Sogʻliqni saqlash sohasida hamkorlik toʻgʻrisida

21.07.2008

Oʻzbekiston Respublikasi Hukumati bilan Quvayt Davlati Hukumati oʻrtasida

Bitim

Oʻzbekiston Respublikasi Hukumati va Quvayt Davlati Hukumati (keyinchalik “Tomonlar” deb ataluvchilar),

ikki davlat oʻrtasida sogʻliqni saqlash sohasida davlatlarning amaldagi qonun-qoidalariga muvofiq oʻzaro manfaatli hamkorlikni rivojlantirish istagida,

quyidagilar toʻgʻrisida ahdlashib oldilar:

1- modda

Tomonlar kuyidagi sohalarda tajriba almashish boʻyicha hamkorlikni qoʻllab-quvvatlaydilar:

1. Sogʻliqni saqlash boʻyicha boshqaruv.

2. Jamiyatda sogʻliqni saqlash va kasalliklarni oldini olish.

3. Onalik va bolalikni muhofaza qilish.

4. Shoshilinch va tez tibbiy yordam koʻrsatish.

5. Dori-darmon nazorati.

6. Tibbiy sanitariya va tibbiy reabilitatsiya.

2- modda

Tomonlar sogʻliqni saqlashga doir ikkala Tomonda oʻtkaziladigan uchrashuvlar va konferensiyalar haqida axborot almashinuvini amalga oshirish va bunday faoliyatlarda qatnashishni qoʻllab-quvvatlaydilar.

3- modda

Tomonlar tibbiyot va farmatsevtikaning turli sohalarida ikki davlatda nashr etiladigan sogʻliqni saqlash yoʻnalishidagi maʼlumotlar, statistik, tibbiy nashrlar hamda qonunchilik boʻyicha maʼlumot almashishga kelishdilar.

4- modda

Tomonlar sogʻliqni saqlash sohasidagi xizmatlar sifatini yaxshilash va ikki tomon uchun foydali tajriba almashinish maqsadida tibbiyot xodimlari oʻrtasida qisqa muddatli tashriflar oʻtkazishga koʻmaklashadilar.

5- modda

Tomonlar bir-birlarining hududlarida farmatsevtika va tibbiyot sohasiga oid koʻrgazmalar tashkillashtirishni qoʻllab - quvvatlaydilar.

6- modda

Tomonlar ikki mamlakatning sogʻliqni saqlash samaradorligi darajasini yaxshilash maqsadida tibbiy tadqiqotlar sohasidagi munosabatlarini muvofiqlashtirib boradilar.

7- modda

Mazkur Bitimdan kelib chiquvchi hamkorlik sohasidagi yoʻl va turarjoy bilan bogʻliq barcha xarajatlar talab qiluvchi Tomon hisobidan qoplanadi.

8- modda

Ushbu Bitimni bajarish va u bilan bogʻliq barcha harakatlar Tomonlarning milliy qonunchiligidan kelib chiqqan holda amalga oshiriladi.

9- modda

1. Ushbu Bitim Tomonlardan birining boshqa Tomonni ushbu Bitimning kuchga kirishi uchun zarur boʻlgan davlat ichki protseduralarni bajarganligi toʻgʻrisida diplomatik kanallar orqali soʻnggi yozma xabarnoma almashilgan kundan boshlab kuchga kiradi.

2. Tomonlarning kelishuviga koʻra, ushbu Bitimga oʻzgartish hamda qoʻshimchalar kiritilishi mumkin va mazkur oʻzgartish hamda qoʻshimchalar ushbu moddaning 1-bandida belgilangan tartibda kuchga kiradi.

3. Ushbu Bitim besh yil muddatga amal qiladi va agar Tomonlardan biri boshqa Tomonni, tegishli muddat tugashidan kamida olti oy oldin diplomatik kanallar orqali ushbu Bitimning amal qilinishini toʻxtatish niyati haqida yozma ravishda xabardor qilmasa, uning faoliyati oʻz-oʻzidan keyingi shunday muddatga uzaytiriladi.

Toshkent shahrida 2008-yil 21-iyulda ikki asl nusxada, har biri oʻzbek, arab va ingliz tillarida tuzildi, bunda barcha matnlar bir xil kuchga ega.

Ushbu Anglashuv memorandumi qoidalarini talqin etishda kelishmovchiliklar yuzaga kelgan hollarda ingliz tilidagi matn ustuvor hisoblanadi.

(imzolar)