Navoiy sport kollejini navoiy olimpiya zaxiralari kollejiga aylantirish chora-tadbirlari toʻgʻrisida (248-son)

23.08.2012

Oʻzbekiston Respublikasi Vazirlar Mahkamasining

qarori

Navoiy viloyatida yuqori toifali sportchilar tayyorlash tizimini yanada takomillashtirish, zarur sport koʻnikmalariga ega boʻlgan iqtidorli va istiqbolli oʻquvchilarni tanlab olish, yoshlarning sportga boʻlgan qiziqishlarini qoʻllab-quvvatlash hamda mavjud moddiy-texnik bazadan yanada samarali foydalanish maqsadida Vazirlar Mahkamasi qaror qiladi:

1. Oʻzbekiston Respublikasi Madaniyat va sport ishlari vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, Iqtisodiyot vazirligi, Xalq taʼlimi vazirligi hamda Navoiy viloyati hokimligining Navoiy viloyatida yuqori toifali sportchilar tayyorlash tizimini yanada takomillashtirish maqsadida Navoiy sport kollejini 2012/2013 oʻquv yilidan boshlab Navoiy olimpiya zaxiralari kollejiga aylantirish toʻgʻrisidagi taklifi maʼqullansin.

Belgilab qoʻyilsinki, Navoiy olimpiya zaxiralari kolleji Oʻzbekiston Respublikasi Vazirlar Mahkamasining “Olimpiya zaxiralari kollejlarida sport zaxirasini tayyorlash tizimini yanada takomillashtirish chora-tadbirlari toʻgʻrisida” 2010-yil 30-iyuldagi 163-son qarori asosida faoliyat yuritadi.

2. Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi Davlat mulki qoʻmitasi bilan birgalikda 2012-yilning 30-avgustiga qadar oʻz tasarrufidagi Navoiy sport kollejining oʻquv binolari va sport inshootlari, shuningdek moddiy-texnik vositalari, oʻquv asbob-uskunalari hamda boshqa mol-mulkini belgilangan tartibda Madaniyat va sport ishlari vazirligi tasarrufiga oʻtkazilishini taʼminlasinlar.

3. Oʻzbekiston Respublikasi Madaniyat va sport ishlari vazirligi, Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi, Xalq taʼlimi vazirligi, Iqtisodiyot vazirligi va Navoiy viloyati hokimligi 2012/2013 oʻquv yili boshlanguniga qadar Navoiy olimpiya zaxiralari kollejida:

sifatli oʻquv-tarbiya jarayonini tashkil etish uchun yuqori malakali trener-oʻqituvchilar bilan toʻldirish;

kadrlar tayyorlash yoʻnalishlariga muvofiq sport anjomlari, oʻquv-laboratoriya asbob-uskunalari, kompyuter texnikasi, zarur normativ-huquqiy hujjatlar, oʻquv va uslubiy adabiyotlar bilan taʼminlash ishlarini amalga oshirsinlar.

4. Oʻzbekiston Respublikasi Madaniyat va sport ishlari vazirligi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi va Navoiy viloyati hokimligi bilan birga yangi oʻquv yiliga qadar:

Oʻzbekiston Respublikasi Vazirlar Mahkamasining 2010-yil 30-iyuldagi 163-son qarori bilan tasdiqlangan Olimpiya zaxiralari kollejlari toʻgʻrisidagi Nizom talablari asosida Navoiy olimpiya zaxiralari kollejining umumtaʼlim boʻgʻinining 7-sinfga — 100 nafar oʻquvchini hamda oʻrta maxsus, kasb-hunar taʼlimi boʻgʻinining 1-kursiga — 100 nafar oʻquvchini qabul qilish;

Navoiy sport kollejining “Sport” yoʻnalishlarida tahsil olgan oʻquvchilar tarkibidagi sportga qobiliyatli eng iqtidorli oʻquvchilar orasidan Navoiy olimpiya zaxiralari kollejining 2- va 3-bosqichiga tanlov asosida 100 nafardan oʻquvchilarni qabul qilish;

oʻrta maxsus, kasb-hunar taʼlimining majburiyligini taʼminlashni inobatga olgan holda Navoiy sport kollejining qolgan oʻquvchilarini oʻz xohishiga koʻra tahsil olayotgan taʼlim yoʻnalishlariga mos boshqa oʻrta maxsus, kasb-hunar taʼlimi muassasalariga oʻtkazish choralarini koʻrsin.

5. Oʻzbekiston Respublikasi Moliya vazirligi joriy yilda Navoiy olimpiya zaxiralari kollejini saqlash xarajatlari uchun qoʻshimcha talab etiladigan mablagʻlarni 2012-yil uchun tasdiqlangan Oʻzbekiston Respublikasining Davlat budjeti parametrlarida maorif sohasiga ajratilgan mablagʻlar doirasida qoplasin hamda kelgusi yillardagi sarf-xarajatlarini mazkur sohaga ajratiladigan mablagʻlar doirasida amalga oshirishni nazarda tutsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I.Ikramov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2012-yil 23-avgust,

248-son