Shanxay hamkorlik tashkilotiga aʼzo davlatlar hududida qoʻshma aksilterror tadbirlarni tashkil etish va oʻtkazish toʻgʻrisida

15.06.2006

Bitim

Shanxay hamkorlik tashkilotiga aʼzo davlatlar — keyingi oʻrinlarda — Tomonlar,

terrorizm Shanxay hamkorlik tashkilotiga aʼzo davlatlarning tinch hayotiga jiddiy xavf solishini anglagan holda,

Tomonlar hududida terrorizmga qarshi samarali kurashni taʼminlash maqsadida,

Tomonlarning terrorizmga qarshi kurashi borasida kelishilgan harakatlari dolzarb ekanligiga ishonch hosil qilgan holda,

Tomonlarning terrorizmga qarshi kurashida hamkorlikni mustahkamlanishi Shanxay hamkorlik tashkilotiga aʼzo davlatlar xalqi manfaatlariga mos keladi deb hisoblagan holda,

Tomonlar hududlarida qoʻshma aksilterror tadbirlarni tashkil etish va oʻtkazishning huquqiy asoslarini yaratishga uringan holda,

2002-yil 7-iyundagi Shanxay hamkorlik tashkilotining Xartiyasi, 2001-yil 15-iyundagi Terrorizm, separatizm va ekstremizmga qarshi kurashish toʻgʻrisidagi Shanxay konvensiyasi va 2002-yil 7-iyundagi Shanxay hamkorlik tashkilotiga aʼzo davlatlar oʻrtasidagi Mintaqaviy aksilterror tuzilma toʻgʻrisidagi Kelishuvga rioya qilgan holda,

milliy qonunchilik, xalqaro huquqning umumqabul qilingan tamoyillari va normalariga rioya qilgan holda,

quyidagilar toʻgʻrisida kelishib olindi:

1-modda

Mazkur Kelishuv maqsadlarini amalga oshirishda qoʻllaniladigan tushunchalar quyidagi maʼnolarni anglatadi:

“qoʻshma aksilterror tadbirlar” — Tomonlar vakolatli organlari tomonidan maxsus aksilterror tuzilmalar kuch-qudratidan foydalanib, kelishilgan maqsad va reja boʻyicha soʻralayotgan Tomonlar hududlarida oʻtkaziladigan terrorizmga qarshi tadbirlar;

“maxsus aksilterror tuzilmalar” — har qaysi Tomonning oʻz qonunchiligiga muvofiq qoʻshma aksilterror tadbirlarni oʻtkazish uchun shakllantiradigan mutaxassislar guruhi;

“qoʻshma aksilterror tadbirlar ishtirokchilari” — maxsus aksilterror tuzilmalar boʻlinmalarining shaxsiy tarkibi, qoʻshma aksilterror tadbirlarning boshqaruv organi tarkibiga kiritilgan va qoʻshma aksilterror tadbirlarni oʻtkazishda koʻmaklashuvchi boshqa shaxslar;

“soʻrayotgan Tomon” — oʻz hududida qoʻshma aksilterror tadbirlarni oʻtkazish uchun maxsus aksilterror tuzilmalarni joʻnatilishi haqida talabnoma bilan murojaat qilgan Tomon;

“soʻralayotgan Tomon” — qoʻshma aksilterror tadbirlarni oʻtkazish uchun maxsus aksilterror tuzilmalarni joʻnatilishini soʻrab, talabnoma bilan soʻrayotgan Tomon murojaat qilgan Tomon;

“koʻmaklashish toʻgʻrisida talabnoma” — soʻrayotgan Tomon vakolatli organining soʻralayotgan Tomon vakolatli organiga qoʻshma aksilterror tadbirlarni oʻtkazishda koʻmaklashishini soʻrab murojaati;

“vakolatli organ” — oʻz qonunchiligiga muvofiq, terrorizmga qarshi kurashni amalga oshiruvchi va qoʻshma aksilterror tadbirlarni oʻtkazishga javobgar boʻlgan Tomonning davlat organi;

“maxsus vositalar va taʼminot materiallari” — qoʻshma aksilterror tadbirlarni oʻtkazishda qoʻllaniladigan va soʻralayotgan Tomon qonunchiligiga muvofiq, uning hududidan olib chiqishga ruxsat etilgan qurol-aslaha va harbiy texnika, qurol va oʻq-dorilar, uskunalar, aloqa vositalari, maxsus aksilterror tuzilmalarning qurol-aslahalari, texnika, transport hamda boshqa maxsus vositalar va materiallar;

“ShHT MATTning Ijroiya qoʻmitasi” — Shanxay Hamkorlik Tashkiloti Mintaqaviy aksilterror tuzilmasining Ijroiya qoʻmitasi.

2-modda

Qoʻshma antiterroristik tadbirlarni oʻtkazishning huquqiy asosini Tomonlar qonunchiligi, ularning xalqaro majburiyatlari, xalqaro huquqning umumqabul qilingan tamoyillari va normalari, shuningdek, mazkur Kelishuv tashkil etadi.

3-modda

Qoʻshma aksilterror tadbirlar terroristik faoliyati bilan birga jumladan, quyidagilarni toʻxtatish maqsadida oʻtkaziladi:

terroristlar tomonidan garovga olingan kishilarni ozod etish;

texnologik va ekologik xavfi yuqori boʻlgan obyektlarni, atom sanoati, transport, energetika, kimyoviy ishlab chiqarish va boshqa obyektlarni qaytarib olish;

portlovchi yoki tuzilishi murakkab boʻlgan shikastlantiruvchi uskunalarni zararsizlantirish;

terroristlar, terroristik guruhlar va/yoki tashkilotlar faoliyatini toʻxtatish.

4-modda

Soʻralayotgan Tomon maxsus aksilterror tuzilmalari tarkibiga kiruvchi qoʻshma aksilterror tadbirlar ishtirokchilari soʻrayotgan Tomon hududida boʻlgan davrida soʻrayotgan Tomon qonunlari va anʼanalarini hurmat qiladilar.

5-modda

Soʻrayotgan Tomon va tranzit Tomon soʻralayotgan Tomon maxsus aksilterror tuzilmalarning tarkibiga kiruvchi qoʻshma aksilterror tadbirlar ishtirokchilarining huquqiy holatini hurmat qiladilar.

6-modda

Tomonlar maxsus aksilterror tuzilmalar soʻrayotgan Tomon hududida boʻlgan davrida va boshqa Tomon hududi boʻylab tranzit vaqtida quyidagilarga rioya etadilar:

maxsus aksilterror tuzilmalar tarkibiga kiruvchi qoʻshma aksilterror tadbirlarning ishtirokchilariga nisbatan soʻrayotgan Tomon va tranzit Tomon qonunchiligi qoʻllanmaydi. Har qanday holatda ham ular soʻrayotgan Tomon yurisdiksiyasi ostida boʻladilar;

huquqbuzarlik sodir etilganida, qoʻshma aksilterror tadbirlar ishtirokchisi oʻz davlati qonunchiligiga koʻra, javobgarlikka tortiladi;

Tomonlarning har biri oʻz qonunchiligiga koʻra, maxsus aksilterror tuzilmalarning tarkibiga kiruvchi qoʻshma aksilterror tadbirlarning ishtirokchilarini soʻrayotgan Tomon hududida sodir etgan jinoyati uchun jinoiy taʼqib qilishga majburdir;

Tomonlar huquqiy yordam koʻrsatish doirasida protsessual harakatlarni amalga oshirishda, oʻz qonunchiligi va oʻz zimmasiga olgan xalqaro majburiyatlariga rioya qiladi.

7-modda

Qoʻshma aksilterror tadbirlarni oʻtkazish haqidagi qarorni soʻrayotgan va soʻralayotgan Tomonlar birgalikda yozma shaklda qabul qiladilar. Soʻrayotgan Tomon ShHT MATTning Ijroiya qoʻmitasi orqali qabul qilingan qarordan boshqa Tomonlarni xabardor qiladi.

8-modda

Soʻrayotgan Tomonning vakolatli organi qoʻshma aksilterror tadbirlarni oʻtkazish haqidagi qaror asosida soʻralayotgan Tomonning vakolatli organiga hamkorlik qilish haqida talabnoma yuboradi va bu toʻgʻrisida ShHT MATTning Ijroiya qoʻmitasini xabardor qiladi.

Koʻmaklashish toʻgʻrisidagi talabnoma yozma shaklda, jumladan, texnik vositalardan foydalangan holda matnni uzatish orqali ham amalga oshiriladi.

Koʻmaklashish toʻgʻrisidagi talabnoma soʻrayotgan Tomon vakolatli organining rahbari yoki uning oʻrnini bosuvchi shaxs tomonidan imzolanadi va/yoki ushbu organning gerbli muhri bilan tasdiqlanadi.

Koʻmaklashish toʻgʻrisidagi talabnomaning haqiqiyligi yoki mazmuniga shubha uygʻonganida, soʻralayotgan Tomon tasdiqlovchi qoʻshimcha hujjat soʻrashi mumkin.

Koʻmaklashish toʻgʻrisidagi talabnoma va unga ilova qilinayotgan hujjatlar hamda boshqa (operativ) maʼlumot, soʻrayotgan Tomon vakolatli organi tomonidan rus yoki xitoy tillarida yuboriladi.

9-modda

Koʻmaklashish toʻgʻrisidagi talabnoma oʻzida quyidagilarni jamlaydi:

soʻralayotgan Tomon vakolatli organining nomini;

soʻrayotgan Tomon vakolatli organining nomini;

talabnoma mazmunining bayoni va soʻralayotgan hamkorlik maqsadini koʻrsatgan holda uning asosini;

soʻralayotgan Tomonning maxsus aksilterror tuzilmasini qoʻshma aksilterror tadbirni oʻtkazish joyiga yetkazish va tuzilma boʻlib turgan davlatga qaytarish usullari hamda sharoitlari toʻgʻrisidagi maʼlumotni, jumladan, soʻralayotgan Tomonning davlat chegarasini kesib oʻtgan joy, vaqt va tartibi haqidagi axborotlarni;

tegishli talabnomani bajarish uchun zarur boʻlgan boshqa axborotlarni.

10-modda

Koʻmaklashish toʻgʻrisidagi talabnomani bajarish, soʻrayotgan Tomonning suvereniteti, xavfsizligi yoki boshqa mavjud manfaatlariga ziyon keltirishini taxmin qilinayotgan boʻlsa, talabnomani bajarish toʻliq yoki qisman rad etilishi mumkin.

Agar soʻrayotgan Tomon koʻrsatilgan talabnomani zudlik bilan bajarilishi uning hududida oʻtkazilayotgan tezkor-qidiruv faoliyati va jinoiy taʼqibga xalaqit beradi deb taxmin qilayotgan boʻlsa, u talabnomani bajarilishini keyinga qoldirishi yoki uni amalga oshirish uchun zarur deb topilgan shartlarga rioya qilgan holda bajarilishiga bogʻlash mumkin.

Koʻmaklashish toʻgʻrisidagi talabnomani bajarishning imkoni boʻlmaganida yoki rad etilgan holatda, soʻralayotgan Tomon zudlik bilan soʻrayotgan Tomonni bunda yozma xabardor etadi.

11-modda

ShHT MATTning Ijroiya qoʻmitasi oʻz vakolati doirasida Tomonlarga qoʻshma antiterroristik tadbirlarni tashkil etish va oʻtkazishda koʻmaklashadi.

12-modda

Soʻrayotgan Tomon soʻralayotgan Tomonning maxsus aksilterror tuzilmasi tarkibiga kiruvchi qoʻshma aksilterror tadbirlar ishtirokchilarini hamda bunday tadbirlarni oʻtkazish joyiga maxsus vosita va taʼminot materiallarini yetkazish uchun zarur shart-sharoitlarni yaratadi.

Soʻralayotgan Tomonning maxsus aksilterror tuzilmasi tarkibiga kiruvchi qoʻshma aksilterror tadbirlar ishtirokchilari va ularning front orqasi hamda texnik taʼminoti soʻrayotgan Tomon hisobidan amalga oshiriladi.

Soʻralayotgan Tomon maxsus aksilterror tuzilmasi tarkibiga kiruvchi qoʻshma aksilterror tadbirlar ishtirokchilarini oʻzining vakolatli organi bilan oʻzaro erkin harakatlanishini taʼminlaydi.

13-modda

Tomonlarning davlat chegaralarini maxsus aksilterror tuzilma tarkibiga kiruvchi qoʻshma aksilterror tadbirlar ishtirokchilari, ushbu tuzilmalarning alohida mutaxassislari tomonidan kesib oʻtishi, shuningdek, chegara orqali Tomonlar maxsus vositalari va taʼminot materiallarini oʻtkazishda, ularning qonunchiligi bilan oʻrnatilgan tegishli tartib-taomillarni tezlashtirgan holda bajarilishiga imkon yaratadi.

Soʻralayotgan Tomonning maxsus aksilterror tuzilmasi tarkibiga kiruvchi qoʻshma aksilterror tadbirlar ishtirokchilari va ushbu tuzilmalarning alohida mutaxassislari Tomonlar chegarasidan koʻrsatilgan tuzilmalar shaxsiy tarkibining nomma-nom tuzilgan roʻyxati hamda shaxsini tasdiqlovchi hujjati, maxsus vositalar va taʼminot materiallari esa soʻralayotgan Tomonning vakolatli organi tasdiqlagan hujjat boʻyicha, belgilangan oʻtish joylaridan oʻtadilar.

Koʻrsatilgan roʻyxat hamda hujjatlar rus va xitoy tillarida, agar Xitoy Tomoni oʻtkazilayotgan qoʻshma aksilterror tadbirda qatnashmasa, rus tilida tuziladi.

Maxsus vositalar va taʼminot materiallari bojxona hamda boshqa toʻlovlardan ozod etiladi, tekshiruvga jalb qilinmaydi, olib qoʻyilmaydi, musodara qilinmaydi.

14-modda

Soʻralayotgan Tomonning maxsus aksilterror tuzilmasi tarkibiga kiruvchi qoʻshma aksilterror tadbirlar ishtirokchilari yoki ushbu tuzilmalarning alohida mutaxassislari, shuningdek, maxsus vositalari va taʼminot materiallari soʻrayotgan Tomon hududi boʻyicha oʻtkazilishini soʻrayotgan Tomon vakolatli organi vakilining nazorati ostida amalga oshiriladi.

Soʻralayotgan Tomonning maxsus aksilterror tuzilmasi tarkibiga kiruvchi qoʻshma aksilterror tadbirlar ishtirokchilari yoki ushbu tuzilmalarning alohida mutaxassislari, shuningdek maxsus vositalar va taʼminot materiallarini tranzit Tomon hududiga oʻtkazish, uning vakolatli organi ruxsati va hamkorligida amalga oshiriladi.

15-modda

Soʻralayotgan Tomon qoʻshma aksilterror tadbirlarni tayyorlash va oʻtkazish uchun boshqaruv organi (keyingi oʻrinlarda — boshqaruv organi) tashkil etadi.

Boshqaruv organi rahbarini soʻrayotgan Tomon tayinlaydi va u ushbu lavozimga tayinlagan shaxsga boʻysinadi.

Qoʻshma aksilterror tadbirlar ishtirokchilari boshqaruv organi rahbariga boʻysinadi.

Boshqaruv organi tuzilmasi, maqsad va vazifalari boshqaruv organi rahbari tomonidan belgilanadi.

Boshqaruv organi tarkibiga qoʻshma aksilterror tadbirlarda ishtirok etuvchi maxsus aksilterror tuzilmalarning rahbarlari, Tomonlarning vakolatli organlari va ShHT MATT Ijroiya qoʻmitasidan vakillar kiritiladi.

Boshqaruv organida ish yuritish rus va xitoy tillarida, agar Xitoy Tomoni qoʻshma aksilterror tadbirlarga jalb etilmagan boʻlsa, ish rus tilida olib boriladi.

Boshqaruv organining asosiy vazifalari quyidagilar hisoblanadi:

holat toʻgʻrisida axborot yigʻish, umumlashtirish, kelib tushayotgan maʼlumotlarni baholash va tahlil qilish, qoʻshma aksilterror tadbirlar ishtirokchilariga hamda koʻrsatilgan tadbirni oʻtkazishga jalb qilinayotgan boshqa tuzilmalariga yetkazish;

soʻrayotgan Tomonning boshqaruv organi rahbari tomonidan qaror qabul qilishi uchun takliflar tayyorlash;

qoʻshma aksilterror tadbirlarni oʻtkazish rejasini ishlab chiqish va bajarish;

qoʻshma aksilterror tadbirlar ishtirokchilari oʻrtasida aloqa oʻrnatish va oʻzaro hamkorlikni tashkil etish;

qoʻshma aksilterror tadbirlarni oʻtkazishga tayyorgarlik va ehtimoliy salbiy oqibatlarni bartaraf etish boʻyicha choralar qabul qilish;

qoʻshma aksilterror tadbirlarning obyektlari hisoblangan shaxslar bilan muzokaralar olib borish va oʻtkazilishini tashkil etish zarurati yuzaga kelganida, uning taktikasini ishlab chiqish;

soʻrayotgan Tomon davlat hokimiyati va boshqaruv organlari bilan oʻzaro hamkorlikni amalga oshirish;

qoʻshma aksilterror tadbirlar oʻtkaziladigan joyda tezkor-qidiruv tadbirlari va tergov harakatlarini amalga oshirilishini taʼminlash;

qoʻshma aksilterror tadbirlariga yakun yasashni tashkil etish;

16-modda

Qoʻshma aksilterror tadbirlarni oʻtkazish davomida boshqaruv organi rahbari quyidagilarni amalga oshiradi:

boshqaruv organi mansabdor shaxslarini tayinlaydi;

qoʻshma aksilterror tadbirlarni oʻtkazish joyini belgilaydi;

qoʻshma aksilterror tadbirlarga tayyorgarlik koʻrish va oʻtkazishga rahbarlik qiladi;

soʻrayotgan va soʻralayotgan Tomonlar maxsus aksilterror tuzilmalari rahbarlari bilan kelishgan holda qoʻshma aksilterror tadbirlar ishtirokchilarining harakatlari va maxsus vositalar hamda taʼminot materiallarini qoʻllash toʻgʻrisida qaro qabul qiladi;

qoʻshma aksilterror tadbirlarni oʻtkazish rejasini tasdiqlaydi;

qoʻshma aksilterror tadbirlar ishtirokchilarining harakatlari hamda maxsus vositalar va taʼminot materiallarini qoʻllashni boshlash hamda tugatish vaqtini belgilaydi;

qoʻshma aksilterror tadbirlar ishtirokchilarining harakatlarini muvofiqlashtirilishini amalga oshiradi;

qoʻshma aksilterror tadbirlar ishtirokchilariga soʻrayotgan Tomon maxsus vositalari va taʼminot materiallarini qoʻllash tartibi toʻgʻrisida qonunchilik talablarini yetkazadi;

aksilterror tadbirlarning obyektlari hisoblangan shaxslar bilan muzokaralar olib borishga ruxsat beradi;

soʻrayotgan Tomon davlat hokimiyati organlarini, ShHT MATT Ijroiya qoʻmitasi va ommaviy axborot vositalari rahbarlarini qoʻshma aksilterror tadbirlarning borishi hamda uning natijalaridan xabardor qiladi;

soʻrayotgan Tomonga qoʻshma aksilterror tadbirini tugatish haqida taklif beradi va Tomonlarning vakolatli organlari hamda ShHT MATT Ijroiya qoʻmitasiga tadbir natijalari toʻgʻrisida hisobot taqdim etadi.

17-modda

Qoʻshma aksilterror tadbirni oʻtkazishga rahbarlik qilishga boshqaruv organi tayinlagan shaxsdan tashqari, boshqa qandaydir shaxslarning aralashuviga yoʻl qoʻyilmaydi.

18-modda

Soʻralayotgan Tomon maxsus aksilterror tuzilmasining rahbari qoʻshma aksilterror tadbirni oʻtkazish rejasini tayyorlash davrida oʻz Tomonining vakolatli organi bilan kelishgan holda ular tomonidan boshqarilayotgan maxsus aksilterror tadbirda qatnashishdan bosh tortish huquqiga ega. Bu holatda rad etish yozma shaklda bildirgi bilan rasmiylashtiriladi.

Qoʻshma aksilterror tadbirlar ishtirokchilarining harakatlari va maxsus vositalar hamda taʼminot materiallarini qoʻllash toʻgʻrisida qaror boshqaruv organi rahbarining yozma buyrugʻi bilan rasmiylashtiriladi.

Taʼminotning maxsus vositalari hamda materiallarini qoʻllanishi nazarda tutilgan qoʻshma aksilterror tadbirlarda maxsus aksilterror tuzilma harakatlarini boshlashi bilan faqat koʻrsatilgan tuzilmalarning rahbarlari ushbu tuzilma bilan boshqaruv organi rahbarining buyrugʻini bajarishda ularning harakatlarini boshqaradi.

Bunda maxsus vositalar va taʼminot materiallarini qoʻllashni amalga oshiruvchi qoʻshma aksilterror tadbirlar ishtirokchilarining harakatlari javobgarlikka tortilishini yoʻqqa chiqaruvchi harakat sifatida qaraladi.

Qoʻshma aksilterror tadbirlarni oʻtkazishda, shunday tadbirlarni oʻtkazish rejasida nazarda tutilgan harakatlarni sodir etish tartibi boshqaruv organi tomonidan, soʻralayotgan Tomon maxsus aksilterror tuzilma rahbari bilan kelishgan holda oʻzgartirilishi mumkin.

19-modda

Qoʻshma aksilterror tadbirlarni oʻtkazishda maxsus vositalar va taʼminot materiallarini qoʻllash, soʻrayotgan Tomon qonunchiligiga muvofiq amalga oshiriladi.

20-modda

Soʻrayotgan Tomonga chegaradosh Tomon xavfsizligiga xavf-xatar yuzaga kelganida, boshqaruv organi oʻsha Tomon vakolatli organini xavf-xatar xususiyati va uning ehtimoliy koʻlamidan xabardor etadi hamda soʻrayotgan Tomon hududida ushbu xavf-xatarni toʻxtatilishi boʻyicha choralar qabul qiladi.

21-modda

Qoʻshma aksilterror tadbirini borishi haqida maʼlumot soʻrayotgan Tomon oʻz qonunchiligiga muvofiq, boshqaruv organi tomonidan belgilanadigan shakl va hajmda yoki uning topshirigʻi bilan jamoatchilik bilan aloqa qiluvchi masʼul shaxs tomonidan yetkaziladi.

22-modda

Qoʻshma aksilterror tadbirga tayyorgarlik va uni oʻtkazishda, tadbir ishtirokchilariga quyidagilarni tarqatishga ruxsat etilmaydi:

maxsus aksilterror tadbir ishtirokchilari toʻgʻrisida;

qoʻshma aksilterror tadbirini oʻtkazishning maxsus texnik tomonlari va taktikasini fosh qiluvchi;

maxsus vositalar va taʼminot materiallarining xususiyati toʻgʻrisida;

soʻrayotgan Tomon qonunchiligi bilan tarqatilishi taqiqlangan boshqa maʼlumotlarni.

23-modda

Qoʻshma aksilterror tadbirni tugatish va boshqaruv organini bekor qilish toʻgʻrisidagi qarorni soʻrayotgan Tomon qabul qiladi.

Soʻrayotgan Tomon qoʻshma aksilterror tadbirni tugatish va uning yakunlari toʻgʻrisida boshqa Tomonlarni va ShHT MAKTning Ijroiya qoʻmitasini xabardor qiladi.

Soʻrayotgan Tomonning vakolatli organi Tomonlarning vakolatli organlari va ShHT MATTning Ijroiya qoʻmitasiga qoʻshma aksilterror tadbirning borishi toʻgʻrisida yakuniy va tahliliy materiallarni taqdim etadi.

24-modda

Soʻralayotgan Tomonning maxsus aksilterror tuzilmalari tarkibiga kiruvchi qoʻshma aksilterror tadbir ishtirokchilari va soʻrayotgan Tomonga tegishli maxsus vositalar hamda taʼminot materiallarini Tomon hududiga qaytishini taʼminlaydi.

Soʻrayotgan Tomonning maxsus aksilterror tuzilmalari tarkibiga kiruvchi qoʻshma aksilterror tadbir ishtirokchilarini soʻralayotgan Tomon hududidan olib chiqish rejasi va muddatlari soʻralayotgan Tomonning vakolatli organi tomonidan soʻrayotgan Tomon vakolatli organi bilan kelishgan holda belgilanadi va tasdiqlanadi.

25-modda

Soʻrayotgan Tomonga tegishli boʻlgan maxsus vositalar hamda taʼminot materiallari uning mulki hisoblanadi va soʻralayotgan Tomon yoki tranzit Tomon qandaydir yoʻllar bilan ushbu mulkni ushlab qolishi va/yoki oʻz ixtiyoriga oʻtkazib ololmaydi.

Qoʻshma aksilterror tadbirlar tugashi bilan foydalanilmagan maxsus vositalar hamda taʼminot materiallari soʻralayotgan Tomon hududidan soʻrayotgan Tomoniga olib chiqib ketilishi zarur.

Agar alohida vaziyat sabab maxsus vositalar hamda taʼminot materiallarini olib chiqishning imkoni boʻlmasa, soʻrayotgan va soʻralayotgan Tomonlarning oʻzaro kelishuviga koʻra, soʻralayotgan Tomonning qonunchiligiga muvofiq, uning hududida sotilishi yoki yoʻq qilinishi mumkin.

26-modda

Soʻrayotgan Tomon qoʻshma aksilterror tadbirlarda ishtirok etayotgan soʻralayotgan Tomonga, agar boshqaruv organi tomonidan qoʻyilgan topshiriqlarni bajarish chogʻida qandaydir, jumladan, soʻralayotgan Tomonning hududida boʻlgan jismoniy, shuningdek yuridik shaxslar hayotiga, sogʻligi va mulkiga va soʻrayotgan Tomonga yetkazilgan boshqa har qanday oʻlim, tan jarohati olish bilan bogʻliq keltirilgan ziyon boʻyicha shikoyat qilishdan bosh tortadi.

Agar soʻrayotgan Tomon maxsus aksilterror tuzilmalari tarkibiga kiruvchi qoʻshma antiterroristik tadbir ishtirokchisi boshqaruv organi tomonidan qoʻyilgan topshiriqlarni bajarish chogʻida qandaydir shaxsga, tashkilotga va soʻrayotgan Tomonning oʻziga ziyon keltirsa, u holda bunday zarar soʻrayotgan Tomon qonunchilikka muvofiq qoplanadi.

27-modda

Soʻrayotgan Tomon maxsus aksilterror tuzilmalari tarkibiga kiruvchi qoʻshma aksilterror tadbir ishtirokchilari soʻrayotgan Tomon hududida zarar keltirilsa va bu zarar mazkur Kelishuvning 26-moddasida nazarda tutilmagan boʻlsa, ushbu keltirilgan zarar manfaatdor Tomonlar oʻrtasida kelishuvga koʻra qoplanadi.

28-modda

Soʻrayotgan Tomonga keltirilgan maxsus vositalar hamda taʼminot materiallarining yoʻqotilishi, toʻliq yoki qisman darajada yoʻq qilinishi bilan bogʻliq sarf-xarajatlarini qoplab berish tartibi manfaatdor Tomonlar oʻrtasida kelishuvga koʻra belgilanadi.

29-modda

Qoʻshma aksilterror tadbirlar davomida soʻralayotgan Tomonning qoʻshma aksilterror tadbirlar ishtirokchilarining hayoti va sogʻligʻiga yetkazilgan zarar, soʻrayotgan Tomonning qonunchiligida koʻrsatilgan tartibda qoplanadi va bunday holat soʻrayotgan Tomonning qoʻshma aksilterror tadbir ishtirokchilariga, ular shunga oʻxshash vaziyatlarda koʻrgan zarari uchun ham qoʻllaniladi.

Bunda soʻrayotgan Tomon maxsus aksilterror tuzilmalari tarkibiga kiruvchi qoʻshma aksilterror tadbir ishtirokchilari, ularning oila aʼzolari uchun oʻsha Tomonning qonunchiligida belgilangan imtiyozlar, kafolat va kompensatsiya pullari toʻliq hajmda saqlanadi. Bunday tartib soʻrayotgan Tomon maxsus aksilterror tuzilmalari tarkibiga kiruvchi qoʻshma antiterroristik tadbir ishtirokchilarini soʻralayotgan Tomon hududida, shuningdek boshqa Tomon hududida tranzit vaqtida boʻlgan davrda uning hayoti va sogʻligʻiga zarar keltirilganida ham qoʻllanadi.

30-modda

Tomonlar oʻz qonunchiligiga muvofiq, mazkur Kelishuvni amalga oshiruvchi vakolatli organlarni belgilaydi va depozitariyga bir vaqtning oʻzida xabarnoma bilan mazkur Kelishuv kuchga kirishi uchun zarur boʻlgan ichki davlat tartib-taomillarini bajarilganligi haqida depozitariyni xabardor qiladi shuningdek, depozitariyga vakolatli organni va uning nomlarini oʻzgargani toʻgʻrisida axborot beradi.

31-modda

Tomonlar oʻzaro kelishuvga koʻra, Shanxay hamdoʻstlik tashkiloti Mintaqaviy antiterroristik tuzilmasi hamkorligida qoʻshma aksilterror tadbirlarda ishtirok etuvchi maxsus aksilterror tuzilmalarni tayyorlash boʻyicha kelishilgan dasturlarni ishlab chiqadi shuningdek, maxsus aksilterror tuzilmalarning birgalikdagi oʻquv mashgʻulotlarini oʻtkazadi, ularning mutaxassislarini stajirovkasini amalga oshiradi.

32-modda

Tomonlar mazkur Kelishuvni izohlash yoki qoʻllash bilan bogʻliq yuzga keladigan munozarali masalalarni konsultatsiya va muzokaralar oʻtkazish yoʻli bilan hal etiladi.

33-modda

Mazkur Kelishuv Tomonlar ishtirokchilari boʻlgan boshqa xalqaro kelishuvlariga koʻra belgilangan haq-huquqlari hamda majburiyatlariga daxl qilmaydi.

34-modda

Mazkur Kelishuv doirasida hamkorlikni amalga oshirishda Tomonlar ishchi til sifatida rus va xitoy tillaridan foydalanadi.

35-modda

Tomonlarning roziligi bilan mazkur Kelishuvga bayonnomalar bilan rasmiylashtiriladigan oʻzgartishlar kiritilishi mumkin, ular mazkur Kelishuvning 36-moddasida belgilangan tartibda kuchga kiradi.

36-modda

Mazkur Kelishuv nomaʼlum muddatga tuziladi va depozitariydan Tomonlar mazkur Kelishuvni kuchga kirishi uchun zarur boʻlgan ichki davlat tartib-taomillarini bajargani toʻgʻrisidagi yozma shakldagi toʻrtinchi xabarnomani qabul qilganidan keyin 30-kun kuchga kiradi.

Mazkur Kelishuv depozitariysi Shanxay Kotibiyati hisoblanadi va Kelishuv imzolanganidan keyin 15 kun ichida mazkur Kelishuvning tasdiqlangan nusxasini Tomonlarga joʻnatadi.

Depozitariy Tomonlardan mazkur Kelishuvning 30-moddasida koʻrsatilganidek, oʻzining vakolatli organi toʻgʻrisidagi xabarnomani olgan kunidan boshlab oʻn besh kun ichida boshqa Tomonlarga bu haqida xabar beradi.

Mazkur Kelishuv 2001-yil 15-iyundagi Terrorizm, separatizm va ekstremizmga qarshi kurashish toʻgʻrisidagi Shanxay konvensiyasining ishtirokchilari boʻlgan davlatlarning birlashishi uchun ochiq. Qoʻshilayotgan davlat uchun mazkur Kelishuv uning qoʻshilishi toʻgʻrisidagi hujjat depozitariy tomonidan olingan kundan oʻttizinchi kuni kuchga kiradi.

Mazkur Kelishuv 2001-yil 15-iyundagi Terrorizm, separatizm va ekstremizmga qarshi kurashish toʻgʻrisidagi konvensiyasining aʼzosi hisoblangan istalgan Tomonlarga nisbatan oʻz kuchida qoladi.

2006-yil 15-iyunda Shanxay shahrida, rus va xitoy tillarida bitta asl nusxada tuzildi, ikkala matn ham bir xil kuchga ega.

(imzolar)