Yalangʻoch qizilmiyani qayta ishlaydigan tashkilotlar faoliyatini takomillashtirish va qoʻllab-quvvatlash chora-tadbirlari toʻgʻrisida (61-son)

01.03.2013

Oʻzbekiston Respublikasi Vazirlar Mahkamasining

qarori

Maxsus ruxsatnomalar olish tartibotini yanada soddalashtirish, tadbirkorlik faoliyati uchun qulay shart-sharoitlar yaratish, shuningdek oʻsimlik dunyosi obyektlaridan oqilona foydalanish va ularni Oʻzbekiston Respublikasi tashqarisiga olib chiqish yuzasidan nazoratni amalga oshirish tartibini takomillashtirish maqsadida Vazirlar Mahkamasi qaror qiladi:

1. Yuridik va jismoniy shaxslarga, ular tomonidan Oʻzbekiston Respublikasining yalangʻoch qizilmiya ildizi ekstrakti ishlab chiqaradigan qayta ishlovchi tashkilotlari bilan gʻamlangan yalangʻoch qizilmiyani yetkazib berish yuzasidan shartnomalar tuzilgan taqdirda, maxsus foydalanish uchun ruxsatnoma olmasdan yalangʻoch qizilmiyani gʻamlash (toʻplash)ga ruxsat etilsin.

2. Oʻzbekiston Respublikasi fuqarolari — yuridik va jismoniy shaxslari uchun:

yalangʻoch qizilmiya xomashyosini (TIF TN kodi 1211 90850 0) chetga olib chiqishga ruxsatnoma berish uchun — 1 (bir) tonna uchun 225 AQSh dollari miqdorida;

yalangʻoch qizilmiyani qayta ishlashdan olingan mahsulotni (TIF TN kodi 1302 12000 0) chetga olib chiqish uchun — 1 (bir) tonna uchun 100 AQSh dollari miqdorida toʻlov belgilansin.

3. Belgilab qoʻyilsinki:

yalangʻoch qizilmiyani chetga olib chiqishga ruxsatnoma berish uchun hamda yalangʻoch qizilmiyani qayta ishlashdan olingan mahsulotni chetga olib chiqish uchun toʻlovlar Oʻzbekiston Respublikasi Markaziy bankining toʻlov kunidagi kursi boʻyicha milliy valyutada amalga oshiriladi;

koʻrsatib oʻtilgan toʻlovlar summasi Vazirlar Mahkamasining “Biologiya resurslaridan oqilona foydalanish, ularni Oʻzbekiston Respublikasiga olib kirish va uning tashqarisiga olib chiqish ustidan nazoratni kuchaytirish toʻgʻrisida” 2004-yil 28-oktabrdagi 508-son qaroriga 3-ilovada nazarda tutilgan tartibda taqsimlanadi;

yalangʻoch qizilmiyani gʻamlash (toʻplash) va chetga olib chiqish, shuningdek uni qayta ishlashdan olingan mahsulotlarni chetga olib chiqish 1-ilovaga muvofiq sxema boʻyicha amalga oshiriladi.

4. Oʻzbekiston Respublikasi Davlat bojxona qoʻmitasi Oʻzbekiston Respublikasi Davlat tabiatni muhofaza qilish qoʻmitasining ruxsatnomalari asosida chetga olib chiqilayotgan oʻsimlik dunyosi obyektlarining bojxonada rasmiylashtirilishini amalga oshirsin.

5. Vazirlar Mahkamasining 2004-yil 28-oktabrdagi 508-son qarori (Oʻzbekiston Respublikasi QT, 2004-y., 10-son, 102-modda) bilan tasdiqlangan Oʻsimlik dunyosi obyektlaridan foydalanish, ularni Oʻzbekiston Respublikasiga olib kirish va uning tashqarisiga olib chiqish tartibi toʻgʻrisidagi Nizomga 2-ilovaga muvofiq qoʻshimcha va oʻzgartirish kiritilsin.

6. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasining Qishloq va suv xoʻjaligi, qishloq xoʻjaligi mahsulotlarini qayta ishlash hamda isteʼmol tovarlari masalalari axborot-tahlil departamentiga yuklansin.

Oʻzbekiston Respublikasining Bosh vaziri SH. MIRZIYOYEV

Toshkent sh.,

2013-yil 1-mart,

61-son

Vazirlar Mahkamasining 2013-yil 1-martdagi 61-son qaroriga 1-ILOVA

Yalangʻoch qizilmiyani gʻamlash (toʻplash) hamda chetga olib chiqishni, shuningdek uni qayta ishlashdan olingan mahsulotlarni chetga olib chiqishni amalga oshirish SXEMASI (1 kg uchun hisobidan)

I. Yalangʻoch qizilmiyani gʻamlash va chetga olib chiqish

1.1. Oʻsimlikni gʻamlash (toʻplash):

a) yalangʻoch qizilmiya ildizi ekstraktini ishlab chiqaruvchi qayta ishlaydigan tashkilotlar bilan yetkazib berish yuzasidan shartnoma tuzmasdan xomashyo gʻamlash.

gʻamlashga ruxsatnoma berish uchun Davlat tabiatni muhofaza qilish qoʻmitasiga murojaat qilish;

gʻamlashga ruxsatnoma olish uchun toʻlov (eng kam oylik ish haqiga koeffitsiyent 0,008).

Vazirlar Mahkamasining 2004-yil 28-oktabrdagi 508-son qarori bilan tasdiqlangan Oʻsimlik dunyosi obyektlaridan foydalanish, ularni Oʻzbekiston Respublikasiga olib kirish va uning tashqarisiga olib chiqish tartibi toʻgʻrisidagi Nizomga muvofiq;

b) yalangʻoch qizilmiya ildizi ekstraktini ishlab chiqaradigan qayta ishlovchi tashkilotlar bilan yetkazib berish yuzasidan shartnoma tuzgan holda xomashyo gʻamlash.

ekstrakt ishlab chiqaruvchi bilan yalangʻoch qizilmiya yetkazib berish yuzasidan majburiy tartibda shartnoma tuzish;

gʻamlash (toʻplash)ga Davlat tabiatni muhofaza qilish qoʻmitasining ruxsatnomasini olish talab qilinmaydi.

1.2. Yalangʻoch qizilmiya xomashyosini chetga olib chiqish:

chetga olib chiqishga ruxsatnoma berish uchun Davlat tabiatni muhofaza qilish qoʻmitasiga murojaat qilish;

chetga olib chiqishga ruxsatnoma olish uchun toʻlov — 0,225 AQSh dollari.

II. Qayta ishlangan xomashyo (ekstrakt)ni chetga olib chiqish

2.1. Ekstraktni chetga olib chiqish:

Vazirlar Mahkamasining 2013-yil 1-martdagi 61-son qaroriga 2-ILOVA

Vazirlar Mahkamasining 2004-yil 28-oktabrdagi 508-son qarori bilan tasdiqlangan Oʻsimlik dunyosi obyektlaridan foydalanish, ularni Oʻzbekiston Respublikasiga olib kirish va uning tashqarisiga olib chiqish tartibi toʻgʻrisidagi Nizomga kiritilayotgan qoʻshimcha va oʻzgartirish

1. 7-bandga quyidagi mazmundagi uchinchi xatboshi qoʻshilsin:

“Yalangʻoch qizilmiyani gʻamlash (toʻplash) yuridik va jismoniy shaxslar tomonidan, ular Oʻzbekiston Respublikasining yalangʻoch qizilmiya ildizi ekstrakti ishlab chiqaradigan qayta ishlovchi tashkilotlari bilan gʻamlangan yalangʻoch qizilmiyani yetkazib berish yuzasidan shartnomalar tuzishgan taqdirda, maxsus foydalanish uchun ruxsatnoma olmasdan amalga oshiriladi”.

2. 22-band quyidagi tahrirda bayon qilinsin:

“22. Oʻsimlik dunyosi obyektlarini chetga chiqarishga ruxsatnoma berish uchun quyidagi miqdorlarda toʻlov undiriladi:

Oʻzbekiston Respublikasining Qizil kitobiga kiritilgan oʻsimlikning bir donasi, shuningdek oʻsimliklarning ushbu turlaridan botanika kolleksiyalari uchun - mazkur turdagi oʻsimliklarni terishga ruxsatnoma qiymatining 5 foizi miqdorida;

Oʻzbekiston Respublikasining Qizil kitobiga kiritilmagan yovvoyi oʻsimliklar xomashyosining bir kilogrammi uchun (Oʻzbekiston Respublikasi fuqarolari - yuridik va jismoniy shaxslar uchun yalangʻoch qizilmiyadan tashqari) - oʻsimlikning mazkur turini gʻamlashga ruxsatnoma qiymatining 10 foizi miqdorida;

yalangʻoch qizilmiya xomashyosining (TIF TN kodi 121190850 0) 1 tonnasi uchun - Oʻzbekiston Respublikasi fuqarolari - yuridik va jismoniy shaxslarga yalangʻoch qizilmiyani chetga olib chiqish uchun ruxsatnoma berishga Oʻzbekiston Respublikasi Markaziy bankining toʻlov kunidagi kursi boʻyicha 225 AQSh dollari miqdorida.

Oʻsimlik dunyosi obyektlarini chetdan olib kirishga ruxsatnoma berilganligi uchun toʻlov undirilmaydi”.