Shahar hududida transport vositalarining majburiy texnik koʻrigini tashkil etish hamda uni oʻtkazish tartibi toʻgʻrisida (288-Q-son)

20.03.2012

Samarqand viloyati Samarqand shahar xokimining

Qarori

Oʻzbekiston Respublikasi Vazirlar Mahkamasining 2003-yil 31-yanvardagi 54-sonli “Transport vositalarini majburiy texnik koʻrikdan oʻtkazish tartibi” toʻgʻrisidagi qarori, Oʻzbekiston Respublikasi Ichki Ishlar Vazirligining 2003-yil 19-fevral kunidagi 56-sonli buyrugʻiga asosan transport vositalarining texnik holati, ulardan foydalanish normalari va qoidalariga rioya etilishi, transport vositalari sonini, tegishliligini, roʻyxatdan oʻtkazilganliligini, yoʻl harakati va transport vositalaridan foydalanish sohasida huquqni buzishlar, jinoyatlarning oldini olish, aniqlash hamda barham berish maqsadida shahar Ichki Ishlar Boshqarmasi yoʻl harakati xavfsizligi boʻlimining 2012-yil 14-yanvardagi 12/1-21-sonli xatini inobatga olib, qaror qilaman:

1. Shahar Ichki Ishlar Boshqarmasi yoʻl harakati xavfsizligi boʻlimi, mudofaa ishlari boʻlimi hamda “Samarqandtrans markazi” bilan hamkorlikda shahardagi mulkchilik shaklidan qatʼiy nazar ilovaga asosan barcha avtotransport vositalarini va tirkamalarini majburiy texnik koʻrikdan oʻtkazish topshirilsin.

2. Mulkchilik shakli va sigʻimidan qatʼiy nazar, yoʻlovchi tashish bilan shugʻullanuvchi transport vositalarining majburiy texnik koʻrigi;

birinchi marta — 1-martdan 30-iyungacha,

ikkinchi marta — 1-martdan 31-oktyabrgacha oʻtkazilsin.

Yuridik shaxslarga qarashli boʻlgan transport vositalarining texnik koʻrigi 1-mart 30-iyungacha;

Jismoniy shaxslarga qarashli boʻlgan transport vositalarining texnik koʻrigi 1-yanvardan 31- avgustgacha tasdiqlangan jadval asosida oʻtkazilsin.

3. Samarqand shahar hududidagi transport vositalari va boshqa oʻzi yurar mexanizmlar egalari fuqarolik javobgarligi davlat majburiy sugʻurta toʻlovlarini nazorat qilish shahar Ichki Ishlar Boshqarmasi yoʻl harakati xavfsizligi boʻlimi (A.Raximov) hamda shaharda faoliyat koʻrsatayotgan sugʻurta idoralari rahbarlariga yuklatilsin.

4. Oʻzbekiston Respublikasi Vazirlar Mahkamasining 2003-yil 54-sonli qarorining 3-qismi talablaridan kelib chiqib, shahar Mudofaa ishlari boʻlimi, shahar Ichki Ishlar Boshqarmasi xamda Milliy xavfsizlik xizmatining harbiy boʻlinmalari transport vositalarini majburiy texnik koʻriklari uz yuqori tashkilotlarini koʻrsatmasiga muvofiq amalga oshirilishi nazarda tutilsin.

5. Shahar Ichki Ishlar Boshqarmasi yoʻl harakati xavfsizligi boʻlimi shahardagi ommaviy axborot vositalari orqali transport vositalarining barcha egalariga, avtomobillarga texnika xizmati koʻrsatuvchi tashkilotlarga majburiy texnik koʻrikdan oʻtkazish tartibini yetkazishga qaratilgan keng tushuntirish ishlari oʻtkazilishini xamda “Zarafshon”, “Samarkandskiy vestnik” va “Samarqand” roʻznomalarida mazkur qarorning mazmun-mohiyati toʻgʻrisida maqolalar chop etish tavsiya etilsin.

6. Ushbu qarorning ijrosini nazorat qilish shahar hokimining birinchi oʻrinbosari S. Saloxiddinov zimmasiga yuklatilsin.

Hokim B.S. SADULLAYEV

Samarqand sh.,

2012-yil 20-mart,

288-Q-son