Bojxona yuk deklaratsiyalariga tuzatish kiritish, qayta rasmiylashtirish va bekor qilish tartibi toʻgʻrisidagi nizomga oʻzgartirish va qoʻshimchalar kiritish toʻgʻrisida (2143-2-son)

11.03.2013

Oʻzbekiston Respublikasi Davlat bojxona qoʻmitasining

Qarori

[Oʻzbekiston Respublikasi Adliya vazirligi tomonidan 2013-yil 11-martda roʻyxatdan oʻtkazildi, roʻyxat raqami 2143-2]

Oʻzbekiston Respublikasi Bojxona kodeksi (Oʻzbekiston Respublikasi Oliy Majlisining Axborotnomasi, 1998-yil, 2-son, 36-modda), “Davlat bojxona xizmati toʻgʻrisida”gi Oʻzbekiston Respublikasi Qonunining 6-moddasi (Oʻzbekiston Respublikasi Oliy Majlisining Axborotnomasi, 1997-y., 9-son, 230-modda), Oʻzbekiston Respublikasi Prezidentining 2012-yil 18-iyuldagi PF–4455-son “Ishbilarmonlik muhitini yanada tubdan yaxshilash va tadbirkorlikka yanada keng erkinlik berish chora-tadbirlari toʻgʻrisida”gi Farmoni (Oʻzbekiston Respublikasi qonun hujjatlari toʻplami, 2012-y., 29-son, 328-modda) va Oʻzbekiston Respublikasi Vazirlar Mahkamasining 2012-yil 29-dekabrdagi 370-son “Tovarlarni elektron shaklda bojxona rasmiylashtiruvi tartibi toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2013-y., 1-son, 9-modda) asosan Oʻzbekiston Respublikasi Davlat bojxona qoʻmitasi qaror qiladi:

1. Oʻzbekiston Respublikasi Davlat bojxona qoʻmitasining 2010-yil 19-avgustdagi 01-02/15-17-son qarori (roʻyxat raqami 2143, 2010-yil 24-sentabr) (Oʻzbekiston Respublikasi qonun hujjatlari toʻplami, 2010-y., 38-son, 339-modda) bilan tasdiqlangan Bojxona yuk deklaratsiyalariga tuzatish kiritish, qayta rasmiylashtirish va bekor qilish tartibi toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

Davlat bojxona qoʻmitasi raisi Z. DUSANOV

Toshkent sh.,

2013-yil 8-fevral,

01-02/15-17-son

Oʻzbekiston Respublikasi Davlat bojxona qoʻmitasining 2013-yil 8-fevraldagi 01-02/15-17 -son qaroriga ILOVA

Bojxona yuk deklaratsiyalariga tuzatish kiritish, qayta rasmiylashtirish va bekor qilish tartibi toʻgʻrisidagi nizomga kiritilayotgan oʻzgartirish va qoʻshimchalar

1. Muqaddima “qoʻyilgandan soʻng” degan soʻzlardan keyin “qogʻoz yoki elektron shakldagi” degan soʻzlar bilan toʻldirilsin.

2. 5-bandda “BYuDning birinchi nusxasini” degan soʻzlar “BYuDni” degan soʻz bilan almashtirilsin.

3. 14-bandda:

uchinchi xatboshida “hamda blank tipografik raqamlari” degan soʻzlar “raqami” degan soʻz bilan almashtirilsin;

yettinchi xatboshida “BYuDning birinchi nusxasi (bojxona uchun nusxa)” degan soʻzlar “qogʻoz shakldagi BYuDning birinchi nusxasi (bojxona uchun nusxa) yoki elektron shakldagi BYuDning qogʻoz nusxasi” degan soʻzlar bilan almashtirilsin.

4. 16-band quyidagi mazmundagi xatboshi bilan toʻldirilsin:

“BYuDning elektron nusxasiga oʻzgartirish kiritish mazkur Nizomning 18-bandi ikkinchi xatboshisida koʻrsatilgan tartibda amalga oshiriladi.”.

5. 18-band quyidagi mazmundagi xatboshi bilan toʻldirilsin:

“Komissiya tomonidan elektron shakldagi BYuDga oʻzgartirish kiritish yoki uni qayta rasmiylashtirish toʻgʻrisida qaror qabul qilinganda yoki bojxona organi mansabdor shaxsining bildirgisiga hududiy bojxona organi boshligʻining rezolyutsiyasiga koʻra, mazkur elektron shakldagi BYuDni rasmiylashtirgan bojxona postida bojxona organi mansabdor shaxsi tomonidan, uch ish kuni davomida, boshlangʻich taqdim etilgan elektron shakldagi BYuD “roʻyxatga olingan rasmiylashtirilgan” maqomidan “qayta rasmiylashtirilgan” maqomiga oʻtkaziladi va uning oʻrniga maʼlumotlar bazasida toʻgʻrilangan elektron shakldagi BYuD roʻyxatga olinadi.”.

6. 20-band quyidagi mazmundagi xatboshi bilan toʻldirilsin:

“Elektron shakldagi BYuDni bekor qilish toʻgʻrisida qaror qabul qilinganda mazkur elektron shakldagi BYuDni rasmiylashtirgan bojxona postida bojxona organi mansabdor shaxsi tomonidan, uch ish kuni davomida, boshlangʻich taqdim etilgan elektron shakldagi BYuD “roʻyxatga olingan rasmiylashtirilgan” maqomidan “bekor qilingan” maqomiga oʻtkaziladi.”.

7. Ilovaning 2-bandi “yoki elektron shakldagi BYuDning yuk egasi yoki bojxona brokeri uchun tayyorlab berilgan qogʻoz nusxalari (“eksport” rejimida yuk moʻljallangan mamlakatga yuborish uchun tayyorlab berilgan nusxa bundan mustasno);” degan soʻzlar bilan toʻldirilsin.