Hamkorlik boʻyicha qoʻshma qoʻmita tuzish toʻgʻrisida

21.07.2008

OʻZBEKISTON RESPUBLIKASI HUKUMATI BILAN QUVAYT DAVLATI HUKUMATI OʻRTASIDA

Bitim

Oʻzbekiston Respublikasi Hukumati va Quvayt Davlati Hukumati, bundan keyin Tomonlar deb ataluvchilar,

doʻstona munosabatlarni rivojlantirish va ikki davlat oʻrtasida barcha sohalarda hamkorlik qilish maqsadida,

quyidagilar toʻgʻrisida kelishib oldilar:

1-modda

Oʻzbekiston Respublikasi va Quvayt Davlati oʻrtasida ikki tomonlama munosabatlarni rivojlantirish maqsadida Tomonlar hamkorlik boʻyicha Qoʻshma qoʻmita tuzadilar, bundan keyin “Qoʻmita” deb ataladi, Qoʻmitaning asosiy vazifalari quyidagilardan iborat:

1. Umum manfaatli siyosiy masalalar boʻyicha maslahatlashuvlar oʻtkazish va muvofiqlashtirish.

2. Iqtisodiy, savdo, investitsiya, moliyaviy va boshqa sohalarda hamkorlikni rivojlantirish hamda nazorat qilish.

3. Madaniyat, fan va axborot sohalarida hamkorlikni ragʻbatlantirish.

4. Sogʻliqnisaqlash va ijtimoiy xizmat koʻrsatish sohalarida hamkorlikni rivojlantirish.

5. Tomonlar oʻrtasida imzolangan hamkorlik bitimlari va dasturlarining amalga oshirilishini nazorat qilish.

6. Harbiy sohadagi hamkorlikni amalga oshirishga koʻmaklashish.

2-modda

Qoʻmitaga hamraislar rahbarlik qiladilar: Oʻzbekiston tomonidan — Oʻzbekiston Respublikasi Bosh vazirining birinchi oʻrinbosari, moliya vaziri yoki Tashqi ishlar vaziri hamda Quvayt tomonidan — Quvayt Davlati Bosh vazirining oʻrinbosari yoki tashqi ishlar vaziri.

Qoʻmita yigʻilishlarida ikkala Tomondan vazirlar yoki yuqori mansabdor vakillar ishtirok etishlari hamda ushbu yigʻilishlarda muhokama etiladigan tegishli hamkorlik sohalari boʻyicha ekspertlar qatnashishlari mumkin.

3-modda

Qoʻmita yigʻilishlari har ikki yilda Tomonlar davlatlari poytaxtlarida navbatma-navbat bilan oʻtkaziladi. Tomonlar har bir yigʻilishni oʻtkazish sanasi toʻgʻrisida diplomatik kanallar orqali kelishib oladilar.

4-modda

1. Qoʻmita doirasida ishchi guruhi tashkil etiladi va ushbu ishchi guruhining vazifalariga qoʻmita yigʻilishlari qarorlarini tayyorlash, muvofiqlashtirish va ularni ijro etish kiradi.

2. Tomonlarning yuqori mansabdor vakillari tayyorlov komissiyasi uchrashuvlarida oʻz davlatining delegatsiyasiga rahbarlik qiladilar. Delegatsiyaning tarkibiga uchrashuvlarda muhokama qilinadigan va kun tartibiga kiritiladigan tegishli sohalardagi tashkilotlar vakillari kiritiladi.

3. Ishchi guruhi tarkibiga ikkala mamlakat savdo-sanoat palatalari aʼzolari va shuningdek, zarur hollarda xususiy sektor vakillari ham kiritilishi mumkin.

5-modda

Tomonlar ikki davlat ekspertlaridan iborat ijroiy komissiyani tuzadilar. Mazkur komissiyaning uchrashuvlari Qoʻmita yigʻilishlari oraligʻida navbatdagi Qoʻmita yigʻilishining tashkilotchisi hisoblangan davlatning poytaxtida oʻtkaziladi.

Ushbu komissiya Qoʻmita doirasida erishilgan kelishuvlarning amalga oshirilishini taʼminlaydi va Qoʻmitaga qoʻshma hisobotlarni taqdim etadi.

6-modda

Tomonlardan birining soʻroviga muvofiq, diplomatik kanallar orqali ikki tomonlama maslahatlashuvlar oʻtkazish yoʻli bilan ushbu Bitimga oʻzgartish va qoʻshimchalar kiritiladi va ular Bitimning 7-moddasida belgilangan tartibda kuchga kiradi.

7-modda

Ushbu Bitim Tomonlardan birining boshqa Tomonni ushbu Bitimning kuchga kirishi uchun zarur boʻlgan davlat ichki protseduralarni bajarganligi toʻgʻrisida diplomatik kanallar orqali soʻnggi yozma xabarnomani olgan kundan boshlab kuchga kiradi.

Ushbu Bitim Tomonlardan biri uning amal qilishini toʻxtatish niyati toʻgʻrisida diplomatik kanallar orqali yozma ravishda xabardor qilmaguncha amal qiladi.

Mazkur Bitimning amal qilishi boshqa Tomon tegishli nota olgandan olti oy oʻtgandan keyin tugatiladi,

Toshkent shahrida 2008-yil 21-iyulda ikki asl nusxada har biri oʻzbek, arab va ingliz tillarida tuzildi, bunda barcha matnlar bir xil kuchga ega.

Ushbu Bitim qoidalarini talqin qilishda kelishmovchiliklar yuzaga kelgan hollarda ingliz tilidagi matn ustuvor hisoblanadi.

(imzolar)