Andijon tumanida ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini 2013-yil uchun eng kam miqdorini belgilash toʻgʻrisida (1233-k-son)

02.11.2012

Andijon viloyati Andijon tumani hokimining

Qarori

Oʻzbekiston Respublikasi “Aholini ish bilan taʼminlash toʻgʻrisida”gi Qonunining 17-moddasiga muvofiq va qonun asosiga koʻra Vazirlar Mahkamasining 2008-yil 20-avgustdagi “Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish tartibi toʻgʻrisida”gi Nizomni tasdiqlash haqidagi 186-sonli xamda viloyat hokimining 2008-yil 25-avgustdagi № 145-K sonli qarorlari ijrosini tumanda bajarilishini taʼminlash maqsadida, Oʻzbekiston Respublikasi “Mahalliy Davlat hokimiyati toʻgʻrisida”gi Qonunining 6-moddasiga asosan qaror qilaman:

1. Andijon tumanida 2013-yil uchun tumandagi ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini eng kam miqdorini barpo etish boʻyicha taklifi 1-ilovaga* qilingan roʻyxatga asosan tasdiqlansin.

*1-ilova berilmaydi.

2. Oʻzbekiston Respublikasi “Aholini ish bilan taʼminlash toʻgʻrisida”gi Qonunining 17-moddasiga asosan ilovadagi korxonalarda ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish, xodimlarning roʻyxatdagi oʻrtacha sonining (11521 nafarini 7 foizi), yaʼni 573 nafar fuqarolarga band qilib qoʻyiladigan ish oʻrinlari tashkil etilishi koʻrsatib oʻtilsin, shu jumladan:

oʻn toʻrt yoshgacha bolalari va nogiron bolalari boʻlgan yolgʻiz ota, yolgʻiz ona hamda koʻp bolali ota-onalar uchun — 129 nafar,

taʼlim muassasalarini tamomlagan yoshlar uchun — 229 nafar,

harbiy xizmatdan boʻshatilganlar uchun — 35 nafar,

nogironlar uchun — 12 nafar,

pensiya yoshiga yaqinlashganlar uchun — 24 nafar.

jazoni oʻtash muassasalaridan ozod qilingan, jazoni oʻtayotgan yoki sud qaroriga koʻra tibbiy xarakterdagi majburiy chora koʻrilgan shaxslar uchun — 18 nafar ish oʻrni,

ijtimoiy muhofazaga muhtoj shaxslarni boshqa toifalari uchun 126 nafar ish oʻrinlari zaxirasi belgilansin.

3. Shaxslari koʻrsatib oʻtilgan toifalari uchun ish joylari xodimlar tomonidan oʻzlarining mehnat majburiyatlarini toʻsiqlarsiz bajarilishini taʼminlaydigan sanitariya-gigiyena normalari va mehnat sharoitlariga muvofiq boʻlishi, shu jumladan:

nogironlar uchun salomatligi va mehnat faoliyatiga nisbatan belgilangan koʻrsatkichlar hisobga olingan xolda mehnat faoliyatini toʻliq bajarish imkonini beruvchi ish joylari;

kasb-hunar taʼlimiga ega boʻlmagan yoshlar uchun, ular umumtaʼlim muassasalarini tamomlaganlaridan keyin bir yil davomida shogirdlik ish joylari yoki maxsus kasb-hunar tayyorgarligini talab qilmaydigan ish joylari;

oʻrta-maxsus va kasb-hunar taʼlim muassasalarini tamomlagan yoshlar, shuningdek Oʻzbekiston Respublikasi Qurolli Kuchlaridan, Ichki Ishlar vazirligi, Favqulodda Vaziyatlar vazirligi va Milliy Xavfsizlik xizmati qoʻshinlaridan boʻshatilgan shaxslar uchun ular oʻquv yurtlarini tamomlaganlaridan keyin yoki boʻshatilganlaridan keyin bir yil davomida ularning kasb-hunar tayyorgarligiga muvofiq keluvchi ish joylari;

oʻn toʻrt yoshgacha bolalari va nogiron bolalari boʻlgan yolgʻiz ota, yolgʻiz ona hamda koʻp bolali ota-onalarga bolalarini tarbiyalash va mehnat majburiyatlarini bajarilishini birga qoʻshib olib borish imkonini beruvchi oʻzgaruvchan jadvalli ish joylari;

jazoni ijro etish muassasalaridan ozod yoki sud qaroriga asosan tibbiy yoʻsindagi majburlov choralariga tortilgan shaxslar uchun maxsus malaka talab qilmaydigan har qanday ish joylari tashkil etilishi belgilansin.

4. Qarorga ilova qilingan roʻyxatdagi korxona rahbarlariga:

ushbu qaror ijrosini taʼminlash;

oʻz korxonalaridagi (mexanik, nazoratchi, qorovul, oʻt yoquvchi, chilangar, payvandlovchi, traktorchi, farrosh har xil toifadagi boshqa boʻshagan ishchi oʻrinlari) kasb va lavozimlarni tegishli tartibda band qilib qoʻyish vazifasi yuklatilsin.

5. Ushbu qaror ijrosini taʼminlashda mazkur ish joylarining koʻrsatib oʻtilgan soni korxona rahbari aybi bilan bajarilmagan taqdirda, korxona rahbarlari Oʻzbekiston Respublikasi Vazirlar Mahkamasining 2008-yil 20-avgustdagi “Ijtimoiy muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish tartibi”gi Nizomning 15-bandiga asosan jazolanishi taʼkidlansin.

6. Ijtimoiy muhofazaga muhtoj shaxslar uchun ish joylarini barpo etuvchi ish beruvchilar quyidagi imtiyozlarga ega boʻladilar, jumladan:

Ish uchastkalari (sexlar) tashkil etish uchun turar joy boʻlmagan binolarni birinchi navbatda ajratish yoʻli bilan band qilib qoʻyiladigan ish oʻrinlari tashkil etgan tashkilotlar uchun imtiyozlar belgilanishi mumkin.

7. Ushbu qaror qabul qilinishi munosabati bilan tuman hokimining 2011-yil 30-sentabrdagi № 1140-K sonli qarori 2013-yil 1-yanvardan oʻz kuchini yoʻqotgan deb hisoblansin.

8. Ushbu qaror (A. Nazarov) tuman gazetasi “Andijon tongi” orqali 3 kun muddat ichida eʼlon qilinsin.

9. Mazkur qarorning bajarilishini nazorat qilish tuman hokimining oʻrinbosari A. Xoshimov, tuman bandlikka koʻmaklashish va aholini ijtimoiy muhofaza qilish markazi direktori v.b. O. Tursunov zimmalariga yuklatilsin.

Hokim U. ISAMIDINOV

Kuygan-yor sh.,

2012-yil 2-noyabr,

1233-k-son