Fuqarolik va jinoiy ishlar boʻyicha huquqiy yordam hamda huquqiy munosabatlar toʻgʻrisida

18.01.2002

Oʻzbekiston Respublikasi bilan Chexiya Respublikasi oʻrtasida

Shartnoma

Oʻzbekiston Respublikasi bilan Chexiya Respublikasi, bundan keyin “Ahdlashuvchi Tomonlar” deb ataluvchilar,

xalqaro huquqning umum eʼtirof etilgan meʼyorlariga amal qilib,

ikkala Ahdlashuvchi Tomonlar fuqarolarining shaxsiy va mulkiy huquqlarining teng huquqiy muhofaza qilinishini taʼminlashga boʻlgan intilishdan kelib chiqib,

fuqarolik, oilaviy va jinoiy ishlar boʻyicha huquqiy yordam koʻrsatish boʻyicha hamkorlikni rivojlantirishga alohida ahamiyat berib,

quyidagilar toʻgʻrisida ahdlashib oldilar:

I boʻlim Umumiy qoidalar

I qism Huquqiy muhofaza

1-modda Tushuncha va atamalar

1. Ushbu Shartnomada keltiriladigan tushuncha va atamalar yagona maʼnoda talqin etilib, quyidagi maʼnolarni anglatadi:

fuqarolik ishlari — sudlar tomonidan koʻrib chiqiladigan fuqarolik-huquqiy, oilaviy-huquqiy, savdo-huquqiy va maʼmuriy ishlar;

jinoiy ishlar — jinoiy ishlab chiqarishda, jumladan ikkala Ahdlashuvchi Tomon qonunlariga koʻra taʼqib etiladigan jinoiy qilmishlarga taalluqli tekshiruv va sud ishlab chiqarishida koʻriladigan ishlar;

Oʻzbekiston Respublikasi adliya muassasalari — sudlar, prokuraturalar hamda fuqarolik va jinoiy ishlar boʻyicha qaror chiqarishga vakolatli boshqa muassasalar;

Chexiya Respublikasining adliya muassasalari — sudlar, prokuraturalar (statni zastupitelsvi) hamda fuqarolik va jinoiy ishlar boʻyicha qaror chiqarishga vakolatli boshqa muassasalar;

bir Ahdlashuvchi Tomonning fuqarosi — shu Ahdlashuvchi Tomon qonunlariga koʻra uning fuqarosi boʻlgan jismoniy shaxs;

bir Ahdlashuvchi Tomon hududida yashaydigan shaxslar — shu Ahdlashuvchi Tomon fuqaroligiga ega boʻlmagan, biroq uning hududida yashash uchun ruxsatnomasi boʻlgan jismoniy shaxslar.

2. Ushbu Shartnomaning qoidalari tegishli ravishda va Ahdlashuvchi Tomonlarning qonunlariga koʻra ularning hududida roʻyxatga olingan yuridik shaxslarga ham joriy etiladi.

2-modda Huquqiy muhofazani taqdim etish

1. Ahdlashuvchi Tomonlardan har birining fuqarolari, shuningdek uning hududida doimiy yashovchi shaxslar boshqa Ahdlashuvchi Tomon hududida oʻz shaxsiy va mulkiy huquqlari munosabatida ana shu Tomonning oʻz fuqarolaridek huquqiy muhofazadan foydalanadilar.

2. Ahdlashuvchi Tomonlardan birining fuqarolari, shuningdek uning hududida yashovchi oʻzga shaxslar boshqa Ahdlashuvchi Tomonning adliya muassasalariga erkin va toʻsqinliksiz murojaat qilishlari, ushbu Ahdlashuvchi Tomonning fuqarolari kabi ularda qatnashishlari, soʻrov qoʻzgʻatishlari, daʼvo qilishlari va boshqa protsessual harakatlarni amalga oshirishlari mumkin.

3-modda Xarajatlarni qoplash uchun avans toʻlashdan ozod qilish

Ahdlashuvchi Tomonlardan birining fuqarolari, shuningdek uning hududida yashovchi boshqa shaxslar ikkinchi Ahdlashuvchi Tomonning adliya muassasalariga daʼvogar, arz qiluvchi, javobgar hamda oʻzga ishtirokchi sifatida murojaat qilsalar, ishlab chiqarish xarajatlari va boshqa kafolatlar uchun avans toʻlashdan ozod qilinadilar.

II qism Huquqiy yordam

4-modda Huquqiy yordam berish

Ahdlashuvchi Tomonlarning adliya muassasalari fuqarolik, oilaviy va jinoiy ishlar boʻyicha oʻzlarining milliy qonunlariga asosan hamda ushbu Shartnoma qoidalariga muvofiq oʻzaro yordam beradilar.

5-modda Huquqiy yordam koʻlami

Ahdlashuvchi Tomonlarning adliya muassasalari soʻralayotgan Ahdlashuvchi Tomonning qonunlarida nazarda tutilgan protsessual va boshqa harakatlarni bajarish orqali, shu jumladan:

1) hujjatlarni tuzish va joʻnatish, tegishli hujjatlar va materiallarning, shu jumladan, sud, bank, moliya, ish hamda boshqa hujjatlarining aslini yoki tasdiqlangan nusxalarini taqdim etish;

2) tintuv oʻtkazish, predmet va hujjatlarni olib qoʻyish, mulkni xatlash, ashyoviy dalillarni joʻnatish va berish;

3) koʻzdan kechirish va tekshirib koʻrish;

4) ekspertiza oʻtkazish;

5) tomonlarni, jabrlanuvchilarni, ayblanuvchilarni, guvohlarni, ekspertlarni soʻroq qilish;

6) jinoyatda ayblanuvchi shaxslarni, shuningdek hukmni ijro etish uchun ushlab berish;

7) jinoiy taʼqib qilishni qoʻzgʻash va amalga oshirish;

8) hujjatlarni berish orqali bir-birlariga yordam beradilar.

6-modda Munosabatlar tartibi

Huquqiy yordam koʻrsatishda Ahdlashuvchi Tomonlarning adliya muassasalari bir-birlari bilan oʻzlarining markaziy organlari:

Oʻzbekiston Respublikasida — Oʻzbekiston Respublikasi Bosh prokuraturasi;

Chexiya Respublikasida — Chexiya Respublikasi Adliya vazirligi orqali munosabatga kirishadilar.

Diplomatik yoʻllar bilan aloqaga kirishishi ham inkor etilmaydi.

7-modda Huquqiy yordam berish toʻgʻrisida soʻrovnoma

1. Huquqiy yordam berish toʻgʻrisidagi soʻrovnomada quyidagilar boʻlishi kerak:

1.1. soʻrayotgan adliya muassasasining nomi hamda soʻralayotgan adliya muassasasining nomi;

1.2. huquqiy yordam soʻralayotgan ishning nomi, soʻrovnoma maqsadining bayoni va soʻralayotgan harakatlarining tavsifi;

1.3. tomonlarning, jabrlanuvchilarning, guvohlarning, gumondorlarning, ayblanuvchilarning, sudlanuvchilarning yoki hukm qilinganlarning ismi va familiyalari, ularning yashash yoki turgan joyi, fuqaroligi, mashgʻuloti, yuridik shaxslar uchun — ularning nomi va joylashgan oʻrni toʻgʻrisidagi maʼlumotlar;

1.4. 1.3-kichik bandda koʻrsatilgan shaxslarning qonuniy vakillari boʻlganda — ularning ismi, familiyasi va manzili;

1.5. bajarilishi talab qilinadigan aniq tartibning qoʻllanish sabablari va mufassal tavsifi;

1.6. jinoiy ishlar boʻyicha ham sodir etilgan jinoyatning tasviri va kvalifikatsiyasi, tegishli qonunlarning bayoni yoki matni, shuningdek xatti-harakat natijasida zarar yetkazilgan boʻlsa — moddiy zararning miqdori toʻgʻrisidagi maʼlumotlar;

1.7. zarur boʻlsa, soʻrovnomaning bajarilishi kutilayotgan muddat.

2. Zarur boʻlsa, soʻrovnomaga soʻrayotgan soʻrovni bajarishni osonlashtiruvchi yoki sanksiyalanadigan protsessual harakatlar uchun zarur boʻladigan hujjatlarning soʻrayotgan Ahdlashuvchi Tomonning huquqiy tartibiga muvofiq tasdiqlangan nusxalari yoki ulardan koʻchirmalar ilova qilinadi.

3. Hujjatlarni topshirish toʻgʻrisidagi soʻrovnomada oluvchining oxirgi maʼlum boʻlgan manzili va ilova qilinayotgan hujjatlarning nomi ham koʻrsatilishi lozim.

4. Soʻrovnoma soʻrayotgan adliya muassasasining tegishli mansabdor shaxsi tomonidan imzolangan va gerbli muhr bilan tasdiqlangan boʻlishi hamda ilova qilinayotgan hujjatlar roʻyxati koʻrsatilishi kerak.

8-modda Bajarish tartibi

1. Huquqiy yordam koʻrsatish toʻgʻrisidagi soʻrovni bajarishda soʻralayotgan adliya muassasasi oʻz davlatining qonunlarini qoʻllaydi. Soʻrayotgan adliya muassasasi soʻroviga koʻra u soʻrayotgan Ahdlashuvchi Tomonning protsessual normalarini, faqat ular soʻralayotgan Ahdlashuvchi Tomonning qonunlariga zid boʻlmasa, qoʻllashi mumkin.

2. Soʻralayotgan adliya muassasasi huquqiy yordam koʻrsatish toʻgʻrisidagi soʻrovni bajarishga vakolatli boʻlmasa, u soʻrovni vakolatli muassasaga joʻnatadi va bu soʻrayotgan adliya muassasasini xabardor qiladi.

3. Soʻrayotgan adliya muassasasining soʻroviga binoan soʻralayotgan adliya muassasasi unga va manfaatdor tomonlarga, soʻralayotgan Ahdlashuvchi Tomonning qonunlariga koʻra bunga yoʻl qoʻyiladigan boʻlsa, ularning soʻrovni bajarish chogʻida ishtirok etishlari uchun huquqiy yordam koʻrsatish toʻgʻrisidagi soʻrovni bajarish vaqti va joyi toʻgʻrisida oʻz vaqtida xabar qiladi.

4. Agar soʻrovnomada koʻrsatilgan shaxsning aniq manzili maʼlum boʻlmasa, soʻralayotgan adliya muassasasi oʻz davlati qonunlariga koʻra uning manzilini aniqlash uchun zarur choralarni koʻradi.

5. Ahdlashuvchi Tomonlarning adliya muassasalari huquqiy yordam koʻrsatish toʻgʻrisidagi soʻrovni oʻz vaqtida va toʻliq bajarish uchun zarur chora-tadbirlarni koʻradilar. Soʻrov bajarilgandan keyin adliya muassasasi zarurat boʻlganda soʻrayotgan adliya muassasasiga huquqiy yordam koʻrsatish toʻgʻrisidagi soʻrovnomaga ilova qilingan hujjatlarni qaytaradi.

6. Ushbu Shartnomaning 19-moddasiga muvofiq huquqiy yordam koʻrsatish mumkin boʻlmagan, soʻralayotgan adliya muassasasi soʻrayotgan adliya muassasasiga huquqiy yordam koʻrsatish toʻgʻrisidagi va ilova qilingan hujjatlarni qaytaradi.

9-modda Guvohlarni, jabrlanuvchilarni, fuqaroviy daʼvogarlarini, fuqaroviy javobgarlarini, qonuniy vakillarni, ekspertlar va tarjimonlarni chaqirish

1. Zarur hollarda Ahdlashuvchi Tomonlardan hududida dastlabki tergovda yoki ish sudda koʻrilayotganda qatnashish uchun boshqa Ahdlashuvchi Tomon hududida boʻlgan guvohlar, jabrlanuvchilar, fuqaroviy daʼvogarlar, fuqaroviy javobgarlar, ularning qonuniy vakillari, ekspertlar, tarjimonchilar chaqirilishi mumkin.

2. Soʻralayotgan Ahdlashuvchi Tomonning adliya muassasasi tomonidan berilgan chaqiriqnoma boʻyicha soʻrayotgan Ahdlashuvchi Tomonning adliya muassasasiga kelgan guvoh, jabrlanuvchi, fuqaroviy daʼvogar, fuqaroviy javobgar va ularning qonuniy vakillari, ekspert, shuningdek tarjimonchi, oʻzining fuqaroligidan qatʼi nazar, ushbu Ahdlashuvchi Tomon hududida uning davlat chegarasidan oʻtgungacha sodir etilgan qandaydir xatti-harakat munosabati bilan jinoiy yoki maʼmuriy javobgarlikka tortilishi, qamoqqa olinishi yoki jazolanishi mumkin emas. Ushbu shaxslar oʻzlarining koʻrib chiqilayotgan ish boʻyicha koʻrsatmalari yoki ekspertlar sifatidagi xulosalari munosabati bilan ham jinoiy yoki maʼmuriy javobgarlikka tortilishi, qamoqqa olinishi yoki jazolanishi mumkin emas.

3. Ushbu moddaning 2-bandida koʻrsatilgan shaxslar, agar ular soʻrayotgan Ahdlashuvchi Tomon hududidan, buning uchun imkoniyatga ega boʻlishsada, ularni soʻroq qilgan adliya muassasasi ularga bundan buyon bu yerda boʻlishlariga zarurat yoʻqligini xabar qilgan kundan boshlab 15 kun oʻtgungacha ketishmasa, ushbu band bilan nazarda tutilgan kafolatlarni yoʻqotadilar. Ushbu shaxslar soʻrayotgan Ahdlashuvchi Tomon hududidan oʻziga aloqador boʻlmagan ayb bilan ketolmagan vaqt ushbu muddatga qoʻshilmaydi.

4. Guvohga, ekspertga, shuningdek jabrlanuvchiga va uning qonuniy vakiliga yoʻlkira va soʻralgan davlatda boʻlish bilan bogʻliq xarajatlarni hamda ishda boʻlmagan kunlari uchun olinmagan ish haqini soʻralayotgan Ahdlashuvchi Tomon toʻlaydi. Ekspert ekspertiza oʻtkazganligi uchun ham haq olish huquqiga egadir. Chaqiriqnomada chaqirilgan shaxsning qanday toʻlovlarni olishga haqli ekanligi koʻrsatilgan boʻlishi kerak. Bunday shaxslarning soʻrovnomalariga binoan soʻralayotgan Ahdlashuvchi Tomonning adliya muassasalari ularga tegishli xarajatlarni qoplash uchun avans toʻlaydi.

5. Ahdlashuvchi Tomonlardan birining hududida yashovchi jabrlanuvchini, daʼvogar fuqaroni va javobgar fuqaroni, guvoh va ekspertni boshqa Ahdlashuvchi Tomonning adliya muassasasiga chaqirish ular kelmagan taqdirda majbur qilish vositalarini qoʻllash tahdidi tusida boʻlmasligi kerak.

10-modda Hujjatlarni topshirish

1. Soʻralayotgan Ahdlashuvchi Tomonning adliya muassasasi hujjatlarni topshirishni, agar topshirilayotgan hujjatlar ushbu davlat tilida tuzilgan yoki zarur tartibda tasdiqlangan tarjima bilan taʼminlangan boʻlsa, soʻrov asosida va ushbu Ahdlashuvchi Tomonning hududida amalda boʻlgan qoidalarga muvofiq amalga oshiradi. Aks holda, u ularni ixtiyoriy ravishda qabul qilishga rozi boʻlsa, hujjatlarni u oluvchiga beradi.

2. Topshirish uchun moʻljallangan hujjatlarning tarjimasi toʻgʻriligini soʻrayotgan adliya muassasasi yoki sud tarjimonchisi, yoxud ularning qonunlari ruxsat bersa Ahdlashuvchi Tomonlardan birining diplomatik yoki konsullik vakili tasdiqlaydi.

3. Hujjatni soʻrovnomada koʻrsatilgan manzil boʻyicha topshirish mumkin boʻlmasa, soʻralayotgan adliya muassasasi oʻz davlatining qonunlariga muvofiq manzilni aniqlash uchun zarur chora-tadbirlarni koʻradi. Manzilni aniqlashning iloji boʻlmagan taqdirda, soʻralayotgan adliya muassasasi soʻrayotgan adliya muassasasini bu haqda xabardor qiladi va topshirilishi kerak boʻlgan hujjatlarni unga qaytaradi.

11-modda Hujjatlar topshirilganligini tasdiqlash

Soʻralayotgan adliya muassasasi topshiriladigan hujjatlarni bayonnoma orqali tasdiqlaydi. Unda hujjatlarni topshirish usuli, joyi va sanasi, hujjat topshirilgan shaxsning imzosi yoki hujjatni qabul qilishni rad etish sababi va soʻralayotgan adliya muassasasi tegishli xodimining gerbli muhr bilan tasdiqlangan imzosi koʻrsatiladi.

12-modda Diplomatik vakolatxonalar va konsullik muassasalarining vakolatlari

Ahdlashuvchi Tomonlar oʻzlarining diplomatik vakolatxonalari yoki konsullik muassasalari orqali boshqa Ahdlashuvchi Tomon hududida boʻlgan oʻz fuqarolariga hujjatlarni topshirish va ularni soʻroq qilish huquqiga egadirlar. Bunda majburiy tusdagi choralarni qoʻllash yoki ularni qoʻllashga tahdid qilinmasligi lozim.

13-modda Hujjatlarning haqiqiyligi

1. Ahdlashuvchi Tomonlardan birining hududida muassasa yoki bunga maxsus vakolatli shaxs tomonidan oʻz vakolati doirasida belgilangan shaklda tayyorlangan yoki tasdiqlangan va gerbli muhr bilan tasdiqlangan hujjatlar boshqa Ahdlashuvchi Tomon hududida biron-bir maxsus guvohnomasiz qabul qilinadi.

2. Ahdlashuvchi Tomonlardan birining hududida rasmiy hujjatlar sifatida qaraladigan hujjatlar boshqa Ahdlashuvchi Tomon hududida rasmiy hujjatlarning tasdiqlovchi kuchi bilan foydalaniladi.

14-modda Fuqarolik holati toʻgʻrisidagi va boshqa hujjatlarni joʻnatish

1. Bir Ahdlashuvchi Tomon fuqarolarning ushlab berish toʻgʻrisidagi va fuqarolik holatlari aktlarini roʻyxatga olish, maʼlumoti toʻgʻrisida hujjatlar, mehnat staji va bu fuqarolarning shaxsiy yoki mulkiy huquq hamda manfaatlariga oid boshqa hujjatlar toʻgʻrisidagi soʻrov boshqa Ahdlashuvchi Tomonning muassasalariga diplomatik yoʻllar orqali joʻnatiladi.

2. Bu muassasalar hujjatlarni oʻz davlatlarining qonunlariga muvofiq beradilar hamda ularni boshqa Ahdlashuvchi Tomonga diplomatik tartibda tarjimasiz va bepul joʻnatadilar. Vakolatli muassasa, keltirilgan xarajatlarni, hududida arizachi yashaydigan Ahdlashuvchi Tomonning qonunlariga muvofiq belgilanadigan miqdorida undirgan holda, arizachining turar joyi boʻyicha unga hujjatni topshiradi. Undirilgan xarajatlar, ularni undirgan Ahdlashuvchi Tomon muassasasi foydasiga kelib tushadi.

15-modda Manzillar va boshqa maʼlumotlarni aniqlash

1. Ahdlashuvchi Tomonlarning adliya muassasalari oʻz davlatlarining qonunlariga muvofiq, agar bu fuqarolarning huquqlarini amalga oshirish uchun talab qilinsa, Ahdlashuvchi Tomonlar hududlarida yashovchi shaxslar manzillarini aniqlashda soʻrovga koʻra, bir-birlariga yordam beradilar. Bunda soʻrayotgan adliya muassasasi soʻrovnomada koʻrsatilgan shaxs manzilini aniqlashga yordam berishi mumkin boʻlgan oʻzidagi mavjud maʼlumotlarni xabar qiladi.

2. Ahdlashuvchi Tomonlarning adliya muassasalari soʻralayotgan Ahdlashuvchi Tomonlar hududida yashaydigan, soʻrayotgan Ahdlashuvchi Tomonning adliya muassasalarida alimentlar toʻlash boʻyicha talablar qoʻyilgan shaxslarning ish joyini yoki mashgʻuloti turini va daromadlar toʻgʻrisidagi maʼlumotlarni aniqlashda bir-birlariga yordam beradilar.

16-modda Huquqiy masalalar boʻyicha axborot

Ahdlashuvchi Tomonlar adliya muassasalarining markaziy organlari soʻrovga koʻra bir-birlariga oʻz davlatlarida amal qilayotgan yoki amalda boʻlgan qonunlar hamda uning adliya muassasalari tomonidan qoʻllanish amaliyoti toʻgʻrisidagi maʼlumotlarni, shuningdek huquqiy masalalar boʻyicha boshqa axborotni taqdim etadilar.

17-modda Tillar

1. Ahdlashuvchi Tomonlarning adliya muassasalari ushbu Shartnomani bajarishda bir-birlariga munosabatlarda oʻzbek, chex va rus tillaridan foydalanadilar.

2. Agar ushbu Shartnomada boshqacha tartib nazarda tutilmagan boʻlsa, soʻrayotgan Ahdlashuvchi Tomon tilida joʻnatilayotgan hujjatlarga soʻralayotgan Ahdlashuvchi Tomon tilidagi yoki rus tilidagi tarjimasi ilova qilinadi.

3. Hujjatlarning yozma tarjimasi toʻgʻriligini tasdiqlash Ahdlashuvchi Tomonlar qonunlari va ushbu Shartnoma qoidalariga muvofiq amalga oshiriladi.

18-modda Huquqiy yordam koʻrsatishga daxldor xarajatlar

Ushbu Shartnomada boshqacha tartib nazarda tutilmagan boʻlsa, har bir Ahdlashuvchi Tomon oʻz hududida huquqiy yordam koʻrsatish boʻyicha xarajatlarni oʻzi qoplaydi.

19-modda Huquqiy yordam koʻrsatishni rad etish

1. Huquqiy yordam koʻrsatish toʻgʻrisidagi soʻrovnoma, agar uni bajarish soʻralayotgan Ahdlashuvchi Tomon suvereniteti, xavfsizligi, jamoat tartibi va asosiy manfaatlariga zarar keltirsa toʻliq yoki qisman rad etilishi mumkin.

2. Soʻrovnomani qondirish rad etilgani toʻgʻrisida qaror qabul qilingan taqdirda soʻrayotgan Ahdlashuvchi Tomon bu haqda oʻz vaqtida, rad etish sababi koʻrsatilgan holda, yozma ravishda xabardor qilinadi.

II boʻlim Fuqarolik va oilaviy ishlar boʻyicha huquqiy munosabatlar

I qism Vakolat

20-modda Umumiy qoidalar

1. Ushbu boʻlimning II—V qismlarida boshqacha tartib koʻzda tutilmagan boʻlsa, Ahdlashuvchi Tomonlardan birining hududida yashash joyiga ega boʻlgan shaxslarga, ularning fuqaroligidan qatʼi nazar, daʼvolar ushbu Ahdlashuvchi Tomon sudlariga, yuridik shaxslarga esa daʼvolar hududida yuridik shaxsning boshqaruv organi, uning vakolatxonasi yoxud filiali joylashgan Ahdlashuvchi Tomon sudlariga beriladi.

2. Har qaysi Ahdlashuvchi Tomon sudlari uning hududida:

2.1. javobgar korxona(filial)ning savdo, sanoat yoki boshqa xoʻjalik faoliyati amalga oshirilganda;

2.2. nizoga sabab boʻlgan shartnomadagi majburiyat bajarilganda yoki toʻliq yoxud qisman bajarilishi kerak boʻlganda vakolatli boʻladi.

3. Yuklar, yoʻlovchilar va bagajlar tashish shartnomalari boʻyicha tashuvchilarga daʼvolar belgilangan tartibda eʼtirozlar bildirilgan transport tashkiloti boshqarmasi joylashgan joyga beriladi.

21-modda Shartnoma boʻyicha sudga tegishlilik

1. Tomonlarning nizoni ushbu sudlarga oʻtkazish toʻgʻrisidagi yozma kelishuvi mavjud boʻlsa, Ahdlashuvchi Tomonlarning sudlari ishni boshqa hollarda ham koʻrib chiqishlari mumkin. Bunda 20-moddaning 3-bandidan va ushbu boʻlimning II—V qismlari bilan belgilangan boshqa normalardan, shuningdek tegishli Ahdlashuvchi Tomon qonunchiligidan kelib chiqadigan mutlaq tomonlarning kelishuvi bilan oʻzgartirilishi mumkin emas.

2. Nizoni oʻtkazish toʻgʻrisida kelishuvlar mavjud boʻlgan taqdirda sud javobgarning arizasiga binoan ishni koʻrish uchun boshqa sudga oʻtkazadi.

22-modda Sud jarayonlarining oʻzaro bogʻliqligi

1. Ikkala Ahdlashuvchi Tomon sudlarida xuddi oʻsha tomonlar oʻrtasida, xuddi shu predmet toʻgʻrisida va xuddi shu asoslarda ish boʻyicha sudlov qoʻzgʻatilganda ishni keyinroq qoʻzgʻagan sud sudlovni toʻxtatadi.

2. Ahdlashuvchi Tomonlar adliya muassasalarining kelishuviga koʻra ishni ilgari qoʻzgʻatgan sud ham agar ushbu ish boshqa sudda, xususan dalillarning katta qismi joylashgan joy boʻyicha yanada tezroq va har tomonlama koʻrib chiqilishini eʼtirof etsa, ishga oid koʻrib chiqishni toʻxtatishi mumkin.

3. Aynan shu huquqiy munosabatlardan kelib chiqadigan qarshi daʼvo va chegirish toʻgʻrisidagi talab, xuddi asosiy daʼvodek, asosiy daʼvoni koʻrib chiqayotgan sudda koʻrib chiqiladi.

II qism Shaxsiy maqom

23-modda Huquqiy layoqat va muomalaga layoqatlilik

1. Jismoniy shaxsning huquqiy layoqati va muomalaga layoqati ushbu shaxs fuqarosi boʻlgan Ahdlashuvchi Tomon qonunlariga koʻra belgilanadi.

2. Bir Ahdlashuvchi Tomon hududida yashaydigan fuqaroligi boʻlmagan shaxsning huquqiy layoqati va muomalaga layoqati u hududida yashash uchun ruxsatga ega boʻlgan Ahdlashuvchi Tomon huquqi boʻyicha aniqlanadi.

3. Yuridik shaxsning huquqiy layoqati u hududida taʼsis etilgan Ahdlashuvchi Tomon qonunlariga koʻra belgilanadi.

24-modda Muomalaga layoqati cheklangan yoki muomalaga layoqatsiz deb eʼtirof etish. Muomalaga layoqatlilikni tiklash

1. Ushbu moddaning 2- va 3-bandlarida nazarda tutilgan hollardan tashqari, shaxsning muomalaga layoqati cheklanganligi yoki muomalaga layoqatsizligi toʻgʻrisidagi ishlar boʻyicha ushbu shaxs fuqarosi boʻlgan Ahdlashuvchi Tomon sudi vakolatlidir.

2. Ahdlashuvchi Tomonlardan birining sudiga uning hududida doimiy yashovchi, boshqa Ahdlashuvchi Tomonning fuqarosi boʻlgan shaxsning muomalaga layoqati cheklanganligi yoki muomalaga layoqatsizligini eʼtirof etish asoslari maʼlum boʻladigan holda, u ushbu shaxs fuqarosi boʻlgan Ahdlashuvchi Tomon sudini bu haqda xabardor qiladi.

3. Muomalaga layoqati cheklangan yoki muomalaga layoqatsiz deb eʼtirof etish uchun asoslardan xabardor qilingan Ahdlashuvchi Tomon sudi uch oy mobaynida ishni boshlamasa yoki oʻz fikrini xabar qilmasa, muomalaga layoqati cheklanganlik yoki muomalaga layoqatsizlikni eʼtirof etish toʻgʻrisidagi ish hududida ushbu fuqaro yashash joyiga ega boʻlgan Ahdlashuvchi Tomon sudida koʻrib chiqiladi. Shaxsni muomalaga cheklangan layoqatli yoki muomalaga layoqatsiz deb eʼtirof etish toʻgʻrisidagi qaror ushbu shaxs fuqarosi boʻlgan Ahdlashuvchi Tomonning vakolatli sudiga joʻnatiladi.

4. Ushbu moddaning 1—3-bandlari qoidalari tegishli ravishda muomalaga layoqatlilikni tiklashda ham qoʻllanadi.

5. Ushbu moddaning 2- va 3-bandlarida nazarda tutilgan va kechiktirib boʻlmaydigan hollarda, shaxsni yoxud uning mol-mulkini muhofaza qilish uchun zarur chora-tadbirlarni hududida ushbu shaxs doimiy yashaydigan Ahdlashuvchi Tomon sudi mustaqil ravishda qabul qilishi mumkin. Ushbu chora-tadbirlar munosabati bilan qabul qilingan farmoyishlar ushbu shaxs fuqarosi boʻlgan Ahdlashuvchi Tomon sudiga joʻnatiladi. Ushbu Ahdlashuvchi Tomon sudi boshqacha chora belgilagan boʻlsa, ushbu farmoyishlar bekor qilinishi mumkin.

25-modda Bedarak yoʻqolganlikni eʼtirof etish va vafot etgan deb eʼlon qilish. Oʻlim faktini belgilash

1. Shaxsni bedarak yoʻqolgan deb eʼtirof etish yoki vafot etgan deb eʼlon qilish toʻgʻrisidagi ishlar boʻyicha hamda oʻlim faktini belgilash toʻgʻrisidagi ishlar boʻyicha soʻnggi maʼlumotlarga koʻra u tirik boʻlgan vaqtda fuqarosi hisoblangan Ahdlashuvchi Tomonning sudlari, boshqa shaxslar boʻyicha esa shaxsning oxirgi yashash joyidagi adliya muassasalari vakolatlidir.

2. Ahdlashuvchi Tomonlardan har birining sudlari boshqa Ahdlashuvchi Tomon fuqarosini va uning hududida yashagan boshqa shaxsni bedarak yoʻqolganligini yoki vafot etganligini eʼtirof etishi, shuningdek huquq va manfaatlari ushbu Ahdlashuvchi Tomon qonunlarida asoslangan uning hududida yashovchilarning soʻrovnomasiga koʻra uning oʻlganlik faktini belgilashi mumkin. Ushbu moddaning 2-bandiga koʻra chiqarilgan qarorlar faqat adliya muassasasi bu qarorni qabul qilgan Ahdlashuvchi Tomon hududida kuchga molik boʻladi.

3. Bedarak yoʻqolganlikni eʼtirof etish yoki vafot etgan deb eʼlon qilish va oʻlim faktini belgilash toʻgʻrisidagi ishlarni koʻrib chiqishda Ahdlashuvchi Tomon sudlari oʻz davlati qonunlarini qoʻllaydilar.

Sh qism Oilaviy ishlar

26-modda Nikohdan oʻtish

1. Nikohga kiruvchi har bir shaxs uchun nikohdan oʻtish shartlari u fuqarosi hisoblanadigan Ahdlashuvchi Tomon qonunlari bilan, bir Ahdlashuvchi Tomon hududida yashaydigan fuqaroligi boʻlmagan shaxslar uchun esa ular hududida yashash uchun ruxsatga ega boʻlgan Ahdlashuvchi Tomon huquqi boʻyicha belgilanadi.

2. Nikohdan oʻtish shakli nikoh hududida tuzilayotgan Ahdlashuvchi Tomon qonunlariga koʻra belgilanadi.

27-modda Er-xotinlarning shaxsiy va mulkiy munosabatlari

1. Er-xotinlarning shaxsiy va mulkiy huquqiy munosabatlari ular birgalikda yashaydigan hududida Ahdlashuvchi Tomon qonunlari boʻyicha belgilanadi.

2. Er-xotinlardan biri Ahdlashuvchi Tomonlardan birining hududida, ikkinchisi — boshqa Ahdlashuvchi Tomon hududida yashasa va shu bilan birga er-xotinning ikkalasi ham aynan bir fuqarolikka ega boʻlsa, ularning shaxsiy va mulkiy huquqiy munosabatlari ular fuqarosi hisoblanadigan Ahdlashuvchi Tomon qonunlari boʻyicha belgilanadi.

3. Er-xotindan biri Ahdlashuvchi Tomonlardan birining, ikkinchisi — Ahdlashuvchi Tomonlardan boshqasining fuqarosi hisoblansa va ulardan biri Ahdlashuvchi Tomoqlardan birining hududida, ikkinchisi — Ahdlashuvchi Tomonlardan boshqasining hududida yashasa, u holda ularning shaxsiy va mulkiy-huquqiy munosabatlari hududida ular oxirgi birgalikdagi yashash joyiga ega boʻlgan Ahdlashuvchi Tomon qonunlari boʻyicha belgilanadi.

4. Ushbu moddaning 3-bandida koʻrsatilgan shaxslar Ahdlashuvchi Tomonlar hududida birgalikdagi yashash joyiga ega boʻlishmagan boʻlsa, adliya muassasasi ishni koʻrib chiqayotgan Ahdlashuvchi Tomonning qonunlari qoʻllanadi.

5. Er-xotinlarning ularning koʻchmas mulkka boʻlgan huquqiy munosabatlari, ushbu mulk hududida joylashgan Ahdlashuvchi Tomon qonunlari boʻyicha belgilanadi.

6. Er-xotinlarning shaxsiy va mulkiy huquqiy munosabatlari toʻgʻrisidagi ishlar boʻyicha qonunlari ushbu moddaning 1—3-, 5-bandlariga muvofiq qoʻllanilishi kerak boʻlgan Ahdlashuvchi Tomon adliya muassasalari vakolatlidir. Agar Ahdlashuvchi Tomonlar hududida er-xotinlarning hech qachon mulki boʻlmagan boʻlsa, bu holda ikkala Ahdlashuvchi Tomonlarning adliya muassasalari ham vakolatli hisoblanib, ular oʻz davlatining qonunlarini qoʻllaydilar.

28-modda Nikohni bekor qilish

1. Nikohni bekor qilish toʻgʻrisidagi ishlar boʻyicha er-xotinlar ariza berilgan vaqtda fuqarolari boʻlgan Ahdlashuvchi Tomon qonunlari qoʻllanadi.

2. Er-xotinlardan biri Ahdlashuvchi Tomonlardan birining, ikkinchisi — Ahdlashuvchi Tomonlardan boshqasining fuqarosi boʻlsa, adliya muassasasi nikohni bekor qilish toʻgʻrisidagi ishni koʻrib chiqayotgan Ahdlashuvchi Tomon qonunlari qoʻllanadi.

29-modda Ahdlashuvchi Tomonlar adliya muassasalarining vakolatliligi

1. 28-moddaning 1-bandida nazarda tutilgan holatda nikohni bekor qilish toʻgʻrisidagi ishlar boʻyicha er-xotinlar ariza berilgan vaqtda fuqarolari boʻlgan Ahdlashuvchi Tomonning adliya muassasalari vakolatlidir. Ariza berilgan vaqtda er-xotinning ikkalasi ham boshqa Ahdlashuvchi Tomon hududida yashashsa, u holda ham ushbu Ahdlashuvchi Tomon adliya muassasalari vakolatlidir.

2. 28-moddaning 2-bandida nazarda tutilgan holatda nikohni bekor qilish toʻgʻrisidagi ishlar boʻyicha er-xotinning ikkalasi ham hududida yashaydigan Ahdlashuvchi Tomon adliya muassasalari vakolatlidir. Er-xotindan biri Ahdlashuvchi Tomonlardan birining hududida, ikkinchisi Ahdlashuvchi Tomonlardan boshqasining hududida yashasa, u holda nikohni bekor qilish toʻgʻrisidagi ishlar boʻyicha er-xotinlar hududlarida yashaydigan ikkala Ahdlashuvchi Tomon adliya muassasalari vakolatlidir.

30-modda Nikohni haqiqiy emas deb tonish

1. Nikohni haqiqiy emas deb tonish toʻgʻrisidagi ishlar boʻyicha 26-moddaga muvofiq nikohdan oʻtishda qoʻllangan Ahdlashuvchi Tomon qonunlari.

2. Nikohni haqiqiy emas deb eʼtirof etish toʻgʻrisidagi ishlar boʻyicha Ahdlashuvchi Tomonlar adliya muassasalarining vakolatligi ushbu Shartnomaning 29-moddasiga muvofiq belgilanadi.

31-modda Otalikni yoki onalikni belgilash va bekor qilish

1. Otalik yoki onalikni belgilash va bekor qilish bola tugʻilganda fuqarosi hisoblangan Ahdlashuvchi Tomon qonunlariga koʻra belgilanadi.

2. Agar bolaning fuqaroligi maʼlum boʻlmasa, otalik yoki onalikni belgilash va bekor qilish hududida bola yashab turgan Ahdlashuvchi Tomonning qonunlariga koʻra belgilanadi.

3. Otalik yoki onalikni belgilash va bekor qilishda hududida bola yashab turgan Ahdlashuvchi Tomonning adliya muassasasi vakolatli hisoblanadi.

32-modda Ota-onalar va bolalar oʻrtasidagi huquqiy munosabatlar

1. Ota-onalar va bolalar oʻrtasidagi huquqiy munosabatlar bolalar fuqarolari boʻlgan Ahdlashuvchi Tomonning qonunlariga koʻra belgilanadi.

2. Ota-onalar va bolalar oʻrtasida huquqiy munosabatlar boʻyicha qonunlari ushbu moddaning 1-bandini qoʻllashga yoʻl beradigan Ahdlashuvchi Tomonning sudi vakolatlidir.

3. Kechiktirish mumkin boʻlmagan hollarda bir Ahdlashuvchi Tomonning adliya muassasalari mustaqil ravishda oʻz qonunlari asosida bola va uning mol-mulkini himoya qilish uchun zarur boʻlgan qaror chiqarishi mumkin va bu toʻgʻrisida zudlik bilan bola fuqarosi boʻlgan Ahdlashuvchi Tomonning adliya muassasasiga xabar qilib, unga tegishli hujjatlarning nusxalarini ham ilova etadi.

33-modda Vasiylik va homiylik

1. Vasiylik va homiylikni belgilash yoki bekor qilish oʻziga nisbatan vasiylik yoki homiylik belgilanayotgan yoki bekor qilinayotgan shaxs fuqarosi boʻlgan Ahdlashuvchi Tomonning qonunlari boʻyicha amalga oshiriladi.

2. Vasiy va homiy bilan vasiylikka yoki homiylikka olinayotgan shaxs oʻrtasidagi huquqiy munosabatlar vasiy yoki homiyni adliya muassasasi tayinlagan Ahdlashuvchi Tomon qonunlariga koʻra tartibga solib boriladi.

3. Vasiylikni yoki homiylikni qabul qilish majburiyati vasiy yoki homiy etib tayinlanayotgan shaxs fuqarosi boʻlgan Ahdlashuvchi Tomonning qonunlariga koʻra belgilanadi.

4. Ahdlashuvchi Tomonlardan birining fuqarosi boʻlgan shaxsning vasiysi va homiysi etib boshqa Ahdlashuvchi Tomonning fuqarosi, agar u vasiylik yoki homiylik amalga oshiriladigan Ahdlashuvchi Tomon hududida yashasa, tayinlanishi mumkin.

34-modda Ahdlashuvchi Tomonlar adliya muassasalarining vasiylik va homiylik masalalarida vakolatliligi

Ushbu Shartnomaga muvofiq boshqacha tartib belgilanmagan boʻlsa, oʻziga nisbatan vasiylik yoki homiylik belgilanayotgan shaxs fuqarosi boʻlgan Ahdlashuvchi Tomonning muassasalari vasiylik yoxud homiylikni belgilash yoki bekor qilish toʻgʻrisidagi ishlar boʻyicha vakolatli hisoblanadi.

35-modda Vasiylik va homiylikka olishga oid chora-tadbirlar koʻrish tartibi

1. Bir Ahdlashuvchi Tomon fuqarosining manfaatlari yoʻlida, agar uning yashash joyi yoxud mulki boshqa Ahdlashuvchi Tomon hududida boʻlsa, vasiylik yoki homiylik boʻyicha choralar koʻrish zarur boʻlib qolgan hollarda ushbu Ahdlashuvchi Tomonning adliya muassasasi ushbu Shartnomaning 34-moddaga muvofiq zudlik bilan vakolatli organni xabardor qilib qoʻyadi.

2. Kechiktirish mumkin boʻlmagan hollarda boshqa Ahdlashuvchi Tomon adliya muassasasi oʻz davlat qonunlariga muvofiq zarur vaqtinchalik chora-tadbirlarni oʻzi koʻrishi mumkin. Bunda u 34-moddaga muvofiq vakolatli adliya muassasini zudlik bilan xabardor qilishga majburdir hamda shu vaqtda tegishli hujjatlarning nusxalarini yuboradi. Ushbu chora-tadbirlar 34-moddada koʻrsatib oʻtilgan adliya muassasasi tomonidan boshqa qaror qabul qilingunga qadar oʻz kuchini saqlab qoladi.

36-modda Vasiylik va homiylikka berish tartibi

1. Vasiylik va homiylikdagi shaxs boshqa Ahdlashuvchi Tomon hududida yashash joyiga yoki mulkka ega boʻlgan hollarda 34-moddaga muvofiq vakolatli adliya muassasasi vasiylik yoki homiylikni boshqa Ahdlashuvchi Tomon adliya muassasasiga berishi mumkin. Vasiylik yoki homiylikni berish soʻralayotgan adliya muassasasi vasiylik yoki homiylikni oʻziga qabul qilgan paytdan boshlab kuchga kiradi va bu haqda soʻrayotgan adliya muassasasi xabardor qilib qoʻyiladi.

2. Ushbu moddaning 1-bandiga muvofiq vasiylik yoki homiylikni qabul qilgan adliya muassasasi uni oʻz davlati qonunlariga muvofiq amalga oshiradi. U vasiylikka olingan yoki homiylikdagi shaxsning shaxsiy maqomiga aloqador masalalar boʻyicha qaror chiqarish huquqiga ega emas, lekin bu shaxs fuqarosi hisoblangan Ahdlashuvchi Tomonning qonunlari boʻyicha zarur boʻlsa nikohdan oʻtishiga ruxsat berishi mumkin.

37-modda Farzandlikka olish

1. Farzandlikka olish yoki uni bekor qilish farzandlikka oluvchi fuqarosi boʻlgan Ahdlashuvchi Tomonning qonunlariga muvofiq farzandlikka olish yoki uni bekor qilish haqida ariza berilgan vaqtdan boshlab belgilanadi.

2. Agar bola boshqa Ahdlashuvchi Tomonning fuqarosi hisoblansa, farzandlikka olishda uni bekor qilishda qonuniy vakilning hamda vakolatli davlat organining, shuningdek u fuqarosi hisoblangan Ahdlashuvchi Tomonning qonunlari shuni talab etsa, bolaning ham roziligini olish zarur.

3. Agar bolaning biri Ahdlashuvchi Tomonning fuqarosi, boshqasi esa boshqa Ahdlashuvchi Tomonning fuqarosi hisoblangan er-xotinlar tomondan farzandlikka olinayotgan boʻlsa, farzandlikka olish yoki uni bekor qilish hududi fuqarolik ishni qoʻzgʻatilgan Ahdlashuvchi Tomon qonunlarida nazarda tutilgan shartlarga muvofiq amalga oshirilishi kerak.

4. Farzandlikka olish yoki uni bekor qilish toʻgʻrisida ariza berilgan paytda farzandlikka oluvchi fuqarosi hisoblangan Ahdlashuvchi Tomonning adliya muassasasi farzandlikka olish yoki uni bekor qilish ishlari boʻyicha vakolatlidir. Ushbu moddaning 3-bandida nazarda tutilgan hollarda esa er-xotinlar oxirgi yashash joyiga yoki turar joyiga ega boʻlgan yoki hozir ega boʻlgan Ahdlashuvchi Tomon hududidagi adliya muassasasi vakolatlidir.

IV qism Mulkiy huquq munosabatlari

38-modda Mulkchilik huquqi

1. Koʻchmas mulkka egalik qilish huquqi hududida koʻchmas mulk joylashgan Ahdlashuvchi Tomonning qonunlariga muvofiq belgilanadi. Qanday mulk koʻchmas hisoblanishi haqidagi masala hududida ushbu koʻchmas mulk joylashgan Ahdlashuvchi Tomonning qonunlariga muvofiq hal etiladi.

2. Davlat reyestriga kiritilishi zarur boʻlgan transport vositalariga egalik huquqi hududida transport vositasini roʻyxatdan oʻtkazgan organ joylashgan Ahdlashuvchi Tomonning qonunlariga binoan belgilanadi.

3. Mulkka egalik huquqining paydo boʻlishi va bekor qilinishi yoki boshqa mulkka ashyoviy huquq bunday huquqning paydo boʻlishi yoki bekor qilinishiga asos boʻlib xizmat qiluvchi harakatlar yoki boshqa holatlar yuz bergan vaqtda hududida joylashgan Ahdlashuvchi Tomonning qonunlariga binoan belgilanadi.

4. Koʻchmas mulkka egalik huquqi va boshqa ashyoviy huquqlar toʻgʻrisida daʼvolar boʻyicha faqat shu mulk joylashgan yerdagi sudlar vakolatlidir.

39-modda Kelishuv shakllari

1. Kelishuv shakli, agar ushbu Shartnomaga koʻra boshqacha tartib joriy qilishmasa, u amalga oshirilgan joyning qonunlariga koʻra belgilanadi.

2. Koʻchmas mulkka oid va unga huquqlar boʻyicha kelishuvlar shakli hududida bunday mulk joylashgan Ahdlashuvchi Tomonning qonunlariga binoan belgilanadi.

3. Tomonlarning kelishuv shakllari boʻyicha huquq va majburiyatlari, agar tomonlar oʻrtasidagi kelishuvda boshqacha tartib belgilanmagan boʻlsa, u amalga oshirilgan joydagi qonunlarga binoan belgilanadi.

40- modda Zararni qoplash

1. Shartnomalar va boshqa huquqiy meʼyordagi harakatlardan kelib chiqganlardan tashqari, zararni qoplash haqidagi majburiyatlar hududida zararni qoplash haqidagi talabga asos boʻlib xizmat qilgan harakat yoki boshqa holatlar yuz bergan Ahdlashuvchi Tomonning qonunlariga binoan belgilanadi.

2. Agar zarar keltiruvchi va zarar koʻrgan bir Ahdlashuvchi Tomonning fuqarosi hisoblansa, shu Ahdlashuvchi Tomonning qonunlari qoʻllaniladi.

3. Ushbu moddaning 1- va 2-bandlarida eslatilgan ishlar boʻyicha hududida zararni qoplash haqidagi talabga asos boʻlib xizmat qilgan harakat yoki boshqa holatlar yuz bergan Ahdlashuvchi Tomon sudi vakolatlidir. Zarar koʻrgan hududida javobgar yashash joyiga ega boʻlgan Ahdlashuvchi Tomon sudiga ham daʼvo arizasi berishi mumkin.

V qism Merosxoʻrlik

41-modda Tenglik prinsipi

Ahdlashuvchi Tomonlardan har birining fuqarolari boshqa Ahdlashuvchi Tomon hududida qonun boʻyicha mulk yoki huquqni qonun yoxud vasiyatnoma boʻyicha ushbu Ahdlashuvchi Tomon fuqarolariday teng shartlarda va hajmda meros qilib qoldirishlari mumkin.

42-modda Merosxoʻrlik huquqi

1. Mulkni meros qilib olish huquqi, ushbu moddaning 2-bandida nazarda tutilgan hollardan tashqari, meros qilib qoldiruvchi hududida oxirgi turar joyiga ega boʻlgan Ahdlashuvchi Tomonning qonunlari boʻyicha belgilanadi.

2. Koʻchmas mulkni meros qilib qoldirish huquqi mulk hududida joylashgan Ahdlashuvchi Tomonning qonunlariga koʻra belgilanadi.

3. Qanday meros qilib qoldirilgan mulk koʻchar yoki koʻchmas hisoblanishi haqidagi masala hududida ushbu mulk joylashgan Ahdlashuvchi Tomonning qonunlariga muvofiq hal etiladi.

43-modda Merosning davlatga oʻtishi

Agar Ahdlashuvchi Tomonning merosga qoldirishda qoʻllanilishi kerak boʻlgan qonunlariga koʻra merosxoʻr davlat boʻlsa, unda meros qilib qoldirilgan koʻchar mulk egasi vafot etgan vaqtda meros qoldiruvchi fuqarosi hisoblangan Ahdlashuvchi Tomonga oʻtadi meros qilib qoldirilgan koʻchmas mulk esa oʻzi joylashgan hududda Ahdlashuvchi Tomonga oʻtadi.

44-modda Vasiyatnoma

1. Shaxsning vasiyatnoma tuzish yoki uni bekor qilish qobiliyati, yoki yetarli darajada istakni bildirmasligining huquqiy oqibatlari, shuningdek vasiyatnomaning shakli va uni bekor qilish tartibi dalolatnoma tuzish vaqtida vasiyat qiluvchi fuqarosi boʻlgan Ahdlashuvchi Tomonning qonunlari boʻyicha belgilanadi.

2. Vasiyatning shakli vasiyat qoldiruvchi vasiyat tuzilayotgan vaqtda fuqarosi boʻlgan Ahdlashuvchi Tomonning qonunlariga koʻra belgilanadi. Biroq hududida vasiyatnoma tuzilayotgan Ahdlashuvchi Tomon qonunlariga rioya qilinganligi ham yetarli deb topilishi mumkin. Bu qoida vasiyatnomani bekor qilishga ham taalluqli.

3. Vasiyatnomani ochish va eʼlon qilish vasiyatnoma qaysi Ahdlashuvchi Tomon hududida boʻlsa, oʻsha Tomonning adliya muassasalari tarafidan amalga oshiriladi. Agar merosxoʻrlik toʻgʻrisida ishni koʻrib chiqishga boshqa Ahdlashuvchi Tomonning adliya muassasasi vakolatli boʻlsa, unga vasiyatnomaning tasdiqlangan nusxasi hamda uni ochish va eʼlon qilish bayonnomasi yuboriladi.

45-modda Meros qilib olish haqidagi ishlar boʻyicha vakolat

1. Koʻchar mulkni meros qilib olish haqidagi ishlar boʻyicha koʻrib chiqishni meros qoldiruvchi vafot etgan vaqtda hududida turar joyga ega boʻlgan Ahdlashuvchi Tomonning muassasalari olib borishga vakolatlidir.

2. Koʻchmas mulkni meros qilib olish haqidagi ishlar boʻyicha koʻrib chiqishni mulk joylashgan hududdagi Ahdlashuvchi Tomon adliya muassasasi koʻrib chiqishga vakolatlidir.

3. Ushbu moddaning 1- va 2-bandlaridagi qoidalar meros toʻgʻrisidagi ishlar koʻrib chiqiladigan ishlar munosabati bilan paydo boʻladigan nizolarni koʻrib chiqishda ham qoʻllaniladi.

46-modda Meros qilib olish ishlari boʻyicha diplomatik vakolatxona yoki konsullik muassasasining vakolati

Meros qilib olish ishlari boʻyicha, shu jumladan, meros olish nizolari boʻyicha Ahdlashuvchi Tomonlardan har birining diplomatik vakolatxonasi yoki konsullik muassasasi, merosdan voz kechish huquqini istisno qilganda, oʻz davlatining fuqarolarini, agar ular boʻlmasalar yoki vakil tayinlamagan boʻlsalar, boshqa Ahdlashuvchi Tomonning adliya muassasalarida maxsus ishonchnoma qogʻozisiz ifodalash uchun vakolatlidir.

47-modda Oʻlganlik toʻgʻrisida xabar qilish

Ahdlashuvchi Tomonlardan birining fuqarosi boshqa Ahdlashuvchi Tomon hududida oʻlgan boʻlsa, bu Ahdlashuvchi Tomonning tegishli organi oʻlgan shaxs fuqarosi boʻlgan davlatning diplomatik vakolatxonasi yoki konsullik muassasasiga uning oʻlganligi, shuningdek undan topilgan merosxoʻrlar haqidagi maʼlumotlar, ularning yashash yoki turar joyi, meros qoldirilgan mulkning koʻlami va qiymati hamda, agar bor boʻlsa, vasiyati toʻgʻrisida xabar beradi.

48-modda Merosni muhofaza qilish choralari

1. Ahdlashuvchi Tomonlarning adliya muassasalari oʻz qonunlariga muvofiq boshqa Ahdlashuvchi Tomon fuqarolari tomonidan oʻz hududlarida qoldirilgan merosni muhofaza qilish yoki unga egalik qilish uchun zarur chora-tadbirlar koʻradilar.

2. Ushbu moddaning 1-bandiga muvofiq koʻrilgan choralar toʻgʻrisida meros beruvchi fuqarosi hisoblanadigan Ahdlashuvchi Tomonning diplomatik vakolatxonasi yoki konsullik muassasasi tezda xabardor qilinadi. Koʻrsatilgan vakolatxona yoki adliya muassasasi ushbu chora-tadbirlarni amalga oshirishda ishtirok etishi mumkin.

3. Ushbu moddaning 1-bandiga muvofiq koʻrilgan chora-tadbirlar meros olish toʻgʻrisidagi ishni amalga oshirishga vakolati boʻlgan adliya muassasasining soʻroviga koʻra oʻzgartirilishi mumkin.

49-modda Merosni berish

1. Bir Ahdlashuvchi Tomon hududida meros qolgan koʻchar mulk yoki meros qolgan koʻchar yoki koʻchmas mulkni sotishdan tushgan pul summasi meros olishni koʻrib chiqish tugaganidan soʻng yashash joyi yoki turar joyi boshqa Ahdlashuvchi Tomon hududida joylashgan merosxoʻrlarga berilishi zarur boʻlsa, biroq ularga yoki ularning qonuniy vakillariga bu mulk yoki summani berishning iloji boʻlmasa, unda merosga qolgan mulk yoki tushgan pul summasi ushbu Ahdlashuvchi Tomon diplomatik vakolatxonasi yoki konsullik muassasasiga topshiriladi.

2. Meros qilib olish haqidagi ishlar boʻyicha vakolatli boʻlgan adliya muassasasi meros qolgan mulkni diplomatik yoki konsullik muassasasiga berish toʻgʻrisida farmoyish beradi.

3. Bu mulk quyidagi hollarda merosxoʻrlarga berilish mumkin:

3.1. meros qolgan mulk joylashgan Ahdlashuvchi Tomonning qonunlarida belgilangan muddatda meros qoldiruvchining kreditorlari bildirgan barcha talablar toʻlangan yoki taʼminlangan boʻlsa;

3.2. meros qilib olish bilan bogʻliq barcha soliq va yigʻimlar toʻlangan yoki taʼminlangan boʻlsa;

3.3. zarurat boʻlsa, Ahdlashuvchi Tomonlarining muassasalari meros qoldirilgan mulkni olib chiqib ketishga ruxsat bergan boʻlsa.

4. Pul summalarini oʻtkazish Ahdlashuvchi Tomonlar qonunlarga muvofiq amalga oshiriladi.

III boʻlim Qarorlarni eʼtirof etish va bajarish

50-modda Eʼtirof etish predmeti va qarorlarni bajarish

Ahdlashuvchi Tomonlardan har biri ushbu Shartnomada nazarda tutilgan shartlarda boshqa Ahdlashuvchi Tomon hududida chiqarilgan qonuniy kuchga kirgan quyidagi qarorlarni eʼtirof etadi va bajaradi:

1) adliya muassasalarining fuqarolik ishlar boʻyicha qarorlari, shuningdek shunday ishlar boʻyicha sud tomonidan tasdiqlangan yarashuv bitimlari va fuqarolik ishlari boʻyicha notarial dalolatnomalar;

2) jinoyat tufayli koʻrilgan zararni qoplashga oid jinoiy ishlar boʻyicha sudlarning hukmlari;

3) arbitraj sudlarining hukmlari;

4) sudlarning sud xarajatlarini qoplash yuzasidan chiqargan qarorlari.

51-modda Bajarilishi talab etilmaydigan qarorlarni eʼtirof etish

1. Har bir Ahdlashuvchi Tomonning adliya muassasalari tomonidan chiqarilgan va qonuniy kuchga kirgan, oʻz xususiyatiga koʻra bajarilishi talab etilmaydigan qarorlar boshqa Ahdlashuvchi Tomon hududida maxsus ishlarni bajarmasdan quyidagi shartlarda eʼtirof etiladi, agar:

1.1. soʻralayotgan Ahdlashuvchi Tomonning adliya muassasalari ilgari bu ishlar boʻyicha qonuniy kuchga kirgan qarorlar chiqarmagan boʻlsa;

1.2. ushbu Shartnomaga koʻra ish, qaror hududida eʼtirof etilishi boʻlgan Ahdlashuvchi Tomonning qonunlariga koʻra ular tomonidan nazarda tutilmagan hollarda ular Ahdlashuvchi Tomon adliya muassasalarining alohida vakolatlariga taalluqli boʻlmasa.

2. Ushbu modda 1-bandining qoidalari vasiylik va homiylik boʻyicha qarorlarga ham tegishli boʻladi.

52-modda Qarorlarni majburiy ijro etishga ruxsat berish

1. Qarorlarni majburiy ijro etishga ruxsat berish toʻgʻrisidagi soʻrovni ijro etilishi kerak boʻlgan Ahdlashuvchi Tomonning vakolatli sudiga beriladi. Soʻrovnoma birinchi pogʻonadagi ish boʻyicha qaror chiqargan sudga ham kiritilishi mumkin. Ushbu sud uni soʻrov boʻyicha qaror chiqarish vakolatiga ega boʻlgan sudga joʻnatadi.

2. Soʻrovga quyidagilar ilova qilinadi:

2.1. qaror yoki uning tasdiqlangan nusxasi, shuningdek qaror qonuniy kuchga kirganligi va ijro etilishi kerakligi haqidagi rasmiy hujjat yoki u qonuniy kuchga kirgunga qadar ijro etilishi kerak boʻlgan, agar bu qarorning oʻzidan kelib chiqmasa, hujjat;

2.2. jarayonda ishtirok etmagan tomonga qarshi qaror chiqarilganligini, belgilangan tartibda va oʻz vaqtida sudga chaqirtirilganligini, uning protsessual muomalaga layoqatli emasligi hollarida esa oʻz qonuniy vakillari orqali ishtirok etganligini bildiruvchi hujjat;

2.3. hujjat joʻnatilishi vaqtida qarorlar qisman bajarilganligini tasdiqlovchi hujjat, agar u qisman bajarilgan boʻlsa;

2.4. shartnomada kelishiladigan sudli ishlar boʻyicha tomonlarning kelishuvini tasdiqlovchi hujjat.

3. Qarorlarni majburiy ijro etishga ruxsat berish toʻgʻrisidagi soʻrov va unga ilova qilingan hujjatlar soʻralayotgan Ahdlashuvchi Tomon tilidagi yoki rus tilidagi tasdiqlangan tarjimasi bilan taʼminlanadi.

53-modda Qarorlarni eʼtirof etish va majburiy bajarish tartibi

1. Qarorni majburiy bajarishni eʼtirof etish va ruxsat berish toʻgʻrisidagi soʻrovni koʻrib chiqadigan sud ushbu Shartnomada koʻzda tutilgan shartlarga rioya qilinganini belgilash bilan cheklanadi. Shartlarga rioya qilingan boʻlsa, sud majburiy bajarish toʻgʻrisida hukm chiqaradi.

2. Majburiy bajarish tartibi hududida bajarish amalga oshiriladigan Ahdlashuvchi Tomon qonunlariga muvofiq belgilanadi.

3. Qarorlarni eʼtirof etish va majburiy bajarishga bogʻliq xarajatlar daʼvogar(ariza beruvchi)ga muassasasi shunday qaror chiqargan Ahdlashuvchi Tomon qonunlarida belgilangan tartibda undirib beriladi.

4. Bir Ahdlashuvchi Tomon adliya muassasasi qarorlarini bajarishda eʼtirof etish va majburiy bajarishning oqibatlari boshqa Ahdlashuvchi Tomon hududida ham xuddi oʻz adliya muassasalarining qarorlari kabi yuridik kuchga molik boʻladi.

54-modda Qarorlarni eʼtirof etish hamda bajarishni rad etish

50-moddada nazarda tutilgan qarorlarni eʼtirof etish hamda majburiy bajarish uchun ruxsatnoma berish quyidagi hollarda rad qilinishi mumkin:

1) hududida qaror chiqarilgan Ahdlashuvchi Tomonning qonunlariga muvofiq u qonuniy kuchga kirmaganda yoki ijro etilishi kerak boʻlmaganda, qaror qonuniy kuchga kirgunga qadar ijro etilishi kerak boʻlgan hollar bundan mustasno;

2) javobgar unga yoki uning qonuniy vakiliga oʻz vaqtida va tegishli ravishda sudga kelish uchun chaqiriq qogʻozi berilmaganligi sababli jarayonda qatnashmaganda;

3) ushbu tomonlar oʻrtasidagi ushbu bahs boʻyicha shu qaror eʼtirof etilishi va ijro etilishi lozim boʻlgan va shu asosda Ahdlashuvchi Tomon hududida oldin ham qonuniy kuchga kirgan qaror chiqarilgan yoki uchinchi davlat sudining eʼtirof etilgan qarori boʻlgan yoxud bu Ahdlashuvchi Tomon adliya muassasasi tomonidan ushbu ish boʻyicha koʻrib chiqish qoʻzgʻatilganida;

4) ushbu Shartnoma qoidalariga muvofiq, ushbu Shartnomada koʻzda tutilmagan hollarda esa hududida qaror eʼtirof etilishi va bajarilishi zarur boʻlgan Ahdlashuvchi Tomonning qonunlariga asosan ish uning muassasalarining mutlaq vakolatiga taalluqli boʻlganda;

5) shartnomada kelishiladigan sudga tegishli ish boʻyicha tomonlarning kelishuvini tasdiqlovchi hujjat boʻlmaganda;

6) sud koʻrib chiqayotgan qarorlarni eʼtirof etish va ijro etish toʻgʻrisidagi soʻrovnoma Ahdlashuvchi Tomonlarning qonunlarida nazarda tutilgan majburiy ijro etish muddati oʻtib ketganda.

IV boʻlim Jinoiy ishlar boʻyicha huquqiy yordam va huquqiy munosabatlar

I qism Ushlab berish

55-modda Ushlab berish majburiyati

Ahdlashuvchi Tomonlar ushbu Shartnomada nazarda tutilgan shartlarga muvofiq bir-birlarining soʻrovlariga koʻra oʻzlarining hududlaridagi jinoyat uchun jinoiy javobgarlikka tortish sababli yoxud shunday jinoyat sababli hukmni ijro etish soʻrayotgan davlatda qidirilayotgan shaxslarni ushlab berish majburiyatini oladilar.

56-modda Ushlab berishga olib keladigan jinoyatlar

1. Ushbu Shartnoma maqsadlariga ushlab berishga sabab boʻlgan soʻralayotgan va soʻrayotgan Ahdlashuvchi Tomonlarning qonunlariga muvofiq jinoyat hisoblanadigan huquqbuzarliklar kamida bir yildan ortiq ozodlikdan mahrum etish yoki yanada ogʻirroq jazo bilan jazolanadilar.

2. Ushbu moddaning 1-bandida nazarda tutilgan jinoyat sodir etilgani boʻyicha chiqarilgan hukmni ijro etish uchun ushlab berish, agar jazo muddati tamom boʻlgunga qadar kamida olti oy qolgan boʻlsa, amalga oshiriladi.

3. Agar ushlab berish haqidagi soʻrovnoma bir necha alohida jinoyatlarga taalluqli boʻlsa, ulardan hammasi ushbu moddaning 1-bandida nazarda tutilgan shartlarga muvofiq kelmasa, unda talab qilinayotgan jinoyatchini berishga, hech boʻlmaganda jinoyatlardan biri olib kelsa, shu shart bilan ruxsat etilishi mumkin.

57-modda Ushlab berishni rad etish uchun asos

1. Quyidagi hollarda ushlab berish rad etiladi;

1.1. amalga oshirilgan jinoyat tufayli ushlab berish soʻralayotgan jinoiy taʼqib Ahdlashuvchi Tomonlarning huquqiy tartibiga koʻra jabrlanuvchining arziga koʻra qoʻzgʻatiladigan boʻlsa;

1.2. amalga oshirilgan jinoyat tufayli ushlab soʻralayotgan jinoiy taʼqib butunlay yoki qisman soʻralayotgan Ahdlashuvchi Tomon hududida amalga oshirilgan boʻlsa, bunga jinoyat sodir etilgan paytda shu Ahdlashuvchi Tomonning bayrogʻi ostidagi kema hamda uning huquqiy tartibiga muvofiq roʻyxatga olingan havo kemasi ham kiradi;

1.3. ushlab berish toʻgʻrisidagi soʻrov kelib tushishiga sabab boʻlgan huquqbuzarlikka soʻrayotgan Ahdlashuvchi Tomon qonunlariga binoan oʻlim jazosi berilsa va soʻrayotgan Ahdlashuvchi Tomon fikricha, Ahdlashuvchi Tomon u oʻlimga hukm qilinmasligiga yoki oʻlim toʻgʻrisida chiqarilgan hukm ijro etilmasligiga yetarli darajada ishonchli kafolat bermagan boʻlsa.

2. Ushlab berish quyidagi hollarda ham rad etilishi mumkin:

2.1. soʻralayotgan tomonda jinoiy taftish qoʻzgʻatish mumkin boʻlmasa, yoki hukmni istalgan sababga koʻra ijro etish mumkin boʻlmasa, bunga muddat oʻtganligi yoki afv etish muddati oʻtganligi ham kiradi;

2.2. soʻralayotgan Ahdlashuvchi Tomon hududida xuddi shu jinoiy qilmish boʻyicha qonuniy kuchga kirgan hukm chiqarilgan, yoki shu ish boʻyicha ishni toʻxtatish toʻgʻrisida qaror chiqarilgan boʻlsa;

2.3. soʻralayotgan Ahdlashuvchi Tomon umumiy jinoyat boʻyicha ushlab berilishi soʻralayotgan shaxsni uning irqi, dini, millati yoki siyosiy qarashlari tufayli taʼqib etish yoki jazolash maqsadida berilgan, deb taxmin qilish uchun yetarli asoslarga ega boʻlsa;

2.4. ushlab berilishi talab etilayotgan shaxs soʻralayotgan Ahdlashuvchi Tomonning fuqarosi boʻlsa yoki unga ushbu davlatda boshpana berilgan boʻlsa;

2.5. ushlab berishni soʻrashga olib kelgan harbiy jinoyatni soʻralayotgan Ahdlashuvchi Tomon umumiy jinoyat hisoblamasa.

58-modda Ushlab berish toʻgʻrisida soʻrov va zarur hujjatlar

1. Ushlab berish toʻgʻrisidagi soʻrov yozma holda joʻnatiladi. Unda ushlab berish talab etilayotgan shaxs toʻgʻrisidagi zarur axborotlar, shuningdek uning fuqaroligi va yashash joyi yoki turar joyi haqidagi maʼlumotlar boʻlishi kerak.

2. Ushlab berish toʻgʻrisidagi soʻrovga barcha hollarda quyidagilar ilova qilinadi:

2.1. ushbu shaxsning kimligini aniqlashga yordam berishi mumkin boʻlgan har qanday axborot bilan bir qatorda iloji boricha aniq bayon-tasviri, shuningdek fotosurati yoki agar boʻlsa, barmoq izlari tasviri kabilar;

2.2. ushbu jinoyatni toifalovchi tegishli qoidaning matni yoki zarur boʻlsa, ushbu jinoyatga toʻgʻri keladigan tegishli qonundan koʻchirma va ushbu jinoyatga sabab boʻlishi mumkin boʻlgan jazoning bayon-tasviri.

3. Agar talab qilingan shaxs jinoyatda ayblanayotgan boʻlsa, ushlab berish toʻgʻrisidagi soʻrovga uni qamoqqa olish haqidagi qarorning tasdiqlangan nusxasi, jinoyatning faktik bayoni, shuningdek jinoyat sodir etilgan vaqt va joy, moddiy zarar haqidagi, agar shunday zarar koʻrilgan boʻlsa, maʼlumotlar ilova qilinadi.

4. Agar talab qilinayotgan shaxs jinoyat uchun hukm qilingan boʻlsa, jinoyatchini ushlab berish haqidagi soʻrovga qonuniy kuchga kirgan hukmning tasdiqlangan nusxasi va agar hukm qilingan shaxs jazoning bir qismini oʻtagan boʻlsa, jazoning oʻtalmagan qismi haqidagi maʼlumotlar bayon qilingan holda ilova qilinadi.

5. Ushlab berish haqidagi soʻrov va unga ilova qilinadigan hujjatlar ushbu Shartnomaning 17-moddasiga muvofiq tuziladi.

6. Ushlab berish haqidagi soʻrov talab qilinayotgan shaxsning soʻralayotgan Ahdlashuvchi Tomon hududidagi turar joyi maʼlum boʻlgan hollarda joʻnatiladi.

59-modda Ushlab berish haqidagi soʻrov yuzasidan qaror

1. Soʻralayotgan Ahdlashuvchi Tomon oʻz qonunlarida nazarda tutilgan tartibga muvofiq ushlab berish haqidagi soʻrovni koʻrib chiqadi va soʻrayotgan Ahdlashuvchi Tomonga oʻz qarori haqida zudlik bilan xabar qiladi.

2. Soʻrovni qondirishga qaror qilingan hollarda soʻralayotgan Ahdlashuvchi Tomon talab qilinayotgan shaxsni qamoqqa olish uchun tezlik bilan chora-tadbirlar koʻradi. Bu shaxsning qamoqqa olinganligi haqida soʻrayotgan Ahdlashuvchi Tomonga zudlik bilan xabar qilinadi.

3. Ushlab berish haqidagi soʻrovni qondirishni har qanday toʻliq yoki qisman rad etish tegishli sabablar bilan asoslab beriladi.

60-modda Qoʻshimcha axborot

1. Soʻralayotgan Ahdlashuvchi Tomon ushlab berish haqida taqdim etilgan soʻrovni asoslashda axborot yetarli emas deb hisoblasa, u 20 kun ichida qoʻshimcha axborot berishni talab qilishi mumkin. Ayni zamonda soʻralayotgan Ahdlashuvchi Tomon talab etilayotgan shaxsning oʻz hududidan chiqib ketishining imkoniyatini oldini olish uchun zarur chora-tadbirlarini koʻrishi mumkin.

2. Ushbu moddaning 1-bandida nazarda tutilgan hollarda soʻrayotgan Ahdlashuvchi Tomon boshqa Ahdlashuvchi Tomonga iloji boricha qisqa muddat ichida qoʻshimcha axborot taqdim etish uchun zarur choralar koʻradi.

61-modda Ehtiyot chorasi sifatida qamoqqa olish

1. Kechiktirib boʻlmaydigan hollarda tegishli organlar soʻralayotgan Ahdlashuvchi Tomondan ushlab berilishi talab qilinayotgan shaxsni ehtiyot chorasi sifatida qamoqqa olishni talab qilishlari mumkin.

2. Ehtiyot chorasi sifatida qamoqqa olishni soʻrab qilingan soʻrovda 58-moddada koʻrsatilgan hujjatlar ushlab berilishi toʻgʻrisidagi soʻrovga qoʻshib berilishni koʻrsatib oʻtish zarur. Unda, shuningdek ushlab berilishni soʻralgan jinoyat, uning qachon va qayerda sodir etilganligi va mumkin boʻlsa, talab etilayotgan shaxsni tavsiflash.

3. Ushlab turish va ehtiyot chorasi sifatida qamoqqa olish toʻgʻrisidagi soʻrov soʻralayotgan Ahdlashuvchi Tomonning diplomatik kanallari orqali yoki bevosita pochta orqali, telegramma, teleks, telefaks yoki Xalqaro jinoiy politsiya tashkiloti INTERPOL vositasida berilishi mumkin. Soʻralayotgan Ahdlashuvchi Tomonning markaziy organi soʻrayotgan Ahdlashuvchi Tomonga soʻrov boʻyicha qarori toʻgʻrisida zudlik bilan xabar qiladi.

4. Soʻralayotgan Ahdlashuvchi Tomon 58-moddada koʻrsatilgan hujjatlarni va ushlab berish haqidagi soʻrovni 60 kun mobaynida olmasa, ehtiyot chorasi sifatida qamoqqa olingan shaxsni ozod qilishi mumkin. Qamoqqa olingan shaxs muddatidan ilgariroq ozod qilinishi ham mumkin, ammo soʻralayotgan Ahdlashuvchi Tomon oʻzi zarur deb topgan, ushlab turib berilishi talab etilayotgan shaxsning qochib ketishiga yoʻl qoʻymaydigan choralarni koʻradi.

5. Shaxsning ozod qilinishi uni ushlab berish haqidagi soʻrov va tasdiqlovchi hujjatlar olingan taqdirda uni takroriy ushlab berish va ehtiyot chorasi sifatida qamoqqa olishga toʻsqinlik qilmaydi.

62-modda Shaxsni topshirish

1. Ushlab berish haqidagi soʻrov qanoatlantirilganligi toʻgʻrisida xabarnoma olinganidan soʻng Ahdlashuvchi Tomonlar talab qilinayotgan shaxsni topshirish vaqti, joyi va tartibini kelishib oladilar.

2. Ahdlashuvchi Tomonlardan birontasi oʻziga bogʻliq boʻlmagan sabablar tufayli ushlab berilayotgan shaxsni topshirish yoki qabul qilib olish imkoniga ega boʻlmasa, bu toʻgʻrisida u darhol boshqa Ahdlashuvchi Tomonni xabardor qiladi. Soʻralayotgan va soʻrayotgan Ahdlashuvchi Tomonlar birgalikda topshirishning yangi muddatini belgilaydilar, ammo talab etilayotgan shaxs bu muddatda ham qabul qilib olinmasa, u ozod qilinishi mumkin.

63-modda Ushlab berish muddatini uzaytirish yoki vaqtincha berish

1. Ushlab berilishi talab etilayotgan shaxs soʻralayotgan Ahdlashuvchi Tomonlar hududida jinoiy javobgarlikka tortilsa yoki boshqa qilmishi uchun hukm qilingan boʻlsa, uni berish muddati jinoiy taʼqib qilish toʻxtatilgunga, hukm ijro etilgunga yoki jazodan ozod qilingunga qadar uzaytirilishi mumkin.

2. Ushbu moddaning 1-bandida nazarda tutilgan ushlab berishni va topshirishni uzaytirish muddatni oʻtkazib yuborishga yoki shaxsga nisbatan tergovga jiddiy zarar yetkazishga olib kelishi mumkin boʻlsa, Ahdlashuvchi Tomon soʻrayotgan Ahdlashuvchi Tomondan talab qilinayotgan shaxsni berish muddatini uzaytirish oʻrniga va soʻrayotgan Ahdlashuvchi Tomonlar bilan birgalikda belgilanadigan shartlarga muvofiq vaqtinchaga berishi mumkin.

3. Vaqtincha berilgan shaxs, u topshirilgan jinoiy ish boʻyicha harakatlar tugagach, kechiktirmasdan qaytarib berilishi kerak. Chunki mazkur shaxs soʻrayotgan Ahdlashuvchi Tomonning fuqarosi boʻlmagan yoki unga soʻrayotgan Ahdlashuvchi Tomondan boshpana berilmagan emas. Bunday fakt yuzasidan soʻralayotgan Ahdlashuvchi Tomonga vaqtinchalik berishdan avval axborot berilishi shart.

64-modda Maxsus qoida

1. Soʻralayotgan .Ahdlashuvchi Tomonning roziligi boʻlmasa, ushbu Shartnomaga muvofiq ushlab berilgan shaxsga nisbatan ushlab berilishiga olib kelgan jinoyatidan tashqari, jinoiy taʼqib qilish, hukm chiqarish amalga oshirilmaydi va u soʻrayotgan Ahdlashuvchi Tomonlarning hududida berilgunga qadar sodir etilgan jinoyat uchun uning shaxsiy ozodligi qandaydir cheklashlarga tortilmaydi.

Ushbu moddaga muvofiq soʻralayotgan Ahdlashuvchi Tomonning roziligini olish uchun berilgan soʻrovga ushbu Shartnomaning 58-moddasida koʻrsatilgan hujjatlar ilova etilishi kerak.

2. Ushlab berilgan shaxs soʻrayotgan Ahdlashuvchi Tomon hududidan chiqib ketish imkoniyatiga ega boʻlsa va uni jinoyat uchun javobgarlikdan butunlay ozod etilgandan soʻng bir oy davomida chiqib ketmasa, yoki ushbu shaxs oldin undan chiqib ketib, soʻrayotgan Ahdlashuvchi Tomon hududiga ixtiyoriy ravishda qaytib kelsa, ushbu moddaning 1-bandi qoidasi qoʻllanilmaydi.

65-modda Muvofiq soʻrovlar yoki uchinchi davlatga ushlab berish

1. Agar bir Ahdlashuvchi Tomon bir shaxsni ushlab berish toʻgʻrisida bir vaqtning oʻzida ikkinchi Ahdlashuvchi Tomon va qaysidir uchinchi davlatning soʻrovni olsa, qaysi soʻrovni qondirilishini uning oʻzi hal qiladi.

2. Soʻrayotgan Ahdlashuvchi Tomon soʻralayotgan Ahdlashuvchi Tomonning roziligisiz talab etilayotgan uchinchi davlatga ushlab berishga haqli emas, ushbu Shartnoma 64-moddasining 2-bandida koʻzda tutilgan hollar bundan mustasno.

66-modda Takroriy ushlab berish

Berilgan shaxs soʻrayotgan Ahdlashuvchi Tomon hududida jinoyat uchun javobgarlikdan butunlay ozod qilingunga qadar Ahdlashuvchi Tomon hududiga qaytsa, unda bu shaxsni takroriy ushlab borish ushbu Shartnomaning 58- va 60-moddalarida nazarda tutilgan hujjatlarni taqdim etmasdan tegishli soʻrov boʻyicha amalga oshirilishi mumkin.

67-modda Mol-mulkni berish

1. Soʻralayotgan Ahdlashuvchi Tomon qonunlari yoʻl qoʻyadigan darajada va tegishli ravishda rioya qilinishi lozim boʻlgan uchinchi tomonning huquqlarini hisobga olib, soʻralayotgan davlatda barcha aniqlangan, jinoyat natijasida sotib olingan, shaxsni qaytarishga sabab boʻlgan yoki jinoiy ish boʻyicha dalil sifatida talab qilinishi mumkin boʻlgan mol-mulk, agar berish ruxsat etilgan boʻlsa, soʻrayotgan Ahdlashuvchi Tomonning soʻrovi boʻyicha beriladi.

2. Yuqorida eslatilgan mol-mulk, agar bu haqda soʻrayotgan Ahdlashuvchi Tomon soʻrayotgan boʻlsa, hatto ushlab berilishi talab etilayotgan shaxsning qochganligi yoki oʻlganligi holatida ham, ana shu Ahdlashuvchi Tomonga berilishi mumkin.

3. Agar aytib oʻtilgan mol-mulk soʻralayotgan Ahdlashuvchi Tomonga jinoiy ish boʻyicha dalil sifatida zarur boʻlsa, unda uni borish ish boʻyicha ishlar tugagunga qadar muddati uzaytirilishi mumkin.

4. Agar aytib oʻtilgan mol-mulk soʻralayotgan Ahdlashuvchi Tomon hududida hibsga olinishi yoki musodara etilishi kerak boʻlsa ham bu Tomon uni ushlab turishi yoki vaqtincha berib turishi mumkin.

5. Agar soʻralayotgan Ahdlashuvchi Tomonning qonunlari yoki uchinchi shaxslarning huquqlarini himoya qilish taqozo etsa, bunday tartibda berilgan har qanday mulk, agar buni ushbu Tomon talab qilsa, sud muhokamasi tamom boʻlishi bilan soʻralayotgan Ahdlashuvchi Tomonga tekinga qaytariladi.

68-modda Tranzit tashish

1. Shaxs uchinchi davlatdan bir Ahdlashuvchi Tomonga boshqa Ahdlashuvchi Tomon hududi orqali berilishi kerak boʻlsa, unda bu oluvchi Ahdlashuvchi Tomon boshqa Ahdlashuvchi Tomondan bu shaxsni uning hududi orqali tranzit olib oʻtish uchun ruxsat soʻraydi. Ushbu qoida havo transportidan foydalangan boshqa Ahdlashuvchi Tomonning hududiga qoʻnish rejalashtirilmagan hollarda qoʻllanmaydi.

2. Shaxs toʻgʻrisidagi maʼlumotlar, jinoiy qilmishning qisqacha bayoni hamda hibsga olish toʻgʻrisida qaror ilova etilgan soʻrov olingandan soʻng soʻralayotgan Ahdlashuvchi Tomon oʻz qonunlarida nazarda tutilgan tartibotlarga muvofiq ushbu soʻrovni koʻrib chiqadi va agar u oʻzining asosiy manfaatlariga zarar yetkazmasa, ushbu soʻrovnomani tezlik bilan qondiradi. Ahdlashuvchi Tomonlarning vakolatli adliya muassasalari har biri alohida holda tranzit usullari, yoʻnalishlari va boshqa shartlarini kelishib oladilar.

3. Tranzit tashishlar vaqtida tranzit davlati qamoqdagi saqlashning yuridik imkoniyatlarini taʼminlaydi va olib ketilayotgan kuzatib ketayotgan boshqa Ahdlashuvchi Tomonning vakillariga zarur yordam koʻrsatadi.

4. Ahdlashuvchi Tomon hududidan uchib oʻtayotgan havo kemasi bu yerda rejadan tashqari qoʻngan hollarda u olib ketilayotgan shaxsni kuzatib ketayotgan boshqa Ahdlashuvchi Tomon vakillarining soʻrovnomasiga koʻra ushbu moddaning 1-bandiga muvofiq olib ketilayotgan shaxsni tranzit tashish toʻgʻrisida soʻrovnoma olgunga qadar 48 soat davomida qamoqda saqlashi mumkin. Bunday soʻrov matnni berishning texnik vositalari, shuningdek telegraf, teleks, telefaks yordamida berilishi mumkin.

5. Tranzit tashishga bogʻliq xarajatlarni soʻrayotgan Ahdlashuvchi Tomon koʻtaradi.

69-modda Jinoiy ish boʻyicha ish yuritish natijalari toʻgʻrisida xabar berish

Ahdlashuvchi Tomonlar oʻzlariga berilgan shaxslarga qarshi jinoiy ish boʻyicha ish yuritish natijalaridan bir-birlarini xabardor qilib turadilar. Soʻrovnomaga koʻra hal qiluv qarorining nusxasi ham joʻnatiladi.

II QISM Jinoiy taʼqibni amalga oshirish

70-modda Jinoiy taʼqibni amalga oshirish mumkinligi

1. Agar shaxsni ushlab berish imkoni boʻlmasa, Ahdlashuvchi Tomonlardan har biri boshqa Ahdlashuvchi Tomondan jinoyatni sodir etishda shubha qilinayotgan shaxsni soʻralayotgan Ahdlashuvchi Tomonning qonunlariga muvofiq jinoiy taʼqib qilishni soʻrashi mumkin.

2. Ahdlashuvchi Tomonlardan har biri oʻzining qonunlariga muvofiq boshqa Ahdlashuvchi Tomonning soʻroviga koʻra oʻz fuqarosini yoki boshqa shaxslarni jinoiy taʼqib qilishlari mumkin, agar bu shaxslar jinoyatni sodir etishda shubha qilinayotgan boʻlsalar, shuningdek ushbu jinoyat ikkala Ahdlashuvchi Tomonlar uchun jinoiy harakat deb hisoblansa.

71-modda Jinoiy taʼqibni amalga oshirish toʻgʻrisida soʻrov va zarur hujjatlar

1. Jinoiy taʼqibni amalga oshirish toʻgʻrisidagi soʻrov yozma holda yuboriladi va unda quyidagilar boʻlishi kerak:

1.1. tergov yoki sud taftishini oʻtkazishga vakolatli boʻlgan soʻrayotgan adliya muassasasi va soʻralayotgan adliya muassasasining nomi;

1.2. jinoiy sudlov ishlarini berish toʻgʻrisida yuborilayotgan soʻrov munosabati bilan qilmishning bayoni, shuningdek jinoyat sodir etilgan joy va vaqt haqidagi maʼlumot;

1.3. jinoyat sodir etganlik toʻgʻrisidagi shubhani asoslovchi tergov natijalari bayoni;

1.4. gumondor shaxsning kimligi, fuqaroligi va yashash joyi haqida yetarli darajadagi aniq maʼlumot;

1.5. jinoyat natijasida keltirilgan ziyonning miqdori toʻgʻrisidagi maʼlumotlar.

2. Jinoiy taʼqibni amalga oshirish toʻgʻrisidagi soʻrovga quyidagilar ilova qilinishi kerak:

2.1. soʻrayotgan Ahdlashuvchi Tomon qonunining ayni qilmishni jinoiy ayb deb baholashga asos boʻladigan matni, shuningdek ishni taftish etishda ahamiyatli boʻlgan boshqa qonunchilik meʼyorlarining matnlari;

2.2. jabrlanuvchining shikoyatiga koʻra qoʻzgʻatiladigan jinoiy ishlar boʻyicha jabrlanuvchilarning arizalar va zararni qoplash toʻgʻrisidagi arizalar;

2.3. shubha qilinayotgan shaxsning kimligini aniqlashga imkon beradigan har qanday axborot, shuningdek, uning tashqi koʻrinishi bayoni, fotosurati va boshqa tasvirlar.

3. Ishda mavjud boʻlgan har bir hujjat soʻrayotgan Ahdlashuvchi Tomonning vakolatli adliya muassasasi tomonidan gerbli muhr bilan tasdiqlangan boʻlishi kerak.

4. Soʻrov va unga ilova qilinadigan hujjatlar ushbu Shartnomaning 17-moddasi qoidalariga muvofiq rasmiylashtiriladi.

72-modda Haqiqiylikni shahodatlantirish va tasdiqlash

Milliy qonunlar va ushbu Shartnomada koʻzda tutilgan hollardan tashqari, agar Ahdlashuvchi Tomonlar boshqacha kelishib olmagan boʻlsalar, taʼqibni amalga oshirish uchun soʻrovga ilova qilinadigan hujjatlar, shuningdek, soʻrovga javob tariqasida berilgan hujjatlar va boshqa xil materiallarning haqiqiyligi shahodatlantirish va tasdiqlashni talab qilmaydi.

73-modda Soʻrovning bajarilishi toʻgʻrisida xabar

Soʻralayotgan Ahdlashuvchi Tomon soʻrayotgan Ahdlashuvchi Tomonga jinoiy ish boʻyicha oʻzining hal qiluv qarori toʻgʻrisida maʼlumot berishi kerak. Soʻrayotgan Ahdlashuvchi Tomonning soʻroviga koʻra hal qiluv qarorining nusxasi joʻnatiladi.

74-modda Soʻrovni rad etish uchun asoslar

1. Ahdlashuvchi Tomon jinoiy taʼqibni amalga oshirish haqidagi soʻrovni qabul qilishdan bosh tortsa, u soʻrayotgan Ahdlashuvchi Tomonni rad etish sabablari haqida xabardor qiladi.

2. Ahdlashuvchi Tomonning milliy qonunlari jinoiy taʼqib qilishga yoʻl qoʻymasa, jinoiy taʼqib haqidagi soʻrovni qabul qilish rad etilishi mumkin.

75-modda Jabrlanuvchining huquqi

Taʼqib toʻgʻrisidagi ishni berishda soʻrayotgan va soʻralayotgan Ahdlashuvchi Tomonlar jinoyatdan jabr koʻrgan shaxsning huquqi, ayniqsa, koʻrilgan zararni qoplashdagi uning huquqi buzilmasligini taʼminlaydilar.

76-modda Jinoiy taʼqib ishni berishning soʻrayotgan Ahdlashuvchi Tomon uchun oqibatlari

Jinoiy taʼqib qilish toʻgʻrisidagi soʻrov Ahdlashuvchi Tomon tarafidan qabul qilinganidan soʻng soʻrayotgan Ahdlashuvchi Tomon jinoiy taʼqib qilishni toʻxtatadi. Ammo soʻralayotgan Ahdlashuvchi Tomonga bu Tomon ish boʻyicha hal qiluvchi qaror chiqarganligi toʻgʻrisida xabar qilmagunicha yuridik yordam berish bundan mustasnodir. Mazkur xabarni olgandan soʻng soʻrayotgan Ahdlashuvchi Tomon ayni jinoyat bilan bogʻliq jinoiy taʼqibni toʻxtatadi.

77-modda Jinoiy taʼqib ishni berishning soʻralayotgan Ahdlashuvchi Tomon uchun oqibatlari

1. Kelishuvga koʻra berilgan jinoiy taʼqib ishi materiallari soʻralayotgan Ahdlashuvchi Tomon qonunlariga koʻra tartibga solinadi, Shubha qilinayotgan shaxsga ayb qoʻyilganda soʻralayotgan Ahdlashuvchi Tomonning adliya muassasasi oʻz qonunlariga muvofiq jinoyat tarkibini tashkil etuvchi aniq elementlarga oid zarur tuzatishlar kiritadi. Bu davlatda eʼlon qilingan jazo chorasi soʻrayotgan Ahdlashuvchi Tomon qonunlarida nazarda tutilganidan qattiqroq boʻlmasligi kerak.

2. Ahdlashuvchi Tomon hududida uning qonunlariga muvofiq amalga oshiriladigan sud taftishi yoki tartibotlar taqozo etadigan har qanday harakat soʻralayotgan Ahdlashuvchi Tomon qonunlariga koʻra bunday harakat qanchalik mos kelsa, qanday harakat boʻlmasin, agar ushbu davlatda yoki ushbu davlat adliya muassasalari tomonidan sodir boʻlsa, soʻralayotgan Ahdlashuvchi Tomon hududida shunday yuridik kuchga ega boʻladi.

3. Ahdlashuvchi Tomon soʻrayotgan Ahdlashuvchi Tomonni jinoiy taʼqibni amalga oshirish haqidagi soʻrovnoma boʻyicha sud muhokamasi natijasida qabul qilingan qaror haqida xabardor qiladi. Shu maqsadda har qanday hal qiluv qarorining nusxasi beriladi.

78-modda Vaqtinchalik choralar

Soʻrayotgan Ahdlashuvchi Tomon jinoiy taʼqib qilish toʻgʻrisida soʻrov yuborish haqida oʻz niyatini bildirsa, soʻralayotgan Ahdlashuvchi Tomon Ahdlashuvchi Tomonning ushbu maqsadda yuborilgan maxsus soʻrovini olgandan soʻng barcha vaqtinchalik choralarni qoʻllashi mumkin, shuningdek, dastlabki ushlash kabi qanday choralar koʻrish mumkin boʻlsa, agar jinoyat, jinoiy taʼqibni amalga oshirish haqidagi soʻrov yuborilgan, uning hududida sodir etilgan boʻlsa soʻralayotgan Ahdlashuvchi Tomon qonunlariga muvofiq qoʻllanishi.

III qism Jinoiy ishlar boʻyicha huquqiy yordam va huquqiy munosabatlar toʻgʻrisida maxsus qoidalar

79-modda Hibsda saqlanayotgan yoki ozodlikdan mahrum etish tarzida jazoni oʻtayotgan shaxslarni vaqtincha berish

1. Tomonlar oʻz qonunlariga muvofiq va qamoqda saqlanayotgan shaxslarning roziligi bilan tegishli soʻrovlar boʻlganda tergov ishlarini oʻtkazishda koʻrsatmalar berish yoki yordam koʻrsatish maqsadida ularni bir-birlariga vaqtinchalik berishlari mumkin.

2. Ushbu moddaning 1-bandida nazarda tutilgan shaxslarni berish soʻralayotgan Ahdlashuvchi Tomonidan belgilangan muddat va shartlarga muvofiq, soʻrayotgan Ahdlashuvchi Tomon bilan kelishib olingandan soʻng, lekin bir oydan oshmagan muddatda, alohida hollarda esa uzogʻi bilan ikki oy muddatga berilishi mumkin.

80-modda Tintish va olib qoʻyish

Soʻralayotgan Ahdlashuvchi Tomon oʻz qonunlari yoʻl qoʻyadigan doiralarda soʻrayotgan Ahdlashuvchi Tomonning ushbu Shartnomaning 67-moddasida nazarda tutilgan shartlarga rioya qilingan holda jinoiy ish boʻyicha isbot sifatida foydalanish uchun buyumlar va hujjatlarni tintish, olib qoʻyish va berish toʻgʻrisidagi soʻrovini bajaradi.

81-modda Jinoyat orqali topilgan daromadlar

Ahdlashuvchi Tomonlar jinoyat orqali topilgan daromadlarni aniqlashda, olib qoʻyishda va musodara qilishda bir-birlariga yordam koʻrsatadilar. Ushbu Shartnomada “jinoyat orqali topilgan daromadlar” tushunchasi jinoyat oqibatida toʻgʻridan toʻgʻri yoki bilvosita olingan yoki sotilgan har qanday shubhali yoki sud tomonidan jinoyat natijasida olingan deb topilgan mulkni yoki oʻzida mulk qiymatini ifodalovchi mulkni yoxud boshqa foydali daromadlarni ifodalaydi.

82-modda Jinoyat orqali topilgan daromadlar borasida yordam koʻrsatish

1. Soʻrayotgan Ahdlashuvchi Tomon soʻralayotgan Ahdlashuvchi Tomonga jinoyat orqali topilgan daromadlar borasida yordam toʻgʻrisida soʻrov yuborar ekan, oʻzi bunday soʻralayotgan Ahdlashuvchi Tomonning yurisdikatsiyasi doirasida boʻlishi mumkin deb hisoblagan sabablar haqida maʼlum qiladi.

2. Ahdlashuvchi Tomon bundan soʻrovni olgandan soʻng jinoyat orqali topilgan biron-bir daromad uning yurisdikatsiyasi doirasida bor-yoʻqligini aniqlash uchun zarur choralar koʻradi hamda soʻrayotgan Ahdlashuvchi Tomonni tekshirish natijalaridan xabardor qiladi.

3. Jinoyat orqali topilgan deb taxmin qilinayotgan daromadlarning borligi aniqlansa, soʻralayotgan Ahdlashuvchi Tomon, tegishli soʻrov mavjud boʻlgan, ushbu daromadlarga nisbatan soʻrayotgan Ahdlashuvchi Tomon sudi tomonidan hal qiluvchi qaror qabul qilingunga qadar gumon jinoyat tufayli olingan ushbu ustida ularni berib yuborilishiga taalluqli biron-bir operatsiya oʻtkazishga, yoki ulardan foydalanishga yoʻl qoʻymaslik maqsadida oʻz qonunlari yoʻl qoʻyadigan choralarni koʻradi.

4. Ahdlashuvchi Tomon oʻz qonunlarida belgilangan darajada va ushbu Shartnoma shartlariga muvofiq, soʻrayotgan Ahdlashuvchi Tomonning jinoyat orqali topilgan daromadlarni olib qoʻyish yoki musodara qilish toʻgʻrisidagi hal qiluv qarorini ijro etadi ijro etishga sanksiya beradi yoki Ahdlashuvchi Tomonning soʻroviga muvofiq ushbu daromadlarni olish uchun boshqa zarur choralar koʻradi.

5. Tomonlar ushbu moddani qoʻllashda halol uchinchi tomonlarning huquqlariga rioya etilishini taʼminlaydilar. Jinoiy faoliyat orqali topilgan daromadlarni berish esa ushbu Shartnomaning 67-moddasida nazarda tutilgan shartlarga rioya qilingan holda amalga oshiriladi.

83-modda Ayblov hukmlar va sudlangan-sudlanmaganligi toʻgʻrisida maʼlumotlar haqida xabar berish

1. Ahdlashuvchi Tomonlar oʻz sudlari tarafidan boshqa Ahdlashuvchi Tomon fuqarolariga nisbatan chiqarilgan va qonuniy kuchga kirgan ayblov hukmlari toʻgʻrisida xabar beradilar va hukm qilinganlarning mavjud fotosuratlari hamda barmoq izlarini yuboradilar.

2. Ahdlashuvchi Tomonlar bir-birlariga soʻrovga koʻra, agar shaxs soʻrayotgan Ahdlashuvchi Tomon hududida jinoiy javobgarlikka tortilayotgan boʻlsa, uning soʻralayotgan Ahdlashuvchi Tomon sudlari tarafidan ilgari sudlangan-sudlanmaganligi toʻgʻrisida maʼlumot beradilar.

84-modda Maxfiylikka rioya qilish

1. Tegishli soʻrov mavjud boʻlgan taqdirda soʻralayotgan Ahdlashuvchi Tomon yordam koʻrsatish toʻgʻrisida soʻrov kelib tushganligini, uning mazmunini va tasdiqlovchi hujjatlar, shuningdek, bunday yordam koʻrsatganlik sir saqlanishi uchun zarur chora-tadbirlarni koʻradi. Maxfiylikni buzmagan holda soʻrovni qondirish imkoni boʻlmasa, soʻralayotgan Ahdlashuvchi Tomon bu haqda soʻrayotgan Ahdlashuvchi Tomonni xabardor qiladi va u shunga qaramay ushbu soʻrovni qondirish kerakligi yoki yoʻqligini aniqlaydi.

2 Soʻrayotgan Ahdlashuvchi Tomon soʻralayotgan Ahdlashuvchi Tomonga berilgan maʼlumot va axborotni sir saqlaydi, ushbu maʼlumot va axborot soʻrovda koʻrsatilgan tergov hamda sud tekshirishini oʻtkazish uchun talab qilingan hollar bundan mustasnodir.

85-modda Foydalanishga oid cheklash

Soʻrayotgan Ahdlashuvchi Tomon soʻralayotgan Ahdlashuvchi Tomonning roziligisiz u bergan axborot yoki maʼlumotlarni soʻrovda koʻrsatilganidan tashqari biron-bir tergov yoki tekshiruv uchun foydalanmaydi yoki bermaydi. Biroq ayblov oʻzgargan taqdim etilgan materialdan qoʻyilgan aybga muvofiq jinoyat unga nisbatan ushbu Shartnomaga koʻra oʻzaro yordam koʻrsatilishi mumkin boʻlgan jinoyatni ifodalasa, oʻsha darajada foydalanish mumkin.

86-modda Guvohlar, jabrlanuvchilar va jinoiy jarayonning boshqa qatnashchilarini muhofaza qilish

Ahdlashuvchi Tomonlar zarurat boʻlganda jinoyatlar toʻgʻrisidagi ishlar boʻyicha huquqiy yordam koʻrsatish toʻgʻrisida kelib tushgan soʻrovga koʻra guvohlar, jabrlanuvchilar va jinoiy jarayonning boshqa qatnashchilarini muhofaza qilish, shuningdek odil sudlovni amalga oshirish manfaatlari talab qilgan hollarda bunday ishlarni sudda koʻrib chiqish yuzasidan oʻz qonunlarida koʻzda tutilgan chora-tadbirlarni koʻradilar.

87-modda Tashishga aloqador xarajatlar

Hibsda saqlanayotgan shaxslarni koʻrsatma berish yoki ushbu Shartnomaning 79-moddasida koʻzda tutilgan taftish oʻtkazish uchun yordam berish vaqtincha berishda tashishga aloqador xarajatlar, bunga ularni uchinchi davlatlar hududidan tranzit olib oʻtish xarajatlari ham kiradi, soʻrayotgan Ahdlashuvchi Tomon tarafidan qoplanadi.

88-modda Jinoiy ishlar boʻyicha yordam koʻrsatishda Ahdlashuvchi Tomonlar adliya muassasalari vakillari va ayblanuvchilar himoyachilarining ishtirok etishi

Ahdlashuvchi Tomonlar adliya muassasalari vakillari va ayblanuvchilar himoyachilari boshqa Ahdlashuvchi Tomonning roziligi bilan mazkur Ahdlashuvchi Tomon adliya muassasalarining jinoiy ishlar boʻyicha yordam koʻrsatishida ishtirok etishlari mumkin.

V-boʻlim Yakuniy qoidalar

89-modda Ushbu Shartnomani qoʻllashdagi masalalar

Ushbu Shartnomani qoʻllashda paydo boʻladigan masalalar markaziy vakolatli adliya muassasalari oʻrtasida oʻzaro kelishuvga koʻra hal etiladi. Zaruriyat boʻlganda kelib chiqqan anglashilmovchiliklarni tartibga solish maqsadida Ahdlashuvchi Tomonlarning adliya organlari vakillaridan iborat qoʻshma komissiya tuzilishi mumkin.

90-modda Boshqa xalqaro shartnomalarga munosabat

Ushbu Shartnoma Ahdlashuvchi Tomonlar ishtirok etgan boshqa xalqaro shartnomalarining qoidalariga daxl qilmaydi.

91-modda Qoʻshimcha va oʻzgartishlar kiritish

Ahdlashuvchi Tomonlarning oʻzaro kelishuviga koʻra ushbu Shartnomaga uning 92-moddasida nazarda tutilgan shartlarga binoan kuchga kiradigan qoʻshimchalar va oʻzgartirishlar kiritilishi mumkin.

92-modda Kuchga kirish

Ushbu Shartnoma ratifikatsiya qilinishi lozim va ratifikatsiya yorliqlari almashingan sanadan boshlab toʻrtinchi oyining birinchi kuni kuchga kiradi.

93-modda Amal qilish muddati

Ushbu Shartnoma kuchga kirish sanasidan boshlab besh yil davomida amal qiladi hamda uning amal qilish muddati, agar Ahdlashuvchi Tomonlardan biri boshqa Ahdlashuvchi Tomonga uning amal qilishini toʻxtatish istagi toʻgʻrisida yozma xabar yubormasa, keyingi besh yillik davrga oʻz-oʻzidan uzaytiriladi. Shartnoma boshqa Ahdlashuvchi Tomon bunday xabarnoma olgan sanadan boshlab olti oy oʻtgach oʻz kuchini yoʻqotadi.

94-modda Vaqtga koʻra amal qilish

Ushbu Shartnoma qoidalari u kuchga kirgunga qadar boʻlgan huquqiy munosabatlarga ham joriy etiladi.

Toshkent shahrida 2002-yil 18-yanvarda ikki asl nusxada, har biri oʻzbek, chex va rus tillarida tuzildi, bunda barcha matnlar teng autentdir. Shartnoma matnini talqin qilish chogʻida yuzaga keladigan anglashilmovchiliklar boʻyicha rus tilidagi matn asos qilib olinadi.

(imzolar)