Andijon viloyatida “2012-yilda yangi ish oʻrinlari yaratish va aholi bandligini taʼminlash dasturi”ni tasdiqlash toʻgʻrisida (77/13-4-son)

16.11.2011

Xalq deputatlari Andijon viloyati kengashining

Qarori

Xalq deputatlari Andijon viloyati Kengashi taʼkidlaydiki, tasdiqlangan dasturga asosan viloyatda joriy yilning yanvar — sentyabr oylari davomida 63914 ta yangi ish oʻrinlari yaratilishi rejalashtirilgan boʻlib, amalda 75237 ta yangi ish oʻrinlari barpo etilib, dastur koʻrsatkichi 117,7 foizga bajarildi. Barcha tumanlar va shaharlarda belgilangan dastur topshirigʻi ortigʻi bilan bajarildi.

Dastur asosida hisobot davrida yaratilgan yangi ish oʻrinlarining salmoqli qismi Andijon shahri (9,3 ming), Andijon (5.1 ming), Asaka (7,4 ming) Qoʻrgʻontepa (5,4 ming), Paxtaobod (4,5 ming) va Shahrixon (5,6 ming) tumanlari hissasiga toʻgʻri kelgan. Jumladan:

1. Yangi ishlab chiqarish obyektlarini ishga tushirish, mavjud korxonalarni kengaytirish va quvvatlarni yangilash hisobiga 2513 ta (129.3%);

2. Kichik sanoat korxonalari va mikrofirmalarni tashkil qilishda 28437 ta (108,6%).

3. Xususiy tadbirkorlikni rivojlantirish yoʻnalishida 8005 ta (108.6%).

4. Fermer xoʻjaliklarini rivojlantirish sohasida 10109 ta (161,1%).

5. Barcha yoʻnalishlar boʻyicha uy mehnatini tashkil qilish hisobiga jami 20703 ta (120%).

Jumladan, bandlikning eng samarali shakllaridan boʻlgan mehnat shartnomalari asosida kasanachilikni rivojlantirish hisobiga joriy yilning 9 oyida 4740 ta kasanachilik ish oʻrinlari yaratilishi rejalashtirilgan boʻlib, amalda 537 ta korxonada 4820 ta rejaga nisbatan 101,7 foiz yangi ish oʻrinlari yaratildi. Kasanachilik ish oʻrinlari yaratishda Andijon shahri, Asaka, Qoʻrgʻontepa, Paxtaobod, Marhamat tumanlarida ibratli ishlar tashkil etilgan.

6. Ishlab chiqarish, ijtimoiy va bozor infratuzilmasini rivojlantirish natijasida 4881 ta (107,5%).

7. Ishlamayotgan korxonalar faoliyatini tiklash 589 ta (172.5%) yangi ish oʻrinlari yaratildi.

Dastur ijrosining xalq deputatlari viloyat, tumanlar va shaharlar Kengashlari doimiy komissiyalari tomonidan har oyda muhokama etib borilishi yoʻlga qoʻyildi. Mahalliy Kengashlar deputatlarining korxona, tashkilot va muassasalarda bu borada olib borilayotgan ishlar yuzasidan nazorat-tahlil faoliyati jonlangan boʻlsada, nazorat-tahlil ishlari manzilli roʻyxat(setevoy grafik)ga kiritilgan barcha korxonalar qamrab olinmagan.

2012-yil Dasturiga asosan viloyatda 2012-yil davomida aholi bandligini taʼminlash dasturiga asosan jami 78 ming 364 ta yangi ish oʻrinlari yaratilishi koʻzda tutilmoqda.

Mazkur Dasturning bajarilishini taʼminlashda xalq deputatlari viloyat, shaharlar va tumanlar Kengashlari doimiy komissiyalarining hududlarda mahalliy ijro organlari bilan hamkorligini yanada kuchaytirish talab etiladi.

Xalq deputatlari viloyat Kengashi QAROR QILADI:

1. Xalq deputatlari viloyat Kengashining Ijtimoiy-madaniy rivojlantirish masalalari doimiy komissiyasi raisi M. Mirzayevning Andijon viloyatida “2012-yilda yangi ish oʻrinlari yaratish va aholi bandligini taʼminlash Dasturi”ni tasdiqlash toʻgʻrisidagi axboroti maʼlumot uchun qabul qilinsin.

2. “2012-yilda yangi ish oʻrinlari yaratish va aholi bandligini taʼminlash Dasturi” ilovaga muvofiq tasdiqlansin.

Dasturga asosan viloyatda 2012-yil davomida aholi bandligini taʼminlash dasturiga asosan jami 78 ming 364 ta yangi ish oʻrinlari yaratilishi, jumladan;

Yangi ishlab chiqarish obyektlarini ishga tushirish hamda mavjud korxonalarni modernizatsiya qilish va kengaytirish hisobiga 2575 ta.

Kichik sanoat korxonalari va mikrofirmalarni tashkil qilish — 32900 ta; shundan:

kichik sanoat korxonalari hisobiga — 3784 ta,

qurilish-pudrat ishlarini kengaytirish, jumladan uy-joy qurilishi va taʼmirlash hisobiga — 6300 ta. Xususiy tadbirkorlikni rivojlantirish 9214 ta.

Barcha yoʻnalishlar boʻyicha uy mehnatini tashkil qilish hisobiga jami 19956 ta, shu jumladan, mehnat shartnomasi asosida korxonalarda kasanachilik ish oʻrinlari 4663 ta, fermer xoʻjaliklarini rivojlantirish hisobiga 4448 ta, ishlab chiqarish, ijtimoiy va bozor infratuzilmasini rivojlantirish hisobiga 6000 ta, ishlamasdan turgan korxonalar faoliyatini tiklash 758 ta yangi ish oʻrinlari barpo etilishi belgilansin.

3. Xalq deputatlari tuman(shahar) Kengashlari mazkur qarorning hududlarda ijrosini taʼminlash boʻyicha zarur chora-tadbirlarni belgilab bajarilishini nazoratga olsin.

4. Viloyat, tuman(shahar) Kengashlari doimiy komissiyalari aʼzolari hamda tuman(shahar) kengashlari deputatlari oʻz saylov okruglarida fuqarolarning oʻzini oʻzi boshqarish organlari bilan hamkorlikda korxona, tashkilot va muassasalarda yangi ish oʻrinlari yaratish va aholi bandligini taʼminlash dasturini oʻz vaqtida bajarilishini taʼminlash ustidan muntazam nazorat-tahlil faoliyati olib borsin.

5. Viloyat mehnat va aholini ijtimoiy muhofaza qilish Bosh boshqarmasi (S. Yusufov), iqtisodiyot Bosh boshqarmasi (B. Niyozmatov) viloyat statistika (V. Novik) bilan birgalikda ishchi oʻrinlari yaratish boʻyicha statistik maʼlumotlarni jamlash va xalq deputatlari viloyat Kengashiga har oyda kiritib borish topshirilsin.

6. Viloyat teleradiokompaniyasi (A. Isaqov), “Andijonnoma” va “Andijanskaya pravda” gazetalari (A. Daminov)larga ish oʻrinlarini tashkil etish va bandligini taʼminlash dasturining ijrosini ommaviy axborot vositalarida keng yoritib borish tavsiya etilsin.

7. Mazkur qarorning bajarilishini nazorat qilish xalq deputatlari viloyat Kengashi Ijtimoiy-madaniy rivojlantirish masalalari doimiy komissiyasi raisi M. Mirzayev zimmasiga yuklatilsin.

Xalq deputatlari Andijon viloyati Kengashining raisi A. Usmanov

Andijon sh.,

2011-yil 16-noyabr,

77/13-4-son