Ikkiyoqlama soliqqa tortishga yoʻl qoʻymaslik va daromad hamda kapital soliqlarini toʻlashdan bosh tortishning oldini olish toʻgʻrisida

18.11.2008

OʻZBEKISTON RESPUBLIKASI HUKUMATI BILAN SAUDIYA ARABISTONI PODShOHLIGI HUKUMATI OʻRTASIDA

Konvensiya

Oʻzbekiston Respublikasi Hukumati bilan Saudiya Arabistoni Podshohligi Hukumati oʻrtasida, bundan keyin ular “Ahdlashuvchi Davlatlar” deb ataladi,

ikki yoqlama soliqqa tortishga yoʻl qoʻymaslik va daromad hamda kapital soliqlarini toʻlashdan bosh tortishning oldini olish toʻgʻrisida Konvensiya tuzish istagini bildirib,

quyidagilar toʻgʻrisida ahdlashib oldilar:

1-modda Qamrab olinayotgan shaxslar

Mazkur Konvensiya Ahdlashuvchi Davlatlarning biri yoki ikkalasining rezidenti boʻlgan shaxslarga nisbatan qoʻllaniladi.

2-modda Konvensiya tatbiq etiladigan soliqlar

1. Ushbu Konvensiya Ahdlashuvchi Davlat yoki uning siyosiy boʻlinmalari yoxud mahalliy hokimiyat organlari nomidan undirilayotgan daromad va kapital soliqlariga nisbatan, ularni undirish usulidan qatʼi nazar, tatbiq etiladi.

2. Daromadga va kapitalga solinadigan soliqlarga jami daromaddan, jami kapitaldan yoki daromad yoxud kapitalning bir qismidan undiriladigan barcha soliqlar taalluqli boʻlib, bunga koʻchar va koʻchmas mulkni boshqa shaxslarga berishdan olingan daromadlarga solinadigan soliqlar, korxonalar toʻlaydigan ish haqi va maoshlardan olinadigan soliqlar, shuningdek kapital qiymatining oʻsishidan olinadigan soliqlar ham kiradi.

3. Ushbu Konvensiya tatbiq etiladigan amaldagi soliqlar, xususan quyidagilardir:

(a) Oʻzbekiston Respublikasiga tatbiqan:

i) yuridik shaxslardan olinadigan daromad (foyda) soligʻi;

ii) jismoniy shaxslardan olinadigan daromad soligʻi; va

iii) mol-mulk soligʻi;

(bundan keyin “Oʻzbekiston soligʻi” deb ataladi).

b) Saudiya Arabistoni Podshohligiga tatbiqan:

zakot;

daromad soligʻi, tabiiy gazdan olinadigan investitsiya soligʻi ham kiradi;

(bundan keyin “Saudiya soligʻi” deb ataladi).

4. Ushbu Konvensiyaning qoidalari mazkur Konvensiya imzolangan sanadan soʻng qoʻshimcha undiriladigan soliqlarga yoki mavjudlari oʻrniga kiritilgan har qanday bir xil yoki aslida oʻxshash soliqlarga nisbatan ham qoʻllanadi. Ahdlashuvchi Davlatlarning vakolatli organlari oʻzlarining tegishli soliq qonunchiligiga kiritilgan har qanday muhim oʻzgartirishlar toʻgʻrisida bir-birlariga xabar beradilar.

3-modda Umumiy taʼriflar

1. Ushbu Konvensiyaning maqsadlari uchun, agar matnning mazmunidan oʻzga maʼno chiqmasa:

a) “Oʻzbekiston” atamasi Oʻzbekiston Respublikasini bildiradi va jugʻrofiy maʼnoda qoʻllanilganda, Oʻzbekiston Respublikasi hududini, shu jumladan ular doirasida Oʻzbekiston Respublikasi suveren huquqlar va yurisdiksiyani, shuningdek Oʻzbekiston Respublikasining qonun hujjatlari boʻyicha va xalqaro huquqqa muvofiq yer ostidan va tabiiy resurslardan foydalanish huquqlarini amalga oshira oladigan hududiy suvlar va havo makonini anglatadi;

b) “Saudiya Arabistoni Podshohligi” atamasi Podshohlik joylashgan ichki hududlar va orollarni, hududiy suvlar ham shunga kiradi, shuningdek Podshohlik bu suvlardan tashqarida xalqaro huquqni, suvga, dengiz tubiga, yer ostiga va tabiiy resurslarga huquqni amalga oshiradigan hududlarni anglatadi;

s) “bir Ahdlashuvchi Davlat” va “boshqa Ahdlashuvchi Davlat” atamalari matn mazmuniga qarab, Oʻzbekiston Respublikasini yoki Saudiya Arabistoni Podshohligini anglatadi;

d) “shaxs” atamasi jismoniy shaxsni, kompaniya yoki shaxslarning har qanday boshqa birlashuvini, shu jumladan (Davlat, siyosiy boʻlinma yoki mahalliy hokimiyat organlari), va tuzilmani ham anglatadi;

e) “kompaniya” atamasi, soliqqa tortish maqsadlarida, yuridik shaxs sifatida qaraladigan har qanday yuridik shaxsni yoki har qanday boshqa tashkilotni anglatadi;

f) “bir Ahdlashuvchi Davlatning korxonasi” va “boshqa Ahdlashuvchi Davlatning korxonasi” atamalari tegishincha bir Ahdlashuvchi Davlat rezidenti boshqaruvi ostida faoliyat yuritayotgan korxonani va boshqa Ahdlashuvchi Davlat rezidenti boshqaruvi ostida faoliyat yuritayotgan korxonani anglatadi;

g) “xalqaro tashish” atamasi Ahdlashuvchi Davlat korxonasi tomonidan foydalaniladigan dengiz yoki havo kemalarida har qanday tashishni anglatadi, dengiz yoki havo kemalaridan faqat boshqa Ahdlashuvchi Davlat hududida joylashgan punktlar oʻrtasida foydalanilishi bundan mustasno.

h) “milliy shaxs” atamasi:

(i) Ahdlashuvchi Davlat fuqaroligiga ega boʻlgan har qanday jismoniy shaxsni,

(ii) Ahdlashuvchi Davlatning amaldagi qonunchiligiga muvofiq oʻzining tegishli maqomini olgan har qanday yuridik shaxs, shirkat va uyushmani anglatadi.

i) “vakolatli organ” atamasi quyidagilarni anglatadi:

(I) Oʻzbekiston Respublikasiga tatbiqan—Davlat soliq qoʻmitasining raisini yoki uning vakolatli vakilini;

(II) Saudiya Arabistoni Podshohligiga tatbiqan - Moliya vazirini yoki uning vakolatli vakilini.

2. Konvensiya Ahdlashuvchi Davlat tomonidan istalgan vaqtda qoʻllanilganida unda belgilanmagan har qanday atama, agar matndan boshqa maʼno kelib chiqmasa, ushbu Konvensiya tatbiq etiladigan soliqlarga nisbatan ana shu Davlat qonunlariga koʻra ega boʻlgan maʼnoni anglatadi; atamaning har qanday maʼnosi ana shu Davlatning soliq qonunchiligiga muvofiq ana shu Davlatning boshqa huquq sohalarida shu atama uchun nazarda tutilgan maʼnodan ustunlik qiladi.

4-modda Rezident

1. Ushbu Konvensiya maqsadlari uchun “Ahdlashuvchi Davlatning rezidenti” atamasi quyidagilarni anglatadi:

a) ushbu Davlatning qonunchiligiga muvofiq, bu Davlatdagi manbadan daromadi yoki unda joylashtirilgan ushbu Konvensiya qamrab oladigan kapitali oʻzining yashash joyi, doimiy boʻlish joyi, boshqaruv organining joylashgan joyi yoki istalgan boshqa xuddi shunday mezon asosida soliqqa tortiladigan har qanday shaxsni;

b) bir Ahdlashuvchi Davlat qonunchiligiga muvofiq tuzilgan va bu Davlatda umuman soliqdan ozod qilinadigan, ushbu Davlatda taʼsis etilgan va unda ishlayotgan yuridik shaxs yoxud:

i) diniy, xayriya, taʼlim, ilmiy yoki shunga oʻxshash maqsadlardagi;

ii) rejaga muvofiq yollanma ishchilarga pensiya toʻlovlarini yoki boshqa shunga oʻxshash haqlarni toʻlashni taʼminlaydigan tashkilotlar.

Ammo bu atama boshqa Davlatdagi manbalardan daromadlari yoki unda joylashtirilgan kapitali oʻsha Davlatda soliqqa tortiladigan shaxsni oʻz ichiga olmaydi.

2. Agar mazkur moddaning 1-bandi qoidalariga muvofiq, jismoniy shaxs ikkala Ahdlashuvchi Davlatning rezidenti boʻlsa, uning maqomi quyidagi tarzda belgilanadi:

a) shaxs toʻsiqsiz yashashi mumkin boʻlgan doimiy yashash joyiga ega boʻlgan Davlatninggina rezidenti hisoblanadi; agar u ikkala Davlatda toʻsiqsiz yashashi mumkin boʻlgan doimiy yashash joyiga ega boʻlsa, shaxsiy va iqtisodiy aloqalari (hayotiy manfaatlari markazi) eng chambarchas boʻlgan Davlatning rezidenti hisoblanadi;

b) agar uning hayotiy manfaatlari markazi mavjud boʻlgan Ahdlashuvchi Davlatni aniqlab boʻlmasa yoki Davlatlarning hech birida toʻsiqsiz yashashi mumkin boʻlgan doimiy yashash joyi boʻlmasa, u odatda yashab turgan Davlatning rezidenti hisoblanadi;

s) agar shaxs odatda har ikki Davlatda yashasa yoki odatda ularning hech birida yashamasa, u qaysi Davlatning milliy shaxsi boʻlsa, shu Davlatning rezidenti hisoblanadi;

d) agar u har ikkala Davlatning milliy shaxsi boʻlsa yoki hech birining milliy shaxsi boʻlmasa, Ahdlashuvchi Davlatlarning vakolatli organlari bu masalani oʻzaro kelishuv orqali hal qilishlari kerak.

3. Agar mazkur moddaning 1-bandi qoidalariga muvofiq, jismoniy shaxs boʻlmagan shaxs Davlatlar ikkalasining rezidenti boʻlsa, u uning amaldagi boshqaruv organi joylashgan Davlatning rezidenti hisoblanadi.

5-modda Doimiy muassasa

1. Ushbu Konvensiya maqsadlari uchun “doimiy muassasa” atamasi korxona tadbirkorlik faoliyatini toʻliq yoki qisman amalga oshiradigan doimiy faoliyat joyini anglatadi.

2. “Doimiy muassasa” atamasi, xususan, quyidagilarni oʻz ichiga oladi:

a) boshqaruv joyi;

b) boʻlinma;

c) ofis;

d) fabrika;

e) ustaxona, va

f) shaxta, neft yoki gaz qudugʻi, karyer yoki tabiiy resurslar qazib olinadigan har qanday boshqa joyni.

3. “Doimiy muassasa” atamasi quyidagilarni ham oʻz ichiga oladi:

a) qurilish maydonchasi, qurilish, montaj yoki yigʻish obyekti yoki ular bilan bogʻliq boʻlgan nazorat faoliyatini, biroq shunday maydoncha, obyekt yoki faoliyatning muddati 6 oydan ortiq davom etsagina;

b) korxona tomonidan xizmatlar koʻrsatish, shu jumladan konsalting korxona shu maqsad uchun yollagan xizmatchilar yoki boshqa xodimlar orqali amalga oshirilsa, biroq shu tusdagi faoliyat yoki u bilan bogʻliq loyiha faoliyati hududda har qanday oʻn ikki oylik davr doirasida jami 6 oydan oshadigan davr yoki davrlar mobaynida davom etsa.

4. Ushbu moddaning avvalgi qoidalariga qaramay, “doimiy muassasa” atamasi quyidagilarni oʻz ichiga olmaydi:

a) inshootlardan faqat shu korxonaga tegishli boʻlgan tovarlar yoki buyumlarni saqlash, yetkazib berish yoki namoyish qilish maqsadida foydalanish;

b) shu korxonaga tegishli boʻlgan tovarlar yoki buyumlar zaxirasining saqlash, namoyish qilish maqsadidagina saqlab turilishi;

c) shu korxonaga tegishli tovarlar yoki buyumlar zaxirasining ularni faqat boshqa korxona tomonidan qayta ishlash maqsadida saqlab turilishi;

d) doimiy faoliyat joyining tovarlar yoki buyumlar sotib olish yoxud ushbu korxona uchun axborot yigʻish maqsadidagina saqlab turilishi;

e) doimiy faoliyat joyining faqat shu korxona manfaatlari uchungina boshqa har qanday tayyorgarlik yoki yordamchi tusdagi faoliyatni amalga oshirish maqsadida saqlab turilishi;

f) doimiy faoliyat joyining faqat a)-e) kichik bandlarida nazarda tutilgan faoliyat turlarining har qanday birikuvi uchungina, basharti bunday doimiy faoliyat joyining jami faoliyati ana shu faoliyat turlarini birlashtirish natijasida vujudga kelsa, tayyorgarlik yoki yordamchi tusda boʻlsa saqlab turilishi.

5. Mazkur moddaning 1 va 2-bandlari qoidalariga qaramasdan, agar shaxs Ahdlashuvchi Davlatda boshqa Ahdlashuvchi Davlat korxonasi nomidan mazkur moddaning 6-bandi tatbiq etiladigan agentdan farqli mustaqil maqomda faoliyat koʻrsatsa, bu shaxs korxona uchun istalgan faoliyatni amalga oshira bilsa, birinchi eslatilgan Davlatda doimiy muassasaga ega korxona sifatida koʻrib chiqiladi, agar:

a) u birinchi eslatilgan Davlatda bunday korxona uchun yoki uning nomidan shartnomalar tuzish vakolatiga ega boʻlsa va odatda undan foydalansa, uning faoliyati mazkur moddaning 4-bandida koʻrsatilganlar bilan chegaralansa, agar mazkur band qoidalariga muvofiq doimiy faoliyat joyi orqali amalga oshirilsa ham, bunday doimiy muassasani doimiy faoliyat joyiga aylantirmasa yoki

b) u birinchi eslatilgan Davlatda bunday korxonaga tegishli tovarlar va mahsulotlar zaxirasiga ega boʻladi, u bu erdan korxona uchun va korxona nomidan tovarlar va mahsulotlarni doimiy yetkazib beradi.

6. Korxona Ahdlashuvchi Davlatda faqat broker, komissioner yoki har qanday boshqa mustaqil maqomli agent orqali tadbirkorlik faoliyatini amalga oshirsa, basharti bunday shaxslar oʻzlarining odatdagi faoliyati doirasida ish yuritsalar, Ahdlashuvchi Davlatda doimiy muassasaga ega deb qaralmaydi.

7. Ushbu moddaning yuqoridagi qoidalariga qaramay, Ahdlashuvchi Davlatning sugʻurta kompaniyasi, agar u boshqa Davlat hududida sugʻurta mukofotlarini yigʻsa yoki u erdagi xatarlarni sugʻurta qilsa, boshqa Ahdlashuvchi Davlatda doimiy muassasaga ega boʻladi. Shunga qaramay, qayta sugʻurtalash hollarida Ahdlashuvchi Davlatlar masalani ichki qonunchilikka asosan tartibga soladilar.

8. Bir Ahdlashuvchi Davlat rezidenti boʻlgan kompaniya boshqa Ahdlashuvchi Davlatning rezidenti boʻlgan kompaniyani nazorat qilsa yoki uning tomonidan nazorat qilinsa yoxud ana shu boshqa Davlatda tijorat faoliyatini amalga oshirsa (doimiy muassasa orqali yoki boshqa tarzda) oʻz-oʻzidan bu kompaniyalardan birini boshqasi uchun doimiy muassasaga aylantirib qoʻymaydi.

6-modda Koʻchmas mulkdan olinadigan daromadlar

1. Bir Ahdlashuvchi Davlat rezidentining boshqa Ahdlashuvchi Davlatda joylashgan koʻchmas mulkdan oladigan daromadi (shu jumladan qishloq va oʻrmon xoʻjaligidan olinadigan daromadlar) ana shu boshqa Davlatda soliqqa tortilishi mumkin.

2. “Koʻchmas mulk” atamasi koʻrib chiqilayotgan mol-mulk joylashgan Ahdlashuvchi Davlat qonunchiligida ifodalangan maʼnoga ega boʻladi. Har qanday holda ham ushbu atama belgilagan koʻchmas mulkka tegishli boʻlgan mol-mulkni, qishloq va oʻrmon xoʻjaligida foydalanadigan chorva mollari va jihozlarni, ularga boʻlgan huquqlar yer ustidagi mulkka taalluqli umumiy qonunchilik qoidalari bilan belgilangan, koʻchmas mulkdan boshqa shaxsning foydalanish huquqlari va minerallar konlarini qazish uchun tovon sifatida toʻlanadigan oʻzgaruvchan yoki qayd etilgan toʻlovlar huquqini yoki minerallar konlari, manbalar va boshqa tabiiy resurslar qatlamlarini qazish huquqini oʻz ichiga oladi; dengiz va havo kemalari koʻchmas mulk sifatida qaralmaydi.

3. Mazkur moddaning 1-bandi qoidalari koʻchmas mulkdan toʻgʻridan toʻgʻri foydalanish, ijaraga berish yoki boshqa har qanday shaklda foydalanishdan olinadigan daromadga nisbatan qoʻllaniladi.

4. Mazkur moddaning 1 va 3-bandlari qoidalari korxonaning koʻchmas mulkdan olgan daromadlariga va mustaqil shaxsiy xizmatlarni amalga oshirish uchun foydalanadigan koʻchmas mulkdan olgan daromadlariga nisbatan ham tatbiq etiladi.

7-modda Tadbirkorlik faoliyatidan olinadigan foyda

1. Bir Ahdlashuvchi Davlat korxonasining foydasi, agar korxona oʻzining tadbirkorlik faoliyatini boshqa Ahdlashuvchi Davlatda unda joylashgan doimiy muassasa orqali amalga oshirmayotgan boʻlsa, faqat shu Davlatda soliqqa tortiladi. Agar korxona oʻz faoliyatini yuqorida aytilganidek amalga oshirayotgan boʻlsa, korxonaning foydasi boshqa Davlatda soliqqa tortilishi mumkin, ammo a) faqat ana shu doimiy muassasaga taalluqli boʻlgan, b) doimiy muassasa orqali sotiladigan aynan bir xil yoki oʻxshash tovarlar va mahsulotlarni boshqa Davlatda sotishga; s) boshqa Davlatda doimiy muassasa orqali bajariladigan aynan bir xil yoki oʻxshash boshqa faoliyatni amalga oshirishga tegishli boʻlgan qismigina soliqqa tortiladi.

2. Mazkur moddaning 3-bandi qoidalariga muvofiq, agar bir Ahdlashuvchi Davlatning korxonasi boshqa Ahdlashuvchi Davlatda joylashgan doimiy muassasa orqali tadbirkorlik faoliyatini amalga oshirayotgan boʻlsa, har bir Ahdlashuvchi Davlatda bunday doimiy muassasaga foyda u alohida va mustaqil korxona sifatida xuddi shunday yoki shunga oʻxshash faoliyatni xuddi shunday yoki shunga oʻxshash shartlar asosida amalga oshirib, doimiy muassasa hisoblangan korxonadan mutlaqo mustaqil ravishda ish koʻrib olishi mumkin boʻlgan foyda kabi hisoblab yoziladi.

3. Doimiy muassasa foydasini aniqlashda, ushbu doimiy muassasa faoliyati maqsadlari uchun sarflangan, shu jumladan doimiy muassasa joylashgan Davlatda va undan tashqaridagi faoliyat maqsadlari uchun sarflangan boshqaruv va umumiy maʼmuriy xarajatlarni chegirib tashlashga yoʻl qoʻyiladi.

Ammo doimiy muassasa tomonidan korxonaning bosh ofisiga yoki uning boshqa ofislaridan istalgan biriga patentlardan yoki boshqa huquqlardan foydalanganlik uchun gonorarlar, royalti toʻlovlari yoki boshqa shunga oʻxshash toʻlovlar orqali yoki aniq xizmatlar koʻrsatganlik uchun komission toʻlov yoʻli bilan yoki menejment uchun yoxud bank muassasasidan tashqari ana shu korxona uchun qarzga berilgan qarz foizlari toʻlovlari yoʻli bilan toʻlanadigan (haqiqiy xarajatlarni qoplashdan boshqa boʻlgan) summalarga nisbatan hech qanday chegirishlarga yoʻl qoʻyilmaydi. Shunday qilib, doimiy muassasa foydasini hisoblashda, doimiy muassasa korxonaning bosh ofisiga yoki uning har qanday boshqa ofislariga royalti, gonorar yoki patentlardan va boshqa huquqlardan foydalanish uchun ayirboshlaganlik kabi boshqa toʻlovlar yoki xizmatlar koʻrsatganlik yoxud menejment uchun komission toʻlovlar koʻrinishidagi toʻlovlar (haqiqiy xarajatlarni qoplashdan boshqa), bank korxonasidan tashqari foizlar koʻrinishidagi korxonaning bosh ofisiga va istalgan ofisiga oʻtkazilgan summalardan tashqari, eʼtiborga olinadi.

4. Boshqa qoidalarga qaramasdan, Ahdlashuvchi Davlat korxonasi tadbirkorlikning boshqa Ahdlashuvchi Davlatga tovarlarni eksport qilish faoliyatidan olgan foydasi oʻsha boshqa davlatda soliqqa tortilmaydi. Agar eksport kontraktlarida Davlatda amalga oshiriladigan boshqa faoliyatlar nazarda tutilgan boʻlsa, bunday faoliyatdan olingan foyda boshqa Davlatda soliqqa tortilishi mumkin.

5. “Tadbirkorlik faoliyatidan foyda” atamasi ishlab chiqarish faoliyatidan, savdo, bank, sugʻurta ishidan, ichki yuk tashishlar faoliyatidan, xizmatlar koʻrsatishdan va shaxsiy koʻchar mulkni ijaraga berishdan olinadigan daromadni oʻz ichiga oladi va ammo bular bilan cheklanmaydi. Bunday atama jismoniy shaxs tomonidan shaxsiy xizmatlar koʻrsatishni yoxud mustaqil xizmat koʻrsatishni oʻz ichiga olmaydi.

6. Agar foyda ushbu Konvensiyaning boshqa moddalarida alohida aytib oʻtilgan daromad turlarini qamrab oladigan boʻlsa, unda ana shu moddalarning qoidalariga ushbu modda qoidalari taʼsir etmaydi.

8-modda Dengiz va havo transporti

1. Xalqaro tashishlarda dengiz va havo kemalaridan foydalanishdan olinadigan foyda faqat korxonaning rahbar organi amalda joylashgan ana shu Ahdlashuvchi Davlatdagina soliqqa tortiladi.

2. “Dengiz va havo kemalarida xalqaro tashishlardan olinadigan foyda” atamasi quyidagilarni oʻz ichiga oladi:

(i) xalqaro tashishlarda foydalaniladigan dengiz va havo kemalarining toʻla asosdagi (vaqtga qarab yoki sayohatga) ijarasidan olinadigan foyda;

(ii) xalqaro tashishlarda foydalaniladigan dengiz va havo kemalarining fraxt asosidagi ijarasidan olinadigan foyda;

(iii) konteynerlar va xalqaro tashishlarda ishlatiladigan bogʻlovchi uskunalardan foydalanishdan yoki ularning ijarasidan olinadigan foydalar, agar bu foydalar dengiz va havo kemalaridan xalqaro tashishlardan olinadigan foydaga nisbatan tasodifiy boʻlsa.

3. Agar dengiz korxonasining haqiqiy boshqaruv joyi kema bortida boʻlsa, u kema roʻyxatga olingan port joylashgan Ahdlashuvchi Davlatda joylashgan deb hisoblanadi, bunday roʻyxatga olish porti mavjud boʻlmasa, kema operatori uning rezidenti hisoblangan Davlatda joylashgan deb hisoblanadi.

4. Mazkur moddaning 1-bandi qoidalari transport vositalaridan foydalanish boʻyicha pula, qoʻshma faoliyat yoki xalqaro tashkilotda ishtirok etishdan olingan foydalarga nisbatan ham qoʻllaniladi.

9-modda Birlashgan korxonalar

1. Agar:

a) Ahdlashuvchi Davlatning korxonasi boshqa Ahdlashuvchi Davlat korxonasini boshqarishda, nazorat qilishda yoki uning kapitalida bevosita yoki bilvosita ishtirok etsa yoki

b) oʻsha shaxslar bir Davlat korxonasini va boshqa Davlat korxonasini boshqarishda, nazorat qilishda yoki uning kapitalida bevosita yoki bilvosita ishtirok etishsa, va har qanday holatda korxonalar oʻrtasida ularning tijorat va moliyaviy munosabatlarida mustaqil korxonalar oʻrtasida yaratiladiganidan farqli sharoitlar vujudga keltirilsa yoki oʻrnatilsa, bunda ulardan biriga hisoblanishi mumkin boʻlgan, ammo bunday sharoitlar natijasida unga hisoblanmagan har qanday foyda ana shu korxonaning foydasiga hisoblanishi va tegishli ravishda soliqqa tortilishi mumkin.

2. Ahdlashuvchi Davlat ana shu Davlat korxonasi foydasiga boshqa Ahdlashuvchi Davlat korxonasi boʻyicha ana shu boshqa Davlatda soliqqa tortilgan foydani kiritsa va tegishli ravishda soliqqa tortsa va shu tariqa kiritilgan foyda birinchi eslatilgan Davlat korxonasiga, agar ikkala korxona oʻrtasida vujudga keltirilgan munosabatlar ikki mustaqil korxona oʻrtasidagi munosabatlar kabi boʻlganda hisoblanadigan foyda boʻlsa, u holda ana shu boshqa Davlat foydadan oʻzida olingan soliq miqdoriga tegishli zarur tuzatishlarni kiritadi. Bunday tuzatishlarni belgilashda ushbu Konvensiyaning boshqa qoidalariga tegishlicha eʼtiborni qaratish kerak va Ahdlashuvchi Davlatlarning vakolatli organlari, zarur boʻlsa, oʻzaro maslahatlashuvlarni boshlashlari lozim.

10-modda Dividendlar

1. Davlat rezidenti boʻlgan kompaniya tomonidan Ahdlashuvchi Davlat rezidentiga toʻlanadigan dividendlar ana shu Davlatda soliqqa tortilishi mumkin.

2. Ammo bunday dividendlar, shuningdek dividendlarni toʻlayotgan kompaniya rezidenti boʻlgan Davlatda shu Davlatning qonunlariga binoan ham soliqqa tortilishi mumkin, biroq agar dividendlarning amaldagi egasi boshqa Davlatning rezidenti boʻlsa, unda shu tarzda olingan soliqning miqdori dividendlar umumiy miqdorining 7 foizidan oshmasligi kerak. Bu band kompaniyaning dividendlar toʻlanadigan foydasini soliqqa tortishga taalluqli emas.

3. “Dividendlar” atamasi ushbu moddada qoʻllanganida, aksiyalardan yoki aksiyalardan foydalanishdan yoki huquqlardan foydalanishdan, konchilik sanoati aksiyalaridan, muassislar aksiyalari yoki qarz talablari hisoblanmagan, foydada ishtirok etish huquqini beruvchi aksiyalardan foydalanish yoxud huquqlardan foydalanishdan olinadigan daromadni, shuningdek foydani taqsimlovchi kompaniya rezidenti boʻlgan Davlatning qonunlariga muvofiq, aksiyalardan olinadigan daromad kabi xuddi shunday soliqlar orqali tartibga solinadigan boshqa daromadlarni anglatadi.

4. Agar dividendlarning haqiqiy egasi bir Davlat rezidenti boʻlgani holda, dividendlarni toʻlayotgan kompaniya rezidenti boʻlgan boshqa Davlatda oʻz faoliyatini u erda joylashgan doimiy muassasa orqali amalga oshirsa yoki ushbu boshqa Davlatda mustaqil shaxsiy xizmatlarni u erda joylashgan doimiy bazadan koʻrsatsa va dividendlar toʻlanadigan xolding aslida shu doimiy muassasa yoki doimiy baza bilan bogʻliq boʻlsa, mazkur moddaning 1 va 2-bandlari qoidalari qoʻllanilmaydi. Bunday holda, sharoitga qarab, 7-modda yoki 14-moddaning qoidalari qoʻllaniladi.

5. Agar bir Davlat rezidenti boʻlgan kompaniya boshqa Ahdlashuvchi Davlatdan foyda yoki daromad olayotgan boʻlsa, ana shu boshqa Ahdlashuvchi Davlat kompaniya toʻlayotgan dividendlarni soliqqa tortmasligi mumkin, bunday dividendlar ana shu boshqa Davlat rezidentiga toʻlanadigan yoki dividendlar toʻlanadigan xolding shu boshqa Davlatda joylashgan doimiy muassasa yoki doimiy baza bilan haqiqatda bogʻliq boʻlgan hollar bundan mustasno, shuningdek kompaniyaning taqsimlanmagan foydasi hatto toʻlanayotgan dividendlar yoki taqsimlanmagan foyda ana shu boshqa Ahdlashuvchi Davlatda toʻla yoki qisman hosil boʻlgan foyda yoki daromaddan tashkil topgan boʻlsa ham, kompaniyaning taqsimlanmagan foydasidan soliqlar olinmaydi.

11-modda Qarz talablaridan daromad

1. Ahdlashuvchi Davlatlarda hosil boʻlgan va boshqa Davlat rezidentiga toʻlanadigan qarz talablaridan daromad ana shu boshqa Davlatda soliqqa tortilishi mumkin.

2. Biroq, bunday daromad u hosil boʻlgan ana shu Ahdlashuvchi Davlatda shu Davlatning qonunlariga asosan ham soliqqa tortilishi mumkin, biroq agar daromadning haqiqiy egasi boshqa Ahdlashuvchi Davlat rezidenti boʻlsa, unda soliq qarz talablaridan daromad yalpi miqdorining 7 foizidan oshmasligi kerak.

3. “qarz talablaridan daromad” atamasi ushbu moddada qoʻllanilganda qarzdorning foydada ishtirok etish huquqlari mavjudligi va ipoteka taʼminotidan qatʼi nazar, har qanday turdagi qarz talablaridan olinadigan daromadlarni, xususan hukumat qimmatli qogʻozlaridan olinadigan daromadlar, obligatsiyalar va qarz majburiyatlaridan daromadlar, shu jumladan, mukofotlar va ushbu qimmatli qogʻozlar, obligatsiyalar yoki qarz majburiyatlari boʻyicha olinadigan yutuqlar tushuniladi. Oʻz vaqtida toʻlanmagan toʻlovlar uchun jarimalar (neustoykalar) ushbu modda maqsadlarida foizlar sifatida qaralmaydi.

4. Agar qarz talablaridan daromadning haqiqiy egasi Ahdlashuvchi Davlatlardan birining rezidenti boʻla turib, foizlar hosil boʻlayotgan boshqa Davlatda tijorat faoliyatini u erda joylashgan doimiy muassasa orqali olib borayotgan boʻlsa yoki ushbu boshqa Davlatda joylashgan doimiy baza orqali mustaqil shaxsiy xizmatlar koʻrsatayotgan boʻlsa va daromad toʻlanayotgan qarz talabnomalari shunday doimiy muassasa yoki doimiy baza bilan ham haqiqatdan bogʻliq boʻlsa, mazkur moddaning 1- va 2-bandlari qoidalari qoʻllanilmaydi. Bunday holda, vaziyatga qarab, 7-modda yoki 14-modda qoidalari qoʻllaniladi.

5. Mazkur Davlatning rezidenti toʻlovchi hisoblansa, qarz talablaridan daromad oʻsha Ahdlashuvchi Davlatda hosil boʻlgan deb hisoblanadi. Biroq daromad toʻlovchi shaxs Ahdlashuvchi Davlatning rezidenti boʻlishi yoki boʻlmasligidan qatʼi nazar, Ahdlashuvchi Davlatda doimiy muassasaga yoki doimiy bazaga ega boʻlsa, shu tufayli qarz talablari boʻyicha daromaddan qarzni toʻlash holati vujudga kelgan boʻlsa va bu daromadni toʻlash boʻyicha xarajatlarni doimiy muassasa yoki baza amalga oshirsa, bunda daromad doimiy muassasa yoki doimiy baza joylashgan Ahdlashuvchi Davlatda vujudga kelgan deb hisoblanadi.

6. Agar toʻlovchi bilan qarz talablari boʻyicha amalda daromad olish huquqiga ega boʻlgan shaxs oʻrtasidagi yoki ular ikkalasi va har qanday boshqa shaxs oʻrtasidagi alohida munosabatlar oqibatida qarz talabiga taalluqli qarz talablaridan daromadlar miqdori toʻlovchi bilan amalda daromadlar olish huquqiga ega boʻlgan shaxs oʻrtasida kelishilishi mumkin boʻlgan miqdordan ortiq boʻlsa, bunday munosabatlar yoʻq boʻlgan taqdirda, ushbu modda qoidalari faqat oxirgi eslatilgan miqdorga nisbatan qoʻllaniladi. Bu holda, toʻlovning ortiqcha qismi avvalgidek ushbu Konvensiya boshqa qoidalarini inobatga olgan holda, har bir Ahdlashuvchi Davlat qonunlariga muvofiq soliqqa tortiladi.

12-modda Royalti

1. Bir Davlatda hosil boʻladigan va Ahdlashuvchi Davlatning rezidentiga toʻlanadigan royaltilar ana shu boshqa Davlatda soliqqa tortilishi mumkin.

2. Biroq, royaltilar oʻzlari yuzaga kelgan oʻsha Ahdlashuvchi Davlatda ham uning qonunlariga muvofiq soliqqa tortilishi mumkin, biroq agarda royaltining haqiqiy egasi boshqa Davlat rezidenti boʻlsa, ushbu holatda undiriladigan soliq royalti yalpi miqdorining 10 foizidan oshmasligi lozim.

3. “Royalti” atamasi u ushbu moddada qoʻllanilganida har qanday adabiy, sanʼat va ilmiy asarlardan, shu jumladan, kinofilmlar, radio va televideniye uchun yozuvlar, har qanday patent, tovar belgisi, chizma yoki modellar, sxema, maxfiy formula yoxud jarayonlar yoki har qanday sanoat, tijorat yoinki ilmiy uskunaga boʻlgan tajribaga taalluqli boʻlgan har qanday mualliflik huquqidan foydalanganlik yoxud sanoat, tijorat yoki ilmiy tajribaga oid axborot uchun haq tarzida olinadigan har qanday koʻrinishdagi toʻlovlarni bildiradi.

4. Agar royaltilarning haqiqiy egasi bir Ahdlashuvchi Davlatning rezidenti boʻla turib, royalti hosil boʻlayotgan Ahdlashuvchi Davlatda u erda joylashgan doimiy muassasa orqali tijorat faoliyatini amalga oshirayotgan boʻlsa yoki ushbu boshqa Davlatda u erda joylashgan doimiy baza orqali mustaqil shaxsiy xizmatlarni amalga oshirayotgan boʻlsa va royalti toʻlanayotgan huquq yoki mol-mulk shunday doimiy muassasa yoki doimiy baza bilan haqiqatda bogʻliq boʻlsa, mazkur moddaning 1 va 2-bandlari qoidalari qoʻllanilmaydi. Bu holda 7-modda yoki 14-moddaning qoidalari vaziyatga qarab qoʻllaniladi.

5. Agar toʻlovchi Ahdlashuvchi Davlatning rezidenti boʻlsa, royalti shu Davlatda hosil boʻlgan deb hisoblanadi. Biroq royaltini toʻlovchi shaxs, Davlatning rezidenti boʻlishi yoki boʻlmasligidan qatʼi nazar, Davlatda royaltini toʻlash majburiyati hosil boʻlishi bilan bogʻliq doimiy muassasaga yoki doimiy bazaga ega boʻlsa va bu doimiy muassasa yoki baza toʻlash boʻyicha xarajatlarni amalga oshirsa, unda bunday royaltilar doimiy muassasa yoki doimiy baza joylashgan Davlatda hosil boʻlgan, deb hisoblanadi.

6. Agar toʻlovchi bilan amalda royalti huquqiga ega shaxs oʻrtasidagi yoki ularning ikkalasi va boshqa biron-bir shaxs oʻrtasidagi alohida munosabatlar oqibatida royaltidan foydalanishga, ular toʻlanadigan foydalanish huquqiga yoki axborotga taalluqli royaltining miqdori toʻlovchi va amalda shu daromadlarni olish huquqiga ega shaxs oʻrtasida kelishilishi mumkin boʻlgan miqdordan ortiq boʻlsa, bunday munosabatlar yoʻq boʻlgan taqdirda, ushbu modda faqat oxirgi eslatilgan miqdorga nisbatan qoʻllaniladi. Bu holda, toʻlovning ortiqcha qismi ushbu Konvensiyaning boshqa qoidalarini inobatga olgan holda, har bir Davlat qonunlariga muvofiq soliqqa tortiladi.

13-modda Kapital qiymatining oʻsishi

1. Davlat rezidentining 6-moddada koʻrsatilgan va boshqa Davlatda joylashgan koʻchmas mulkni shaxsga berishdan oladigan daromadlar oʻsha boshqa Davlatda tortilishi mumkin.

2. Bir Ahdlashuvchi Davlat korxonasining Ahdlashuvchi Davlatdagi doimiy muassasasi tijorat mulkining bir qismini tashkil etuvchi koʻchar mulkni boshqa shaxsga berishdan olgan yoki bir Ahdlashuvchi Davlat rezidentining boshqa Ahdlashuvchi Davlatda mustaqil shaxsiy xizmatlarni amalga oshirishida foydalanishi mumkin boʻlgan doimiy bazasiga taalluqli koʻchar mulkni boshqa shaxsga berishdan olgan daromadlariga, jumladan ana shunday doimiy muassasani (alohida yoki korxona bilan birgalikda) yoki shunday doimiy bazani boshqa shaxsga berishdan olgan daromadlari ana shu boshqa Davlatda soliqqa tortilishi mumkin.

3. Ahdlashuvchi Davlat korxonasining xalqaro tashishlarda foydalaniladigan dengiz yoki havo kemalarini yoki shunday dengiz yoki havo kemalaridan foydalanishga taalluqli boʻlgan koʻchar mulkni boshqa shaxsga berishdan oladigan daromadlari faqat korxonaning haqiqiy boshqaruv organi joylashgan Ahdlashuvchi Davlatda soliqqa tortiladi.

4. Mazkur moddaning 2-bandi qoidalariga qaramasdan Davlat rezidenti kompaniyaning ulushi boʻlgan aksiyalarni oʻzgalarga berishdan oladigan daromadlar ushbu Davlatda soliqqa tortilishi mumkin.

5. Mazkur moddaning avvalgi bandlarida sanab oʻtilmagan istalgan boshqa mol-mulkni oʻzga shaxsga berishdan olinadigan daromadlar mol-mulkni boshqa shaxsga berayotgan shaxs rezident boʻlgan oʻsha Davlatdagina soliqqa tortilishi mumkin.

14-modda Mustaqil shaxsiy xizmatlar

1. Bir Davlat rezidentining kasbiy xizmatlarni koʻrsatish yoki mustaqil tusdagi boshqa faoliyatdan oladigan daromadlari faqat ana shu Davlatda soliqqa tortiladi. Istisno tariqasida, quyidagi hollarda bunday daromadlar boshqa Ahdlashuvchi Davlatda ham soliqqa tortilishi mumkin:

a) agar u oʻz faoliyatini amalga oshirish uchun boshqa Ahdlashuvchi Davlatda oʻzi uchun muntazam qulay boʻlgan doimiy bazaga ega boʻlsa; bunday holda daromadning faqat shunday doimiy bazaga taalluqli boʻlgan qismigina ushbu boshqa Davlatda soliqqa tortilishi mumkin; yoki

b) agar uning boshqa Ahdlashuvchi Davlatda boʻlishi boshlanishi yoki tugashi tegishli moliya yilida har qanday oʻn ikki oylik davr doirasida jami 183 kunni tashkil etuvchi yoki undan oshuvchi davr yoki davrlar mobaynida davom etsa, bu holda Davlatda amalga oshirilgan faoliyatdan olingan daromad qismigina ana shu boshqa Davlatda soliqqa tortiladi.

2. “Kasbiy xizmatlar” atamasi, xususan mustaqil ilmiy, adabiy, badiiy, sanʼat, taʼlimiy va oʻqituvchilik faoliyatlarini, shuningdek shifokorlar, yuristlar, muhandislar, meʼmorlar, stomatologlar va buxgalterlarning mustaqil faoliyatini qamrab oladi.

15-modda Yollash bilan bogʻliq shaxsiy xizmatlar

1. 16, 18, 19, 20 va 21-moddalar qoidalarini hisobga olib, bir Ahdlashuvchi Davlat rezidentining yollanish boʻyicha oladigan maoshi, ish haqi va boshqa shu kabi haqlar faqat ana shu Davlatda soliqqa tortilishi mumkin, agar yollanma ish boshqa Ahdlashuvchi Davlatda amalga oshirilmagan boʻlsa. Agar yollanma ish shu tariqa bajariladigan boʻlsa, unda shu munosabat bilan olingan haq ana shu boshqa Davlatda soliqqa tortilishi mumkin.

2. Mazkur moddaning 1-bandi qoidalariga qaramay, bir Ahdlashuvchi Davlat rezidenti boshqa Ahdlashuvchi Davlatda amalga oshiradigan yollanma xizmat uchun oladigan haq, agar kuyidagi shartlar bajarilsa, faqat birinchi eslatilgan Davlatda tortiladi, agar:

a) haq oluvchi boshqa Davlatda qarab chiqiluvchi boshlanadigan va tugaydigan moliya yilida istalgan oʻn ikki oylik davr doirasida jami 183 kundan oshmaydigan davr yoki davrlar mobaynida boʻlsa, va

b) haq yollovchi tomonidan yoki boshqa Ahdlashuvchi Davlat rezidenti boʻlmagan yollovchi nomidan toʻlansa, va

s) yollovchi boshqa Davlatda ega boʻlgan doimiy muassasa yoki doimiy baza haq toʻlash xarajatlarini qoplamasa.

3. Ushbu moddaning avvalgi qoidalariga qaramay, Ahdlashuvchi Davlat korxonasi tomonidan foydalaniladigan kema yoki samolyotda amalga oshiriladigan yollanma ish uchun oladigan haqlar korxonaning haqiqiy boshqarish organi joylashgan ana shu Davlatdagina soliqqa tortilishi mumkin.

16-modda Direktorlarning gonorarlari

Bir Ahdlashuvchi Davlatning rezidenti boshqa Ahdlashuvchi Davlatning rezidenti boʻlgan kompaniyaning Direktorlar kengashi yoki boshqa shunga oʻxshagan organining aʼzosi sifatida oladigan direktorlar gonorarlari va boshqa shunga oʻxshagan toʻlovlari ushbu boshqa Davlatda soliqqa tortilishi mumkin.

17-modda Sanʼat xodimlari va sportchilar

1. 14 va 15-moddalarning qoidalariga qaramay, bir Davlat rezidentining teatr, kino, radio yoki televideniye artisti yoki musiqachi kabi sanʼat xodimi yoki sportchi sifatida boshqa Davlatdagi shaxsiy faoliyati tufayli oladigan daromadi shu Davlatda tortilishi mumkin.

2. Sanʼat xodimi yoki sportchi amalga oshirgan shaxsiy faoliyatga doir daromad sanʼat xodimi yoki sportchining oʻziga emas, boshqa shaxsga hisoblab yozilsa, 7, 14 va 15-moddalarning qoidalariga qaramay, ushbu daromad sanʼat xodimi yoki sportchi faoliyat koʻrsatgan oʻsha Davlatda soliqqa tortilishi mumkin.

3. Mazkur moddaning 1 va 2-bandlarida koʻrib chiqilayotgan, bir Ahdlashuvchi Davlatning rezidenti boshqa Davlatda amalga oshirgan faoliyatidan oladigan daromad bu boshqa Ahdlashuvchi Davlatda, agar uning ushbu boshqa Ahdlashuvchi Davlatda boʻlishi toʻla yoki qisman birinchi eslatilgan Ahdlashuvchi Davlatning jamoat jamgʻarmalari yoki siyosiy boʻlinmasi yoxud mahalliy hokimiyat organlari tomonidan mablagʻ bilan taʼminlansa, yoki Ahdlashuvchi Davlatlar hukumatlari oʻrtasida madaniy ayirboshlash toʻgʻrisida bitim mavjud boʻlsa, soliq toʻlashdan ozod qilinadi.

18-modda Pensiyalar

1. 19-moddaning 2-bandi qoidalariga muvofiq, Ahdlashuvchi Davlat rezidentiga ilgari yollanish boʻyicha ishlaganlik munosabati bilan kompensatsiya sifatida toʻlanadigan pensiyalar va boshqa oʻxshash toʻlovlar faqat ushbu Davlatda tortiladi.

2. Mazkur moddaning 1-bandi qoidalariga qaramasdan Ahdlashuvchi Davlat yoki uning siyosiy boʻlinmasi yoki mahalliy hokimiyat organi ijtimoiy himoya tizimining bir qismi boʻlgan ijtimoiy sxema boʻyicha amalga oshirilib, toʻlanadigan pensiyalar va boshqa toʻlovlar faqat ushbu Davlatda soliqqa tortiladi.

19-modda Hukumat xizmati

1. a) Davlat yoki siyosiy boʻlinma yoxud mahalliy hokimiyat organi tomonidan ana shu Davlatga yoki siyosiy boʻlinma yoxud mahalliy hokimiyat organiga koʻrsatgan xizmatlari uchun jismoniy shaxsga toʻlanadigan pensiyadan tashqari ish haqi, maosh va shunga oʻxshash boshqa haqlar, faqat ana shu Davlatda soliqqa tortilishi mumkin.

b) Biroq bunday ish haqi, maosh va shunga oʻxshash haqlar, agar xizmat ana shu Ahdlashuvchi Davlatda amalga oshirilsa va jismoniy shaxs ana shu Davlatning rezidenti boʻlsa, faqat boshqa Davlatda soliqqa tortiladi, agar shaxs:

(i) ana shu Davlatning milliy shaxsi boʻlsa, yoki

(ii) shu xizmatni amalga oshirish maqsadidagina ana shu Davlatning rezidenti boʻlmagan boʻlsa.

2. a) Davlat yoki siyosiy boʻlinma yoki mahalliy hokimiyat organlari tomonidan yoki ular shakllantirgan jamgʻarmalar tomonidan ushbu Davlat, siyosiy boʻlinma yoki mahalliy hokimiyat organiga koʻrsatilgan xizmatlar uchun toʻlanadigan har qanday pensiya faqat ushbu Davlatda soliqqa tortiladi.

b) Biroq bunday pensiya, agar jismoniy shaxs boshqa Davlatning rezidenti yoki milliy shaxsi boʻlsa, boshqa Ahdlashuvchi Davlatdagina soliqqa tortilishi mumkin.

3. 15, 16, 17 va 18-moddalarning qoidalari Ahdlashuvchi Davlat yoki siyosiy yoxud maʼmuriy boʻlinma yoki mahalliy hokimiyat organi tomonidan amalga oshiriladigan tijorat faoliyati munosabati bilan koʻrsatilgan xizmatlarga toʻlanadigan ish haqi, maosh va shunga oʻxshash haqlar va pensiyalarga nisbatan qoʻllaniladi.

20-modda Talabalar

1. Bir Davlatga kelgunga qadar bevosita boshqa Ahdlashuvchi Davlatning rezidenti hisoblanib turgan yoki boʻlgan va birinchi eslatilgan Davlatda faqat oʻqish yoki maʼlumot olish maqsadidagina yashab turgan talaba yoki stajorning yashashi, oʻqishi yoki maʼlumot olishi uchun moʻljallangan toʻlovlar, agarda bunday toʻlovlar shu Davlat hududidan tashqaridagi manbalardan paydo boʻlgan boʻlsa, ushbu Davlatda soliqqa tortilmaydi.

2. Ahdlashuvchi Davlatga kelgunga qadar bevosita boshqa Ahdlashuvchi Davlatning rezidenti boʻlgan va boʻlib turgan hamda birinchi eslatilgan Davlatda oʻqish va taʼlim olish maqsadida boʻlib turgan talabalar, stajor va amaliyotchilar oladigan va boshqa Ahdlashuvchi Davlatda koʻrsatilgan xizmatlarga nisbatan haqni tashkil qiladigan toʻlovlar, taʼlim olish va oʻqish bilan bogʻliq xizmatlar faqat oʻzini taʼminlash uchun amalga oshirilgan holda, soliqqa tortilmaydi.

21-modda Oʻqituvchilar va ilmiy xodimlar

Boshqa Davlatga oʻqitish yoki ilmiy ishni amalga oshirish maqsadlari uchun taklif qilingunga yoki kelgunga qadar bevosita Ahdlashuvchi Davlatning rezidenti hisoblanib turgan yoki boʻlgan oʻqituvchi yoki ilmiy xodim bunday faoliyatdan oladigan haqlar ushbu boshqa Davlatda ikki yildan oshiq boʻlmagan muddatda soliqqa tortilmaydi.

22-modda Boshqa daromadlar

1. Ahdlashuvchi Davlat rezidentining ushbu Konvensiyaning oldingi moddalarida aytib oʻtilmagan daromad turlari, ular qayerda paydo boʻlishidan qatʼi nazar, faqat ana shu Davlatda soliqqa tortiladi.

2. 6-moddaning 2-bandida belgilangan koʻchmas mulkdan olingan daromadni istisno etgan holda, agarda bunday daromadni oluvchi bir Ahdlashuvchi Davlat rezidenti boʻla turib, boshqa Ahdlashuvchi Davlatda joylashgan doimiy muassasa orqali faoliyatini amalga oshirayotgan boʻlsa yoki u erda joylashgan doimiy bazadan mustaqil shaxsiy xizmatlarni amalga oshirayotgan boʻlsa va daromad toʻlanadigan huquq yoki mol-mulk haqiqatan ham bunday doimiy muassasa yoki baza bilan bogʻlangan boʻlsa, mazkur moddaning 1-bandi qoidalari qoʻllanilmaydi. Bu holatda, vaziyatga qarab, 7 va 14-moddalarning qoidalari qoʻllaniladi.

23-modda Kapital

1. Bir Ahdlashuvchi Davlatda mavjud boʻlgan koʻchmas mulk shaklida taqdim qilingan va Davlatda joylashgan kapital faqat ushbu boshqa Davlatda soliqqa tortilishi mumkin.

2. Bir Davlat korxonasining Davlatda ega boʻlgan doimiy muassasaning amaliy mulkini tashkil qiluvchi koʻchar mulki yoxud mustaqil shaxsiy xizmatlarni koʻrsatish uchun ega boʻlgan doimiy bazaga tegishli bir Davlat rezidentiga boshqa Davlatda mansub koʻchar mulk tarzidagi kapital ushbu boshqa Davlatda tortilishi mumkin.

3. Xalqaro tashuvlarda foydalaniladigan kemalar va samolyotlar hamda bunday kemalar va samolyotlarni ishlatishga tegishli koʻchar mulk tarzidagi kapital korxonaning haqiqiy idorasi joylashgan Davlatdagina soliqqa tortiladi.

4. Ahdlashuvchi Davlat rezidenti kapitalining boshqa barcha koʻrinishlari faqat shu Davlatda soliqqa tortiladi.

24-modda Ikkiyoqlama tortishni bartaraf etish

1. Bir Ahdlashuvchi Davlatning rezidenti ushbu Konvensiya qoidalariga muvofiq boshqa Ahdlashuvchi Davlatda soliqqa tortilishi mumkin boʻlgan daromad olsa yoki mol-mulkka ega boʻlsa, unda birinchi eslatib oʻtilgan Davlat:

a) ushbu rezidentning daromadidan olinadigan soliqdan boshqa Davlatda toʻlangan daromad soligʻiga teng qiymatni chegirib tashlashi;

b) shu boshqa Davlatda toʻlangan, ushbu rezidentning mol-mulk soligʻiga teng qiymatni mol-mulk soligʻidan chegirib tashlashi lozim.

Bunday chegirmalar har qanday holda ham vaziyatga bogʻliq holda ana shu boshqa Davlatda tortilishi mumkin boʻlgan daromad yoki mol-mulkka taalluqli chegirma taqdim qilingunga qadar hisoblab chiqilgan daromad yoki mol-mulkdan olinadigan soliq qismidan ortiq boʻlmasligi lozim.

2. Soliq miqdori Ahdlashuvchi Davlatning ichki qonunlariga muvofiq beriladigan muayyan maxsus imtiyozli choralarga koʻra soliqqa tortishdan ozod qilingan yoki kamaytirilgan boʻlsa, unda u Ahdlashuvchi Davlatda toʻlangan, deb hisoblanadi va shunga binoan u boshqa Ahdlashuvchi Davlatning soligʻidan chegirib tashlanishi lozim boʻladi.

3. Saudiya Arabistoni Podshohligi ikkiyoqlama soliqqa tortishni bartaraf etish usullari Saudiya Arabistoni fuqarolariga nisbatan zakot yigʻish tartibi qoidalariga zarar yetkazmasligini taʼminlaydi.

25-modda Oʻzaro kelishuv taomili

1. Agar shaxs Davlatlardan biri yoki har ikkalasining harakati unga ushbu Konvensiyada nazarda tutilganga muvofiq kelmaydigan soliqqa tortishga olib keladi yoki olib kelishi mumkin, deb hisoblasa, u ushbu Davlatlarning ichki qonunchiligida nazarda tutilgan himoya vositalaridan qatʼi nazar, oʻz arizasini oʻzi rezidenti boʻlgan Ahdlashuvchi Davlatning vakolatli organiga taqdim etishi mumkin. Ariza ushbu Konvensiya qoidalariga nomuvofiq soliqqa tortishga olib keluvchi harakatlar toʻgʻrisida birinchi bor bildirilgan vaqtdan boshlab uch yil mobaynida berilishi lozim.

2. Agar vakolatli organ uning eʼtirozini asosli deb topsa va uning oʻzi qoniqtiradigan qarorga kela olmasa, masalani mazkur Konvensiyaga muvofiq kelmaydigan soliqqa tortishni oldini olish maqsadida boshqa Ahdlashuvchi Davlatning vakolatli organi bilan oʻzaro kelishib hal qilishga harakat qiladi. Erishilgan har qanday kelishuv Ahdlashuvchi Davlat qonunchiligida nazarda tutilgan qandaydir vaqt cheklashlariga qaramasdan bajarilishi lozim.

3. Ahdlashuvchi Davlatlarning vakolatli organlari mazkur Konvensiyani talqin qilish yoki qoʻllashda yuzaga keladigan har qanday qiyinchilik yoki shubhali holatlarni oʻzaro kelishuv asosida hal qilishga harakat qiladilar. Ular, shuningdek mazkur Konvensiyada nazarda tutilmagan hollarda ham ikkiyoqlama tortilishiga yoʻl qoʻymaslik maqsadida maslahatlashishlari mumkin.

4. Ahdlashuvchi Davlatlarning vakolatli organlari oldingi bandlar maʼnolarini tushunishda hamfikrlikka erishish maqsadida bir-birlari bilan bevosita aloqada boʻlib turishlari mumkin.

5. Davlatlarning vakolatli organlari mazkur Konvensiyani qoʻllash usulini va ayniqsa Davlatlarning rezidentlari boshqa Davlatda ushbu Konvensiyada nazarda tutilgan soliq chegirmalari olishiga yoki soliqdan ozod qilinishiga qoʻyiladigan talablarni oʻzaro kelishuv boʻyicha aniqlashlari mumkin.

26-modda Axborot almashish

1. Davlatlarning vakolatli organlari ushbu Konvensiya qoidalari yoki ushbu Konvensiya tatbiq etiladigan Ahdlashuvchi Davlatlarning soliqlarga tegishli ichki qonunchiligidan ushbu Konvensiyaga zid boʻlmaydigan darajada foydalanish uchun zarur axborotni almashib turadilar. Axborot almashish 1-modda bilan cheklanib qolmaydi. Ahdlashuvchi Davlat olgan har qanday axborot, ushbu Davlatning ichki qonunlariga muvofiq olingan axborot kabi maxfiy hisoblanadi hamda faqat baholash yoki yigʻish, majburiy undirish yoki sud orqali taʼqib etish bilan yoxud ushbu Konvensiya tatbiq etiladigan soliqlarga nisbatan apellatsiyalarni koʻrib chiquvchi shaxslar va organlargagina, shu jumladan sudlar va maʼmuriy organlarga oshkor etiladi. Bu shaxslar yoki organlar axborotdan faqat shunday maqsadlarda foydalanadilar. Ular ushbu axborotni ochiq sud majlisida yoki yuridik qarorlar qabul qilish chogʻida oshkor etishlari mumkin.

2. Har qanday holatda ham ushbu moddaning 1-bandi qoidalari Ahdlashuvchi Davlatlar zimmasiga quyidagi majburiyatlarni yuklovchi qoidalar sifatida talqin qilinmaydi:

a) u yoki bu Davlat qonunchiligi yoki odatdagi maʼmuriy amaliyotiga zid maʼmuriy choralar oʻtkazish;

b) u yoki bu Ahdlashuvchi Davlat qonunchiligiga koʻra yoki odatdagi maʼmuriy amaliyoti chogʻida olinishi mumkin boʻlmagan axborotni taqdim etish;

s) savdo, sanoat, tadbirkorlik, tijorat yoki kasb siri yoki savdo jarayonini oshkor etuvchi axborotni yoki oshkor etilishi davlat siyosatiga (jamoat tartibiga) zid keluvchi axborotni taqdim etish.

27-modda Maxsus qoidalar

Mazkur Konvensiyaning 10, 11 va 12-moddalarida nazarda tutilgan, Ahdlashuvchi Davlatning hukumati (Oʻzbekiston Respublikasiga tatbiqan Markaziy bank va Davlatga toʻliq tegishli tashkilotlar va Saudiya Arabistoni Podshohligiga tatbiqan Saudiya Arabistoni Monetar agentligi) olgan foyda, olinishi mumkin boʻlgan qarz talablari yoki huquqlari aksiyalarini boshqalarga berishdan olinadigan har qanday daromad bilan birga, ushbu boshqa Ahdlashuvchi Davlatda soliqqa tortishdan ozod qilinadi.

28-modda Diplomatik agentlar va konsullik xizmatchilari

Mazkur Konvensiyaning hech bir qoidasi diplomatik agentlar yoki konsullik xizmatchilarining huquqning umumiy meʼyorlar tomonidan yoki maxsus bitimlarning qoidalariga muvofiq berilgan soliq imtiyozlariga daxl qilmaydi.

29-modda Kuchga kirish

1. Davlatlarning har biri ushbu Konvensiyaning kuchga kirishi uchun ichki qonunchilikka muvofiq talab qilinadigan taomil bajarilganligi toʻgʻrisida bir-birlarini diplomatik kanallar orqali xabardor qiladilar. Ushbu Konvensiya bunday xabarnomalarning oxirgisi olingan oydan keyingi ikkinchi oyning birinchi kunidan boshlab kuchga kiradi.

2. Konvensiya qoidalari:

a) manbadan undiriladigan soliqlarga nisbatan, birinchi yanvardan yoki ushbu Konvensiya kuchga kirgan sanadan keyingi kundan boshlab toʻlanadigan summalarga nisbatan;

b) har bir soliq yilida undiriladigan boshqa soliqlarga nisbatan—birinchi yanvardan yoki ushbu Konvensiya kuchga kirgan sanadan keyingi kundan boshlab tatbiq etiladi.

30-modda Amal qilishni toʻxtatish

1. Ushbu Konvensiya Ahdlashuvchi Davlatlardan istalgan biri Konvensiyaning amal qilishi kuchga kirgan sanadan 5 yil oʻtgan kundan boshlab istalgan taqvimiy yilning 30-iyunidan kechiktirmasdan diplomatik kanallar orqali uning amal qilishini toʻxtatish toʻgʻrisida boshqa Ahdlashuvchi Davlatga xabarnoma yuborib, Konvensiyani bekor qilishi mumkin boʻlgunga qadar oʻz kuchida qoladi.

2. Bu holda Konvensiyaning amal qilishi:

a) amal qilishini toʻxtatish toʻgʻrisidagi xabarnoma berilgan taqvimiy yil tugaganidan keyin daromad toʻlanadigan manbada undiriladigan soliqlarga nisbatan;

b) amal qilishini bekor qilish toʻgʻrisidagi xabarnoma berilgan taqvimiy yil tugagandan keyin har bir soliq yilida undiriladigan boshqa soliqlarga nisbatan toʻxtatiladi. Tegishli tartibda vakolat berilgan kuyidagi imzo chekuvchilar, shuni tasdiqlab, ushbu Konvensiyani imzoladilar.

2008-yil 18-noyabr kuni Riyod shahrida ikki nusxada, har biri oʻzbek, arab va ingliz tillarida tuzildi, bunda barcha matnlar bir xil kuchga ega.

Ushbu Konvensiya qoidalarini talqin qilishda kelishmovchiliklar yuzaga kelgan holda ingliz tilidagi matn asos uchun qabul qilinadi.

(imzolar)

ILOVA

BAYoNNOMA

Oʻzbekiston Respublikasi Hukumati bilan Saudiya Arabistoni Podshohligi Hukumati oʻrtasida ikkiyoqlama soliqqa tortishga yoʻl qoʻymaslik va daromad hamda kapital soliqlarini toʻlashdan bosh tortishning oldini olish toʻgʻrisida Konvensiyani imzolash davrida, quyidagi nizom Konvensiyaning ajralmas qismi hisoblanadi va Konvensiyaning 29 moddasi nizomiga muvofiq amalga kirishi yuzasidan kelishildi:

1. Konvensiyaning 3 moddasi (g) paragrafi hamda 8,13,15 va 23 moddalari qayd etilgan “xalqaro tashish” atamasiga, shuningdek “temir yoʻl transporti” ham kiradi.

2. Davlatlar muzokaralar oʻtkazish yoʻli bilan “avtomobil transporti”ni “xalqaro tashish” atamasiga kiritilishiga kelishdi.

Tegishli tartibda vakolat berilgan quyidagi imzo chekuvchilar, shuni tasdiqlab, ushbu Bayonnomani imzoladilar.

2008-yil 18-noyabr kuni Ar-Riyod shahrida ikki nusxada, har biri oʻzbek, arab va ingliz tillarida tuzildi, bunda barcha matnlar bir xil kuchga ega.

Ushbu Bayonnomaning qoidalarini talqin qilishda kelishmovchiliklar yuzaga kelgan holda ingliz tilidagi matn asos uchun qabul qilinadi.

(imzolar)