Oʻzbekiston Respublikasi banklarida ochiladigan bank hisobvaraqlari toʻgʻrisidagi yoʻriqnomaga oʻzgartirishlar va qoʻshimcha kiritish haqida (1948-7-son)

31.07.2012

OʻZBEKISTON RESPUBLIKASI MARKAZIY BANKI BOShQARUVINING

Qarori

[Oʻzbekiston Respublikasi Adliya vazirligi tomonidan 2012-yil 31-iyulda roʻyxatdan oʻtkazildi, roʻyxat raqami 1948-7]

“Oʻzbekiston Respublikasining Markaziy banki toʻgʻrisida”gi (Oʻzbekiston Respublikasi Oliy Majlisining Axborotnomasi, 1995-y., 12-son, 247-modda) va “Buxgalteriya hisobi toʻgʻrisida”gi (Oʻzbekiston Respublikasi Oliy Majlisining Axborotnomasi, 1996-y., 9-son, 142-modda) Oʻzbekiston Respublikasining qonunlariga hamda Oʻzbekiston Respublikasi Prezidentining 2012-yil 18-iyuldagi PF–4455-sonli “Ishbilarmonlik muhitini yanada tubdan yaxshilash va tadbirkorlikka yanada keng erkinlik berish chora-tadbirlari toʻgʻrisida”gi Farmoniga (Oʻzbekiston Respublikasi qonun hujjatlari toʻplami, 2012-y., 29-son, 328-modda) muvofiq Oʻzbekiston Respublikasi Markaziy banki Boshqaruvi qaror qiladi:

1. Oʻzbekiston Respublikasi Markaziy banki Boshqaruvining 2009-yil 16-martdagi 7/2-sonli qarori (roʻyxat raqami 1948, 2009-yil 27-aprel) (Oʻzbekiston Respublikasi qonun hujjatlari toʻplami, 2009-y., 18-son, 229-modda) bilan tasdiqlangan Oʻzbekiston Respublikasi banklarida ochiladigan bank hisobvaraqlari toʻgʻrisidagi yoʻriqnomaga ilovaga muvofiq oʻzgartirishlar va qoʻshimcha kiritilsin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Markaziy bank raisi F. MULLAJONOV

Toshkent sh.,

2012-yil 28-iyul,

22/1-son

Oʻzbekiston Respublikasi Markaziy banki Boshqaruvining 2012-yil 28-iyuldagi 22/1-sonli qaroriga ILOVA

Oʻzbekiston Respublikasi banklarida ochiladigan bank hisobvaraqlari toʻgʻrisidagi yoʻriqnomaga kiritilayotgan oʻzgartirishlar va qoʻshimcha

1. 12-bandning “g” kichik bandidan “hamda notarial tasdiqlangan” degan soʻzlar chiqarib tashlansin.

2. 14-bandning “v” kichik bandi quyidagi tahrirda bayon etilsin:

“v) mazkur Yoʻriqnomaning 3-ilovasida keltirilgan shaklga muvofiq, imzolar namunalari va muhr izi qoʻyilgan hamda notarial tasdiqlangan ikki dona varaqcha. Mazkur kichik bandning notarial tasdiqlashga doir qismi tadbirkorlik subyektlariga nisbatan tatbiq etilmaydi.”.

3. 32 va 33-bandlar quyidagi tahrirda bayon etilsin:

“32. Yuridik shaxslarning, shuningdek ularning vakolatxona va filiallarining imzolari namunalari va muhr izi qoʻyilgan varaqcha notarial tasdiqlanadi. Mazkur talabning notarial tasdiqlashga doir qismi tadbirkorlik subyektlariga nisbatan tatbiq etilmaydi.

Kasaba uyushmalari birlamchi tashkilotlari tomonidan taqdim etiladigan imzo namunalari va muhr izi qoʻyilgan varaqcha ularning yuqori turuvchi kasaba uyushmalari birlashmasi tomonidan tasdiqlanadi.

Imzolar namunalari va muhr izi qoʻyilgan varaqcha ikki nusxada taqdim qilinadi. Varaqchaning bir nusxasi buxgalterda, ikkinchisi esa, pul cheklarini rasmiylashtiruvchi nazoratchida turadi. Banklarda mijozlarning bir nechta hisobvaraqlariga xizmat koʻrsatiladigan boʻlsa, ulardan imzolar namunalari va muhr izi qoʻyilgan varaqchalar yuqorida koʻrsatilgan tartibda qoʻshimcha ravishda talab qilinishi mumkin. Imzolar namunalari va muhr izi qoʻyilgan varaqchalarda hisobvaraqlarning raqamlari koʻrsatiladi.

33. Yuridik shaxs rahbari ikkita imzolash huquqiga ega boʻlgan shaxslarning roʻyxatini tasdiqlaydi. Birinchi roʻyxatga — rahbarlik vazifalarini amalga oshiruvchi, ikkinchisiga — buxgalteriya hisobi va moliyaviy boshqarish vazifalarini amalga oshiruvchi shaxslar kiradi.

Bankda hisobvaraq ochish uchun yuridik shaxslar bankka rahbar, shuningdek buxgalteriya hisobi va moliyaviy boshqarish vazifalarini amalga oshiruvchi shaxs imzolari namunalari va dumaloq muhr izi qoʻyilgan varaqchani ikki nusxada taqdim qiladi. Mikrofirmalar uchun buxgalteriya hisobi va moliyaviy boshqarish vazifalarini amalga oshiruvchi shaxsning imzo namunasini taqdim etish talab etilmaydi.

Yuridik shaxs tashkil etmagan holda faoliyat koʻrsatayotgan dehqon xoʻjaligi boshligʻi va yakka tartibdagi tadbirkor dumaloq muhri boʻlmagan hollarda, oʻz imzolari namunalarini taqdim etadi.

Toʻlovga taqdim etiladigan cheklarning raqamlarini tekshirish maqsadida bank mijozlarga bergan pul cheklari raqamlarini masʼul ijrochi va nazoratchilardagi mijozlarning imzolari hamda muhr izlari namunasi koʻrsatilgan varaqchada qayd etiladi.”.

4. 38-band quyidagi mazmundagi jumla bilan toʻldirilsin:

“Mazkur bandning notarial tasdiqlashga doir qismi tadbirkorlik subyektlariga nisbatan tatbiq etilmaydi.”.

5. 41-banddagi “korxonani” degan soʻz “yuridik shaxsni” degan soʻzlar bilan almashtirilsin va “notarial tasdiqlangan holda” degan soʻzlar chiqarib tashlansin.