Toʻlov terminallari bilan jihozlash va aholi bilan pul hisob-kitoblarini amalga oshirishda ularni qoʻllash tartibi toʻgʻrisidagi nizomga oʻzgartirish va qoʻshimchalar kiritish haqida (1986-2-son)

01.04.2013

Oʻzbekiston Respublikasi Markaziy banki Boshqaruvi Oʻzbekiston Respublikasi Davlat soliq qoʻmitasining

Qarori

[Oʻzbekiston Respublikasi Adliya vazirligi tomonidan 2013-yil 1-aprelda roʻyxatdan oʻtkazildi, roʻyxat raqami 1986-2]

Oʻzbekiston Respublikasining “Oʻzbekiston Respublikasining Markaziy banki toʻgʻrisida” (Oʻzbekiston Respublikasi Oliy Majlisining Axborotnomasi, 1995-y., 12-son, 247-modda), “Davlat soliq xizmati toʻgʻrisida” (Oʻzbekiston Respublikasi Oliy Majlisining Axborotnomasi, 1997-y., 9-son, 232-modda) va “Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi (Oʻzbekiston Respublikasi qonun hujjatlari toʻplami, 2013-y., 1-son, 1-modda) qonunlariga muvofiq Oʻzbekiston Respublikasi Markaziy banki Boshqaruvi va Davlat soliq qoʻmitasi qaror qiladilar:

1. Oʻzbekiston Respublikasi Markaziy banki Boshqaruvi va Davlat soliq qoʻmitasining 2009-yil 20-iyundagi 18/1, 2009-20-son qarori (roʻyxat raqami 1986, 2009-yil 27-iyul) (Oʻzbekiston Respublikasi qonun hujjatlari toʻplami, 2009-y., 30-31-son, 351-modda) bilan tasdiqlangan “Toʻlov terminallari bilan jihozlash va aholi bilan pul hisob-kitoblarini amalga oshirishda ularni qoʻllash tartibi toʻgʻrisida”gi nizomga ilovaga muvofiq oʻzgartirish va qoʻshimchalar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

Markaziy bank raisi F. MULLAJONOV

Toshkent sh.,

2013-yil 2-mart,

5/2-son

Davlat soliq qoʻmitasi raisi B. PARPIYEV

Toshkent sh.,

2013-yil 2-mart,

2013-18-son

Oʻzbekiston Respublikasi Markaziy banki Boshqaruvi va Davlat soliq qoʻmitasining 2013-yil 2-martdagi 5/2, 2013-18-sonli qaroriga ILOVA

Toʻlov terminallari bilan jihozlash va aholi bilan pul hisob-kitoblarini amalga oshirishda ularni qoʻllash tartibi toʻgʻrisidagi nizomga kiritilayotgan oʻzgartirish va qoʻshimchalar

1. 1-band quyidagi mazmundagi toʻrtinchi xatboshi bilan toʻldirilsin:

“Savdo kartasi — bank plastik kartochkalaridan toʻlovlarni qabul qilish boʻyicha toʻlov terminali, infokiosk (oʻz-oʻziga xizmat koʻrsatish toʻlov-maʼlumot terminali) va bankomat orqali naqd yoki naqd pulsiz toʻlovlarni amalga oshirish uchun ularga oʻrnatiladigan, amalga oshirilgan hisob-kitoblar toʻgʻrisidagi tranzaksiyalarni inkassatsiya qilingunga qadar jamlab boruvchi, shu bilan bir vaqtda stop-list roʻyxatidagi soʻmli bank plastik kartochkalari roʻyxatini oʻzida saqlovchi mikroprotsessorli plastik karta;”;

toʻrtinchi va beshinchi xatboshilar tegishincha beshinchi va oltinchi xatboshilar deb hisoblansin.

2. 2-bandning oltinchi xatboshisidan “kredit uyushmalari,” degan soʻzlar chiqarib tashlansin.

3. 10-bandning birinchi xatboshisi quyidagi tahrirda bayon etilsin:

“Savdo va xizmat koʻrsatish obyektlari rahbarlari toʻlov terminallarining uzluksiz ishlashini hamda obyektlarda “Oʻzkart” banklararo chakana toʻlov tizimi shartli belgisi boʻlishini taʼminlashlari shart.”.

4. Quyidagi mazmundagi 101-band bilan toʻldirilsin:

“101. Savdo va xizmat koʻrsatish obyektlari faoliyatini toʻxtatgan hollarda, bir ish kunidan kechiktirmasdan toʻlov terminallari va ularning savdo kartalarini bergan tijorat banklariga bank plastik kartochkalari boʻyicha toʻlovlarni amalga oshiruvchi tizimdan oʻzlarini chiqarish uchun murojaat qilishlari shart.

Tijorat banklari bir ish kuni ichida toʻlov terminali savdo kartalaridagi mablagʻlarning toʻliq inkassatsiyasini amalga oshirib, barcha mablagʻlarni mijozning asosiy depozit hisobvaragʻiga oʻtkazadi hamda toʻlov terminallari va ularning savdo kartalarini bank plastik kartochkalari boʻyicha toʻlovlarni amalga oshiruvchi tizimdan chiqaradi.

Faoliyatini toʻxtatgan savdo va xizmat koʻrsatish obyektlari toʻlov terminallari va ularning savdo kartalarini ijaraga bergan tijorat bankiga qaytarishi shart.

Savdo va xizmat koʻrsatish obyektlari tomonidan bank plastik kartochkalari boʻyicha toʻlovlarni amalga oshiruvchi tizimga ulangan toʻlov terminallari va ularning savdo kartalarini boshqa xoʻjalik yurituvchi subyektlarga foydalanish uchun berilishiga yoʻl qoʻyilmaydi.

Oʻzlariga tegishli boʻlgan (tizimga ulangan) toʻlov terminallari va ularning savdo kartalarini boshqa xoʻjalik yurituvchi subyektlarga foydalanish uchun bergan savdo va xizmat koʻrsatish obyektlari qonun hujjatlarida belgilangan tartibda javobgar boʻladilar.”.

5. Ushbu oʻzgartirish va qoʻshimchalar Oʻzbekiston Respublikasi Savdo-sanoat palatasi bilan kelishilgan.

Oʻzbekiston Respublikasi Savdo-sanoat palatasi raisi A. ShAYXOV

2013-yil 25-fevral