Savdoda bilvosita soliqlarni undirish tamoyillari toʻgʻrisida

04.05.2001

Oʻzbekiston Respublikasi Hukumati bilan Rossiya Federatsiyasi Hukumati oʻrtasida

Bitim

Oʻzbekiston Respublikasi Hukumati bilan Rossiya Federatsiyasi Hukumati, bundan keyin “Tomonlar” deb ataluvchilar,

quyidagilar toʻgʻrisida ahdlashib oldilar:

1- modda Umumiy taʼriflar

Ushbu Bitim maqsadlarida quyidagi atamalar ishlatiladi;

“bilvosita soliqlar” — ustama qiymatga soliq va aksiz (aksiz soligʻi yoki aksiz yigʻimi);

“nollik stavka” — nol foizga teng boʻlgan tovarlarga (xizmatlarga) solinadigan bilvosita soliqlar stavkasi, bu esa tovarlarni ishlab chiqarishda va realizatsiya qilishda (xizmatlar koʻrsatishda) ishlatilgan moddiy resurslar boʻyicha soliq solishdan va qoʻshilgan qiymat soligʻi uchun tovon hamda aksizlardan ozod qilishga barobar, va soliq toʻlovchi uchun navbatdagi toʻlovlar hisobidan toʻlangan soliqlarni hisobga olish huquqini yoki ularning oʻrnini toʻldirishni anglatadi.

“tayinlangan mamlakat” — bojxona hududiga tovarlar isteʼmol qilish uchun olib kiriladigan davlat;

“xoʻjalik yurituvchi subyektlar” — Tomonlar davlatlarining soliq toʻlovchilari.

2-modda Bitimning mavzui

Tomonlar davlatlarining xoʻjalik yurituvchi subyektlari oʻrtasida tashqi savdo operatsiyalarini amalga oshirishda bilvosita soliqlarni undirish tamoyilini belgilash ushbu Bitimning mavzui boʻlib hisoblanadi.

3- modda Tovarlarni olib chiqishda soliq solish tamoyili

Eksport bojxona rejimiga joylashtirilgan, bir Tomon davlati bojxona hududidan olib chiqiladigan va boshqa Tomon davlati bojxona hududiga olib kiriladigan tovarlarga Tomonlar belgilagan tartibga muvofiq nollik stavka boʻyicha bilvosita soliq solinadi. Mazkur qoida tabiiy gaz va neftga, jumladan barqaror gaz kondensatiga taalluqli boʻlmaydi.

4- modda Tovarlarni olib kirishda soliq solish tamoyili

Bir Tomon davlati bojxona hududidan olib chiqilgan, boshqa Tomon davlati bojxona hududiga olib kirilayotgan tovarlarga tayinlangan mamlakatda uning milliy qonunlariga muvofiq bilvosita soliqlar solinadi.

5- modda Xizmat koʻrsatishda bilvosita soliqlarni qoʻllash tartibi

1. Xizmat koʻrsatishda bilvosita soliqlarni qoʻllash tartibi alohida bayonnoma bilan rasmiylashtiriladi, Mazkur bayonnoma kuchga kiritilguniga qadar xizmatlarga Tomonlar davlatlarining qonunlariga muvofiq soliq solinadi. Quyidagi xizmatlar bundan istisno:

a) bir Tomon davlati bojxona hududidan boshqa Tomon davlati bojxona hududiga olib chiqilgan tovarlar transportirovkasi va xizmat koʻrsatilishi boʻyicha, jumladan tayinlangan joyga joʻnatish, yuklash, yuk tushirish va qayta yuklash boʻyicha xizmatlar;

b) tovarlarni joʻnatish yoki tayinlangan punktlari Tomonlar davlatlari hududida joylashganligi sharti bilan tranzit tovarlar transportirovkasi va xizmat koʻrsatilishi boʻyicha, jumladan tayinlangan joyga joʻnatish, yuklash, yuk tushirish va qayta yuklash boʻyicha xizmatlar;

v) bir Tomon davlati bojxona hududidan boshqa Tomon davlati bojxona hududiga toʻgʻri va teskari yoʻnalishda yoʻlovchi va yuklarni tashish boʻyicha xizmatlar.

2. Ushbu modda 1 -bandining “a”, “b” va “v” kichik bandlarida sanab oʻtilgan xizmatlarga, ular Tomonlar belgilagan tartiblarga muvofiq haqiqatda koʻrsatilgani tasdiqlangan holda, soliq toʻlovchilari bunday xizmatlarni koʻrsatadigan davlatda nollik stavka boʻyicha qoʻshilgan qiymat soligʻi solinadi.

6- modda Tovarlarning koʻchishi va bilvosita soliqlarni toʻlash ustidan nazorat

1. Tovarlarning koʻchishi ustidan nazoratni amalga oshirish, axborotni hisobga olish va almashish maqsadlarida Tomonlar Mustaqil Davlatlar Hamdoʻstligi tashqi iqtisodiy faoliyat tovar nomenklaturasini ishlatadilar (MDH TIF TN).

2. Tomonlar davlatlari bojxona hududlariga olib kiriladigan tovarlar boʻyicha bilvosita soliqlarni tayinlangan mamlakatning bojxona organlari yoki uning soliq organlari undiradilar.

7-modda Bitimni ijro etish

1. Ushbu Bitim Tomonlarning xalqaro huquqning umum tan olingan tamoyil va meʼyorlariga muvofiq ichki ishlab chiqaruvchilar va milliy bozor manfaatlarini himoya qilish uchun zarur choralarni koʻrish huquqiga toʻsqinlik qilmaydi.

2. Ushbu Bitimni talqin yoki tatbiq qilish borasidagi kelishmovchiliklarni Tomonlar maslahatlashuvlar yoʻli bilan hal etadilar.

8- modda Bitimga oʻzgartish va qoʻshimchalar kiritish

1. Tomonlar oʻzaro rozilik boʻyicha ushbu Bitimga oʻzgartish va qoʻshimchalar kiritadilar. Ular Bitimning ajralmas qismi boʻlib hisoblanadigan bayonnomalar bilan rasmiylashtiriladi.

2. Tomonlar zarurat boʻlganida ushbu Bitim bajarilishining borishini va unga oʻzgartish va qoʻshimchalar kiritilishining maqsadga muvofiqligini baholash uchun maslahatlashuvlar oʻtkazadilar.

9- modda Bitimning amal qilish muddati

1. Ushbu Bitim Tomonlar uning kuchga kirishi uchun davlat ichki protseduralarini bajarganliklari toʻgʻrisidagi oxirgi yozma ravishdagi xabarnoma diplomatik kanallar orqali olingan oydan soʻng keyingi oyning birinchi sanasidan boshlab kuchga kiradi.

2. Ushbu Bitim besh yillik muddatga tuziladi hamda Tomonlardan hech biri navbatdagi muddat tugashidan kamida olti oy ilgari uning amal qilishini toʻxtatish niyati toʻgʻrisida boshqa Tomonga yozma ravishda diplomatik kanallar orqali xabar bermasa, keyingi besh yillik davrlarga oʻz-oʻzidan uzaytiriladi.

Moskva shahrida 2001-yil 4-mayda ikki nusxada, har biri oʻzbek va rus tillarida tuzildi, ikkala matn bir xil kuchga ega.

(imzolar)