2001-2010-yillarga moʻljallangan iqtisodiy hamkorlik toʻgʻrisida

18.04.2001

Oʻzbekiston Respublikasi Hukumati bilan Ozarbayjon Respublikasi Hukumati oʻrtasida

Bitim

Oʻzbekiston Respublikasi Hukumati bilan Ozarbayjon Respublikasi Hukumati, bundan keyin “Tomonlar” deb ataluvchilar,

1996-yil 27-maydagi Oʻzbekiston Respublikasi bilan Ozarbayjon Respublikasi oʻrtasida doʻstlik va hamkorlik toʻgʻrisidagi Shartnomaga, 1996-yil 27-maydagi Oʻzbekiston Respublikasi Hukumati bilan Ozarbayjon Respublikasi Hukumati oʻrtasida erkin savdo toʻgʻrisidagi Bitimga, 1997-yil 18-iyundagi Oʻzbekiston Respublikasi va Ozarbayjon Respublikasi oʻrtasida har tomonlama hamkorlik va sheriklik munosabatlarini yanada rivojlantirish toʻgʻrisida Deklaratsiyaga, shuningdek Tomonlar ishtirokchilari boʻlgan boshqa xalqaro shartnomalarga amal qilib,

ikkala davlatning iqtisodiy va ilmiy-texnikaviy salohiyatidan samarali foydalanish va ular xalqlarining turmush farovonligini yuksaltirish maqsadida,

savdo-iqtisodiy va ishlab chiqarish munosabatlarini oʻzaro manfaatli, uzoq muddatli va barqaror asosda yanada rivojlantirish hamda mustahkamlashga intilib,

MDH doirasida umumiy iqtisodiy makonni bosqichma-bosqich shakllantirish va rivojlantirish maqsadga muvofiqligini tan olib,

tovarlar, xizmatlar, kapital va ishchi kuchining erkin koʻchishiga bosqichma-bosqich oʻtishda shart-sharoitlar yaratishga katta ahamiyat berib,

xalqaro huquqning umumeʼtirof etilgan meʼyor va tamoyillariga amal qilib,

quyidagilar toʻgʻrisida ahdlashib oldilar:

1-modda

Tomonlar ushbu Bitimning tarkibiy qismi boʻlib hisoblanadigan Oʻzbekiston Respublikasi Hukumati bilan Ozarbayjon Respublikasi Hukumati oʻrtasida 2001—2010-yillardagi moʻljallangan iqtisodiy hamkorlik Dasturini (bundan keyin – Dastur) qabul qiladilar hamda uni amalga oshirish uchun har tomonlama koʻmaklashadilar.

2- modda

Iqtisodiy hamkorlik Tomonlarning strategik manfaatlariga toʻgʻri keladigan uzoq muddatli sheriklik, tenghuquqlik, oʻzaro manfaat tamoyillariga asoslanadi hamda umum eʼtirof etilgan xalqaro huquq meʼyorlari va ikki davlat hududida amal qiluvchi milliy qonunlarga rioya etgan holda mulk shaklidan va boʻysunishdan qatʼi nazar, tashqi iqtisodiy faoliyat yurituvchi subyektlar hamda regionlar oʻrtasida bevosita kelishuv va toʻgʻridan toʻgʻri aloqalar orqali amalga oshiriladi.

Tomonlar oʻz milliy qonunlariga muvofiq, Tomonlarning xoʻjalik yuritish subyektlari tashqi iqtisodiy faoliyatni olib borishi, davlatlararo loyiha va dasturlarni tuzish, kooperatsiyani rivojlantirish, umumiy ishlab chiqarish tuzilmalarini tashkil qilish, xususiylashtirish va investitsiya loyihalarida birgalikda ishtirok etish uchun qulay shart-sharoitlar yaratadilar.

Tomonlar bir-birlarining oʻzaro iqtisodiy manfaatlariga ziyon yetkazadigan xatti-harakatlardan oʻzlarini tiyadilar.

3- modda

Tomonlar quyidagilarga koʻmaklashadilar:

hamkorlikning hamma sohalarini qamrab oladigan meʼyoriy-huquqiy bazani tashkil qilish;

savdo-iqtisodiy, ilmiy-texnikaviy va madaniy aloqalarni izchil rivojlantirish hamda kengaytirishi;

neft, gaz, neftekimyo, avtomobil, aviatsiya, tikish, tekstil, qurilish, qishloq xoʻjaligi va boshqa sohalarda hamkorlikni yanada rivojlantirish;

Oʻzbekiston va Ozarbayjonning mashinasozlik, kimyo va boshqa korxonalarining ishlab chiqarish kooperatsiyasi va ixtisoslashtirilishini rivojlantirish, qishloq xoʻjaligi mahsulotlarini qayta ishlash boʻyicha qoʻshma korxonalarni tashkil qilish boʻyicha ishlarni davom ettirish;

Tomonlarning milliy manfaatlari hamda amal qiluvchi qonunlariga muvofiq Ozarbayjon Respublikasining maʼmuriy-hududiy boʻlinmalari Respublikasining Toshkent, Buxoro, Andijon, Fargʻona va Navoiy viloyatlari bilan regionlararo hamkorligini mustahkamlash va rivojlantirish;

Tomonlarning xoʻjalik yuritish subyektlari oʻrtasida oʻzaro manfaatli hamkorlikni mustahkamlashga;

oʻzaro manfaatli milliy va xalqaro loyiha va dasturlarni moliyaviy taʼminlash uchun investitsiya, moliyaviy hamda sugʻurta kompaniyalarini jalb etish.

4- modda

Tomonlar investitsiyalarni ragʻbatlantirish va oʻzaro himoya qilish, tadbirkorlikni qoʻllab-quvvatlash, tovar va fond bozorlariga, shuningdek mehnat bozoriga yoʻl ochish uchun qulay sharoitlarni barpo etishga koʻmaklashadilar.

5- modda

Tomonlar oʻzaro manfaatli asosda umumiy ilmiy-texnikaviy muhit barpo etishga intiladilar, va shu maqsadda xalqaro loyihalar, fundamental va amaliy ilmiy tadqiqotlar oʻtkazish doirasidagi hamkorlikda birgalikdagi harakatni taʼminlaydilar.

6- modda

Tomonlar ular ishtirokchilari boʻlgan mavjud shartnomalar va kelishuvlarga asosan transport va aloqa sohasida hamkorlikni faollashtiradilar. Oʻz hududlari orqali transport aloqasining barcha turlarida yoʻlovchi va yuklarning tranziti uchun qulay sharoitlarni, jumladan Tomonlarning milliy qonunlarini mukammallashtirish yoʻli bilan, yaratadilar. Tomonlarning milliy qonunlariga muvofiq ularning hududlari orqali tranziti taqiqlangan yuklar bundan istisno.

Tomonlar Trans-Osiyo-Yevropa tola-optik magistrali(TAYE VOLS) qurilishini tugatish va uning samarali ishlashi uchun zarur choralarni koʻradilar.

7- modda

Tomonlar hududiy boshqaruv organlari, xoʻjalik yurituvchi subyektlar tomonidan mahsulot yetkazib berish boʻyicha shartnomalar tuzilganida cheklashlar kiritmaydilar. Tomonlarning milliy qonunlari koʻzda tutadigan hollar bundan istisno.

8- modda

Tomonlar Dasturni bajarishni muvofiqlashtirishni, uni amalga oshirish va, zaruriyat boʻlganda, unga oʻzgartishlar kiritish uchun takliflarni ishlab chiqish jarayoni ustidan nazoratni (1997-yil 18-iyundagi ikki tomonlama Bayonnoma asosida tuzilgan) Oʻzbekiston Respublikasi va Ozarbayjon Respublikasi oʻrtasida hamkorlik boʻyicha hukumatlararo Qoʻshma komissiyaga topshiradilar.

Dasturni bajarish jarayoni Qoʻshma komissiya yigʻilishlarida har yili kamida bir marta koʻrib chiqiladi.

9- modda

Ushbu Bitimning qoidalarini talqin qilish va qoʻllash yuzasidan bahslar maslahatlashuv va muzokaralar orqali hal qilinishi kerak.

Tomonlarning oʻzaro roziligiga koʻra ushbu Bitimga alohida bayonnomalar bilan rasmiylashtirilgan oʻzgartish va toʻldirishlar kiritilishi. Bu bayonnomalar ushbu Bitimning tarkibiy qismi boʻlib hisoblanadi va ushbu Bitimning 11-moddasida koʻrsatilgan protseduraga muvofiq kuchga kiradi.

10- modda

Ushbu Bitim Tomonlarning ular ishtirokchilar boʻlgan boshqa xalqaro shartnomalardan kelib chiqadigan huquq va majburiyatlariga daxl qilmaydi.

11- modda

Ushbu Bitim Tomonlar uning kuchga kirishi uchun zarur boʻlgan davlat ichki protseduralarini bajarganliklari toʻgʻrisida oxirgi xabarnomani olingan sanadan boshlab kuchga kiradi va 2010-yilning 31-dekabriga qadar amal qiladi.

Tomonlardan har biri boshqa Tomonga yozma ravishda xabar berish orqali ushbu Bitimning amal qilishini toʻxtatishi mumkin. Bu holda Bitim shunday xabarnoma olingan sanadan boshlab olti oy oʻtgach amal qilishini toʻxtatadi.

Agar Tomonlar boshqacha ahdlashib olmasalar, ushbu Bitim amal qilishining toʻxtatilishi bu Bitim amal qilinishi davrida kuchga kirgan dastur loyihalarning amalga oshirilishiga daxl qilmaydi.

Toshkent shahrida, 2001-yil 18-aprelda ikki nusxada, har biri oʻzbek, ozarbayjon va rus tillarida tuzildi, bunda barcha matnlar bir xil kuchga ega. Ushbu Bitim qoidalarini talqin qilish uchun rus tilidagi matn ishlatiladi.

(imzolar)