Oʻzaro mahsulot yetkazib berish toʻgʻrisida

02.10.2012

OʻZBEKISTON RESPUBLIKASI HUKUMATI BILAN TURKMANISTON HUKUMATI OʻRTASIDA

Bitim

Oʻzbekiston Respublikasi Hukumati bilan Turkmaniston Hukumati, bundan keyin “Tomonlar” deb ataluvchilar,

Tomonlar oʻrtasida iqtisodiy hamkorlikni rivojlantirishga koʻmaklashish, shuningdek ular oʻrtasidagi savdoni kengaytirish istagini bildirib,

xalqaro huquqning umumeʼtirof etilgan prinsiplari va normalariga hamda oʻz davlatlarining qonunchiligiga amal qilib,

ikki davlat oʻrtasida uzoq muddatga moʻljallangan turli darajalardagi, shu jumladan ularning xoʻjalik yurituvchi subyektlari oʻrtasidagi hamkorlikni rivojlantirish va mustahkamlash chora-tadbirlari muhimligini eʼtirof etib, quyidagilar toʻgʻrisida kelishib oldilar:

1-modda.

Ushbu Bitim qoidalarini amalga oshirish maqsadida hamda ikki davlat qonunchiligi va normativ-huquqiy aktlari doirasida, Tomonlar ikki tomonlama mahsulot yetkazib berish borasida quyidagilar bilan cheklanib qolmagan holda hamkorlik qiladilar:

Oʻzbekiston Respublikasidan Turkmanistonga — yengil avtomobillar, yuk mashinalari, avtobuslar, maxsus texnika, qishloq xoʻjaligi texnikasi, ehtiyot qismlar, mineral oʻgʻitlar, oʻsimliklarni kimyoviy himoyalash vositalari, qurilish materiallari, elektr jihozlari va elektrotexnik uskunalar, qishloq xoʻjalik va boshqa mahsulotlar;

Turkmanistondan Oʻzbekiston Respublikasiga — neft, gaz kondensati, polipropilen, polistirol, beshofit, tekstil va qishloq xoʻjaligi hamda qayta ishlash sanoati mahsulotlari, gilam mahsulotlari va boshqa mahsulotlar.

2-modda.

1. Ushbu Bitim doirasida koʻzda tutilgan hamkorlik Tomonlar davlatlarining amaldagi qonunlari va qoidalari, xalqaro savdo tajribasi va Tomonlarning kompaniyalari va xoʻjalik yurituvchi subyektlari oʻrtasida tuzilgan shartnomalari asosida amalga oshirilishi lozim.

2. Tomonlar oʻzlarining xoʻjalik yurituvchi subyektlari majburiyatlari boʻyicha javobgar emaslar.

3-modda.

Mazkur Bitimning monitoringi va muvofiqlashtirilishi Savdo-iqtisodiy, ilmiy-texnikaviy va madaniy hamkorlik boʻyicha oʻzbek-turkman Qoʻshma komissiyasi tomonidan uning yigʻilishlarida ikki davlatning manfaatdor kompaniyalari va xoʻjalik yurituvchi subyektlari ishtirokida Tomonlar oʻrtasida maslahatlashuvlar oʻtkazish yoʻli bilan amalga oshiriladi. Tomonlar muntazam ravishda mahsulotlar savdosiga oid maʼlumotlarni umumlashtiradilar va savdoda yuzaga keladigan masalalarni kelishib boradilar.

Mazkur Bitimni amalga oshirish maqsadida, Tomonlar ikki davlatning vazirliklari, idoralari, tashkilotlari va korxonalarining quyidagi faoliyatini koʻllab-quvvatlashlari va ragʻbatlantirishlari lozim:

— ishbilarmon doiralar va savdo missiyalar uchrashuvlarini va muzokaralarini tashkil etish;

— tashqi savdoga oid maʼlumot va tajriba bilan almashish;

— ikki tomonlama savdo hamkorligiga toʻsqinlik qilayotgan muammolarni aniqlash va oʻzaro qanoatlantiruvchi qarorga kelishga xizmat qiladigan tavsiyalar berish.

4-modda

Ushbu Bitim qoidalari Oʻzbekiston Respublikasi va Turkmaniston ishtirokchi boʻlgan xalqaro shartnomalardan, shuningdek ularning xalqaro tashkilotlarga aʼzoligidan kelib chiqadigan huquq va majburiyatlariga daxl qilmaydi.

Tomonlar xalqaro huquqning umumeʼtirof etilgan normalariga hamda oʻz davlatlari qonunchiligiga muvofiq uzoq muddatli hamkorlikni amalga oshiradilar.

5-modda.

Ushbu Bitim qoidalarini talqin etish yoki qoʻllashda yuzaga keladigan kelishmovchiliklar Tomonlar oʻrtasidagi muzokaralar va maslahatlashuvlar orqali hal etiladi.

6-modda.

Tomonlarning oʻzaro roziligi bilan ushbu Bitimga oʻzgartish va qoʻshimchalar kiritilishi mumkin, ular ushbu Bitimning ajralmas qismi hisoblanadigan alohida bayonnomalar bilan rasmiylashtiriladi.

Agarda bayonnomalarda boshqacha tartib belgilanmagan boʻlsa, ushbu moddaning birinchi xatboshida qayd etilgan bayonnomalarning kuchga kirishi va ularning amal qilish muddati mazkur Bitimning 7-moddasiga muvofiq belgilanadi.

7-modda.

Mazkur Bitim imzolangan sanadan boshlab kuchga kiradi va 2017-yilning 31-dekabrigacha amal qiladi. Agar ushbu Bitimning amal qilish muddati tugashidan olti oy oldin Tomonlardan biri yozma ravishda boshqa Tomonga ushbu Bitimning amal qilishini tugatish niyati toʻgʻrisida xabar bermasa, mazkur Bitim keyingi besh yillik muddatlarga oʻz-oʻzidan uzayaveradi.

Mazkur Bitimni amal qilish muddatining tugatilishi ushbu Bitim amalda boʻlgan vaqtida va Bitimni amalga oshirish doirasida imzolangan shartnomalarga taʼsir etmaydi.

Ashxobod shahrida 2012-yil 2-oktabrda ikki asl nusxada, har biri oʻzbek, turkman va rus tillarida tuzildi, bunda barcha matnlar bir xil kuchga ega.

Mazkur Bitimni talqin etishda kelishmovchiliklar yuzaga kelganda, Tomonlar rus tilidagi matndan foydalanadilar.

(imzolar)