Sport kurashlari boʻyicha ixtisoslashtirilgan olimpiya zaxiralari maktabini tashkil etish toʻgʻrisida (PQ-1822-son)

24.09.2012

Oʻzbekiston Respublikasi Prezidentining

Qarori

Respublikamizda kuchli maktabga ega boʻlgan hamda Olimpiya oʻyinlari va xalqaro musobaqalarda yuqori natijalarga erishgan sport kurashini olimpiya sport turlaridan biri sifatida yanada keng rivojlantirish, iqtidorli yoshlarni erkin va yunon-rum kurashi bilan muntazam shugʻullanishga faol jalb etish, ularning sport mahoratini oshirish hamda trener kadrlarning salohiyatini rivojlantirish, shu asosda mamlakatimiz terma jamoalari uchun ishonchli zaxirani shakllantirish borasida zarur shart-sharoitlar yaratish maqsadida:

1. Oʻzbekiston Respublikasi Madaniyat va sport ishlari vazirligi, Xalq taʼlimi vazirligi, Ichki ishlar vazirligi va Oʻzbekiston sport kurashlari assotsiatsiyasining Toshkent shahrida Sport kurashlari boʻyicha ixtisoslashtirilgan olimpiya zaxiralari maktabini tashkil etish toʻgʻrisidagi taklifiga rozilik berilsin.

2. Belgilab qoʻyilsinki:

Sport kurashlari boʻyicha ixtisoslashtirilgan olimpiya zaxiralari maktabi Oʻzbekiston Respublikasi Ichki ishlar vazirligi huzuridagi idoraviy sport kompleksiga tegishli binolar va inshootlarning bir qismi negizida erkin va yunon-rum kurashi boʻyicha yosh isteʼdodli kurashchilarni tanlab olish va tayyorlash bilan shugʻullanadigan oʻz internatiga ega boʻlgan sport-sogʻlomlashtirish muassasasi sifatida tashkil qilinadi;

Sport kurashlari boʻyicha ixtisoslashtirilgan olimpiya zaxiralari maktabining umumiy kontingenti 60 nafar oʻquvchini tashkil qiladi, ular turarjoy, toʻrt mahal ovqat, sport ekipirovkasi hamda maxsus kiyim-bosh, sport uskunalari va anjomlari bilan taʼminlanadilar.

3. Quyidagilar Sport kurashlari boʻyicha ixtisoslashtirilgan olimpiya zaxiralari maktabining asosiy vazifalari etib belgilansin:

zarur boʻlgan taqdirda sport kurashi boʻyicha xorijiy trenerlar va mutaxassislarni taklif qilgan holda, kurashchilarni sport kurashi sohasidagi eng yangi ilmiy-metodik tavsiyanomalar asosida tayyorlash boʻyicha oʻquv-mashq jarayonini yuqori darajada tashkil qilish;

nazariy tayyorgarlik va texnik-taktik koʻnikmalarni takomillashtirish, oʻquvchilarning professional qobiliyatini rivojlantirish, shuningdek zamonaviy sport kurashini rivojlantirishning xalqaro talablariga muvofiq holda Oʻzbekiston terma jamoalarini tayyorlash darajasini oshirish;

Birlashgan kurash usullari xalqaro federatsiyasi (FILA) trenerlarini oʻqitish dasturlaridan foydalangan holda, Sport kurashlari boʻyicha ixtisoslashtirilgan olimpiya zaxiralari maktabi trenerlarining malakasini tizimli asosda oshirib borish;

oʻquvchi-kurashchilar va trenerlar tarkibining professional mahoratini oshirish uchun tajriba almashish borasida sport kurashi boʻyicha xorijiy maktablar bilan hamkorlikni rivojlantirish.

4. Shunday tartib oʻrnatilsinki, unga muvofiq, Sport kurashlari boʻyicha ixtisoslashtirilgan olimpiya zaxiralari maktabini moliyalashtirish quyidagilar hisobidan amalga oshiriladi:

Davlat budjeti mablagʻlari;

Sport kurashlari assotsiatsiyasi mablagʻlari;

homiylar mablagʻlari va xalqaro tashkilotlarning grantlari;

qonun hujjatlarida taqiqlanmagan boshqa manbalar.

5. Oʻzbekiston Respublikasi Davlat mulki qoʻmitasi, Ichki ishlar vazirligi, Toshkent shahri hokimligi bir oy muddatda Ichki ishlar vazirligining Toshkent shahri, Mirzo Ulugʻbek tumani, Mustaqillik shohkoʻchasida joylashgan sport kompleksining tegishli binolari va inshootlarini, boshqa mulklarini, “Dinamo” stadionini Sport kurashlari boʻyicha ixtisoslashtirilgan olimpiya zaxiralari maktabining balansiga belgilangan tartibda bepul oʻtkazilishini taʼminlasin.

6. Oʻzbekiston Respublikasi Vazirlar Mahkamasi bir oy muddatda:

Sport kurashlari boʻyicha ixtisoslashtirilgan olimpiya zaxiralari maktabining tuzilmasini va maktabga oʻquvchilarni tanlov asosida qabul qilish tartibini;

Sport kurashlari boʻyicha ixtisoslashtirilgan olimpiya zaxiralari maktabi oʻquvchilarining yashab turishi uchun jihozlar, oziq-ovqat, shuningdek sport ekipirovkasi va kiyim-bosh bilan taʼminlash normativlarini;

Sport kurashlari boʻyicha ixtisoslashtirilgan olimpiya zaxiralari maktabi uchun oʻquv-mashgʻulot, sport va xoʻjalik uskunalari, jihozlar, zamonaviy kompyuter texnikasi, texnik hamda transport vositalari, shuningdek boshqa mulklarning zarur roʻyxatini;

Sport kurashlari boʻyicha ixtisoslashtirilgan olimpiya zaxiralari maktabi uchun oʻquv-mashgʻulot korpusining qurilishini tashkil etish boʻyicha kompleks chora-tadbirlarni tasdiqlasin.

7. Oʻzbekiston Respublikasi Ichki ishlar vazirligi Madaniyat va sport ishlari vazirligi hamda Oʻzbekiston Sport kurashlari assotsiatsiyasi bilan birgalikda:

bir oy muddatda belgilangan tartibda Sport kurashlari boʻyicha ixtisoslashtirilgan olimpiya zaxiralari maktabining Nizomi tasdiqlanishini, shuningdek uning davlat roʻyxatidan oʻtkazilishini;

Sport kurashlari boʻyicha ixtisoslashtirilgan olimpiya zaxiralari maktabining yuqori malakali mutaxassislar bilan taʼminlanishini, oʻquv xonalarining zarur oʻquv-metodik adabiyotlar bilan jihozlanishini;

ikki oy muddatda ilgʻor xalqaro tajribani hisobga olgan holda, erkin va yunon-rum kurashi boʻyicha yosh kurashchilarni tayyorlash dasturi tasdiqlanishini;

Sport kurashlari boʻyicha ixtisoslashtirilgan olimpiya zaxiralari maktabi oʻquvchilari tayyorgarligining sifati muntazam ravishda monitoring qilib borilishi va zarur hollarda tayyorgarlik jarayoniga tegishli tuzatishlar kiritilishini taʼminlasin.

8. Oʻzbekiston Sport kurashlari assotsiatsiyasiga:

Sport kurashlari boʻyicha ixtisoslashtirilgan olimpiya zaxiralari maktabiga tizimli asosda tashkiliy va oʻquv-metodik yordam koʻrsatish hamda uning moddiy-texnik bazasini mustahkamlashga koʻmaklashish;

ikki oy muddatda Sport kurashlari boʻyicha ixtisoslashtirilgan olimpiya zaxiralari maktabini kerakli oʻquv-mashq va sport uskunalari, mebel va anjomlar, zamonaviy kompyuter texnikasi, texnik va transport vositalari hamda boshqa mol-mulk bilan taʼminlash boʻyicha chora-tadbirlar kompleksini homiylar bilan birgalikda amalga oshirish;

Oʻzbekiston Respublikasi Ichki ishlar vazirligi, manfaatdor vazirlik va idoralar bilan birgalikda, Birlashgan kurash usullari xalqaro federatsiyasi trenerlarini oʻqitish dasturlaridan foydalangan holda, Sport kurashlari boʻyicha ixtisoslashtirilgan olimpiya zaxiralari maktabi trenerlarining malakasini oshirish kurslarini tashkil etish, shuningdek Sport kurashlari boʻyicha ixtisoslashtirilgan olimpiya zaxiralari maktabining oʻquv-mashgʻulot jarayoniga Federatsiyaning kadrlar va oʻquv-metodik salohiyati jalb etilishini taʼminlash tavsiya qilinsin.

9. Oʻzbekiston Respublikasi Moliya vazirligi:

ushbu qarorga muvofiq, 2013-yildan boshlab har yili, Davlat budjeti parametrlarida Sport kurashlari boʻyicha ixtisoslashtirilgan olimpiya zaxiralari maktabini tashkil qilish, moddiy-texnik bazasini mustahkamlash va rivojlantirish hamda uning joriy taʼminoti bilan bogʻliq xarajatlar uchun zarur budjet mablagʻlari ajratilishini nazarda tutsin;

3 ta xizmat avtotransporti, shu jumladan, bitta avtobus taʼminoti uchun limit belgilasin.

10. Mazkur qarorning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2012-yil 24-sentabr,

PQ-1822-son