Oʻzbekiston Respublikasi monopoliyadan chiqarish va raqobatni rivojlantirish davlat qoʻmitasini tashkil etish toʻgʻrisida (PF-2676-son)

02.08.2000

Oʻzbekiston Respublikasi Prezidentining

Farmoni

“Tovar bozorlarida monopolistik faoliyatni cheklash va raqobat toʻgʻrisida”gi Oʻzbekiston Respublikasi Qonuniga muvofiq va respublika bozorlarida sogʻlom raqobat muhitini shakllantirish, raqobatni rivojlantirish uchun zarur tashkiliy-huquqiy va iqtisodiy shart-sharoitlar yaratish, bozorlarni monopollashtirishga urinishlarga yoʻl qoʻymaslik, bozor iqtisodiyoti talablariga javob beruvchi monopoliyaga qarshi tartibga solish tizimini takomillashtirish maqsadida, shuningdek, isteʼmolchilar huquqlarini himoya qilish manfaatlarini koʻzlab:

1. Oʻzbekiston Respublikasi Moliya vazirligi huzuridagi Monopoliyadan chiqarish va raqobatni rivojlantirish qoʻmitasi negizida Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi tashkil etilsin.

2. Quyidagilar Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasining asosiy vazifalari va faoliyat yoʻnalishlari etib belgilansin:

respublikada sogʻlom raqobat muhitini yaratish uchun zarur tashkiliy, iqtisodiy va moliyaviy shart-sharoitlarni, mustahkam huquqiy bazani shakllantiruvchi va muvofiqlashtiruvchi markaz funksiyalarini amalga oshirish;

bozor iqtisodiyoti talablariga javob beruvchi raqobat qonunlarini, umumiy qabul qilingan normalar va qoidalarni samarali amalga oshirishni taʼminlovchi monopoliyaga qarshi tartibga solishning kuchli tizimini barpo etish;

insofsiz raqobatchilar tomonidan tovar va moliya bozorlarini, birinchi navbatda, isteʼmol tovarlari bozorlarini monopollashtirish yuzasidan har qanday urinishlarning oldini olish, ularni cheklash va ularga barham berish;

monopoliyadan chiqarish boʻyicha respublika, tarmoq va mintaqaviy dasturlar ishlab chiqilishi va amalga oshirilishini muvofiqlashtirish;

monopoliyaga qarshi qonunchilik hujjatlariga rioya qilinishi, shuningdek, oʻz vakolati doirasida tabiiy monopoliyalar subyektlari faoliyati ustidan nazoratni amalga oshirish;

monopol birlashmalar (korxonalar)ning Oʻzbekiston Respublikasi Davlat reyestrini yuritish;

reklama va isteʼmolchilar huquqlarini himoya qilish toʻgʻrisidagi qonunchilik hujjatlariga rioya qilinishi ustidan nazoratni amalga oshirish;

isteʼmol tovarlari narxlari monitoringini oʻtkazish, isteʼmolchilar huquqlarini himoya qilish jamiyatlari bilan birgalikda narxlarning asossiz ravishda oʻsib ketishiga, ichki bozorda sifatsiz isteʼmol tovarlari sotilishi va xizmatlar koʻrsatilishiga olib keluvchi insofsiz raqobatning oldini olish chora-tadbirlarini koʻrish.

3. Belgilab qoʻyilsinki, quyidagilar Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasining hududiy organlari hisoblanadi:

Qoraqalpogʻiston Respublikasida — Qoraqalpogʻiston Respublikasi Moliya vazirligi huzuridagi Monopoliyadan chiqarish va raqobatni rivojlantirish qoʻmitasi negizida tashkil etiladigan Qoraqalpogʻiston Respublikasi Monopoliyadan chiqarish va raqobatni rivojlantirish qoʻmitasi;

viloyatlar va Toshkent shahrida — viloyatlar va Toshkent shahar hokimliklari moliya boshqarmalari huzuridagi Monopoliyadan chiqarish va raqobatni rivojlantirish hududiy boshqarmalari negizida tashkil etiladigan monopoliyadan chiqarish va raqobatni rivojlantirish hududiy boshqarmalari.

4. Belgilansinki, Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasining oʻz vakolati doirasida qabul qilinadigan qarorlari vazirliklar, idoralar, joylardagi hokimiyat organlari, muassasalar va tashkilotlar, mulkchilik shakllaridan qatʼi nazar, xoʻjalik yurituvchi subyektlar, mansabdor shaxslar va fuqarolar tomonidan bajarilishi majburiy hisoblanadi.

5. Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasiga quyidagi huquqlar berilsin:

monopoliyaga qarshi qonunchilik hujjatlarini, tabiiy monopoliyalar, isteʼmolchilar huquqlarini himoya qilish toʻgʻrisidagi va reklama toʻgʻrisidagi qonunchilik hujjatlarini buzayotgan davlat boshqaruvi organlariga, joylardagi hokimiyat organlariga, xoʻjalik yurituvchi subyektlarga va ularning mansabdor shaxslariga oʻz vakolatlari doirasida qarorlar (yozma koʻrsatmalar) berish;

xoʻjalik yurituvchi subyektlarga va ularning mansabdor shaxslariga, shuningdek, davlat boshqaruvi organlari va joylardagi hokimiyat organlari mansabdor shaxslariga qonunchilik hujjatlarida nazarda tutilgan hollarda va tartibda jarimalar solish;

monopol faoliyat, isteʼmolchilar huquqlarini va reklama toʻgʻrisidagi qonunchilik hujjatlarini buzish natijasida asossiz olingan mablagʻlarni (daromad, foydani), shuningdek, solingan jarimalarni va qoʻshilgan penyani xoʻjalik yurituvchi subyektlardan qonunchilik hujjatlarida belgilangan tartibda olib qoʻyish toʻgʻrisida qarorlar qabul qilish;

fuqarolarning ularning isteʼmolchilik huquqlari poymol qilinishi haqidagi arizalari va shikoyatlari boʻyicha bu huquqlarni buzgan korxonalar va tashkilotlarni (ularning moliyaviy-xoʻjalik faoliyati bundan mustasno) Nazorat organlari faoliyatini muvofiqlashtiruvchi Respublika kengashi bilan kelishgan holda tekshirish.

6. Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi Qoraqalpogʻiston Respublikasi Vazirlar Kengashi, viloyatlar, shaharlar, tumanlar hokimliklari bilan birgalikda shahar va tuman isteʼmolchilar huquqlarini himoya qilish jamiyatlarining shakllantirilishiga har tomonlama koʻmaklashsin, bozorlarda sifatsiz mahsulotlar paydo boʻlishining, tovarlar isteʼmol narxlarining va xizmatlarga tariflarning asossiz oʻsishiga olib keluvchi insofsiz raqobatning oldini olishda ularning rolini oshirishga yordamlashsin.

7. Oʻzbekiston Respublikasi Prokuraturasi, Ichki ishlar vazirligi, Davlat soliq qoʻmitasi Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi xodimlariga ular tomonidan xizmat vazifalarini bajarishlarida koʻmaklashsinlar, Qoʻmita va uning hududiy organlari xodimlariga ularga yuklangan funksiyalarni bajarishda toʻgʻonoq boʻlayotgan mansabdor shaxslarning, ayrim fuqarolar xatti-harakatlarining oldini olsinlar.

8. Oʻzbekiston Respublikasi Prezidentining “Oʻzbekiston Respublikasi Moliya vazirligi huzurida Monopoliyadan chiqarish va raqobatni rivojlantirish qoʻmitasini tashkil etish toʻgʻrisida” 1996-yil 15-maydagi PF-1464-son Farmoni oʻz kuchini yoʻqotgan deb hisoblansin, 1-bandning ikkinchi xatboshi bundan mustasno.

9. Vazirlar Mahkamasi oʻn kun muddatda Oʻzbekiston Respublikasi Monopoliyadan chiqarish va raqobatni rivojlantirish Davlat qoʻmitasi faoliyatini tashkil etish toʻgʻrisida qaror qabul qilsin.

Oʻzbekiston Respublikasining Prezidenti I. KARIMOV

Toshkent sh.,

2000-yil 2-avgust,

PF-2676-son