Kasbiy taʼlim tashkilotlari oʻquvchilarini tegishli taʼlim dasturida takroran oʻqitish uchun kursda qoldirish tartibi toʻgʻrisidagi nizomni tasdiqlash haqida (2450-son)

11.04.2013

Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi direktorining

buyrugʻi

[Oʻzbekiston Respublikasi Adliya vazirligi tomonidan 2013-yil 11-aprelda roʻyxatdan oʻtkazildi, roʻyxat raqami 2450]

Oʻzbekiston Respublikasining “Taʼlim toʻgʻrisida”gi (Oʻzbekiston Respublikasi Oliy Majlisining Axborotnomasi, 1997-y., 9-son, 225-modda) va “Kadrlar tayyorlash milliy dasturi toʻgʻrisida”gi (Oʻzbekiston Respublikasi Oliy Majlisining Axborotnomasi, 1997-y., 11-12-son, 295-modda) qonunlariga hamda Oʻzbekiston Respublikasi Vazirlar Mahkamasining 2012-yil 29-dekabrdagi 367-son “Oʻrta maxsus, kasb-hunar taʼlimi muassasalari oʻquvchilari oʻqishini koʻchirish, qayta tiklash va oʻqishdan chetlashtirish tartibini takomillashtirish haqida”gi qaroriga (Oʻzbekiston Respublikasi qonun hujjatlari toʻplami, 2013-y., 1-son, 6-modda) muvofiq buyuraman:

1. Kasbiy taʼlim tashkilotlari oʻquvchilarini tegishli taʼlim dasturida takroran oʻqitish uchun kursda qoldirish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Direktor J. ISMAILOV

Toshkent sh.,

2013-yil 11-mart,

62/1-son

Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi direktorining 2013-yil 11-martdagi 62/1-son buyrugʻiga ILOVA

Kasbiy taʼlim tashkilotlari oʻquvchilarini tegishli taʼlim dasturida takroran oʻqitish uchun kursda qoldirish tartibi toʻgʻrisidagi

NIZOM

Mazkur Nizom kasbiy taʼlim tashkilotlarining (bundan buyon matnda taʼlim tashkiloti deb yuritiladi) oʻquvchilarini tegishli taʼlim dasturida takroran oʻqitish uchun kursda qoldirish tartibini belgilaydi.

Mazkur Nizom xorijiy taʼlim tashkilotlari va ularning filiallari (markaz, boʻlim, oʻquv-maslahat punkti va shu kabilar) va harbiy akademik litseylar hamda olimpiya va paralimpiya sport turlariga tayyorlash markazlariga tatbiq etilmaydi.

I bob. Umumiy qoidalar

1. Oʻquvchilarni tegishli taʼlim dasturida takroran oʻqitish uchun kursda qoldirish ularni taʼlim tashkilotidan chetlashtirish deb hisoblanmaydi.

2. Taʼlim tashkilotida har bir oʻquv yilga oʻquvchilarni tegishli taʼlim dasturida takroran oʻqitish uchun kursda qoldirish va ularni qayta oʻqishini rasmiylashtirish toʻgʻrisidagi murojaatlarni koʻrib chiqish komissiyasi (bundan buyon matnda Komissiya deb yuritiladi) tashkil etiladi.

Komissiyaga taʼlim tashkilotining direktori rahbarlik qiladi.

Komissiyaning tarkibi taʼlim tashkilotining Pedagogik kengashi qarori bilan tasdiqlanadi hamda taʼlim tashkiloti direktorining buyrugʻi bilan rasmiylashtiriladi.

3. Komissiya tarkibiga maʼnaviy-maʼrifiy, oʻquv va ishlab chiqarish ishlari boʻyicha direktor oʻrinbosarlari, kafedra mudirlari, boʻlim boshliqlari, guruh rahbarlari hamda taalluqli fan oʻqituvchilari kiradi.

4. Qoraqalpogʻiston Respublikasi Kasbiy taʼlim agentligi, viloyatlar va Toshkent shahar kasbiy taʼlim boshqarmalari (bundan buyon matnda hududiy kasbiy taʼlim boshqarmasi deb yuritiladi) taʼlim tashkiloti tomonidan taqdim etilgan oʻquvchilarni tegishli taʼlim dasturida takroran oʻqitish uchun kursda qoldirishga tegishli hujjatlarning haqqoniyligini oʻrganish huquqiga ega.

II bob. Oʻquvchilarni tegishli taʼlim dasturida takroran oʻqitish uchun kursda qoldirish

5. Oʻquvchilarni tegishli taʼlim dasturida takroran oʻqitish uchun kursda qoldirish quyidagi hollarda amalga oshiriladi:

akademik qarzdorlikka (oʻzlashtirilmaslikka) ega boʻlganda;

yagona ishlab chiqarish amaliyotlaridan oʻtmaganda;

kurs ishini topshirmaganda;

3 va undan ortiq fan boʻyicha “qoniqarsiz” yakuniy yillik baho olganda.

6. Har bir guruh rahbari tomonidan har bir kurslarni tamomlash yakunlari boʻyicha akademik qarzdorlikka (oʻzlashtirilmaslikka) ega boʻlgan, yagona ishlab chiqarish amaliyotlaridan oʻtmagan, kurs ishini topshirmagan hamda 3 va undan ortiq fan boʻyicha “qoniqarsiz” yakuniy yillik baho olgan oʻquvchilar toʻgʻrisidagi maʼlumotlar Komissiyaga koʻrib chiqish uchun taqdim etiladi.

Tegishli taʼlim dasturida takroran oʻqitish uchun kursda qoldirilishi mumkin boʻlgan oʻquvchilarning ota-onalari (yoki ularning oʻrnini bosuvchi shaxslar) oʻquv yili davomida muntazam ravishda taʼlim tashkiloti tomonidan oʻquvchilarni oʻzlashtirish va darslardagi ishtiroki koʻrsatkichlari toʻgʻrisida xabardor qilib boriladi.

7. Tegishli taʼlim dasturida takroran oʻqitish uchun kursda qoldirilishi koʻzda tutilgan oʻquvchilarning ota-onalari (yoki ularning oʻrnini bosuvchi shaxslar) yashash manzili va fuqarolar yigʻiniga ushbu masalani Komissiyada koʻrib chiqish vaqti koʻrsatilgan holda taʼlim tashkiloti direktorining rasmiy xabarnomasi yuboriladi.

Kursda qoldirilayotgan oʻquvchilarning ota-onalari (yoki ularning oʻrnini bosuvchi shaxslar) va fuqarolar yigʻini vakili Komissiya ishida ishtirok etmaganliklari Komissiya ishining toʻxtatilishiga yoki tegishli xulosalar chiqarmaslikka asos boʻlmaydi.

8. Oʻquvchilarni tegishli taʼlim dasturida takroran oʻqitish uchun kursda qoldirish yuzasidan har yili oʻquv yili yakuni boʻyicha 1-iyulga qadar Komissiya quyidagi ishlarni amalga oshiradi:

tegishli kursni tamomlash yakunlari boʻyicha akademik qarzdorlikka (oʻzlashtirilmaslikka) ega boʻlgan, kurs ishini topshirmagan, yagona ishlab chiqarish amaliyotlaridan oʻtmagan hamda 3 va undan ortiq fan boʻyicha “qoniqarsiz” yakuniy yillik baho olgan oʻquvchilarni tegishli taʼlim dasturida takroran oʻqitish uchun kursda qoldirish toʻgʻrisidagi hujjatlarni oʻrganadi;

Komissiyaning masʼul kotibi tomonidan tegishli taʼlim dasturida takroran oʻqitish uchun kursda qoldirish koʻzda tutilgan oʻquvchilarni roʻyxati shakllantiriladi;

Komissiya tegishli taʼlim dasturida takroran oʻqitish uchun kursda qoldirish koʻzda tutilgan oʻquvchilarning hujjatlarini hududiy kasbiy taʼlim boshqarmasi bilan kelishib Pedagogik kengashga taqdim etadi.

9. Pedagogik kengash taqdim etilgan hujjatlarini oʻrganib chiqib, tegishli taʼlim dasturida takroran oʻqitish uchun kursda qoldiriladigan oʻquvchilarga nisbatan tegishli qaror qabul qiladi.

Pedagogik kengash qaroriga oʻquvchilarni oʻqitish kursini tamomlash yakunlari boʻyicha reyting koʻrsatkichi va kurs ishini topshirish natijalari, shuningdek yagona ishlab chiqarish amaliyoti natijalari ilova qilinadi.

10. Pedagogik kengash qarori asosida oʻquvchilarni tegishli taʼlim dasturida takroran oʻqitish uchun kursda qoldirish toʻgʻrisida taʼlim tashkiloti direktorining buyrugʻi rasmiylashtiriladi.

11. Oʻquvchilarni tegishli taʼlim dasturida takroran oʻqitish uchun kursda qoldirishga asos boʻlgan hujjatlarning asl nusxalari taʼlim tashkilotining xodimlar boʻlimi yoki arxivida saqlanadi.

12. Kursda qoldirilgan oʻquvchilarning shaxsiy hujjatlari oʻquvchi yoki ota-onalari (yoki ularning oʻrnini bosuvchi shaxslar)ga berilmaydi.

III bob. Tegishli taʼlim dasturida takroran oʻqitish uchun kursda qoldirilgan oʻquvchilarning qayta oʻqishini rasmiylashtirish

13. Oʻquvchilarning oʻquv yili boshlangunga qadar qayta oʻqishini rasmiylashtirish toʻgʻrisidagi arizalari ular taʼlim olayotgan taʼlim tashkilotida qabul qilinadi va ushbu arizalar Komissiya tomonidan koʻrib chiqiladi.

Tegishli taʼlim dasturida takroran oʻqitish uchun kursda qoldirilgan oʻquvchilarning qayta oʻqishini rasmiylashtirish uchun oʻquvchi voyaga yetmagan boʻlsa, ota-onasi (yoki ularning oʻrnini bosuvchi shaxslar) tomonidan taʼlim tashkiloti direktori nomiga ariza beriladi.

14. Taʼlim tashkilotining Pedagogik kengashi tegishli taʼlim dasturida takroran oʻqitish uchun kursda qoldirilgan oʻquvchilarning qayta oʻqishini rasmiylashtirish toʻgʻrisida qaror qabul qiladi. Ushbu qaror asosida taʼlim tashkiloti direktorining tegishli buyrugʻi rasmiylashtiriladi.

Mazkur buyruqda oʻquvchilar oʻqiydigan oʻquv kursi, tayyorlov yoʻnalishi va guruh raqami koʻrsatilishi shart.

15. Agar tegishli taʼlim dasturida takroran oʻqitish uchun kursda qoldirilgan oʻquvchini qayta oʻqishini rasmiylashtirish davrida uni oʻqigan taʼlim yoʻnalishi (mutaxassisligi) tugatilgan boʻlsa, oʻquvchining xohishiga koʻra shu taʼlim tashkilotidagi mos va turdosh yoʻnalishi (mutaxassisligi) boʻyicha rasmiylashtirish masalasi ham ariza bilan birga taʼlim tashkiloti Pedagogik kengashi tomonidan koʻrib chiqilishi va hal etilishi lozim.

IV bob. Yakuniy qoidalar

16. Majburiy taʼlimni davom ettirish uchun oʻquvchilarga toʻsqinlik qilayotgan taʼlim tashkiloti rahbarlari, masʼul xodimlar, shuningdek oʻquvchilarning ota-onalari (yoki ularning oʻrnini bosuvchi shaxslar) qonunchilik hujjatlariga muvofiq javobgardir.

17. Kursda qoldirilishi yoki qayta oʻqishini rasmiylashtirishdan norozi boʻlgan oʻquvchilarning masalasini koʻrib chiqish boʻyicha ularning ota-onalari (yoki ularning oʻrnini bosuvchi shaxslar) hududiy kasbiy taʼlim boshqarmasiga yozma murojaat qilishlari mumkin.

18. Mazkur Nizom Oʻzbekiston Respublikasi Sogʻliqni saqlash vazirligi, Madaniyat va sport ishlari vazirligi va Oʻzbekiston Badiiy akademiyasi bilan kelishilgan.

Sogʻliqni saqlash vaziri A. ALIMOV

2013-yil 11-mart

Madaniyat va sport ishlari vaziri M. XODJIMATOV

2013-yil 11-mart

Oʻzbekiston Badiiy akademiyasi raisi A. NURIDINOV

2013-yil 11-mart