Toshkent shahrida vaqtinchalik bir martalik ishlarni bajaruvchi shaxslar mehnat faoliyatini tartibga solishga qaratilgan qoʻshimcha choralar toʻgʻrisida (51-son)

31.01.2012

Toshkent shahar hokimining

Qarori

Oʻzbekiston Respublikasi Prezidentining 2007-yil 6-apreldagi “Aholi bandligini oshirish hamda mehnat va aholini ijtimoiy muhofaza qilish organlari faoliyatini takomillashtirish chora-tadbirlari toʻgʻrisida”gi PQ-616-sonli va Oʻzbekiston Respublikasi Vazirlar Mahkamasining 2001-yil 18-maydagi “Vaqtinchalik bir martalik ish bilan taʼminlash markazlarini tashkil etish toʻgʻrisida”gi 223-sonli qarorlari talablarini toʻlaqonli bajarishni tashkil etish, shuningdek vaqtinchalik bir martalik ishlarni bajaruvchi fuqarolarning mehnat faoliyatini tartibga solish, ular uchun zarur ijtimoiy-maishiy shart-sharoitlar yaratish va ularni ishga joylashtirishga koʻmaklashish, aholi xavfsizligini taʼminlashga qaratilgan ishlarni yanada jadallashtirish maqsadida qaror qilaman:

1. Mehnat va aholini ijtimoiy muhofaza qilish bosh boshqarmasi (B.Mirxanov), Ichki ishlar bosh boshqarmasi (A.Ibragimov):

1.1. Bandlikka koʻmaklashish va aholini ijtimoiy muhofaza qilish tuman markazlari huzuridagi Vaqtinchalik ishlarni tashkil etish byurolari ish faoliyatini talab darajasida amalga oshirilmayotganligi koʻrsatib oʻtilsin.

1.2. Vaqtinchalik ishlarni tashkil etish byurolari ish faoliyati hamda bir martalik ishga yollangan fuqarolarning ish tartibi Oʻzbekiston Respublikasi Vazirlar Mahkamasining 2001-yil 18-maydagi “Vaqtinchalik bir martalik ish bilan taʼminlash markazlarini tashkil etish toʻgʻrisida”gi 223-sonli qarori bilan tasdiqlangan Namunaviy nizom talablariga qatʼiy rioya qilingan holda amalga oshirish choralari koʻrilsin.

2. Toshkent shahrida vaqtinchalik mehnat faoliyatini amalga oshirish Tartibi 1-ilovaga muvofiq tasdiqlansin va uning qoʻllanilishi 6-fevraldan boshlab taʼminlansin.

3. Mehnat va aholini ijtimoiy muhofaza qilish bosh boshqarmasi (B.Mirxanov), Binolardan foydalanish departamenti (F.Mirhaydarov), tuman hokimlari: bir oy muddat ichida vaqtinchalik bir martalik ishlarning bajarilishi borasida yuzaga kelgan vaziyatni hisobga olib, 2-ilovada koʻrsatilgan manzillarda Bandlikka koʻmaklashish va aholini ijtimoiy muhofaza qilish tuman markazlari huzurida Vaqtinchalik ishlarni tashkil etish byurolari tashkil etilishi va joylashtirilishi inobatga olinsin.

4. Mehnat va aholini ijtimoiy muhofaza qilish bosh boshqarmasi (B.Mirxanov), tuman hokimlari, Bandlikka koʻmaklashish va aholini ijtimoiy muhofaza qilish tuman markazlari rahbarlari bilan birgalikda bir oy muddatda:

— vaqtinchalik bir martalik ishlarga yollanishda fuqarolarga koʻmaklashish ishlari jadallashtirilsin;

— byurolar huzurida ovqatlanish shoxobchalari, sanitariya tarmoqlari, oʻrindiqlar bilan jihozlashni tashkil etilishi va ish izlovchi fuqarolar uchun boshqa zarur ijtimoiy-maishiy shart-sharoitlar yaratilishi taʼminlansin;

— vaqtinchalik bir martalik ishlarni bajarish uchun fuqarolarni yollashda ish beruvchi jismoniy va yuridik shaxslarga koʻmaklashilsin xamda ularga texnika va mehnat xavfsizligi qoidalariga rioya etishlari tushuntirilsin;

— byurolarda lokal axborot almashinuvi asosida vaqtinchalik bir martalik ish izlovchi fuqarolarni keng xabardor qilish uchun jismoniy va yuridik ish beruvchi shaxslar tomonidan beriladigan ish turlari toʻgʻrisidagi maʼlumotlar banki shakllantirilsin va ularning har oyda yangilanib borilishi taʼminlansin.

5. Toshkent shahar hokimligi Axborot xizmati, tuman hokimlari, “Mahalla” jamgʻarmasi (J.Inagʻomov), Xususiy uy-joy mulkdorlari shirkatlari uyushmasi (A.Nabiyev), Ichki ishlar bosh boshqarmasi(A.Ibragimov):

5.1. Jamoatchilik vakillari bilan hamkorlikda, ommaviy axborot vositalaridan foydalangan holda, 16 yoshga toʻlgan va vaqtinchalik bir martalik ish izlovchi fuqarolarga, shuningdek ish beruvchi jismoniy va yuridik shaxslarga Toshkent shahrida faoliyat yuritayotgan byurolar toʻgʻrisida, ushbu byurolardan roʻyxatdan oʻtishlari, byurolarda xizmatlar tekin koʻrsatilishi yuzasidan targʻibot va tushuntirish ishlari amalga oshirilsin.

5.2. Vaqtinchalik bir martalik ishga yollanuvchi fuqarolarni hamda ish beruvchi jismoniy va yuridik shaxslarni vaqtinchalik bir martalik ishlarni bajarishda jamoat tartibi va pasport rejimi qoidalariga rioya qilishlari toʻgʻrisida xabardor qilinsin.

6. Ichki ishlar bosh boshqarmasi (A.Ibragimov), Mehnat va aholini ish bilan taʼminlash bosh boshqarmasi (B.Mirxanov) tegishli idoralar bilan birgalikda:

6.1. Byurolar va fuqarolar oʻrtasidagi munosabatlarni tartibga solish maqsadida Oʻzbekiston Respublikasi Adliya vazirligi tomonidan 2004-yil 13-sentabrda 1406-son bilan roʻyxatga olingan Ichki ishlar vazirining 2004-yil 10-sentabrdagi 240-sonli buyrugʻi talablarini inobatga olib, 4-ilovada keltirilgan, kerakli maʼlumotlar kiritilib mukammallashtirilgan, vaqtinchalik bir martalik ishga kelgan shaxslardan talab etiladigan soʻrovnoma-maʼlumotlar toʻldirilishi.

6.2. Qaror 4-ilovasida keltirilgan shaklda fuqarolarga vaqtinchalik bir martalik ishda ishlash huquqini beruvchi, oʻrnatilgan tartibda himoyalangan, laminantlangan, muddatli guvohnomani kerakli maʼlumotlar bilan toʻldirib, mukammallashtirilgan xolda chop etish va tegishli tuman byurolari orqali murojaat qilgan shaxslarga berilishi hamda guvohnoma asosida fuqarolarning vaqtinchalik bir martalik mehnat faoliyatini tartibga solish choralari koʻrilsin.

7. Byurolar tomonidan shaxsga beriladigan guvohnoma ushbu shaxsning Toshkent shahrida doimiy yoki vaqtincha roʻyxatda turishligini belgilamasligi va ushbu shaxsning Toshkent shahrida mulkchilik shaklidan qatʼi nazar, korxona, muassasa va tashkilotlarda mehnat shartnomalari tuzib, doimiy muddatga ishga joylashish huquqini bermasligi tushuntirilsin.

8. Toshkent shahar hokimining birinchi oʻrinbosari (B.Raxmonov), hokim oʻrinbosari (F.Ziyayev), Ichki ishlar bosh boshqarmasi (A.Ibragimov), Mehnat va aholini ish bilan taʼminlash bosh boshqarmasi (B.Mirxanov):

8.1. Toshkent shahri hududida sanoat, qurilish, savdo, bozor va boshqa sohalarda faoliyat yuritayotgan tashkilotlarda guvohnoma mavjud boʻlmagan shaxslarning vaqtinchalik bir martalik mehnat faoliyati bilan shugʻullanishiga chek qoʻyish choralari koʻrilsin.

8.2. Tuman Byurolari oʻrtasida axborot almashinuvini takomillashtirish maqsadida lokal aloqa almashinuvini tashkil etish yuzasidan taklif ishlab chiqilsin.

9. Ichki ishlar bosh boshqarmasi (A.Ibragimov): Joylardagi ichki ishlar boshqarmalari xodimlarini keng jalb etib, byurolarga murojaat qilmagan va oʻrnatilgan tartibda guvohnoma olmagan shaxslarni aniqlab, ularni byurolarga murojaat etishlarini taʼminlash choralari koʻrilsin.

10. Ichki ishlar bosh boshqarmasi (A.Ibragimov), “Mahalla” jamgʻarmasi (J.Inagʻomov) bilan birgalikda: vaqtinchalik bir martalik ishlarni bajarish uchun Toshkent shahriga kelgan fuqarolarni hisobga olish (uchyot), hisobga olish shunday toifa shaxslarni oʻz vaqtida va tezlikda byuroga yoʻnaltirish, ular yuzasidan doimiy nazoratni kuchaytirish ishlari amalga oshirilsin xamda bu haqidagi ichki buyruq (qaror)larini qabul qilish tavsiya etilsin.

11. Mehnat va aholini ijtimoiy muhofaza qilish bosh boshqarmasi (B.Mirxanov), Moliya bosh boshqarmasi (M.Mirmaxmudov): bir oy muddatda yangi byurolarni barpo etish, mavjud byuro binolarini taʼmirlash, saqlash va ularga sarflanadigan boshqa joriy xarajatlar, shuningdek fuqarolarni vaqtinchalik bir martalik ishlash bilan bogʻlik hujjatlarni tayyorlash uchun sarflanadigan xarajatlarni moliyalashtirish va yechimi yuzasidan aniq taklif kiritilsin.

13. Mazkur qarorning bajarilishini nazorat qilish Toshkent shahar hokimining birinchi oʻrinbosari B.Raxmonov va hokim oʻrinbosari F.Ziyayev zimmalariga yuklatilsin.

Toshkent shahar hokimi vazifasini bajaruvchi R. USMONOV

Toshkent sh.,

2012-yil 31-yanvar,

51-son

Toshkent shahar hokimining 2012-yil 31-yanvardagi 51-sonli qaroriga 1-ILOVA

Toshkent shahrida vaqtinchalik mehnat faoliyatini amalga oshirish

TARTIBI

I. Umumiy qoidalar

Ushbu Tartib Toshkent shahrida vaqtinchalik mehnat faoliyatini amalga oshirish qoidalarini belgilaydi. Vaqtinchalik bir martalik ishlarni bajaruvchi fuqarolarning mehnat faoliyatini tartibga solish, ular uchun zarur ijtimoiy-maishiy shart-sharoitlar yaratish va ularni bir martalik ishlar bilan taʼminlashga koʻmaklashish, aholi xavfsizligini taʼminlash, Oʻzbekiston Respublikasining boshqa hududlaridan kelgan fuqarolarini hisobga olish, mehnat faoliyatini nazorat qilish va bu boradagi mahalliy davlat hokimiyati, ichki ishlar idoralari, Mehnat va aholini ijtimoiy muhofaza qilish muassasalarining vazifalarini koʻzda tutadi.

II. Toshkent shahrida vaqtinchalik mehnat faoliyatini amalga oshirish yuzasidan davlat idoralarining birgalikdagi umumiy vazifalari

Toshkent shahrida vaqtinchalik mehnat faoliyatini amalga oshirish yuzasidan davlat idoralari birgalikda quyidagi umumiy vazifalarni amalga oshiradilar:

fuqarolarga vaqtinchalik bir martalik ishlarga yollanishda koʻmaklashadi;

— vaqtinchalik, bir martalik ishlarni bajaruvchi fuqarolarga yangidan tashkil etilgan va mavjud boʻsh ish joylari toʻgʻrisida maʼlumotlar berish hamda mutaxassisligiga qarab ishga yoʻnaltirish;

— fuqarolarni vaqtinchalik, bir martalik ishlarni bajarish uchun yollashda ish beruvchi jismoniy va yuridik shaxslarga koʻmaklashadi hamda ular tomonidan tavsiya etilayotgan ish turlari toʻgʻrisida maʼlumotlar bankini shakllantiradi;

— ishga yollanuvchi fuqarolar tomonidan vaqtinchalik bir martalik ishlar bajarilishida jamoat tartibiga rioya qilinishi, pasport rejimi qoidalari, shuningdek mehnat xavfsizligining asosiy qoidalari toʻgʻrisida xabardor qiladi;

— manfaatdor ish beruvchi yuridik shaxslarni jalb etgan holda boʻsh ish oʻrinlari yarmarkalarini muntazam ravishda oʻtkazadi;

— vaqtinchalik bir martalik ish izlovchi fuqarolar uchun zarur ijtimoiy-maishiy shart-sharoitlar yaratadi, ovqatlanish shoxobchalari tashkil etadi;

— vaqtinchalik bir martalik ishlarni bajaruvchi fuqarolar tomonidan qonunbuzilishlari va huquqbuzarliklar sodir etilishining oldini oladi hamda profilaktika qiladi.

III. Mahalliy davlat hokimiyati organlarining fuqarolar vaqtinchalik mehnat faoliyatini tashkil etish yuzasidan vazifalari

Mahalliy davlat hokimiyati organlari fuqarolar uchun vaqtinchalik mehnat faoliyatini tashkil etish yuzasidan quyidagi vazifalarni bajaradi:

— vaqtinchalik bir martalik mehnat faoliyati bilan bogʻliq davlat idoralari ishlarini muvofiqlashtiradi va nazorat qiladi;

— Bandlikka koʻmaklashish va aholini ijtimoiy muhofaza qilish tuman markazlari tarkibidagi 5 ta “Vaqtinchalik ishlarni tashkil etish byuro”larini taʼmirlash va jihozlash choralarini koʻradi hamda yangi tashkil etilayotgan 3 ta byurolar uchun Toshkent shahar hududida vaqtinchalik foydalanilmayotgan binolardan joy ajratadi;

— byurolar huzurida ovqatlanish shoxobchalari, sanitariya tarmoqlari, oʻrindiqlar bilan jihozlashni tashkil etilishi va ish izlovchi fuqarolar uchun boshqa zarur ijtimoiy-maishiy shart-sharoitlar yaratilishini taʼminlaydi;

— manfaatdor ish beruvchi yuridik shaxslarni jalb etgan holda boʻsh ish oʻrinlari yarmarkalarini muntazam ravishda oʻtkazadi;

jamoatchilik vakillari bilan hamkorlikda, ommaviy axborot vositalaridan foydalangan holda, 16 yoshga toʻlgan va vaqtinchalik bir martalik ish izlovchi fuqarolarga, shuningdek ish beruvchi jismoniy va yuridik shaxslarga Toshkent shahrida vaqtinchalik bir martalik mehnat faoliyati toʻgʻrisida targʻibot-tashviqot hamda tushuntirish ishlarini amalga oshiradi.

IV. Mehnat va aholini ish bilan taʼminlash bosh boshqarmasi, Bandlikka koʻmaklashish va aholini ijtimoiy muhofaza qilish tuman markazlari, Vaqtinchalik ishlarni tashkil etish byurolarining vazifalari

Mehnat va aholini ish bilan taʼminlash bosh boshqarmasi, Bandlikka koʻmaklashish va aholini ijtimoiy muhofaza qilish tuman markazlari, Vaqtinchalik ishlarni tashkil etish byurolari quyidagi vazifalarni amalga oshiradi:

— mahalliy davlat hokimiyati organlari bilan birgalikda vaqtinchalik bir martalik mehnat faoliyatini tashkil etish va quyi tizimlardagi bu boradagi faoliyatni nazorat qiladi;

— rioya qilinishi zarur boʻlgan tartib qoidalarni xamda byuro faoliyati toʻgʻrisidagi maʼlumotlarni mazkur byurolar hududlarining qulay joylariga joylashtirilishini taʼminlaydi.

Byuro maxsus ruxsat va litsenziya talab qilinadigan ishlarga joylashtirish vazifasi bilan shugʻullanish vakolatiga ega emas.

V. Ichki ishlar organlarining vazifalari

Ichki ishlar organlari quyidagi vazifalarni bajaradi:

— vaqtinchalik bir martalik ishga yollanuvchi fuqarolar hamda ish beruvchi jismoniy va yuridik shaxslar tomonidan vaqtinchalik bir martalik ishlarni bajarilishida oʻzini-oʻzi boshqarish organlari bilan hamkorlikda jamoat tartibi va pasport rejimi qoidalariga rioya qilinishini nazorat qiladi;

— kerakli maʼlumotlar kiritilib, mukammallashtirilgan, vaqtinchalik bir martalik ishga kelgan shaxslardan talab etiladigan soʻrovnoma-maʼlumotlar toʻgʻri toʻldirilishini nazorat qilish xamda qisqa muddatlarda soʻrovnomalar boʻyicha tekshirishlarni taʼminlaydi;

— Toshkent shahri hududida sanoat, qurilish, savdo, bozor va boshqa sohalarda faoliyat yuritayotgan korxonalarda vaqtinchalik mehnat faoliyatini amalga oshirish huquqini beruvchi guvohnomasi mavjud boʻlmagan shaxslarning ushbu faoliyat bilan shugʻullanishiga chek qoʻyish choralarini koʻradi;

— Joylardagi ichki ishlar boshqarmalari xodimlarini keng jalb etib, byurolarga murojaat qilmagan va oʻrnatilgan tartibda vaqtinchalik mehnat faoliyatini amalga oshirish huquqini beruvchi guvohnoma olmagan shaxslarni aniqlab, ularni byurolarga murojaat etishlarini taʼminlaydi;

— vaqtinchalik bir martalik ishlarni bajarish uchun Toshkent shahriga kelgan fuqarolarning hisobini yuritish, hisobga olingan bunday toifa shaxslarni oʻz vaqtida va qisqa muddatda byuroga yoʻnaltirish, ular yuzasidan doimiy nazoratni oʻrnatadi;

— ishga yollangan shaxslarni ish manzillarida boʻlishi, doimiy yoki vaqtinchalik roʻyxatda turishi, ularda guvohnomalarning mavjudligini tekshirib boradi;

— vaqtinchalik bir martalik ishlarni bajaruvchi fuqarolar tomonidan qonunbuzilishlari va huquqbuzarliklar sodir etilishining oldini olish hamda profilaktika tadbirlarini amalga oshiradi.

VI. Ish beruvchi yuridik va jismoniy shaxslarning hamda bir martalik ishlarini amalga oshirayotgan fuqaroning huquq va burchlari

Ish beruvchi yuridik va jismoniy shaxs bandlikka koʻmaklashuvchi markazga boʻsh ish oʻrinlari toʻgʻrisida va vaqtinchalik bir martalik ishlarga doir takliflarni beradi.

Guvohnoma olgan shaxslarni bir martalik ish bilan taʼminlaydi, ularning Oʻzbekiston Respublikasi Mehnat kodeksida belgilangan huquqlarini kafolatlaydi, ish haqini oʻz vaqtida toʻlanishini hamda mehnat xavfsizligi qoidalariga rioya qilinishini taʼminlaydi.

Guvohnoma egasining noqonuniy xatti-harakatlari toʻgʻrisida byuroga xabar beradi.

Vaqtinchalik bir martalik ishlarni amalga oshirayotgan fuqaroning huquq va burchlari:

Soʻrovnomada oʻzi toʻgʻrisida maʼlumotlarning haqqoniyligini taʼminlaydi.

Ish beruvchi bilan shartlashilgan sharoitlarda mehnat vazifalarini amalga oshiradi.

Pasport tizimi qoidalariga rioya qiladi va jamoat tartibini saqlaydi.

Ish beruvchidan mehnat qonunchiligiga asosan oʻz vaqtida ish haqini toʻlanishi, ish vaqti va dam olish vaqtlari kafolatlarini hamda qonunda belgilangan boshqa imtiyozlarni talab qilish huquqiga ega.

Toshkent shahar hokimining 2012-yil 31-yanvardagi 51-sonli qaroriga 2-ILOVA

Vaqtinchalik bir martalik ishlarni tashkil etish byurolari joylashadigan manzillar roʻyxati

Toshkent shahar hokimining 2012-yil 31-yanvardagi 51-sonli qaroriga 3-ILOVA

Toshkent shahar hokimining 2012-yil 31-yanvardagi 51-sonli qaroriga 4-ILOVA