Energiyani tejaydigan lampalar ishlab chiqarishni tashkil etish va ulardan foydalanishga bosqichma-bosqich oʻtish chora-tadbirlari toʻgʻrisida (161-son)

02.06.2011

Oʻzbekiston Respublikasi Vazirlar Mahkamasining

qarori

Yuqori xalqaro standartlarga muvofiq boʻlgan, energiya isteʼmoli pasayishini va mamlakatning energetika resurslarini tejashni taʼminlaydigan energiyani tejaydigan zamonaviy lampalar ishlab chiqarishni tashkil etish va ular bilan ichki bozorni toʻldirish uchun qulay shart-sharoitlar yaratish maqsadida Vazirlar Mahkamasi qaror qiladi:

1. Oʻzbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligi, Moliya vazirligi hamda “Oʻzeltexsanoat” uyushmasi tomonidan ishlab chiqilgan:

2011 — 2015-yillarda energiyani tejaydigan zamonaviy lampalar ishlab chiqarishni tashkil etish va foydalanilayotgan choʻgʻlanish lampalarini almashtirish chora-tadbirlari dasturi 1-ilovaga muvofiq;

2011 — 2015-yillarda energiyani tejaydigan lampalarni mahalliy ishlab chiqarish va ular bilan ichki bozorni toʻldirishning maqsadli parametrlari 2-ilovaga muvofiq maʼqullansin.

2. Vazirliklar, davlat qoʻmitalari, idoralar, xoʻjalik birlashmalari va yirik korxonalar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

har yili 10-yanvargacha boʻlgan muddatda Oʻzbekiston Respublikasi Iqtisodiyot vazirligi va Moliya vazirligi bilan kelishilgan foydalanilayotgan energiyani koʻp sarflaydigan choʻgʻlanish lampalarini energiyani tejaydigan lampalarga almashtirish jadvallarini, ularda idoraviy mansub tashkilotlarning aniq roʻyxatini, yil choraklari boʻyicha almashtirishning miqdor parametrlarini, moliyalashtirish manbalarini va masʼul shaxslarni nazarda tutgan holda, tasdiqlash uchun Vazirlar Mahkamasiga kiritsinlar;

tasdiqlangan jadvallardan kelib chiqib idoraviy mansub tashkilotlar tomonidan mamlakatimiz ishlab chiqaruvchilari bilan, shu jumladan har yili oʻtkaziladigan Xalqaro sanoat yarmarkasida va Kooperatsiya birjasida energiyani tejaydigan lampalarni sotib olishga shartnomalar tuzilishini belgilangan tartibda taʼminlasinlar.

3. Oʻzbekiston Respublikasi Moliya vazirligi Davlat budjetining har yilgi parametrlarini shakllantirishda Davlat budjetidan moliyalashtiriladigan vazirliklar va idoralarga elektr energiyasidan foydalanish xarajatlarini tegishlicha pasaytirishni nazarda tutgan holda budjetdan ajratiladigan mablagʻlar doirasida energiyani tejaydigan lampalarni sotib olish va oʻrnatishga mablagʻlar ajratishni nazarda tutsin.

4. Oʻzbekiston Respublikasi Davlat arxitektura va qurilish qoʻmitasi “OʻzshaharsozlikLITI” DUK, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda 2011-yil 1-sentabrgacha boʻlgan muddatda Vazirlar Mahkamasiga 2012-2013-yillar mobaynida Toshkent, Samarqand, Buxoro shaharlarida va boshqa yirik shaharlarda shahar koʻchalarini energiyani tejaydigan zamonaviy lampalardan foydalangan holda yoritishni modernizatsiya qilish boʻyicha investitsiya loyihalarini amalga oshirishga doir takliflar kiritsin.

5. Oʻzbekiston Respublikasi Iqtisodiyot vazirligi, “Oʻzeltexsanoat” uyushmasi Oʻzbekiston Respublikasi Davlat tabiatni muhofaza qilish qoʻmitasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda ikki oy muddatda Vazirlar Mahkamasiga shaharlar va tumanlarda oʻz resursini ishlab boʻlgan energiyani tejaydigan lampalarni toʻplash va saqlash punktlari, shuningdek ularni utilizatsiya qiladigan korxonalar tashkil etish boʻyicha takliflar kiritsinlar.

6. Oʻzbekiston Respublikasi Davlat arxitektura va qurilish qoʻmitasi, tegishli loyiha institutlari yangidan tiklanadigan obyektlarga, shu jumladan “Qishloqqurilishbank” aksiyadorlik-tijorat banki kreditlari hisobiga qishloq joylarda quriladigan namunaviy turar joylarga loyiha-smeta hujjatlarini ishlab chiqishda faqat energiyani tejaydigan lampalardan foydalanishni nazarda tutsinlar.

7. Oʻzbekiston Milliy axborot agentligi, Oʻzbekiston milliy teleradiokompaniyasi, Oʻzbekiston matbuot va axborot agentligi “Oʻzeltexsanoat” uyushmasi bilan birgalikda ommaviy axborot vositalarida energiyani tejaydigan lampalardan foydalanishning afzalligi toʻgʻrisidagi materiallar keng yoritilishini taʼminlasinlar.

8. Mazkur qarorning bajarilishini nazorat qilish Oʻzbekiston Respublikasining Bosh vaziri Sh.M.Mirziyoyev zimmasiga yuklansin.

Oʻzbekiston Respublikasi Prezidenti I. Karimov

Toshkent sh.,

2011-yil 2-iyun,

161-son

Vazirlar Mahkamasining 2011-yil 2-iyundagi 161-son qaroriga 1-ILOVA

2011 — 2015-yillarda energiyani tejaydigan zamonaviy lampalar ishlab chiqarishni tashkil etish va foydalanilayotgan choʻgʻlanish lampalarini almashtirish chora-tadbirlari dasturi

* loyihalarning birinchi bosqichlari 2010-yilning ikkinchi yarim yilligida foydalanishga topshirilgan.

Vazirlar Mahkamasining 2011-yil 2-iyundagi 161-son qaroriga 2-ILOVA

2011 — 2015-yillarda energiyani tejaydigan lampalarni mahalliy ishlab chiqarish va ular bilan ichki bozorni toʻldirishning maqsadli parametrlari