Soliq maslahati milliy standarti (3-sonli SMMS) “Davlat soliq xizmati organlari tomonidan soliq tekshiruvlari oʻtkazish vaqtida soliq maslahati boʻyicha xizmatlar koʻrsatish tartibi”ni tasdiqlash toʻgʻrisida (2425-son)

06.02.2013

Oʻzbekiston Respublikasi Moliya vazirining

buyrugʻi

[Oʻzbekiston Respublikasi Adliya vazirligi tomonidan 2013-yil 6-fevralda roʻyxatdan oʻtkazildi, roʻyxat raqami 2425]

Oʻzbekiston Respublikasi “Soliq maslahatiga oid faoliyat toʻgʻrisida”gi Qonunining 10-moddasiga muvofiq buyuraman:

1. Soliq maslahati milliy standarti (3-sonli SMMS) “Davlat soliq xizmati organlari tomonidan soliq tekshiruvlari oʻtkazish vaqtida soliq maslahati boʻyicha xizmatlar koʻrsatish tartibi” ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Vazir R. AZIMOV

Toshkent sh.,

2013-yil 8-yanvar,

3-son

Oʻzbekiston Respublikasi moliya vazirining 2013-yil 8-yanvardagi 3-son buyrugʻiga ILOVA

Soliq maslahati milliy standarti (3-sonli SMMS)

“Davlat soliq xizmati organlari tomonidan soliq tekshiruvlari oʻtkazish vaqtida soliq maslahati boʻyicha xizmatlar koʻrsatish tartibi”

Ushbu Soliq maslahati milliy standarti (3-sonli SMMS) (bundan keyingi oʻrinlarda standart deb yuritiladi) Oʻzbekiston Respublikasida soliq maslahati boʻyicha faoliyatni normativ tartibga solishning elementi hisoblanadi.

I bob. Umumiy qoidalar

1. Ushbu standartning maqsadi davlat soliq xizmati organlari tomonidan soliq tekshiruvlarini oʻtkazish vaqtida soliq maslahatchilari tashkiloti tomonidan mijozga (ishonch bildiruvchiga) soliq maslahati boʻyicha xizmatlar koʻrsatish tartibini belgilash hisoblanadi.

2. Mazkur standart talablari barcha soliq maslahatchilari tashkilotlari tomonidan qoʻllanilishi majburiydir.

3. Mazkur standart bir martalik (bir yoʻla) xizmatni koʻrsatish shartnomalari boʻyicha soliq maslahatchilari tashkiloti tomonidan koʻrsatiladigan xizmatlarga tatbiq etilmaydi.

II bob. Soliq tekshiruvlari oʻtkazish vaqtida koʻrsatiladigan xizmatlar

4. Soliq tekshiruvlari oʻtkazish vaqtida soliq maslahati boʻyicha xizmatlar (keyingi oʻrinlarda xizmatlar deb yuritiladi) shartnoma asosida koʻrsatiladi va quyidagilarni oʻz ichiga oladi:

tekshiruv vaqtida vujudga kelayotgan aniq koʻrsatilgan savollar boʻyicha xulosa berish, ushbu savollar boʻyicha mijozning (ishonch bildiruvchining) davlat soliq xizmati organlari oldidagi nuqtai nazarini tasdiqlovchi hujjatlarni (isbotlarni) taqdim etish yuzasidan tavsiyalar ishlab chiqish;

soliq tekshiruvi doirasida amalga oshirayotgan harakatlarni kuzatib borish (soliq toʻlovchining hududi va joylarini koʻzdan kechirish, mol-mulkini inventarizatsiya qilish, hujjatlar va predmetlarni olib qoʻyish va boshqalar) hamda oʻtkazilayotgan harakatlar qonuniyligi toʻgʻrisida mijozga (ishonch bildiruvchiga) xulosa taqdim etish;

soliq tekshiruvi natijalarini (soliq tekshiruvi dalolatnomasini) muhokama qilishda davlat soliq xizmati organlarining mansabdor shaxslari oldida mijozning (ishonch bildiruvchining) manfaatlarini ifoda etish.

5. Shartnomada soliq tekshiruvi natijalari boʻyicha davlat soliq xizmati organining qarori ustidan shikoyat berish boʻyicha tavsiyalar tayyorlash nazarda tutilishi mumkin.

III bob. Soliq tekshiruvi oʻtkazish vaqtida xizmatlar koʻrsatish boʻyicha maxsus talablar

6. Mazkur standartga muvofiq xizmat koʻrsatayotgan soliq maslahatchilari tashkiloti soliq tekshiruvi materiallarida isbot sifatida mijoz (ishonch bildiruvchi) tomonidan taqdim etilgan hujjatlardagi maʼlumotlar toʻgʻriligi boʻyicha xulosa berish va fikr bildirishga haqli emas.

Soliq maslahatchilari tashkiloti xulosalar tayyorlashda, oʻzining fikriga koʻra huquqiy jihatdan xatarni yuzaga keltirishi mumkin boʻlgan hujjatlardan va maʼlumotlardan isbot sifatida foydalanmaslik huquqiga ega va bu haqda, yuzaga kelishi mumkin boʻlgan xatarlarni koʻrsatgan holda, mijozga (ishonch bildiruvchiga) xabar beradi.

7. Soliq maslahatchilari tashkiloti xizmat koʻrsatish jarayonida olingan mijozga (ishonch bildiruvchiga) tegishli maʼlumotni uning roziligisiz davlat soliq xizmati organlariga va boshqa shaxslarga maʼlum qilishga haqli emas.

8. Soliq tekshiruvi dalolatnomasidagi xulosa va fikrlar yuzasidan soliq maslahatchilari tashkilotining fikrini bildirish, hamda ushbu xulosa va fikrlar boʻyicha shikoyat berish yuzasidan takliflar, soliq tekshiruvi dalolatnomasi boʻyicha eʼtirozlar tayyorlash faqat yozma ravishda beriladi.

9. Soliq maslahatchilari tashkiloti tomonidan koʻrsatilgan xizmat boʻyicha hisobot tuzishda, hisobotda majburiy tartibda soliq tekshiruvi materiallarini koʻrib chiqishda va u boʻyicha qaror qabul qilishda soliq maslahatchilari tashkilotining inobatga olinmagan asoslangan eʼtirozlari mavjud boʻlgan davlat soliq xizmati organining nuqtai nazari koʻrsatiladi.

IV bob. Yakuniy qoidalar

10. Agar shartnomada boshqacha tartib nazarda tutilgan boʻlmasa, soliq maslahati boʻyicha xizmat koʻrsatish soliq tekshiruvi boshlangan muddatdan qatʼi nazar, boshlanadi.

11. Mazkur standart Oʻzbekiston Respublikasi Davlat soliq qoʻmitasi bilan kelishilgan.

Davlat soliq qoʻmitasi raisi B. PARPIYEV

2013-yil 8-yanvar