“Qayragʻoch” konida yer osti koni qurish” investitsiya loyihasini amalga oshirish chora-tadbirlari toʻgʻrisida (57-son)

26.02.2013

Oʻzbekiston Respublikasi Vazirlar Mahkamasining

qarori

“Semguran” shaxtasining tarkibida oltin mavjud boʻlgan maʼdanini qazib olish boʻyicha boʻsh qolayotgan quvvatlar oʻrnini toʻldirishni taʼminlash va “Olmaliq KMK” OAJ Angren oltin qazib olish fabrikasining qayta ishlash ishlab chiqarish quvvatlari yuklamasi darajasini saqlash maqsadida Vazirlar Mahkamasi qaror qiladi:

1. “Qayragʻoch” konida yer osti koni qurish” investitsiya loyihasini amalga oshirish doirasida kapital quyilmalarining umumiy qiymati 30,56 mln AQSH dollari boʻlgan loyihaning texnik-iqtisodiy asoslashi ishlab chiqilganligi va u belgilangan tartibda vakolatli organlarda ekspertizadan oʻtkazilganligi maʼlumot uchun qabul qilinsin.

2. Quyidagilar:

“Olmaliq KMK” OAJning oʻz mablagʻlari, shu jumladan 10,59 mln AQSH dollariga teng summadagi maxsus investitsiya hisob raqamlari mablagʻlari;

Oʻzbekiston Respublikasi Tiklanish va taraqqiyot jamgʻarmasining qayta moliyalashtiradigan bankning yillik 1,0 foiz miqdoridagi marjasini qoʻshgan holda yillik 4,0 foizli stavka bilan jumladan ikki yillik imtiyozli davr bilan 7 yil muddatga beriladigan, “Ipoteka-bank” ATIB orqali qayta moliyalashtiriladigan Oʻzbekiston Respublikasi Tiklanish va taraqqiyot jamgʻarmasining 6,72 mln AQSH dollari miqdoridagi krediti;

Oʻzbekiston Respublikasi Markaziy bankining qayta moliyalashtirishi stavkasidan oshmaydigan foizli stavka boʻyicha, jumladan ikki yillik imtiyozli davr bilan 7 yil muddatga ajratiladigan “Ipoteka-bank” ATIBning 13,25 mln AQSH dollariga teng boʻlgan milliy valyutadagi krediti “Qayragʻoch” konida yer osti koni qurish” investitsiya loyihasini amalga oshirishni moliyalashtirish manbalari etib belgilansin.

3. Belgilansinki:

“Olmaliq KMK” OAJ loyihaning oʻz vaqtida va toʻliq amalga oshirilishi, shuningdek jalb etiladigan kreditlardan maqsadli va samarali foydalanilishi uchun masʼul boʻlgan qarz oluvchi va ijro etuvchi organ hisoblanadi;

jalb etiladigan kreditlarni qaytarish va ularga xizmat koʻrsatish bilan bogʻliq xarajatlar “Olmaliq KMK” OAJning oʻz mablagʻlari, shu jumladan maxsus investitsiya hisob raqamlari hisobiga amalga oshiriladi.

4. Quyidagilar:

loyihani texnik-iqtisodiy asoslashning asosiy texnik-iqtisodiy parametrlari 1-ilovaga va 2014-yilda foydalanishga topshirish muddatiga muvofiq;

Oʻzbekiston Respublikasi Tiklanish va taraqqiyot jamgʻarmasi kreditini qaytarishning prognoz jadvali 2-ilovaga* muvofiq tasdiqlansin.

*2-ilova berilmaydi.

5. Oʻzbekiston Respublikasi Moliya vaziri Oʻzbekiston Respublikasi Tiklanish va taraqqiyot jamgʻarmasining qayta moliyalashtirilayotgan krediti boʻyicha “Olmaliq KMK” OAJning majburiyatlari boʻyicha “Ipoteka-bank” ATIBga belgilangan tartibda Oʻzbekiston Respublikasi kafolatini bersin.

6. Oʻzbekiston Respublikasi Vazirlar Mahkamasi tomonidan tasdiqlanadigan roʻyxatlar boʻyicha koʻrsatib oʻtilgan loyihani amalga oshirish doirasida “Olmaliq KMK” OAJ tomonidan import qilinadigan, Oʻzbekiston Respublikasida ishlab chiqarilmaydigan materiallar, transport vositalari, asbob-uskunalar va ularga ehtiyot qismlar 2014-yil 1-noyabrgacha bojxona toʻlovlaridan ozod qilinsin (bojxona yigʻimlari bundan mustasno).

7. “Olmaliq KMK” OAJga “Qayragʻoch” konida yer osti koni qurish” investitsiya loyihasini amalga oshirish doirasida qurilish-montaj ishlarini, zaruriyat boʻlganda, toʻgʻridan-toʻgʻri shartnomalar asosida subpudrat ishlarini bajarish uchun respublikaning ixtisoslashtirilgan qurilish-montaj va boshqa tashkilotlarini jalb etgan holda oʻz kuchlari bilan bajarishga ruxsat berilsin.

8. Oʻzbekiston Respublikasi Davlat arxitektura va qurilish qoʻmitasi loyiha boʻyicha loyiha-smeta hujjatlari ekspertizadan oʻtkazilishini belgilangan tartibda taʼminlasin va “Qayragʻoch” konida yer osti koni qurish” investitsiya loyihasini amalga oshirish doirasida qurilish-montaj ishlarini bajarish sifati ustidan davlat arxitektura-qurilish nazoratini oʻrnatsin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Gʻ.I. Ibragimov zimmasiga yuklansin.

Oʻzbekiston Respublikasi Prezidenti I.KARIMOV

Toshkent sh.,

2013-yil 26-fevral,

57-son

Vazirlar Mahkamasining 2013-yil 26-fevraldagi 57-son qaroriga 1-ILOVA

“Qayragʻoch” konida yer osti koni qurish” investitsiya loyihasining texnik-iqtisodiy asoslanishi asosiy texnik-iqtisodiy parametrlari

*Amaldagi summalardan va kreditni tanlash sanalaridan kelib chiqib aniqlashtirilishi kerak.