Oʻzbekiston Respublikasi va Tojikiston Respublikasining radioxizmatlari foydalanadigan 30.0 - 1000.0 mgs radiochastotasi polosasidagi radiochastota tasarrufini muvofiqlashtirish toʻgʻrisida

30.05.2000

Oʻzbekiston Respublikasi Hukumati bilan Tojikiston Respublikasi Hukumati oʻrtasida

Bitim

Oʻzbekiston Respublikasi Hukumati bilan Tojikiston Respublikasi Hukumati, bundan keyin “Tomonlar” deb ataluvchilar,

aloqa sohasidagi hamkorlikni rivojlantirish istagida,

radioaloqa, televideniye va radioeshittirish xizmatlariga talab darajasini hisobga olib,

oʻz davlatlari radioxizmatlarining oʻzaro zararli radioxalalini bartaraf etish maqsadida 30.0 — 1000.0 MGts radiochastotasi polosasidagi radiochastota tasarrufini muvofiqlashtirish zarur deb hisoblab,

Xalqaro Elektr aloqasi Uyushmasi (XEU)ning Radioxizmat reglamentiga muvofiq faoliyat yuritib,

quyidagilar toʻgʻrisida ahdlashib oldilar:

1-modda

Ushbu Bitimdagi “chegaraoldi tumani” atamasi Oʻzbekiston Respublikasi va Tojikiston Respublikasi oʻrtasidagi chegaraning har ikki tomonida joylashgan, bir Tomon davlatining radioelektron vositalari boshqa Tomon davlati hududida ushbu Bitimda qabul qilingan yoʻl qoʻyiladigan miqdordan ortiqroq radioxalal darajasi kelib chiqishi mumkin boʻlgan hududni anglatadi.

2-modda

Tomonlarning huquqlari, majburiyat hamda masʼuliyati xalqaro huquqning umumeʼtirof etilgan meʼyorlari, Tomonlarning milliy qonunlari va ushbu Bitim qoidalariga koʻra belgilanadi va tartibga solinadi.

3-modda

Ushbu Bitimni roʻyobga chiqarish uchun Tomonlarning vakolatli organlari etib quyidagilar tayinlanadi:

Oʻzbekiston Respublikasida — Oʻzbekiston Pochta va telekommunikatsiya agentligi

700000, Toshkent sh., A.Tolstoy koʻchasi, 1

Telefaks: (371) 133-52-27,

Telefon: (371) 133-66-45;

Tojikiston Respublikasida — Tojikiston Respublikasi Aloqa vazirligi

734025, Dushanbe sh., Rudakiy shoxkoʻchasi, 57

Telefaks: (992 372) 21-29-53,

Telefon: (992 372)21-22-84

4-modda

Tomonlar turli radioxizmat stansiyalarining chegaraoldi tumanlarida 30.0 — 1000.0 MGts radiochastotasi polosasidagi radiochastotalaridan ushbu Bitim qoidalariga muvofiq ravishda foydalanishni muvofiqlashtirish masalalarida hamkorlik qiladilar.

5-modda

1. Ushbu Bitimga muvofiq quruqlikdagi harakatchan, barqaror, radioeshittirishlar va boshqa radioxizmatlar radiochastotalarni tasarruf etishni muvofiqlashtirish masalalarida hamkorlik qiladilar.

2. Ushbu Bitimning 4-moddasida koʻrsatilgan kyenglikdagi radiochastotalarni muvofiqlashtirishga davlatlarning chegaraoldi tumanlarida joylashgan stansiyalarning, shuningdek agar qoʻshni davlatning chegaraoldi tumanida maydonning minimal muhofaza kuchlanishining median qiymati farqi va tegishli xizmatlarning muhofaza nisbatidan oshadigan boʻlsa, chegaraoldi tumanlari hududidan tashqaridagi alohida stansiyalarning radiochastota tasarruflari tegishlidir.

3. Chegaraoldi tumanlardagi qabul qiluvchi stansiyalarni radioxalallardan muhofaza etish lozim boʻlsa, ularning radiochastota tasarrufini muvofiqlashtirishni amalga oshirish ham mumkin boʻladi.

6-modda

1. Tomonlar ikki toifadagi radiochastotalarni belgilaydilar:

ustuvor va muvofiqlashtiriluvchi, ular roʻyxatlarda quyidagicha qayd etiladi;

tomonlarning ustuvor radiochastotalari roʻyxati, Tomonlarning har biri ulardan boshqa Tomon bilan oldindan muvofiqlashtirilmagan holda tasarruf etadilar;

muvofiqlashtiriluvchi radiochastotalar roʻyxati, ular Tomonlar tarafidan muvofiqlashtiriladi va ulardan foydalanish yuzasidan kelishuvga erishilgan boʻladi.

Har bir Tomon uchun ustuvor radiochastotalarning miqdori davlat vazifalarini amalga oshirish minimal darajada yetarli boʻlishi lozim. Radiostansiyalarning ushbu radiochastotalardagi ishi qoʻshni davlatning chegaraoldi tumanlari ichki liniyasida joylashgan radiostansiyalarga radioxalal tugʻdirmasligi kerak.

Ustuvor radiochastotalar chegaraoldi tumanining istalgan nuqtasida joylashgan radiostansiyalarga tayinlanadi (beriladi).

Muvofiqlashtirilgan radiochastotalarni tayinlash (berish) boshqa Tomon bilan oldindan oʻtkazilgan muvofiqlashtirish shartlari asosida amalga oshiriladi.

2. Radiostansiyalarga ustuvor toifa roʻyxatidagi radiochastotalarni berish va muvofiqlashtiriluvchi radiochastotalar toifasi roʻyxatiga kiritilgan radiochastotalar tasarrufi Tomonlar tarafidan oʻzaro kelishuv asosida amalga oshirilgan deb qaraladi.

3. Tomonlardan har birida mazkur toifalardagi radiochastotalarning roʻyxati boʻlishi va ular oʻtkazilgan muvofiqlashtirish asosida toʻlgʻizilishi lozim. Tomonlarning radiochastotalari roʻyxati har yili Tomonlar ekspertlarining kengashlarida aniqlashtirib olinishi kerak.

4. Tomonlar oʻz radiostansiyalari oʻrtasida 4-moddada koʻrsatilgan radiochastotalar boʻyicha yuzaga kelishi mumkin boʻlgan radioxalal vaziyatlarini koʻrib chiqadilar hamda ularni bartaraf etish choralarini koʻradilar, shuningdek ishlab turgan muvofiqlashtirilgan stansiyalarning roʻyxatlarini kelishilgan shaklda almashlaydilar.

7-modda

1. Har bir konkret holatda axborotni (pochta, faks yoki elektron pochta orqali) berish Tomonlarning qaroriga koʻra amalga oshiriladi.

2. Tomonlar ustuvor va muvofiqlashtiriluvchi toifadagi radiochastotalar roʻyxatini, shuningdek boshqa Tomon yozma ravishda rozilik bermagan boʻlsa, uning radiochastotalari tasarrufini muvofiqlashtirish masalalariga oid yozishmalar va axborotni oshkor qilmaslik hamda uchinchi tomonga berib yubormaslik majburiyatini oladilar.

3. Berilayotgan axborotning maxfiyligini bu axborotni berayotgan Tomon belgilaydi.

Berilayotgan axborot matbuotda oshkor etish taqiqlangan maʼlumotlardan xoli boʻlishi lozim. Bu talablarga rioya etish masʼuliyati axborotni berayotgan Tomon zimmasiga yuklatiladi.

4. Tomonlar hamkorlik davomida olingan axborotni muhofaza etishni taʼminlaydilar. Axborotni muhofaza etish Tomonlarning milliy qonunlariga muvofiq amalga oshiriladi.

5. Axborotni muhofaza etishning buzilishi bunga yoʻl qoʻygan davlatning qonunlariga binoan tasnif etiladi.

6. Tomonlar olingan axborotdan faqat shu maqsadda foydalanishlari va u qaysi xodimning xizmat vazifasini bajarish jarayonida zarur boʻlsa, oʻshangagina taqdim etishlari lozim.

7. Tomonlar olingan barcha axborotni boshqa Tomon talab qilgan hollarda taqqoslash va mavjudligi nuqtai nazaridan taqdim etish majburiyatini oladilar.

8. Dolzarbligi va amaliy qiymatini yoʻqotgan axborot Tomonlarning oʻzaro kelishuviga koʻra qaytarib beriladi yoki qayta tiklanmaydigan qilib yoʻqotiladi. Yoʻq qilib yuborish fakti hujjatlashtiriladi, va bu hujjatning bir nusxasi ushbu axborotni taqdim etgan Tomonga joʻnatiladi.

9. Axborot yoʻqolsa yoki oshkor boʻlib qolsa, Tomonlar darhol oʻzaro maslahatlashuv oʻtkazadilar, taftish uyushtiradilar va uning natijalari toʻgʻrisida bir-birini axborotning yoʻqolgan yoki oshkor boʻlib qolgan sanadan boshlab uzogʻi bilan 90 kun ichida xabardor qiladilar.

10. Axborotni yoʻqotib qoʻygan yoki oshkor etgan Tomon uni bergan Tomonga shu hol tufayli koʻrgan zararini toʻlaydi.

Zararni toʻlashning koʻlami va tartibini Tomonlarning vakolatli delegatsiyalari muzokara oʻtkazish orqali, ushbu axborotni bergan Tomonning qonun-qoidalariga asoslangan holda belgilaydi.

8-modda

1. Radiochastotalar tasarrufini muvofiqlashtirishda Tomonlar qabul qilingan va kelishilgan bir xil texnikaviy asoslardan foydalanadilar.

2. Radiochastotalarni tasarruf etishda har bir Tomon radiochastotalar spektridan samarali foydalanishga harakat qilishi hamda taqdim etilayotgan aloqa xizmatlarining maqsad yoʻnalishidan kelib chiqqan holda ular sifatining qoniqarli boʻlishini taʼminlash uchun oʻz radiostansiyalari quvvati samarali taralishini minimum darajaga qadar pasaytirishga intilishi kerak.

3. Aloqa texnikasi taraqqiyotini hisobga olib, Tomonlar aniqlash va muvofiqlashtirishning texnikaviy asoslarini bundan keyin rivojlantirish maqsadida ekspertlar kengashlarini oʻtkazadilar.

9-modda

1. Har bir Tomon uning uchun radiochastotalar roʻyxatida belgilanmagan yangi radiochastota tasarrufidan foydalanish yoki muvofiqlashtiriluvchi radiochastotalar roʻyxatiga oʻzgartish kiritishdan oldin XEU Radioaloqa reglamenti talablari asosida muvofiqlashtirish oʻtkazishi kerak.

2. Muvofiqlashtirish yuzasidan soʻrov yuborilgan Tomon uni olganligi toʻgʻrisida telegramma yuborishi va 30 kun ichida asoslangan javob qaytarishi lozim. Bunda u eʼlon etilayotgan radiochastotalar tasarrufiga rozi boʻlmasa, ushbu muammoni maqbul tarzda hal etish yuzasidan oʻz takliflarini bayon qilishi kerak.

3. Muvofiqlashtirish yuzasidan soʻrov yuborgan Tomon 45 kun ichida javob olmasa, u boshqa Tomonning eʼlon qilingan radiochastotalar tasarrufiga eʼtirozi yoʻq deb hisoblaydi va uni oʻzining muvofiqlashtirilgan radiochastotalar roʻyxatiga qoʻshib, bu toʻgʻrida boshqa Tomonni xabardor qiladi.

4. Quyidagi hollarda radiochastotalar tasarrufini muvofiqlashtirish shart emas:

a) tasarruf muayyan Tomonning roʻyxatidagi ustuvor chastotalardan biriga muvofiq amalga oshirilsa;

b) muvofiqlashtirilgan radiochastotalar tasarrufidan foydalanadigan stansiyada boshqa Tomon hududida qoʻshimcha radioxalal paydo boʻlishiga olib kelmaydigan jihatlar oʻzgargan boʻlsa;

v) ilgari muvofiqlashtirilgan radiochastotalarda ish olib boradigan qoʻshimcha stansiya ishga tushirilgan chogʻida boshqa Tomon hududida radioxalal koʻpaymasa.

5. Muvofiqlashtirilgan radiochastotalar tasarrufidan foydalanadigan stansiya ishi toʻxtatilsa, boshqa Tomonga uning oʻrniga ishga tushirilgan stansiyaning texnikaviy tavsifi 30 kun ichida xabar qilinadi.

6. Baʼzi shoshilinch hollarda Tomonlar vaqtincha (30 kungacha) quvvati samarali taralganida 13 dB Vt.dan oshmaydigan stansiyalarga radiochastotalardan foydalanish uchun ruxsat berishga haqlidirlar. Bunda Tomonlar bir-birini bunday foydalanish hollaridan ogoh qilib, yuz berishi mumkin boʻlgan radioxalalni bartaraf etish choralarini koʻradilar.

7. Tomonlardan birontasi muvofiqlashtirilgan radiochastotalar tasarrufi roʻyxatiga muvofiqlashtirishni talab qilmaydigan oʻzgartish kiritgan, jumladan muvofiqlashtirilgan stansiyadan foydalanishni toʻxtatgan boʻlsa, u bu toʻgʻrida boshqa Tomonga 30 kun ichida xabar beradi.

10-modda

Bir Tomonning qabul qiluvchi stansiyasi yoʻl qoʻyib boʻlmaydigan radioxalallarni qayd etayotgan boʻlsa, u radioxalallarni yuzaga keltirayotgan stansiyaning egasi boʻlgan Tomonga bu toʻgʻrida xabar beradi. Tomonlar oʻzaro tushunish va hamkorlik asosida radioxalallarga oid masalani hal qilish choralarini koʻradilar.

11-modda

1. Ushbu Bitimda koʻzda tutilmagan barcha masalalarda Tomonlar Xalqaro Elektr aloqa konferensiyalarining qoidalari, Xalqaro radio aloqa reglamenti qoidalari va Xalqaro Elektr aloqa Uyushmasining tavsiyalariga amal qiladilar.

2. Ushbu Bitim Tomonlarning ular aʼzo boʻlgan xalqaro bitimlar hamda Tomonlardan har birida radiochastotalardan foydalanishni tartibga soladigan milliy qoidalarni bajarishlariga monelik qilmaydi.

12-modda

Ushbu Bitim qoidalarini talqin qilish va qoʻllash chogʻida Tomonlar oʻrtasida kelib chiqadigan barcha muammo hamda nizolar Tomonlarning vakolatli organlari tarafidan muzokara va maslahatlashuv oʻtkazish orqali hal etiladi.

13-modda

Ekspertlarning uchrashuvlari Tomonlar tarafidan oldindan kelishib olinadi, uning tashkiliy jihatlarini hududida bunday uchrashuv oʻtkaziladigan davlat hal qiladi. Ekspertlarni moliyaviy taʼminlash har bir Tomonning oʻz sarmoyalari hisobidan amalga oshiriladi.

14-modda

Tomonlarning ushbu Bitimga muvofiq oʻzaro munosabatlarida rus tili qoʻllanadi.

15-modda

Tomonlarning oʻzaro kelishuviga binoan, ushbu Bitimga oʻzgartish va qoʻshimchalar kiritilishi mumkin.

Barcha oʻzgartish va qoʻshimchalar alohida bayonnomalar tarzida rasmiylashtiriladi va ushbu Bitimning tarkibiy qismi hisoblanadi.

16-modda

Ushbu Bitim imzolangan sanadan boshlab kuchga kiradi. Bitim besh yil muddatga tuziladi va Tomonlardan hech qaysisi tegishli muddat tugashidan kamida olti oy ilgari boshqa Tomonni uning faoliyatini toʻxtatish toʻgʻrisidagi niyatidan yozma ravishda xabardor qilmasa, u har gal oʻz-oʻzidan keyingi besh yillik davrlarga uzayadi.

Bu davrda Tomonlar berilgan axborotdan foydalanish tartibi yuzasidan oʻzaro maslahatlashuvlar oʻtkazadilar. Ushbu Bitim faoliyatining toʻxtatilishi Tomonlarni uning faoliyati toʻxtatilguniga qadar olingan axborotni muhofaza qilish masʼuliyatidan, shuningdek uning yoʻqolishi yoki oshkor qilinishi boʻyicha javobgarliqdan ozod qilmaydi.

Toshkent shahrida, 2000-yil 30-mayda ikki nusxada, oʻzbek, tojik va rus tillarida tuzildi, bunda barcha matnlar bir xil kuchga ega.

Ushbu Bitimni talqin qilishda har xilliklar yuzaga kelgan hollarda Tomonlar rus tilidagi matndan foydalanadilar.

(imzolar)