Terrorizm, transmilliy uyushgan jinoyatchilik va jinoyatning boshqa turlariga qarshi kurashda va ularni oldini olishda hamkorlik qilish toʻgʻrisida

10.09.2010

OʻZBEKISTON RESPUBLIKASI HUKUMATI BILAN VETNAM SOTSIALISTIK RESPUBLIKASI HUKUMATI OʻRTASIDA

Bitim

Oʻzbekiston Respublikasi Hukumati bilan Vyetnam Sotsialistik Respublikasi Hukumati (bundan keyin Tomonlar deb ataluvchilar);

ikki davlat oʻrtasidagi hamkorlikni yanada kuchaytirish va mavjud doʻstona munosabatlarni mustahkamlashni istab;

oʻz fuqarolarining hayoti, mulki fundamental huquq va erkinliklarini himoyalash zarurligini anglab;

terrorizm, transmilliy uyushgan jinoyatchilik va jinoyatning boshqa turlariga qarshi kurashish sohasidagi xalqaro shartnomalarni inobatga olib;

suverenitet, mustaqillik, hududiy daxlsizlik, ichki ishlariga aralashmaslik, tenglik va oʻzaro manfaatdorlik prinsiplarini tan olib;

terrorizm, transmilliy uyushgan jinoyatchilik va jinoyatning boshqa turlari tomonidan tahdidni oshib borayotganligidan jiddiy tashvishlanib;

transmilliy uyushgan jinoyatchilik va jinoyatning boshqa turlaridan tushadigan mablagʻ terrorizmni moliyalashtirishning asosiy manbalaridan biri ekanligini anglab;

terrorizm, transmilliy uyushgan jinoyatchilik va jinoyatning boshqa turlariga samarali qarshi kurashda va ularni oldini olishda xalqaro hamkorlik muhim ahamiyat kasb etishini anglab;

terrorizm va transmilliy uyushgan jinoyatchilik hamda jinoyatning boshqa turlariga qarshi kurashda va ularni oldini olishda kuchlarini birlashtirishni maqsad qilib;

oʻz davlatlarining mavjud qonun hujjatlariga asoslanib;

quyidagilar toʻgʻrisida kelishib oldilar:

1- modda Bitimning maqsadi

Tomonlar ushbu Bitim va oʻz davlatlarining qonun hujjatlari doirasida maʼlumotlar va tajribalar almashish orqali jinoyatchilikni oldini olish, fosh qilish va unga qarshi kurashishda hamkorlik oʻrnatadilar.

2- modda Hamkorlik sohalari

Tomonlar ushbu Bitim va oʻz davlatlarining qonun hujjatlari doirasida jinoyatchilikni, xususan quyidagi jinoiy harakatlarni oldini olish, fosh qilish va unga qarshi kurashishda hamkorlik qiladilar:

a) terrorizm va shu kabi jinoiy faoliyatni moliyalashtirish;

b) giyohvandlik vositalari va psixotrop moddalari hamda ularning prekursorlarini ishlab chiqarish, saqlash, tashish yoki qonunga xilof ravishda muomala qilish;

v) odam savdosi;

g) jinoiy faoliyatdan olingan daromadlarni oshkorlashtirish (legallashtirish);

d) qurol-yarogʻlar, oʻq-dorilar, portlatish moslamalari va boshqa xavfli moddalari bilan qonunga xilof ravishda muomala qilish, ularni ishlab chiqarish, saqlash va foydalanish;

e) elektron va kompyuter vositalari yordamida sodir etilgan jinoyatlar;

j) xalqaro iqtisodiy jinoyatlar;

z) kontrabanda va bojxona haqidagi qonun hujjatlarini buzish;

i) Tomonlar zarur deb topgan jinoyatning boshqa turlari.

Ushbu Bitim jinoiy ishlar boʻyicha huquqiy yordam koʻrsatish va ekstraditsiya masalalariga daxl qilmaydi.

3-modda Hamkorlik shakllari

Ushbu Bitimning 2-moddasida mustahkamlangan hamkorlikni qoʻllab-quvvatlash maqsadida Tomonlar:

1. Milliy qonunchilik va oʻzlarining vakolatlari doirasida quyidagi axborot va hujjatlar bilan almashadilar:

a) ushbu Bitimning 2-moddasida belgilangan jinoyat turlariga daxldor jinoiy harakatlar va faoliyatni oldini olish, fosh qilish va ularga qarshi kurashishni takomillashtirish maqsadidagi maʼlumotlar;

b) boshqa Tomonning yurisdiksiyasi ostida sodir etilgan jinoyat ijrochilari haqida axborotlar va shaxsiy maʼlumotlar;

v) jinoyatchilikni oldini olish, fosh qilish va unga qarshi kurashishga doir oʻzaro kelishilgan boshqa axborotlar.

2. Lozim topilgan taqdirda huquq-tartibot organlari tomonidan belgilangan tarzda ularning yurisdiksiyasi ostida sodir etilgan jinoyatlar boʻyicha maxsus tadbirlarni milliy qonunchilik va tegishli vakolatlar doirasida amalga oshirilishini topshirish.

3. Ushbu Bitimda belgilangan jinoyatlarga qarshi kurash boʻyicha Tomonlarning milliy qonun hujjatlari toʻgʻrisida tegishli axborotlar bilan almashish.

4. Ushbu Bitim doirasida texnik va boshqaruv malaka sohasida qiyosiy tahlilni amalga oshirish va tajribalar bilan almashish maqsadida rasmiy va ekspertlar guruhi yoki oʻquv mashgʻulotlari ishtirokchilarini boshqa davlatga yuborish va qabul qilish.

5. Maxsus tadbirlar, jinoyatni oldini olish va unga qarshi kurashishda ilmiy va texnologik tadqiqotlar oʻtkazish, ishlab chiqarish tadbirlari va maxsus texnik uskunalar hamda huquq-tartibot organlari tomonidan ishlatiladigan qoʻshimcha vositalardan foydalanishda tajriba bilan almashish.

6. Terrorizmga qarshi kurashish, garovga olingan shaxslarni tutqunliqdan ozod qilish va Tomonlar zarur deb hisoblagan boshqa sohalarda huquq-tartibotni saqlash boʻyicha oʻqitish va tayyorlash hamda huquq-tartibot oʻquv va tayyorlov tuzilmasini yaratishda koʻmak berish yoʻli bilan hamkorlik qilish.

7. Ushbu Bitimda nazarda tutilgan sohalardagi nashrlar va amalga oshirilgan ilmiy izlanish natijalari bilan almashish.

4-modda Vakolatli organlar

1. Ushbu Bitim maqsadlarini amalga oshirish uchun Tomonlarning vakolatli organlari oʻzlarining belgilangan vakolatlari doirasida bir-birlari bilan toʻgʻridan toʻgʻri yoki vakil(lar)i orqali aloqalarni amalga oshiradilar.

Tomonlarning vakolatli organlari:

a) Oʻzbekiston Respublikasi Hukumati nomidan:

1) Tashqi ishlar vazirligi;

2) Ichki ishlar vazirligi;

3) Milliy xavfsizlik xizmati;

4) Bosh prokuratura;

5) Narkotik moddalarni nazorat qilish milliy axborot-tahlil markazi;

6) Davlat bojxona qoʻmitasi.

b) Vyetnam Sotsialistik Respublikasi Hukumati nomidan:

1. Jamoat xavfsizligi vazirligi;

2. Tashqi ishlar vazirligi;

3. Oliy xalq prokuraturasi;

4. Moliya vazirligi;

2. Tomonlar oʻzlarining vakolatli organlari roʻyxatiga kiritilgan oʻzgarishlar toʻgʻrisida bir-birlarini darhol diplomatik kanallar orqali xabardor etadilar.

5- modda Alohida hujjatlar tuzish holatlari

Vakolatli organlar milliy qonunchilik va oʻzlarining vakolatlariga asosan hamda mazkur Bitim doirasida maxsus dastur va tadbirlarni nazarda tutuvchi alohida yozma kelishuvlar tuzishlari mumkin.

6- modda Axborot almashish

1. Tomonlar milliy qonunchilik va oʻz vakolatlari doirasida jinoyatlarni fosh qilish va oldini olish, huquqbuzarlarni qoʻlga olish, sudlovga tortish yuzasidan ularning huquq-tartibot organlari soʻrov asosida bir-birlariga xabar berishlarini taʼminlaydilar. Soʻralayotgan Tomon milliy qonunchiligida bunday murojaat sud idoralariga qilinishi lozimligi belgilangan boʻlsa, ushbu modda qoidalari qoʻllanilmaydi.

2. Ushbu moddaning 1 -bandi zarur hisoblangan axborotlarni, xususan huquq-tartibotni taʼminlash boʻyicha axborotlarni, Tomonlar oʻz tashabbuslari bilan milliy qonunchilik asosida bir-birlariga berishlariga toʻsqinlik qilmaydi.

3. Ushbu Bitimga muvofiq axborot berish va/yoki yordam koʻrsatish haqidagi soʻrov yozma ravishda rasmiylashtirilib, soʻrayotgan Tomonning vakolatli organi rahbari yoki tayinlangan vakili tomonidan imzolanadi va rasmiy muhr bilan tasdiqlanadi.

4. Axborot berish va/yoki yordam koʻrsatish haqidagi soʻrovda quyidagilar aks ettirilishi lozim:

a) yordam soʻrayotgan vakolatli organning nomi;

b) ishning mohiyati va unga tegishli maʼlumotlar hamda qoʻllaniladigan huquq normalari;

v) soʻrovda koʻrsatilgan shaxsning nomi, millati va doimiy turar joyi;

g) soʻrovning maqsadi;

d) soʻrovni bajarishda soʻralayotgan Tomon rioya qilishi zarur boʻlgan alohida tartib tavsifini asoslanib berilishi;

e) soʻrov ijrosini amalga oshirish muddati;

j) soʻrovning bajarilishi uchun lozim boʻlgan har qanday boshqa hujjatlar.

z) agar lozim topilsa, soʻrovnomani maxfiyligini taʼminlovchi alohida koʻrsatmalar.

5. Soʻrayotgan Tomon soʻralayotgan Tomon axborotlariga joriy qilingan maxfiylik darajalarga rioya qilinishini taʼminlaydi

6. Tomonlar maʼlumotlarni toʻgʻridan -toʻgʻri yoki diplomatik kanallar yoxud Interpol maʼlumotlarni almashish tizimi orqali yuborish yoʻli bilan muloqotga kirishadilar.

7- modda Nazorat ostida yetkazib berish

Tomonlar oʻz milliy qonunlari va xalqaro majburiyatlari asosida giyohvandlik vositalari va psixotrop moddalar xalqaro noqonuniy muomalada boʻlishining oldini olish hamda bunday muomalada ishtirok etayotgan shaxslarni aniqlash maqsadida Tomonlarning vakolatli organlari bilan oʻzaro kelishilgan holda nazorat ostida tovarlar yetkazib berish usulidan foydalanadi, yaʼni noqonuniy muomalaga kiritilgan giyohvandlik vositalari va psixotrop moddalarning oʻz nazoratlari ostida bojxona hududiga olib kirilishiga, bojxona hududidan olib chiqilishiga yoki bojxona hududi orqali tranzit olib oʻtilishiga yoʻl qoʻyadilar.

8- modda Hamkorlikni cheklash

1. Agar soʻrovni bajarish inson huquqlarining buzulishiga olib kelsa, davlat suvereniteti yoki xavfsizligiga zarar yetkazsa yoxud soʻralayotgan Tomonning qonunchiligi yoki xalqaro majburiyatlariga zid kelsa, uning bajarilishi toʻlaligicha yoki qisman rad etilishi mumkin.

2. Soʻrovni bajarishni rad etish toʻgʻrisida qaror qabul qilingan holda, Tomonlarning vakolatli organlari bu toʻgʻrisida rad etilishning sababini koʻrsatgan holda, bir-birlarini xabardor qiladilar. Bunday rad javobi mazkur Bitimning ijrosiga taʼsir qilmaydi.

9-modda Shaxsiy maʼlumotlarni himoya qilish

1. Ushbu Bitimni qoʻllashda shaxsiy maʼlumotlarni berilishi va u bilan ishlanishi har bir Tomonning milliy qonunchiligi va Interpol doirasida amalda boʻlgan qoidalariga mos kelishi lozim.

2. Ushbu Bitim maqsadi yoʻlida soʻrayotgan Tomon soʻralayotgan Tomonning talabiga asosan barcha axborot, hujjatlar, namunalar yoki texnik uskunalarning maxfiyligini taʼminlash yuzasidan zarur choralarni koʻrishi lozim.

3. Ushbu Bitim doirasida almashinilayotgan axborot, hujjatlar, namunalar va texnik uskunalar uchinchi tomonga boshqa Tomonning yozma roziligisiz maʼlum qilinmasligi, oʻtkazilmasligi yoki berilmasligi lozim.

4. Ushbu moddaning 1-bandi qoidalarini cheklamagan holda, quyidagi qoidalar ushbu Bitimni qoʻllash yuzasidan berilgan shaxsiy maʼlumotlar bilan ishlashga tatbiq etiladi:

a) maʼlumotlardan, agar ushbu Bitimda bunday maʼlumotlar berilishi mumkinligi belgilangan boʻlsa, soʻrayotgan Tomon faqat Bitim maqsadlari yoʻlida foydalanishi mumkin, bunday maʼlumotlar faqat soʻralayotgan Tomon ruxsati olingandan keyingina va soʻrayotgan Tomon qonunchiligiga muvofiq boshqa maqsadlarda foydalanilishi uchun berilishi mumkin.

b) maʼlumotlar Tomonlar tayinlagan tegishli sud, ichki ishlar idoralari yoxud boshqa huquq-tartibot organi tomonidan foydalanilishi mumkin, bunday organlar roʻyxati boshqa tomonga xabardor etilishi lozim.

v) maʼlumotlarni berayotgan Tomon uning aniqligini kafolatlaydi, agar maʼlumotni bunday tarzda bera olmagan taqdirda, bu haqda soʻrayotgan Tomonni darhol xabardor etadi; shundan soʻng soʻrayotgan Tomon tegishli maʼlumotlarni tuzatishi yoki yoʻq qilishi lozim.

g) Tomonlardan biri jabrlanuvchi tomonga nisbatan oʻz milliy qonunchiligida belgilangan majburiyatlaridan boʻyin tovlash maqsadida boshqa Tomonning noaniq maʼlumot berganligini vaj qilib arz qilmaydi.

d) maʼlumotlarning berilishi va qabul qilinishi qayd etilishi lozim. Tomonlar bunday qayd etishni yurituvchi muassasalar roʻyxati bilan almashadilar.

e) maʼlumotlarni berish va unga kirish tegishli shaxs tomonidan soʻralayotgan Tomon milliy qonunchiligi asosida amalga oshiriladi. Maʼlumotlar bunday shaxsga faqat ushbu maʼlumotlarni dastlabki bergan Tomon ruxsati bilan berilishi mumkin.

5. Har bir Tomon shaxs huquqlarini buzilishini oldini olish va cheklash maqsadida boshqa Tomon tarafidan berilgan axborotlardan foydalanilishi ustidan kuzatuv olib boradi.

10- modda Xalqaro majburiyatlar

Ushbu Bitim qoidalari, Oʻzbekiston Respublikasi yoki Vyetnam Sotsialistik Respublikasi ishtirok etgan boshqa xalqaro shartnomalaridan kelib chiquvchi huquq va majburiyatlariga daxl qilmaydi.

11- modda Xarajatlar

Tomonlar, agar oʻzgacha kelishib olinmagan boʻlsa, ushbu Bitim qoidalarini bajarilishi bilan bogʻliq xarajatlarning oʻz hududida kelib chiqqan qismini qoplaydilar.

12- modda Qoʻshimcha va oʻzgartirishlar

Ushbu Bitimga har qanday vaqtda Tomonlarning oʻzaro roziligi bilan qoʻshimcha va oʻzgartirishlar kiritilishi mumkin va yozma ravishda bayonnomalar shaklida rasmiylashtirilishi lozim. Bunday qoʻshimcha va oʻzgartirishlar Tomonlar tomonidan belgilangan muddatda kuchga kiradi.

13- modda Hamkorlikni amalga oshirish tili

Ushbu Bitim doirasida hamkorlikni amalga oshirishda ingliz tilidan foydalaniladi.

14- modda Nizolarni hal etish

Ushbu Bitim qoidalarini qoʻllash yoki talqin qilish bilan bogʻliq boʻlgan barcha nizolar Tomonlar oʻrtasida toʻgʻridan toʻgʻri muzokaralar olib borish yoki diplomatik kanallar orqali hal etiladi.

15- modda Bitimning kuchga kirishi, amal qilishi va oʻz kuchini yoʻqotishi

1. Ushbu Bitim uning kuchga kirishi uchun zarur boʻlgan tegishli davlat ichki talablarini Tomonlar bajarganliklari toʻgʻrisida soʻngi xabarnoma olingan sanadan 60 kundan soʻng kuchga kiradi.

2. Ushbu Bitim 5 (besh) yil muddat davomida amal qiladi. Bundan keyin, Tomonlardan birontasi ushbu Bitimning amal qilishini tugatish niyati toʻgʻrisida uning muddati tugashidan 6 (olti) oy ilgari boshqa Tomonni yozma ravishda xabardor qilmasa, u keyingi 5 (besh) yillik muddatga oʻz-oʻzidan uzayaveradi.

3. Ushbu Bitim amal qilishining toʻxtatilishi, agar Tomonlar oʻzgacha ahdlashib olmagan boʻlsalar, ushbu Bitim asosida olingan axborot va maʼlumotlarning maxfiyligini saqlash borasidagi Tomonlarning majburiyatlariga daxl qilmaydi.

Yuqoridagilarni tasdiqlab, oʻz Hukumatlari tomonidan tegishli vakolat olgan quyida imzo chekuvchilar ushbu Bitimni imzoladilar.

Toshkent shahrida 2010-yil 10-sentabrda ikki asl nusxada, har biri oʻzbek, vyetnam va ingliz tillarida tuzildi, bunda barcha matnlar bir xil kuchga ega.

Ushbu Bitim qoidalarini talqin qilishda kelishmovchiliklar yuzaga kelgan holda, ingliz tilidagi matn ustuvor hisoblanadi.

(imzolar)