Oʻzbekiston-Qozogʻiston davlat chegarasidan oʻtkazish punktlari toʻgʻrisida

16.11.2001

Oʻzbekiston Respublikasi Hukumati bilan Qozogʻiston Respublikasi Hukumati oʻrtasida

Bitim

Oʻzbekiston Respublikasi Hukumati bilan Qozogʻiston Respublikasi Hukumati, bundan keyin Tomonlar deb ataluvchilar,

Oʻzbekiston Respublikasi bilan Qozogʻiston Respublikasi oʻrtasida aloqani rivojlantirish uchun qulay shart-sharoitlarni yaratish maqsadida,

Oʻzbekiston-Qozogʻiston davlat chegarasidan shaxslarni, transport vositalarini, yuk, tovar va hayvonlarni oʻtkazish tartibini takomillashtirish zarurligiga asoslanib,

noqonuniy migratsiya, qurol-yarogʻ, giyohvandlik vositalari, psixotrop moddalar va prekursorlarning kontrabandasini aniqlash va oldini olish, shuningdek epidemiya va epizootiyaning tarqalishini bartaraf qilish boʻyicha chora-tadbirlarni birgalikda va oʻz vaqtida olib borish zarurligini tan olib,

quyidagilar toʻgʻrisida ahdlashib oldilar:

1-modda

Oʻzbekiston-Qozogʻiston davlat chegarasini shaxslar va transport vositalarining kesib oʻtishi, shuningdek yuk, tovar va hayvonlarni olib oʻtish uchun Tomonlar davlat chegaralaridan xalqaro, ikki tomonlama oʻtkazish punktlarini (bundan keyin oʻtkazish punktlar deb ataluvchilar) oʻrnatadilar.

Tomonlar oʻtkazish punktlari roʻyxatini diplomatik kanallar orqali ahdlashib oladilar va ushbu Bitimning ajralmas qismlari hisoblanadigan bayonnomalar orqali rasmiylashtiradilar.

Tomonlar davlatlarining chegara va bojxona idoralarining ahdlashuviga hamda Tomonlar davlatlarining milliy qonunlariga koʻra Tomonlar davlatlarining fuqarolari oʻtishlari uchun yengillashtirilgan oʻtkazish punktlari tuzilishi mumkin.

2- modda

Oʻzbekiston-Qozogʻiston davlat chegarasi avtomobil oʻtkazish punktlari orqali shaxslarning kesib oʻtishi transport vositalaridan foydalangan holda yoki piyoda amalga oshirilishi mumkin.

3- modda

Shaxslarni, transport vositalarini, yuk, tovar va hayvonlarni chegara, bojxona va zarur hollarda boshqa turdagi nazorat qilish (bunday keyin — nazorat qilish deb ataladi), oʻtkazish punktlarida Tomonlar davlatlarining milliy qonunchiliklari va ular ishtirok etgan xalqaro shartnomalarga muvofiq amalga oshiriladi.

4- modda

Oʻtkazish punktlarining ochilishi, ularni qurib bitirgandan keyin va har bir Tomon davlatlarining nazorat organlari faoliyati uchun zarur infratuzilma yaratilganidan soʻnggina amalga oshiriladi.

Tomonlar oʻtkazish punktlarining ochilganligi yoki yopilganligi toʻgʻrisida bir-birlarini diplomatik kanallar orqali xabardor qiladilar.

Ushbu Bitimni bajarishda Tomonlarning quyidagi vakolatli organlari masʼul hisoblanadilar:

Oʻzbekiston Respublikasi tomonidan -Oʻzbekiston Respublikasi Davlat chegaralarini himoya qilish qoʻmitasi va Oʻzbekiston Respublikasi Davlat bojxona qoʻmitasi;

Qozogʻiston Respublikasi tomonidan - Qozogʻiston Respublikasi Milliy xavfsizlik qoʻmitasining Chegara xizmati va Qozogʻiston Respublikasi Davlat daromadlari vazirligining Bojxona qoʻmitasi.

5- modda

Tomonlarning vakolatli organlari boshqacha tartib oʻrnatishga kelishib olmagan boʻlsalar, oʻtkazish punktlarining ishlari kunda yigirma toʻrt soat amalga oshiriladi.

Ushbu Bitim Tomonlar ilgari boshqa davlatlarga nisbatan qabul qilgan majburiyatlariga daxl qilmaydi va uchinchi davlatlar hamda ularning manfaatlariga qarshi qaratilmagan.

6- modda

Oʻtkazish punktlari orqali harakatlanishning cheklanishi yoki toʻxtatilishi Tomonlar davlatlarining milliy xavfsizligi manfaatlarida, sanitar-karantin sabablariga koʻra, tabiiy ofatlar natijasida, epidemiya va epizootiya hollarida amalga oshirilishi mumkin.

Bunday cheklashlarni kiritayotgan Tomon boshqa Tomonni cheklashning kiritilishi uchun rejalashtirilgan vaqtga kamida 24 soat qolganda cheklashning sabalari va muddatlarini koʻrsatgan holda, diplomatik kanallar orqali xabardor qiladi.

Tomonlar Oʻzbekiston-Qozogʻiston davlat chegarasi orqali oʻtkazish punktlarining obyektlari yoki kommunikatsiya qurilmalarning rejali taʼmirlanishi sababli harakatlanish cheklanishi yoki taqiqlanishi toʻgʻrisida bir-birlarini bunday ishlar boshlanishidan kamida uch oy oldin, ularning tugatilish sanasini koʻrsatgan holda axborot beradilar.

7- modda

Favqulodda holatlarda (tabiiy ofatlar, yongʻinlar, suv toshqinlari, epidemiya, epizootiya, texnogen xarakteridagi avariyalar, shoshilinch tibbiy tez yordam koʻrsatish va h.k.) Tomonlar davlatlarining chegara idoralari oʻzaro kelishuvga koʻra Tomonlar davlatlarining fuqarolarini transport vositalari va anjomlarini nazoratning belgilangan tartibiga rioya qilgan holda amaldagi oʻtkazish punktlaridan tashqari oʻtkazishlari mumkin.

8- modda

Oʻtkazish punktlarining tegishlicha faoliyatini taʼminlash uchun Tomonlarning har biri oʻz davlatining hududida zarur infratuzilmani yaratadi.

Avtomobil va temir yoʻl oʻtkazish punktlari obyektlarini loyihalashtirishda, shuningdek qurilishida Tomonlar davlatlarining hududlarida birgalikda nazorat olib borish uchun shart-sharoitlarni yaratish imkoniyatlari koʻrib chiqiladi.

Birgalikdagi nazoratining tartibi va tashkillashtirishi Tomonlarni tegishli idoralar oʻrtasidagi kelishuvlar orqali hal qilinadi.

9- modda

Ushbu Bitimni amalga oshirish maqsadida Tomonlar lozim boʻlsa, uning ijro etish masalalari boʻyicha ikki tomonlama maslahatlashuvlar oʻtkazadilar.

Ushbu Bitimning qoidalarini talqin qilish va qoʻllash borasida yuzaga keladigan bahs va kelishmovchiliklar muzokaralar orqali hal qilinadi.

10- modda

Tomonlarning oʻzaro kelishuvlariga koʻra ushbu Bitimga oʻzgartish va toʻldirishlar kiritilishi mumkin. Ular ushbu Bitimning ajralmas qismi hisoblanadi va alohida bayonnomalar orqali rasmiylashtiriladi.

11- modda

Ushbu Bitim Tomonlarning uni kuchga kirishi uchun zarur boʻlgan davlat ichki protseduralarini bajarilganliklari toʻgʻrisida oxirgi yozma xabarnoma olingan sanadan boshlab kuchga kiradi.

Ushbu Bitim besh yil muddatga tuziladi va Tomonlardan birontasi boshqa Tomonni ushbu Bitim faoliyatini toʻxtatish toʻgʻrisidagi niyatini navbatdagi besh yillik muddat tugashidan kamida olti oy ilgari yozma xabarnoma yubormasa, u oʻz-oʻzidan keyingi besh yillik muddatlarga uzayaveradi.

Ostona shahrida 2001-yil 16-noyabrda ikki nusxada, har biri oʻzbek, qozoq va rus tillarida tuzildi, bunda barcha matnlar bir xil kuchga ega.

Ushbu Bitim qoidalarini talqin qilishda kelishmovchiliklar yuzaga kelgan holda, Tomonlar rus tilidagi matnga murojaat qiladilar.

(imzolar)