Iqtisodiyot va savdo sohasida hamkorlik toʻgʻrisida

28.05.2009

OʻZBEKISTON RESPUBLIKASI HUKUMATI VA BRAZILIYAFEDERATIV RESPUBLIKASI HUKUMATI OʻRTASIDA

Bitim

Oʻzbekiston Respublikasi Hukumati va Braziliya Federativ Respublikasi Hukumati bundan keyin “Tomonlar” deb ataluvchilar,

Oʻzbekiston Respublikasi va Braziliya Federativ Respublikasi oʻrtasida iqtisodiyot va savdo sohasida hamkorlikka katta ahamiyat qaratib,

xalqaro huquq prinsiplariga asoslangan holda, ikki davlat oʻrtasida iqtisodiyot va savdo sohasida hamkorlikni rivojlantirish va doʻstona munosabatlarni mustahkamlashni istab,

quyidagilar toʻgʻrisida kelishdilar:

1-modda

Tomonlar oʻz milliy manfaatlaridan kelib chiqqan holda, mazkur Bitim qoidalariga va Tomonlarning milliy qonunchiligiga muvofiq iqtisodiyot va savdo sohasida hamkorlikni rivojlantirish va mustahkamlash chora-tadbirlarini koʻradilar.

2-modda

1. Tomonlar oʻzaro ikki davlat oʻrtasidagi tovarlar importi va eksportiga nisbatan qoʻllaniladigan boj toʻlovlari va xuddi shunday taʼsirga ega boʻlgan soliqlarga taalluqli eng qulay rejim yaratadilar.

2. Mazkur moddaning 1-bandidagi qoidalar:

a) Tomonlardan biri tarafidan chegaraboʻyi savdosini yengillashtirish maqsadida qoʻshni davlatlarga yaratiladigan imtiyozlarga;

b) har bir tomon tarafidan ular aʼzo boʻlgan erkin savdo va bojxona ittifoqi toʻgʻrisidagi bitimlar doirasida yaratiladigan imtiyozli rejimga, rivojlanayotgan davlatlar bilan imtiyozga oid bitimlarga yoki rivojlanayotgan davlatlarga imtiyozlarni bir tomonlama berishga nisbatan qoʻllanilmaydi.

3-modda

Tomonlar oʻzlarining milliy qonunchiliklariga muvofiq boshqa Tomonning hududida xar qanday Tomonning qoʻshma korxonalarini, xoʻjalik yurituvchi subyektlarning filiallarini, banklarini va boshqa tuzilmalarini tashkil etilishiga yordam beradilar. Tomonlar investitsiyalarni va texnologiyaga bogʻliq ishlab chiqarishlarni rivojlantirishni va mustahkamlashni muhimligini anglab yetadilar.

4-modda

1. Tomonlar ikki davlat oʻrtasidagi iqtisodiy hamkorlikni qoʻshma loyihalar va dasturlar orqali qoʻllab-quvvatlaydilar.

2. Tomonlar ikki davlatning xoʻjalik yurituvchi subyektlari oʻrtasida iqtisodiyot va savdo sohasida hamkorlikni qoʻllab-quvvatlash maqsadida zarur chora-tadbirlarni koʻradilar.

5-modda

Tomonlar xoʻjalik yurituvchi subyektlarining mazkur Bitim asosida imzolagan shartnomalari doirasidagi barcha toʻlovlar, Tomonlarning milliy qonunchiligiga muvofiq xalqaro toʻlovlarda qabul qilingan talablarga asosan erkin muomaladagi valyutada amalga oshiriladi.

6-modda

Tomonlar hududlarida oʻtkaziladigan xalqaro yarmarkalar va koʻrgazmalarda va boshqa shunga oʻxshash anjumanlarda ikki davlat xoʻjalik yurituvchi subyektlarining ishtirok etishlariga koʻmaklashadilar.

7-modda

1. Tomonlar oʻrtasidagi iqtisodiyot va savdo sohasida hamkorlik ikki davlat xoʻjalik yurituvchi subyektlari oʻrtasida ularning mulkiy va hamkorlik shakllaridan qatʼi nazar, Tomonlarning milliy qonunchiligi hamda xalqaro savdo tajribasidan dunyo tovarlari va xizmatlari bozori narxlari asosida shartnomalar orqali amalga oshiriladi.

2. Tomonlar ikki davlat xoʻjalik yurituvchi subyektlarining tuzgan shartnomalari boʻyicha majburiyatlarini bajarmaganliklari yuzasidan javobgar boʻlmaydilar.

8-modda

1. Tomonlar mazkur Bitim qoidalarini amalga oshirish maqsadida, Oʻzbekiston Respublikasi va Braziliya Federativ Respublikasi oʻrtasida Tomonlarning tegishli davlat organlari va ishbilarmon doiralar vakillaridan iborat savdo-iqtisodiy hamkorlik boʻyicha Hukumatlararo komissiya (bundan keyin — Hukumatlararo komissiya) tashkil etadilar.

2. Hukumatlararo komissiya yigʻilishlari bir yilda bir marta yoki har ikki Tomon oʻzaro kelishuvi boʻyicha zarur deb hisoblagan vaqtlarda Oʻzbekiston Respublikasi va Braziliya Federativ Respublikasida navbatma-navbat oʻtkaziladi. Hukumatlararo komissiya oʻz Reglamentini oʻzi muvofiqlashtiradi.

3. Hukumatlararo komissiyaning asosiy vazifalari quyidagilardir:

a) oʻzaro manfaatli boʻlgan sohalarda iqtisodiyot va savdo boʻyicha hamkorlik dasturlarini muhokama qilish;

b) kreditlar berishning maʼqul shartlarini, iqtisodiyot va savdo sohasida hamkorlikni moliyaviy taʼminlashni aniqlash;

v) oʻrta va kichik biznesni qoʻllab-quvvatlovchi dasturlarni tayyorlash va amalga oshirish;

g) ikki davlat xoʻjalik yurituvchi subyektlari oʻrtasida iqtisodiyot va savdo sohasida hamkorlikning shart-sharoitlari yaxshilash uchun takliflar tayyorlash;

d) ushbu Bitimning tatbiq qilinishi yuzasidan takliflar kiritish;

e) Tomonlar hamda ular davlatlarining xoʻjalik yurituvchi subyektlari oʻrtasida iqtisodiyot va savdo sohasida hamkorlikni amalga oshirish jarayonida yuzaga keladigan masalalarni koʻrib chiqish.

4. Tomonlarning oʻzaro ichki kelishuviga asosan mazkur moddani amalga oshirish bilan bogʻliq xarajatlar har bir Tomon tarafidan oʻziga tegishli qismi boʻyicha qoplanadi.

9-modda

Tomonlarning oʻzaro kelishuviga muvofiq, ushbu Bitimga uning ajralmas qismi hisoblanadigan bayonnomalar bilan rasmiylashtiriladigan oʻzgartish va qoʻshimchalar kiritilishi mumkin va ushbu bayonnomalar mazkur Bitimning 11-moddasiga muvofiq kuchga kiradi.

10-modda

Ushbu Bitim Oʻzbekiston Respublikasi yoki Braziliya Federativ Respublikasi tomonidan tuzilgan mavjud xalqaro shartnomalardan kelib chiquvchi Tomonlarning har qanday huquq va majburiyatlariga taʼsir etmaydi.

11-modda

1. Mazkur Bitim Tomonlardan birining boshqa Tomonning ushbu Bitimning kuchga kirishi uchun zarur boʻlgan ichki davlat protseduralarini bajarganligi toʻgʻrisida soʻnggi yozma xabarnomani olgan sanadan boshlab kuchga kiradi va Tomonlardan birining mazkur Bitim amal qilishini toʻxtatish toʻgʻrisidagi yozma xabarnomasini olgunga qadar amalda boʻladi.

2. Mazkur Bitimning amal qilish muddati shunday yozma xabarnoma olingandan soʻng olti oydan keyin toʻxtatiladi.

3. Mazkur Bitimning amal qilish muddatining toʻxtatilishi, ushbu Bitimning amal qilishi davomida yuzaga kelgan Tomonlarning moliyaviy majburiyatlarini bajarishiga taʼsir qilmaydi.

Braziliya shahrida 2009-yil 28-may kuni ikki nusxada, har biri oʻzbek, portugal va ingliz tillarida tuzildi, bunda barcha matnlar bir xil kuchga ega.

Mazkur Bitimni talqin qilish maqsadida ingliz tilidagi matn ustuvor hisoblanadi.

(imzolar)