Ikki tomonlama munosabatlarni rivojlantirish toʻgʻrisida

24.11.2010

OʻZBEKISTON RESPUBLIKASI BILAN QATAR DAVLATI OʻRTASIDA

Bitim

Oʻzbekiston Respublikasi va Qatar Davlati, bundan keyin “Tomonlar” deb ataluvchilar,

oʻzaro hurmat prinsipiga asoslangan holda hamkorlik va doʻstlik aloqalarini rivojlantirish va kuchaytirish istagida,

BMT Nizomining maqsad va qoidalariga sodiqlikni taʼkidlagan holda,

ikki mamlakat xalqlarining tarixi, madaniyati va anʼanalarining yaqinligi, ular oʻrtasidagi aloqalarning mustahkamlanishiga asos boʻlishiga ishonib,

quyidagilar toʻgʻrisida kelishib oldilar:

1-modda

Tomonlar ikki mamlakat oʻrtasida siyosiy, iqtisodiy, savdo va madaniy sohalarda aloqalarni oʻzaro ishonch va hamjihatlik asosida rivojlantirishga intiladilar.

2-modda

Tomonlar munosabatlarni yanada rivojlantirish maqsadida, oʻzaro manfaatlarni ifodalovchi mintaqaviy va xalqaro masalalar boʻyicha maslahatlashuvlar oʻtkazadilar va fikr almashadilar.

3-modda

Tomonlar tajriba almashish va iqtisodiy, savdo, madaniy, ilmiy, texnologik, aloqa va axborot sohalarida hamkorlikning turli xil jihatlarini rivojlantirish, sport va turizm sohalarida imkoniyatlarni kengaytirish va rivojlantirishga koʻmaklashadilar.

4-modda

Tomonlar mushtarak dasturlar doirasida iqtisodiyot, menejment, diplomatiya, turizm sohalarida kadrlar tayyorlash va ularning malakasini oshirish boʻyicha tajriba almashishga, shuningdek professor-oʻqituvchilar va ilmiy guruhlar almashinuvini ragʻbatlantirishga kelishdilar.

5-modda

Tomonlar ijtimoiy tashkilotlar, ishbilarmonlar doiralari, ilmiy va madaniy jamiyatlar oʻrtasida hamkorlikni ragʻbatlantirishga hamda ikki mamlakat shaharlari oʻrtasida qoʻshma loyihalarni rivojlantirishga qaratilgan chora-tadbirlar koʻrishga kelishib oldilar.

6-modda

Tomonlar tarixiy va madaniy merosni muhofaza qilishda hamkorlik qiladilar hamda xalqaro tashkilotlar doirasida xalqaro madaniyat, tarixiy yodgorliklar sanʼat, arxeologiya va boshqa yodgorliklarni himoya qilishga intiladilar.

7-modda

Ushbu Bitim qoidalari boshqa davlat manfaatlariga, ikki mamlakatning boshqa davlatlar bilan tuzilgan ikki va koʻp tomonlama bitimlaridan kelib chiqadigan majburiyatlariga daxl qilmaydi.

8-modda

Tomonlarning oʻzaro kelishuvi asosida ushbu Bitimga uning ajralmas qismi hisoblanadigan alohida protokollar bilan rasmiylashtiriladigan oʻzgartish hamda qoʻshimchalar kiritilishi mumkin va mazkur protokollar ushbu Bitimning 9-moddasida belgilangan tartibga muvofiq kuchga kiradi.

9-modda

Ushbu Bitim Tomonlardan birining boshqa Tomonni ushbu Bitimning kuchga kirishi uchun zarur boʻlgan davlat ichki protseduralarini bajarganligi toʻgʻrisida diplomatik kanallar orqali soʻnggi yozma xabarnomani olgan kundan boshlab kuchga kiradi.

Bitim Tomonlardan biri uning amal qilishini toʻxtatish niyati toʻgʻrisida diplomatik kanallar orqali yozma ravishda xabardor qilmaguncha amal qiladi.

Mazkur Bitimning amal qilishi boshqa Tomon tegishli nota olganidan olti oy oʻtgandan keyin tugatiladi.

Doha shahrida 2010-yil 24-noyabrda oʻzbek, arab va ingliz tillarida ikki, asl nusxada imzolandi, bunda barcha matnlar bir xil kuchga ega.

Ushbu Bitim qoidalarini talqin qilishda kelishmovchiliklar yuzaga kelgan hollarda ingliz tilidagi matn ustuvor hisoblanadi.

(imzolar)