirish toʻgʻrisidagi arizasi mavjud boʻlgan taqdirda beriladi.

8. Imtiyozlarning amal qilish muddati tamom boʻlishi yoki mulk huquqi boshqa shaxslarga oʻtishi munosabati bilan ular boʻyicha vaqtinchalik chetdan olib kelishning bundan keyingi muddatiga davriy bojxona toʻlovlari toʻlash zaruriyati paydo boʻladigan tovarlar.

9. Investitsiya loyihalari asosida chetdan olib kelinadigan tovarlar.

Bunday tovarlarni vaqtinchalik chetdan olib kelishga investitsiya davri muddatiga yoʻl qoʻyiladi.

10. Tovarlarni yetkazib berish va xizmatlar koʻrsatishga import kontraktlar boʻyicha kafolat muddati mobaynida xizmat koʻrsatish va nuqsonlarni bartaraf etish uchun chetdan olib kelinadigan tovarlar (Oʻzbekiston Respublikasining bojxona hududida qoldirish uchun moʻljallangan tovarlar bundan mustasno).

Bunday tovarlarni vaqtinchalik chetdan olib kelishga kafolatli davr muddatiga yoʻl qoʻyiladi.

II. Oʻzbekiston Respublikasi rezidentlarining mulki boʻlgan, ular uchun vaqtincha chetga olib chiqishning koʻproq muddatlari belgilanishi mumkin boʻlgan tovarlar roʻyxati

11. Oʻzbekiston Respublikasining diplomatik vakolatxonalari va konsullik muassasalarining xorijiy davlatlar hududidagi obyektlarida foydalanish uchun olib chiqilgan tovarlar. Vaqtincha chetga olib chiqish muddatini uzaytirish koʻrsatib oʻtilgan tovarlar mavjudligi tasdiqlangan hollarda amalga oshiriladi.

12. Oʻzbekiston Respublikasining yuridik shaxslari bilan xorijiy davlatlarning yuridik shaxslari oʻrtasidagi ijara shartnomalari asosida vaqtinchalik chetga olib chiqilgan temir yoʻl transporti vositalari, shuningdek ularga ehtiyot qismlar va ularga xizmat koʻrsatish uchun transport asbob-uskunasi. Vaqtinchalik chetga olib chiqish muddati ijara shartnomasi muddatlaridan kelib chiqib belgilanadi.

13. Oʻzbekiston Respublikasining yuridik shaxslari bilan xorijiy davlatlarning yuridik shaxslari oʻrtasidagi ijara shartnomalari asosida vaqtinchalik chetga olib chiqilgan havo transporti vositalari, shuningdek ularga ehtiyot qismlar va ularga xizmat koʻrsatish uchun transport asbob-uskunasi. Vaqtinchalik chetga olib chiqish muddati ijara shartnomasi muddatlaridan kelib chiqib belgilanadi.

14. Lizing shartnomalari asosida chetga olib chiqilgan tovarlar.

Bunday tovarlarni vaqtinchalik chetga olib chiqishga lizing shartnomasi amal qilish muddatiga ruxsat beriladi.

15. Tovarlar va xizmatlarning eksport kontraktlari boʻyicha kafolat muddati mobaynida xizmat koʻrsatish va nuqsonlarni bartaraf etish uchun chetga olib chiqilgan tovarlar (Oʻzbekiston Respublikasining bojxona hududidan tashqarida qoldirish uchun moʻljallangan tovarlar bundan mustasno).

Bunday tovarlarni vaqtinchalik chetga olib chiqishga kafolatli davrning amal qilishi muddatiga yoʻl qoʻyiladi.

Tovarlar va transport vositalarini vaqtinchalik chetdan olib kelish (chetga olib chiqish) bojxona rejimiga qoʻyish qoidalariga 5-ILOVA

Vazirlar Mahkamasining 2013-yil 13-apreldagi 106-son qaroriga 2-ILOVA

Tovarlar va transport vositalarini yuk bojxona deklaratsiyasi rasmiylashtirmasdan vaqtinchalik chetdan olib kelish (chetga olib chiqish)

qoidalari

Ushbu Qoidalar tovarlar va transport vositalarini yuk bojxona deklaratsiyasi rasmiylashtirmasdan Oʻzbekiston Respublikasi hududiga vaqtinchalik chetdan olib kelish hamda Oʻzbekiston Respublikasi hududidan vaqtinchalik chetga olib chiqish shartlarini belgilaydi.

I. Tovarlar va transport vositalarini yuk bojxona deklaratsiyasi rasmiylashtirmasdan vaqtinchalik chetdan olib kelish (chetga olib chiqish) qoidalari va ularga nisbatan bojxona toʻlovlarini qoʻllash

1. Quyidagi tovarlar yuk bojxona deklaratsiyasi rasmiylashtirmasdan va bojxona toʻlovlari toʻlamasdan Oʻzbekiston Respublikasining bojxona hududiga vaqtinchalik chetdan olib kelinadi va Oʻzbekiston Respublikasi hududidan vaqtinchalik chetga olib chiqiladi:

a) qiymati belgilangan eng kam oylik ish haqining oʻn baravari miqdoridan oshmaydigan tovarlar. Koʻrsatib oʻtilgan tovarlar T-6 shaklidagi deklaratsiya va tovarga ilova qilingan hujjatlar asosida oʻtkaziladi, qonun hujjatlarida nazarda tutilgan holatlar bundan mustasno;

b) shaxsiy ehtiyojlarni qondirish uchun moʻljallangan xorijiy fuqarolar va Oʻzbekiston Respublikasi hududida doimiy yashash joyiga ega boʻlmagan fuqaroligi boʻlmagan shaxslar tomonidan olib kelingan tovarlar.

Ushbu kichik bandning birinchi xatboshiga muvofiq avtotransport vositalari vaqtinchalik chetdan olib kelingan taqdirda bojxona bojlari va soliqlardan toʻliq ozod qilish bir yil mobaynida uch oygacha boʻlgan muddatga beriladi.

Koʻrsatilgan muddat tugagach avtotransport vositalari qaytarib olib chiqib ketilmagan taqdirda ularga nisbatan vaqtinchalik chetdan olib kelishning bundan keyingi muddati uchun davriy bojxona toʻlovlari qoʻllanadi, bunda avtotransport vositasini vaqtinchalik chetdan olib kelgan shaxsning yoki vaqtinchalik chetdan olib kelish huquqiga ega boʻlgan boshqa shaxsning nomiga yuk bojxona deklaratsiyasi rasmiylashtiriladi.

Qaytarib olib chiqib ketish taʼminlanmaganda yoki koʻrsatib oʻtilgan davrda avtotransport vositasining tegishli bojxona rejimi rasmiylashtirilganda qaytarib olib chiqib ketishning muddati oʻtgan har bir kuni uchun dvigatel hajmining har kub. santimetri uchun 0,01 AQSh dollari miqdorida yigʻim undiriladi;

v) transport vositalari, ularga ehtiyot qismlar, butlovchi buyumlar va transport asbob-uskunalari, shuningdek Oʻzbekiston Respublikasi hududiga va Oʻzbekiston Respublikasi hududidan yoʻlovchilar va yuklarni xalqaro tashuvlarda foydalaniladigan konteynerlar, poddonlar va koʻp martalab foydalaniladigan idishlar va upakovkalarning boshqa turlari.

Koʻrsatilgan transport vositalari xorijiy davlatda roʻyxatdan oʻtkazilgan boʻlishi kerak.

Koʻrsatilgan transport vositalari, ularga ehtiyot qismlar, butlovchi buyumlar va transport asbob-uskunalari, koʻp martalab foydalaniladigan idishlar va upakovkalarni vaqtinchalik olib kelishga transport operatsiyalarini amalga oshirish muddatiga, lekin uch oydan koʻp boʻlmagan muddatga bojxona bojlari va soliqlardan toʻliq ozod qilgan holda ruxsat etiladi.

Vaqtinchalik chetdan olib kelish muddati tugagach, koʻrsatilgan tovarlar Oʻzbekiston Respublikasining bojxona hududidan tashqariga olib chiqilishi yoki Oʻzbekiston Respublikasining bojxona qonunchiligiga muvofiq tegishli bojxona rejimiga joylashtirilishi kerak;

g) shaxsiy ehtiyojlarni qondirish uchun moʻljallangan, Oʻzbekiston Respublikasi fuqarolari va Oʻzbekiston Respublikasi hududida doimiy yashash joyiga ega boʻlgan fuqaroligi boʻlmagan shaxslar tomonidan chetga olib chiqiladigan tovarlar.

Ushbu kichik bandning birinchi xatboshiga muvofiq avtotransport vositalari vaqtinchalik chetga olib chiqilgan taqdirda vaqtinchalik chetga olib chiqishga bir yil mobaynida uch oygacha boʻlgan muddatga ruxsat beriladi.

Koʻrsatilgan muddat tugagach avtotransport vositasi qaytarib olib kelinmagan taqdirda unga qonun hujjatlariga muvofiq yuk bojxona deklaratsiyasi rasmiylashtiriladi.

Qaytarib olib kelish yoki avtotransport vositasining tegishli bojxona rejimini rasmiylashtirish taʼminlanmaganda koʻrsatib oʻtilgan davr uchun qaytarib olib kelishning muddati oʻtgan har bir kuni uchun dvigatel hajmining har kub. santimetri uchun 0,01 AQSh dollari miqdorida yigʻim undiriladi;

d) vaqtinchalik chetga olib chiqiladigan transport vositalari, ularga ehtiyot qismlar, butlovchi buyumlar va transport asbob-uskunalari, shuningdek yoʻlovchilar va yuklarni xalqaro tashuvlarda foydalaniladigan konteynerlar, poddonlar va koʻp martalab foydalaniladigan idishlar va upakovkalarning boshqa turlari. Koʻrsatilgan transport vositalari Oʻzbekiston Respublikasida roʻyxatdan oʻtkazilgan boʻlishi kerak.

Koʻrsatilgan transport vositalari, ularga ehtiyot qismlar, butlovchi buyumlar va transport asbob-uskunalari, koʻp martalab foydalaniladigan idishlar va upakovkalarni vaqtinchalik chetga olib chiqishga transport operatsiyalarini amalga oshirish muddatiga, lekin uch oydan koʻp boʻlmagan muddatga ruxsat beriladi.

Vaqtinchalik chetga olib chiqish muddati tugagach, koʻrsatilgan tovarlar Oʻzbekiston Respublikasining bojxona hududiga olib kelinishi yoki Oʻzbekiston Respublikasining bojxona qonunchiligiga muvofiq bojxona rejimiga qoʻyilishi kerak;

e) yoʻlovchilar va yuklarni xalqaro temir yoʻl transportida tashishda foydalaniladigan temir yoʻl transport vositalari.

2. Bojxona postida nazorat va hisobga olishni amalga oshirish uchun “b”, “v”, “g” va “d” kichik bandlarda koʻrsatilgan transport vositalarini vaqtinchalik chetdan olib kelishda (chetga olib chiqishda) qonun hujjatlarida belgilangan tartibda qayta chetga olib chiqish (chetdan olib kirish) toʻgʻrisida majburiyat rasmiylashtiriladi. Qayta chetga olib chiqish (chetdan olib kelish) majburiyatida, shuningdek transport vositalariga ehtiyot qismlar, butlovchi buyumlar va transport asbob-uskunalari, konteynerlar, poddonlar va koʻp martalab foydalaniladigan idishlar va upakovkalarning boshqa turlari toʻgʻrisidagi maʼlumotlar ham koʻrsatiladi.

II. Yakunlovchi qoidalar

3. Davlat bojxona organlari vaqtinchalik chetdan olib kelish (chetga olib chiqish)ning bojxona rejimiga qoʻyishni rasmiylashtirmasdan respublikaga vaqtinchalik chetdan olib kelingan va respublikadan vaqtinchalik chetga olib chiqilgan tovarlar va transport vositalarining hisobini yuritadilar.

4. Ushbu Qoidalarning buzilishida aybdor boʻlgan shaxslar qonun hujjatlariga muvofiq javob beradi.