Xizmat turar joylari olish huquqiga ega boʻlgan shaxslar roʻyxatiga oʻzgartirish kiritish toʻgʻrisida (67-son)

06.03.2013

Oʻzbekiston Respublikasi Vazirlar Mahkamasining

qarori

Doimiy yashash joyidan tashqaridagi hududda belgilangan tartibda ishga tayinlangan davlat boshqaruvi hududiy organlarining va prokuratura organlarining xodimlariga qulay turar joy sharoitlarini taʼminlash maqsadida Vazirlar Mahkamasi qaror qiladi:

1. Vazirlar Mahkamasining 2000-yil 27-yanvardagi 24-son qarori (Oʻzbekiston Respublikasi QT, 2000-y., 1-son, 7-modda) bilan tasdiqlangan Xizmat turar joylari olish huquqiga ega boʻlgan shaxslar roʻyxatining 20-bandi quyidagi tahrirda bayon qilinsin:

“20. Boshqa mintaqalardan ishga taklif qilingan Prezident Devoni, Oliy Majlis Kotibiyati, Vazirlar Mahkamasi, vazirliklar, idoralar va ularning hududiy boʻlinmalari apparatlarining masʼul xodimlari, prokuratura organlarining xodimlari”.

2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2013-yil 6-mart,

67-son