Xorazm viloyatining harakatdagi trolleybuslar parki tarkibini yangilash haqida (309-son)

25.10.2012

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining 2010-yil 21-dekabrdagi PQ-1446-son “2011 — 2015-yillarda infratuzilmani, transport va kommunikatsiya qurilishini rivojlantirishni jadallashtirish toʻgʻrisida”gi qarori hamda Vazirlar Mahkamasining 2009-yil 26-oktabrdagi 281-son “Shahar yoʻlovchi elektr transporti harakatdagi sostav parkini yangilash chora-tadbirlari toʻgʻrisida”gi qarorini ijro etish maqsadida Vazirlar Mahkamasi qaror qiladi:

1. “Xorazm trolleybus boshqarmasi” davlat korxonasi tomonidan “Shkoda elektrik” (Chexiya) firmasi bilan 9 ta trolleybus sotib olish boʻyicha tuzilgan shartnoma (keyingi oʻrinlarda shartnoma deb yuritiladi) boʻyicha Oʻzbekiston Respublikasi Tashqi iqtisodiy aloqalar, investitsiyalar va savdo vazirligining belgilangan tartibdagi xulosasi olinganligi maʼlumot uchun qabul qilinsin.

2. Belgilansinki:

Oʻzbekiston Respublikasi Tiklanish va taraqqiyot jamgʻarmasining 10 yil muddatga, shu jumladan 3 yillik imtiyozli davr bilan, yillik 1,25 foiz stavkada (qayta moliyalashtiruvchi bankning 0,25 foizlik marjasini oʻz ichiga olgan holda) “Oʻzsanoatqurilishbank” OATB tomonidan qayta moliyalashtiriladigan 3534,1 ming yevro miqdoridagi krediti kontraktni moliyalashtirish manbai;

qarz mablagʻlaridan maqsadli va samarali foydalanish uchun masʼul boʻlgan “Xorazm trolleybus boshqarmasi” davlat korxonasi Oʻzbekiston Respublikasi Tiklanish va taraqqiyot jamgʻarmasidan jalb qilinayotgan kredit boʻyicha qarz oluvchi hisoblanadi.

Oʻzbekiston Respublikasi Tiklanish va taraqqiyot jamgʻarmasining “Oʻzsanoatqurilishbank” OATB orqali qayta moliyalashtiriladigan kreditini qaytarishning prognoz jadvali ilovaga* muvofiq tasdiqlansin.

*Ilova berilmaydi.

3. Oʻzbekiston Respublikasi Tiklanish va taraqqiyot jamgʻarmasi, “Oʻzsanoatqurilishbank” OATB va “Xorazm trolleybus boshqarmasi” davlat korxonasi ikki hafta muddatda shartnoma boʻyicha moliyalashtirishni ochsin.

4. Xorazm viloyati hokimligi:

ikki hafta muddatda Oʻzbekiston Respublikasi Tiklanish va taraqqiyot jamgʻarmasi kreditiga xizmat koʻrsatishga maqsadli yoʻnaltirilgan budjet mablagʻlarini oʻtkazish uchun “Oʻzsanoatqurilishbank” OATBda “Xorazm trolleybus boshqarmasi” davlat korxonasining maxsus hisob raqamini ochsin;

bir oy muddatda “Xorazm viloyati trolleybuslar harakatdagi tarkibi parkini yangilash” loyihasining texnik-iqtisodiy hisob-kitobini belgilangan tartibda tasdiqlash uchun kiritsin;

olti oy muddatda mahalliy budjet mablagʻlari hisobidan elektr transporti infratuzilmasini (aloqa tarmoqlari, tortish podstansiyalari, park va taʼmirlash bazasi) kapital taʼmirlashni taʼminlasin.

5. Oʻzbekiston Respublikasi Moliya vazirligi:

2012-yilda Oʻzbekiston Respublikasi Tiklanish va taraqqiyot jamgʻarmasi kreditiga xizmat koʻrsatish uchun Oʻzbekiston Respublikasi Vazirlar Mahkamasining zaxira jamgʻarmasidan mablagʻlar ajratsin;

2013-yildan boshlab har yili kelgusi yil uchun Oʻzbekiston Respublikasi Davlat budjeti loyihasini tuzishda Oʻzbekiston Respublikasining respublika budjeti va Xorazm viloyatining mahalliy budjeti hisobidan teng ulushlarda Oʻzbekiston Respublikasi Tiklanish va taraqqiyot jamgʻarmasi kreditiga xizmat koʻrsatish uchun mablagʻlarni nazarda tutsin.

6. Oʻzbekiston Respublikasi Iqtisodiyot vazirligi 9 ta trolleybus sotib olinishi Oʻzbekiston Respublikasining 2013-yilgi Investitsiya dasturiga belgilangan tartibda kiritilishini taʼminlasin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.I. Zakirov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2012-yil 25-oktabr,

309-son