Yozgi taʼtil kunlarida maktab oʻquvchilarini dam oldirish va sogʻlomlashtirish ishlarini tashkil etish toʻgʻrisida (274-son)

05.05.2008

Toshkent shahar hokimi Toshkent shahar kasaba uyushmalari tashkilotlari birlashma Kengashi Rayosatining

Qoʻshma Qarori

Toshkent shahar hokimining 2008-yil 3-mart “Yoshlar yili” Davlat dasturini amalga tatbiq etish toʻgʻrisida”gi 121-sonli qaroriga asosan hamda taʼtil kunlarida shahar mehnatkashlari farzandlarini dam oldirish va ularni sogʻlomlashtirish ishlarini uyushqoqlik bilan tashkil etish maqsadida, Toshkent shahar hokimi va Toshkent shahar kasaba uyushmalari tashkilotlari birlashmasi Kengashining rayosati qaror qiladilar:

1. Yozgi taʼtil kunlarida maktab oʻquvchilarini dam oldirish va sogʻlomlashtirishga tayyorgarlik koʻrish hamda taʼminlash boʻyicha shahar komissiyasi tarkibi 1-ilovaga* muvofiq tasdiqlansin.

2. Tuman hokimliklari, boshqarmalar, tarmoq kasaba uyushmalarining shahar tashkilotlari, tasarrufida bolalar sogʻlomlashtirish oromgohi boʻlgan barcha korxona va tashkilotlar rahbarlari zimmasiga taʼtil kunlarida maktab oʻquvchilarini dam oldirish va ularni sogʻlomlashtirish ishlarini uyushqoqlik bilan tashkil etish yuklatilsin.

Bu borada quyidagilar amalga oshirilsin:

barcha turdagi oromgohlarda tiklash-taʼmirlash ishlarini 2008-yilning 25-may kunigacha tugatish uchun zarur choralar koʻrilib, ularda oʻquvchilarning maʼnaviy va mehnat tarbiyasi, sogʻlomlashtirish, jismoniy tarbiya va sport ishlarini amalga oshirishga shart-sharoitlar yaratish;

bolalar sogʻlomlashtirish oromgohlari faoliyatini toʻxtatib qoʻyishga, ularni sotish yoki boshqa maqsadlarda foydalanishga yoʻl qoʻymaslik ustidan nazorat oʻrnatish.

3. Yozgi taʼtil kunlarida maktab oʻquvchilarini dam oldirish va sogʻlomlashtirishga tayyorgarlik koʻrish hamda taʼminlash boʻyicha shahar komissiyasi aʼzolari va tarmoq kasaba uyushmalari shahar tashkilotlari rahbarlari 2-ilovaga* muvofiq oromgohlarga biriktirilsin. Biriktirilgan masʼullar zimmasiga mavsumning maroqli oʻtkazilishini tashkil etish va doimiy nazoratga olish vazifasi yuklatilsin.

*1 va 2-ilovalar berilmaydi.

4. Tuman hokimlari, Xalq taʼlimi bosh boshqarmasi (N.X. Rahmonqulova), yozgi mavsum mobaynida shahar maktablari qoshidagi kunduzgi oromgohlarning samarali ishlashini eʼtiborga olgan holda ularni tashkil etish va moliyalashtirish boʻyicha majmuaviy tadbirlarni joriy yilning 1-mayiga qadar ishlab chiqsinlar hamda amalga oshirsinlar. Bunda, bolalar sogʻlomlashtirish oromgohlarini bir meʼyorda ishlashi bilan bogʻliq boʻlgan, pedagogik va xizmat koʻrsatuvchi xodimlarga haq toʻlash kabi barcha xoʻjalik xarajatlari Xalq taʼlimi bosh boshqarmasi, tuman xalq taʼlimi boʻlimlari tomonidan moliyalashtirilishi koʻzda tutilsin.

Tuman hokimlari va “Mahalla” jamgʻarmasining tuman boʻlimlari budjetdan tashqari mablagʻlar hisobiga Bolalarni dam oldirish va sogʻlomlashtirishni tashkil etish boʻyicha Respublika komissiyasi tomonidan belgilangan meʼyorlar boʻyicha bolalarning ovqatlanishi uchun xarajatlarni tuman xalq taʼlimi boʻlimlarining hisob raqamiga oʻtkazish choralari koʻrilsin.

5. Tuman hokimlari:

2007-yilgi sogʻlomlashtirish mavsumida maktablar qoshida tashkil etilgan kunduzgi oromgohlarda bolalarni dam oldirish boʻyicha yuzaga kelgan qarzdorlikni joriy yilning 15-mayigacha bartaraf etish choralarini koʻrsinlar.

6. Xalq taʼlimi bosh boshqarmasi ( N.X. Rahmonqulova), Sogʻliqni saqlash bosh boshqarmasi (M.S. Islomov), Savdo, xizmat koʻrsatish sohasi va xalq isteʼmoli mollari ishlab chiqarish departamenti (R.A. Abdumajitov), Madaniyat va sport ishlari bosh boshqarmasi ( R.M. Xamidov):

oromgohlarga zarur boʻlgan malakali xodimlarni tanlash va ularni oʻz vaqtida ishga yuborish choralari koʻrilsin.

7. 2007-yil yozgi mavsumda pedagogik kadrlar bilan oromgohlarni taʼminlanishidagi kamchilik va nuqsonlarni eʼtiborga olgan holda 2008-yil maktab oʻquvchilarining yozgi taʼtili mobaynida oromgohlarda ishlash uchun yuboriladigan tarbiyachi va yetakchilarning kasb mahoratini hamda malakasini oshirish maqsadida Toshkent shahar Xalq taʼlimi bosh boshqarmasi (N.X. Rahmonqulova), “Kamolot” yoshlar ijtimoiy harakatining Toshkent shahar Kengashi (A.X. Mirzajonov) va pedagogika kadrlarini tayyorlaydigan oliy oʻquv yurtlari — Nizomiy nomidagi Toshkent Davlat pedagogika universiteti (U.Sh. Begimqulov), Toshkent Davlat Jahon tillari universiteti (Gʻ.B. Shoumarov) yozda oromgohlarda yetakchi va tarbiyachi boʻlib ishlashga yuboriladigan talabalar uchun 1-2 haftalik oʻquv kurslari ishlab chiqilib, ularni meʼyoriy hujjatlar va oʻqish yakuni boʻyicha tegishli guvohnoma bilan taʼminlasinlar va joriy yilning 25-mayiga qadar barcha bolalar sogʻlomlashtirish oromgohlarining talabnomalariga binoan yetarli darajada yetakchilar bilan taʼminlash choralarini koʻrsinlar.

8. Oʻzbekiston Davlat jismoniy tarbiya instituti (J.A. Akramov) yozgi sogʻlomlashtirish mavsumida bolalarni jismoniy tarbiya va sport mashgʻulotlari bilan toʻliq ravishda qamrab olish maqsadida Toshkent shahar Xalq taʼlimi bosh boshqarmasi (N.X. Rahmonqulova) va “Kamolot” yoshlar ijtimoiy harakatining Toshkent shahar Kengashi (A.X. Mirzajonov) bilan birgalikda shahar maktablarida sportning turli toʻgaraklari, sportning ommaviy turlari boʻyicha seksiyalarni tashkil etsin. Mazkur ishni maktablarda tashkil etish hamda oʻtkazish uchun 2008-yilning taʼtili davrida pedagogik amaliyot oʻtash sifatida institutning tayyorgarlik koʻrgan magistrlari hamda talabalari maktablarga yuborilsin.

9. “Maʼnaviyat targʻiboti markazi” shahar boʻlimi (I.X. Abdugʻaniyev):

mavsum boshlanishi arafasida (15-mayga qadar) bolalar sogʻlomlashtirish oromgohlariga maʼnaviyat va maʼrifat xonalarini koʻrgazmali materiallar, pedagog xodimlarini uslubiy qoʻllanmalar va adabiyotlar bilan taʼminlashda amaliy yordam bersinlar.

10. Savdo, xizmat koʻrsatish sohasi va xalq isteʼmoli mollari ishlab chiqarish departamenti (R.A. Abdumajitov):

oromgohlarni zarur oziq-ovqat mahsulotlari bilan taʼminlash uchun ularni savdo tashkilotlari, tayyorlov idoralari va shoxobchalariga biriktirish ishlari amalga oshirilsin. Oromgohlarga sifatli mahsulotlar berilishi, mahsulotlarning ayrim turlari belgilangan narxlardan eng kam savdo ustamasi qoʻyilgan holda sotilishi ustidan nazorat oʻrnatilsin, shuningdek oromgohlarni zarur madaniy, sport va xoʻjalik anjomlari, sanoat mollari bilan (pul oʻtkazish yoʻli orqali) taʼminlash choralari koʻrilsin.

11. Kasaba uyushmalarining tarmoq tashkilotlari va xoʻjalik rahbarlari: xarid qilingan mahsulotlar uchun hisob-kitobni oʻz vaqtida amalga oshirilishini taʼminlasin.

12. “Dori-darmon” birlashmasi (V.V. Ziyoyeva):

barcha oromgohlarni kerakli dori-darmonlar bilan taʼminlasin.

13. “Toshshahartransxizmat” uyushmasi (Sh.Sh. Muxamedjonov):

tashkilotlar va korxonalarning talabnomalariga binoan bolalarni oromgohlarga yetkazish uchun texnik jihatdan sifatli avtobuslar ajratilsin. Ajratilgan avtobuslar avtoxizmat tannarxi darajasida boʻlishi belgilab qoʻyilsin.

14. Ichki ishlar bosh boshqarmasi (Q.U. Naqibov):

oromgohlarda jamoat tartibini saqlash uchun militsiya xodimlari biriktirilsin. Oromgohlarga bolalarni avtotransportda olib borish va qaytib olib kelishda yoʻl harakati xavfsizligi taʼminlansin hamda ularni YPX avtoekipajlari tomonidan kuzatuvi tashkil etilsin.

15. Davlat sanitariya-epidemiologiya nazorati markazi (B.J. Qurbonov):

oromgohlarda tozalikni saqlash va oziq-ovqatlarni tayyorlashda sanitariya-gigiyena meʼyorlariga qatʼiy rioya etilishi hamda toza va sifatli ichimlik suvi bilan taʼminlanishi nazoratga olinsin.

16. Toshkent shahar elektr tarmoqlari korxonasi (R.T. Axmedov):

yoz mavsumida shahar hududida va Toshkent viloyati tumanlarida joylashgan oromgohlarni viloyat elektr tarmoqlari korxonasi bilan birgalikda uzluksiz ravishda elektr energiyasi bilan taʼminlash choralari koʻrilsin.

17. IIBB Yongʻin xavfsizligi boshqarmasi (T.M. Yuldashev):

yozgi mavsumga tayyorgarlik qoʻrish va mavsum davomida oromgohlarda yongʻinni oldini olish holati, xavfsizligini taʼminlash maqsadida aniq reja-tadbirlar ishlab chiqilsin va uning toʻliq bajarilishi taʼminlansin.

18. Favqulodda vaziyatlar boshqarmasi (E.J. Ikromov):

koʻchki xavfi boʻlishi mumkin boʻlgan hududlarda joylashgan oromgohlarni chegara qoʻshinlari vakillari bilan birgalikda oʻrganib chiqib, ularni koʻrikdan oʻtkazilishi taʼminlansin.

19. Oʻzbekiston Respublikasi Bolalar sportini rivojlantirish jamgʻarmasining Toshkent shahar filiali (A.I. Tolipjonov):

roʻyxatga binoan bolalar sogʻlomlashtirish oromgohlariga sport, ommaviy ishlarni joylarda tashkil etish uchun homiylik yordami sifatida sport inventarlari va jihozlarini ajratsin.

20. Oʻzbekiston Respublikasi Markaziy bankining Toshkent shahar bosh boshqarmasi (Sh.R. Xojizadayev):

oromgohlarga zarur boʻlgan oziq-ovqat mahsulotlari, dori-darmon va tibbiy ashyolar, xoʻjalik va madaniy-sport anjomlari sotib olish, xodimlarga ish haqi berish uchun mablagʻlar va toʻlovlarning oʻz vaqtida oʻtkazilishi nazoratga olinsin.

21. Madaniyat va sport ishlari bosh boshqarmasi (R.M. Xamidov), “Kamolot” yoshlar ijtimoiy harakati shahar Kengashi (A.X. Mirzajonov), Bolalar sportini rivojlantirish jamgʻarmasining Toshkent shahar filiali (A.I. Tolipjonov):

yozgi mavsum davrida oromgohlarda bolalar oʻrtasida madaniy-maʼrifiy va sport tadbirlarini uyushtirish boʻyicha tadbirlar rejasi ishlab chiqsin va joylarda ijrosi taʼminlansin.

22. “Oʻzbekkino” milliy agentligining shahar boʻlimi ( B.S. Ortiqov ):

barcha oromgohlarni maxsus kino-videofilmlar repertuari bilan taʼminlasin va har bir oromgohda har ikki kunda filmlar namoyish etilishi koʻzda tutilsin.

23. “Toshkent oqshomi” va “Vecherniy Tashkent” gazetalari (D.I. Isroilov), “Toshkent teleradiokanali” DUK (F. Zokirov):

maktab oʻquvchilarining taʼtili kunlarida shahar mehnatkashlari farzandlarini dam oldirish va ularni sogʻlomlashtirish ishlarini muntazam ravishda ommaviy axborot vositalari orqali yoritib borilishi tavsiya etilsin.

24. Ushbu qarorning bajarilishini nazorat qilish Toshkent shahar hokimining oʻrinbosari B.I. Toxirov va Toshkent shahar kasaba uyushmalari tashkilotlari birlashmasi Kengashi raisining oʻrinbosari — madaniy-maʼrifiy va sport ishlari boʻlimi mudiri A.N. Efimov zimmalariga yuklatilsin.

Hokim A. TOʻXTAYEV

Toshkent sh.,

2008-yil 5-may,

274-son

Toshkent shahar kasaba uyushmalari tashkilotlari birlashmasi Kengashining raisi N. NASIMOV

Toshkent sh.,

2008-yil 14-mart,

13-8-son