Davlat mulki obyektlaridan kelgusida samarali foydalanish va ularni tasarruf etish boʻyicha qoʻshimcha chora-tadbirlar toʻgʻrisida (154-son)

31.05.2012

Oʻzbekiston Respublikasi Vazirlar Mahkamasining

qarori

Vazirlar Mahkamasining “Davlat mulki obyektlaridan oqilona foydalanish va ularni tasarruf etishni taʼminlash chora-tadbirlari toʻgʻrisida” 2011-yil 8-sentabrdagi 251-son qaroriga muvofiq hamda davlat mulki obyektlaridan kelgusida samarali foydalanish va ularni tasarruf etishni taʼminlash maqsadida Vazirlar Mahkamasi qaror qiladi:

1. Boʻsh turgan va foydalanilmayotgan davlat mulki obyektlaridan kelgusida oqilona foydalanish va ularni tasarruf etishga doir takliflar tayyorlash boʻyicha ishchi komissiyaning davlat mulki boʻlgan koʻchmas mulk obyektlaridan (keyingi oʻrinlarda “obyektlar” deb ataladi) kelgusida samarali foydalanish va ularni tasarruf etishni taʼminlashga doir ayrim yaroqsiz obyektlarni buzish, ommaviy savdolar orqali yoki investitsiya kiritish majburiyati bilan “nol” xarid qiymatida xususiylashtirish hamda uy-joy sifatida foydalanish maqsadida rekonstruksiya qilish va mukammal taʼmirlash toʻgʻrisidagi takliflari maʼlumot uchun qabul qilinsin.

2. Quyidagilar:

oʻrnatilgan tartibda buzilishi belgilangan obyektlar roʻyxati 1-ilovaga muvofiq;

ommaviy savdolar orqali xususiylashtiriladigan obyektlar roʻyxati 2-ilovaga muvofiq;

investitsiya kiritish majburiyati bilan “nol” xarid qiymatida xususiylashtiriladigan obyektlar roʻyxati 3-ilovaga muvofiq;

tadbirkorlik subyektlariga bepul beriladigan va kelgusida uy-joy sifatida foydalaniladigan boʻsh turgan koʻp qavatli obyektlar roʻyxati 4-ilovaga muvofiq;

boʻsh turgan va foydalanilmayotgan davlat mulki obyektlaridan oqilona foydalanish va ularni tasarruf etish chora-tadbirlari dasturi 5-ilovaga muvofiq tasdiqlansin.

3. Belgilab qoʻyilsinki:

1-ilovada keltirilgan obyektlarni buzish mahalliy hokimliklar va balansda saqlovchilar tomonidan maxsus komissiya tuzgan holda amalga oshiriladi hamda buzish natijasida chiqqan yaroqli qurilish materiallari dalolatnoma tuzilgan holda roʻyxatga olinadi;

2 — 4-ilovalarda keltirilgan obyektlarni tuman (shahar) hokimliklari belgilangan tartibda oʻz balansiga qabul qilib oladilar hamda ushbu obyektlarni xususiylashtirish ishlari tuman (shahar) hokimliklari balanslariga oʻtkazilgandan soʻng amalga oshiriladi;

4-ilovada keltirilgan obyektlar tadbirkorlik subyektlari tomonidan mukammal taʼmirlanib, uy-joy sifatida sotiladi, bunda bunyod etilgan uy-joy fondining 20 foizi aholining ijtimoiy himoyaga muhtoj qatlamlariga, xususan, voyaga yetgan yetim bolalarni va halok boʻlgan harbiy xizmatchilarning farzandlarini uy-joy bilan taʼminlash maqsadida tuman (shahar) hokimliklari tasarrufiga oʻtkaziladi;

5-ilovada keltirilgan obyektlardan kelgusida samarali foydalanish, ularning butligi va daxlsizligini saqlash uchun mahalliy hokimliklar va obyektlarni balansda saqlovchilar masʼul hisoblanadi.

Qoraqalpogʻiston Respublikasi, viloyatlar va Toshkent shahridagi mazkur qarorga 2 — 4-ilovalarda keltirilgan ijtimoiy soha obyektlari ommaviy savdolar orqali yoki investitsiya kiritish majburiyati bilan “nol” xarid qiymatida xususiylashtirilayotganligi munosabati bilan Oʻzbekiston Respublikasi Iqtisodiyot vazirligi va Moliya vazirligi keyingi yillar uchun respublika va tegishli hududiy investitsiya dasturlarini ushbu hududlarda ijtimoiy soha obyektlarining yangi qurilishiga ehtiyoj mavjudligini inobatga olgan holda shakllantirishni taʼminlasinlar.

4. Quyidagilar obyektlarni buzish bilan bogʻliq xarajatlarni qoplash manbalari etib belgilansin:

obyektlarni buzish natijasida olingan yaroqli qurilish materiallarini sotishdan tushadigan mablagʻlar;

balansda saqlovchilarning budjetdan tashqari daromadlari hamda ularning xarajatlar smetasi doirasidagi budjet mablagʻlari;

tegishli mahalliy budjetlar daromadlar rejasining oshirib bajarilishidan olingan mablagʻlar.

5. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari ushbu qarorga 1-ilovada keltirilgan obyektlarning buzilishi natijasida boʻshaydigan yer maydonlarini:

hudud talabidan kelib chiqqan holda ijtimoiy soha obyekti qurish uchun ajratishni (aholi punktidan uzoq yerda joylashgan va chekka hududlarda joylashgan obyektlardan tashqari), ijtimoiy soha obyekti qurilgunga qadar ushbu yer maydonlarini obodonlashtirgan va koʻkalamzorlashtirgan holda saqlashni;

hudud talabidan kelib chiqqan holda ijtimoiy soha obyekti qurish uchun ehtiyoj boʻlmaganda tadbirkorlik faoliyatini amalga oshirish uchun yuridik va jismoniy shaxslarga belgilangan tartibda ajratishni taʼminlasinlar.

6. Oʻzbekiston Respublikasi Sogʻliqni saqlash vazirligi, Xalq taʼlimi vazirligi, Oliy va oʻrta maxsus taʼlim vazirligi, Madaniyat va sport ishlari vazirligi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda mazkur qarorga 2-3-ilovalarda koʻrsatilgan obyektlar xususiylashtirilib yangi mulkdorlarga berilgunga qadar ularning daxlsizligi va butligini hamda ikki oy muddatda ushbu obyektlarning kadastr hujjatlari tayyorlanishini taʼminlasinlar.

7. Oʻzbekiston Respublikasi Iqtisodiyot vazirligi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda mazkur qarorga 5-ilovaga kiritilgan, rekonstruksiya va mukammal taʼmirlashga muhtoj boʻlgan, balansda saqlovchi tomonidan faoliyat yoʻnalishida samarali foydalaniladigan obyektlarni 2013 — 2017-yillarga moʻljallangan investitsiya dasturlariga belgilangan tartibda kiritsin.

8. Oʻzbekiston Respublikasi Davlat mulki qoʻmitasi, Savdo-sanoat palatasi Oʻzbekiston milliy teleradiokompaniyasi bilan birgaliqda davlat mulki obyektlaridan kelgusida samarali foydalanish va ularni tasarruf etish chora-tadbirlari yuzasidan amalga oshirilayotgan ishlar toʻgʻrisida telekoʻrsatuvlar va radioeshittirishlar tayyorlanishi va namoyish etilishini taʼminlasinlar.

9. Vazirlar Mahkamasining “Ishlamayotgan, boʻsh turgan va qurilishi tugallanmagan davlat mulki obyektlari negizida nooziq-ovqat isteʼmol tovarlari ishlab chiqarishni tashkil etish chora-tadbirlari toʻgʻrisida” 2010-yil 8-iyuldagi 141-son qaroriga ilovadagi:

26, 47 va 52-pozitsiyalar chiqarib tashlansin;

30-pozitsiyadagi “Yangiyerindustriya” DK” soʻzlari “Yangiyeryoʻlindustriya” DKning boʻsh turgan va foydalanilmayotgan bino va inshootlari” soʻzlari bilan almashtirilsin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov va Oʻzbekiston Respublikasi Bosh vazirining oʻrinbosari B.I. Zakirov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2012-yil 31-may,

154-son

Vazirlar Mahkamasining 2012-yil 31-maydagi 154-son qaroriga 1-ILOVA

Oʻrnatilgan tartibda buzilishi belgilangan obyektlar

ROʻYXATI

(1-ilova Oʻzbekiston Respublikasi Vazirlar Mahkamasining 2013-yil 13-sentabrdagi 249-sonli qarori tahririda — OʻR QHT, 2013-y., 38-son, 491-modda)

Vazirlar Mahkamasining 2012-yil 31-maydagi 154-son qaroriga 2-ILOVA

Ommaviy savdolar orqali xususiylashtiriladigan obyektlar

ROʻYXATI

Mahalliy hokimlik tomonidan ortiqcha deb topilgan yer maydonlari mahalliy hokimlik zaxirasiga olinib, ulardan samarali foydalaniladi.

Vazirlar Mahkamasining 2012-yil 31-maydagi 154-son qaroriga 3-ILOVA

Investitsiya kiritish majburiyati bilan “nol” xarid qiymatida xususiylashtiriladigan obyektlar

ROʻYXATI

* Ushbu obyektlar sotuvga chiqarilgandan soʻng bir yil mobaynida sotilmagan taqdirda mazkur qarorning 1-ilovasida belgilangan shartlarda buziladi.

Mahalliy hokimlik tomonidan ortiqcha deb topilgan yer maydonlari mahalliy hokimlik zaxirasiga olinib, ulardan samarali foydalaniladi.

Vazirlar Mahkamasining 2012-yil 31-maydagi 154-son qaroriga 4-ILOVA

* Tadbirkorlik subyektlariga bepul beriladigan va kelgusida uy-joy sifatida foydalaniladigan boʻsh turgan koʻp qavatli obyektlar

ROʻYXATI

* Uy-joylar aholining ijtimoiy himoyaga muhtoj qatlamlariga berilgandan soʻng, 5 yil mobaynida sotish huquqisiz beriladi.

Mahalliy hokimlik tomonidan ortiqcha deb topilgan yer maydonlari mahalliy hokimlik zaxirasiga olinib, ulardan samarali foydalaniladi.

Vazirlar Mahkamasining 2012-yil 31-maydagi 154-son qaroriga 5-ILOVA

Boʻsh turgan va foydalanilmayotgan davlat mulki obyektlaridan oqilona foydalanish va ularni tasarruf etish chora-tadbirlari

DASTURI

* Uy-joylar aholining ijtimoiy himoyaga muhtoj qatlamlariga berilgandan soʻng, 5 yil mobaynida sotish huquqisiz beriladi.