Fond bozorini yanada rivojlantirish hamda davlat mulki negizida tashkil etilgan aksiyadorlik jamiyatlarini qoʻllab-quvvatlash chora-tadbirlari toʻgʻrisida (PF-1939-son)

04.03.1998

Oʻzbekiston Respublikasi Prezidentining

Farmoni

Aksiyadorlikka aylantirilayotgan korxonalarning Oʻzbekiston va xorijiy sarmoyadorlarni jalb etishdan manfaatdorligini oshirish, ularning texnik qayta jihozlanishini taʼminlash, raqobatbardosh mahsulot ishlab chiqarish hamda fond bozoridagi faoliyatini ragʻbatlantirish maqsadida:

1. Aksiyadorlikka aylantirilayotgan korxonalarning aksiyalari paketlarini Oʻzbekiston Prezidentining 1997-yil 31-martdagi 1740-sonli Farmonida belgilangan ulushlari boʻyicha quyidagi tartibda joylashtirilsin:

mehnat jamoasi aksiyalari paketi aksiyadorlikka aylantirilayotgan korxona tasarrufiga beriladi, jamoa aʼzolari oʻrtasida tarqatiladi hamda ular koʻzlagan tartibda foydalaniladi;

davlatga tegishli aksiyalar paketi davlat mulkini boshqarish vakolatiga ega boʻlgan organ sifatida Oʻzbekiston Respublikasi Davlat mulkini boshqarish va tadbirkorlikni qoʻllab-quvvatlash davlat qoʻmitasi ixtiyorida qoladi;

erkin sotuv hamda xorijiy sarmoyadorlarga sotishga moʻljallangan aksiyalar paketlari Oʻzbekiston Respublikasi Davlat mulkini boshqarish va tadbirkorlikni qoʻllab-quvvatlash davlat qoʻmitasi hamda aksiyadorlikka aylantirilayotgan korxonalar tomonidan birgalikda joylashtiriladi va tarqatiladi.

2. 1999-yil 1-yanvarga qadar boʻlgan davrda erkin sotuv va xorijiy sarmoyadorlarga moʻljallangan aksiyalardan tushgan mablagʻ (valyuta hisobidagi tushumni ham hisobga olgan holda), istisno tarzida, toʻlaligicha (operatsiya xarajatlaridan tashqari) qaytarmaslik imtiyozi bilan, aksiyadorlikka aylantirilayotgan korxonalarga oʻtkaziladi. Bu mablagʻ soliqqa tortilmaydi hamda undan ishlab chiqarilayotgan mahsulotni renavatsiya qilish va yangilash boʻyicha qatʼiy maqsad yoʻlida foydalaniladi.

Aksiyadorlik jamiyatlariga aylantirilayotgan korxonalarning erkin sotuv va xorijiy sarmoyadorlarga moʻljallangan aksiyalarni sotishdan tushgan mablagʻlari maxsus ochiladigan maxsus ssuda hisoblarida jamlanadi.

Oʻzbekiston Respublikasi Davlat mulkini boshqarish va tadbirkorlikni qoʻllab-quvvatlash davlat qoʻmitasiga 1999-yil 1-yanvarga qadar boʻlgan davrda aksiyadorlik jamiyatlariga aylantirilayotgan korxonalar bilan birgalikda ularning erkin sotuv va xorijiy sarmoyalarga moʻljallangan aksiyalarini sotish bilan bogʻliq barcha masalalarni hal etish huquqi berilsin.

Oʻzbekiston Respublikasi Moliya vazirligi, Davlat Soliq qoʻmitasi aksiyadorlik jamiyatlarining aksiyalarni sotishdan oʻz ixtiyorida qolgan mablagʻlardan aniq maqsadlarda foydalanishi ustidan nazorat qilsin. Bu mablagʻlardan koʻzda tutilgan maqsadlarda foydalanmaslik hollari aniqlangan taqdirda, ular respublika budjetiga oʻtkaziladi.

3. Belgilab qoʻyilsinki:

davlat korxonalarini aksiyadorlik jamiyatlariga aylantirish jarayonida paydo boʻlgan aksiyalar yangi egalariga belgilangan tartibda sotilgunga qadar birinchi marta joylashtirilgan davlat mulki hisoblanadi;

aksiyadorlik jamiyatlari tomonidan dividendlarni oʻtkazish, ularni toʻlash toʻgʻrisida qaror qabul qilingan paytdagi holatiga koʻra, nizom jamgʻarmasining boshlangʻich hajmiga muvofiq tarzda, mavjud aksiyalarning toʻla summasi boʻyicha, aksiyalarning davlatga tegishli, lekin sotilmay qolgan qismini ham hisobga olgan holda amalga oshiriladi.

Oʻzbekiston Respublikasi Davlat mulkini boshqarish va tadbirkorlikni qoʻllab-quvvatlash davlat qoʻmitasi, Qimmatli qogʻozlar bozori faoliyatini muvofiqlashtirish va nazorat qilish markazi vazirliklar, idoralar, konsernlar, korporatsiyalar va uyushmalar bilan birgalikda 1998-yilning 1 choragi mobaynida aksiyadorlar roʻyxatini ular olishi lozim boʻlgan dividendlarni toʻlash uchun davlatga tegishli boʻlgan aksiyalar paketlariga muvofiqlashtirsinlar.

4. Oʻzbekiston Davlat mulkini boshqarish va tadbirkorlikni qoʻllab-quvvatlash davlat qoʻmitasi manfaatdor vazirlik va idoralar bilan birgalikda ikki hafta muddat ichida Xususiylashtirish Investitsiya Fondlari (XIFlar) faoliyatini takomillashtirish boʻyicha Vazirlar Mahkamasiga taklif kiritsin. Taklifda quyidagilar hisobga olinsin:

XIFlarni boshqaruvchi kompaniyalarning moliyaviy barqarorligi hamda ularning rahbarlari professional darajasiga talabchanlikni oshirish;

XIFlarni boshqarishning cheklangan kishilar doirasida konsentratsiyalashuvi va XIFlar aktivlari bilan gʻayriqonuniy operatsiyalar oʻtkazilishiga barham berish.

5. Oʻzbekiston Respublikasi Adliya vazirligi, Moliya vazirligi, Davlat mulkini boshqarish va tadbirkorlikni qoʻllab-quvvatlash davlat qoʻmitasi va Davlat Soliq qoʻmitasi bir hafta muddat ichida:

Vazirlar Mahkamasiga amaldagi qonunchilikka mazkur Farmondan kelib chiqadigan oʻzgartish va qoʻshimchalar kiritish haqida taklif kiritsin;

amaldagi idoraviy meʼyoriy hujjatlar va yoʻriqnomalarni mazkur Farmon talablariga muvofiqlashtirsin.

6. Mazkur Farmonning bajarilishini nazorat qilish Oʻzbekiston Respublikasi Bosh vazirining oʻrinbosari V.Chjen hamda Moliya vaziri J.Sayfiddinov zimmasiga yuklansin.

Oʻzbekiston Respublikasining Prezidenti I. KARIMOV

Toshkent sh.,

1998-yil 4-mart,

PF-1939-son