Tumandagi barcha yuridik va jismoniy shaxslarga, shu jumladan xorijiy yuridik va jismoniy shaxslarga tegishli boʻlgan va belgilangan tartibda davlat yoʻl harakati xavfsizligi xizmati organlarida roʻyxatdan oʻtkazilgan transport vositalarini majburiy texnik koʻrikdan oʻtkazish toʻgʻrisida (229-k-son)

16.02.2013

Andijon viloyati Xoʻjaobod tumani hokimining

Qarori

Oʻzbekiston Respublikasi Vazirlar Mahkamasining 2003-yil 31-yanvardagi “Transport vositalarini majburiy texnik koʻrikdan oʻtkazish tartibi toʻgʻrisida”gi Nizomni tasdiqlash haqidagi 54-sonli qarori, Oʻzbekiston Respublikasi Ichki Ishlar vazirligining 2003-yil 19-fevraldagi “Transport vositalarini majburiy texnik koʻrikdan oʻtkazish tartibi toʻgʻrisida”gi 56-sonli buyrugʻi talablarini bajarish hamda Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6, 25-moddalari, Xoʻjaobod tumani ichki ishlar boʻlimining 2013-yil 29-yanvardagi 12-sonli xatini koʻrib chiqib qaror qilaman:

1. Xoʻjaobod tumani ichki ishlar boʻlimining 2013-yil 29-yanvardagi 12-sonli xati inobatga olinsin.

2. Tumandagi barcha yuridik va jismoniy shaxslarga, shu jumladan xorijiy yuridik va jismoniy shaxslarga tegishli boʻlgan va belgilangan tartibda davlat yoʻl harakati xavfsizligi xizmati organlarida roʻyxatdan oʻtkazilgan transport vositalarini texnik koʻrigi joriy yilning 1-yanvaridan 31-avgust kuniga qadar oʻtkazilishi taʼminlansin.

3. Shaxsiy avtotransportlarning texnik koʻrigi davrida avtohavaskorlar jamiyatiga aʼzo qilishda yaqindan yordam berish tuman ichki ishlar boʻlimi yoʻl harakati xavfsizligi boʻlinmasi (A. Ismoilov) zimmasiga yuklatilsin.

4. Yuridik shaxslarga qarashli boʻlgan avtotransport vositalarini Nizomning 5-bandidagi “a” kichik bandiga asosan kichik majburiy texnik koʻrigi 1-martdan 30-iyungacha oʻtkazilsin.

5. Xoʻjaobod tumani hududidagi barcha tashkilot, korxona muassasalar, xususiy subyektlar, fermerlar va MMTP avtotransport vositalarini 2013-yil davomida davlat texnik koʻrigidan oʻtkazish boʻyicha tuman nazorat komissiyasining 1-ilovaga* hamda Xoʻjaobod tumani hududida joylashgan barcha tashkilot, korxona, qishloq xoʻjaligi, fermer xoʻjaliklari, MMTPlar hamda xususiy firmalariga tegishli boʻlgan avtomototransport vositalarini 2013-yil majburiy texnik koʻrikdan oʻtkazish jadvali 2-ilovaga muvofiq tasdiqlansin.

*1-ilova berilmaydi.

6. Tuman Ichki ishlar boʻlimi boshligʻi (K. Mirzakarimov)ga yuridik va jismoniy shaxslarga tegishli boʻlgan avtotransport vositalarini texnik koʻrigini bajarilishi yuzasidan 2013-yilning avgust oyida tuman hokimligiga axborot berish vazifasi yuklatilsin.

7. Tuman “Haqiqat” roʻznomasi (T. Shermatov)ga gazetada mazkur qarorni eʼlon qilish tavsiya etilsin.

8. Mazkur qaror qabul qilinishi munosabati bilan tuman hokimining 2011-yil 4-fevraldagi 7-f sonli farmoyishi oʻz kuchini yoʻqotgan deb hisoblansin.

9. Ushbu qaror ijrosini nazorat qilish tuman hokimining birinchi oʻrinbosari D. Anorboyev zimmasiga yuklatilsin.

Hokim E. YaKUBOV

Xoʻjaobod t.,

2013-yil 16-fevral,

229-k-son

Xoʻjaobod tumani hokimining 2013-yil 16-fevraldagi 229-q-sonli qaroriga 2-ILOVA

Xoʻjaobod tumani hududida joylashgan barcha tashkilot, korxona qishloq xoʻjaligi, fermer hoʻjaliklari, MMTPlar hamda xususiy firmalariga tegishli boʻlgan avtotransport vositalarini 2013-yil majburiy texnik koʻrikdan oʻtkazish

jadvali

Tuman hududidagi shaxsiy avtotransport vositalarini texnik koʻrikdan oʻtkazish jadval asosida hududlarda oʻtkaziladi.