“Angren” maxsus industrial zonasini barpo etish toʻgʻrisida (PF-4436-son)

13.04.2012

Oʻzbekiston Respublikasi Prezidentining

Farmoni

Yuqori qoʻshilgan qiymatga ega boʻlgan raqobatbardosh mahsulot ishlab chiqarishni taʼminlaydigan zamonaviy, yuksak texnologiyali ishlab chiqarishlarni tashkil etish uchun xorijiy va mahalliy investitsiyalarni jalb etish boʻyicha qulay shart-sharoitlarni shakllantirish, shuningdek Toshkent viloyatining ishlab chiqarish va resurs salohiyatidan kompleks hamda samarali foydalanish, shu asosda yangi ish joylarini yaratish va aholi daromadlarini oshirish maqsadida:

1. Oʻzbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligi, Moliya vazirligi, Toshkent viloyati hokimligining Toshkent viloyatida “Angren” erkin iqtisodiy zonasini (keyingi oʻrinlarda — “Angren” EIZ deb yuritiladi) 1-ilovaga muvofiq hududlar chegaralari doirasida barpo etish toʻgʻrisidagi taklifi qabul qilinsin.

Oʻzbekiston Respublikasi “Yergeodezkadastr” davlat qoʻmitasi Toshkent viloyati hokimligi bilan birgalikda bir oy muddatda “Angren” maxsus industrial zonasi tarkibiga kiritiladigan yer maydonlarining chegaralarini aniq belgilasin va yerlarning tegishli ravishda ajratilishini taʼminlasin.

Belgilab qoʻyilsinki, “Angren” erkin iqtisodiy zonasi tarkibiga kiritilgan yer maydonlari “Angren” EIZ direksiyasining bevosita tasarrufida boʻladi.

3. Belgilab qoʻyilsinki:

“Angren” erkin iqtisodiy zonasining faoliyat yuritish muddati 30 yilni tashkil etadi va bu muddat keyinchalik uzaytirilishi mumkin;

“Angren” EIZ faoliyat yuritadigan muddat mobaynida uning hududida maxsus soliq tartibi va bojxona imtiyozlari amal qiladi;

“Angren” EIZ qatnashchisi maqomi elektron onlayn-auksion savdo natijasiga koʻra “Angren” EIZ direksiyasi tomonidan beriladi.

“Angren” EIZda roʻyxatdan oʻtgan xoʻjalik subyektlariga nisbatan soliq toʻlovchining holatini yomonlashtiradigan Oʻzbekiston Respublikasining soliq qonunchiligi aktlari qoʻllanilmaydi, aksiz soligʻiga tortiladigan tovarlarga soliq solishni tartibga soluvchi aktlar bundan mustasno.

6. Toshkent viloyati hokimligi belgilangan tartibda “Angren” EIZda loyihalarni amalga oshiruvchi investorlar uchun quyidagilarni taʼminlasin:

birinchi navbatda sobiq sanoat zonalarining foydalanilmayotgan hududlarida korxonalar qurish uchun yer maydonlarini oʻz vaqtida elektron onlayn-auksion savdolariga chiqarish;

muhandislik-kommunikatsiya infratuzilmasi tarmoqlariga ulanish uchun barcha zarur ruxsatnomalarni “bir darcha” tamoyili asosida berish.

7. Shunday tartib oʻrnatilsinki, unga muvofiq “Angren” EIZda qatnashuvchi xoʻjalik yurituvchi subyektlar uchun “Oʻzbekenergo” AJ, “Oʻztransgaz” AK, Toshkent viloyati hokimligi boʻlinmalari va boshqa muhandislik-kommunikatsiya xizmatlarini yetkazib beruvchilar kommunikatsiyalarni ishlab chiqarish maydonchalariga tutashtirgan holda kafolatli ulanishini taʼminlaydilar.

8. Oʻzbekiston Respublikasi Iqtisodiyot vazirligi, Moliya vazirligi hamda Davlat arxitektura va qurilish qoʻmitasi “Oʻzbekenergo” DAK, “Oʻztransgaz” AK, “Oʻzavtoyoʻl” AK, “Oʻzbekiston temir yoʻllari” DAK, “Oʻzkommunxizmat” agentligi, Toshkent viloyati hokimligi bilan birgalikda uch oy muddatda “Angren” maxsus industrial zonasi hududida transport, ishlab chiqarish va muhandislik-kommunikatsiya infratuzilmasini jadal rivojlantirish dasturini ishlab chiqsin va Oʻzbekiston Respublikasi Vazirlar Mahkamasiga kiritsin.

9. Oʻzbekiston Respublikasi Vazirlar Mahkamasi bir oy muddatda “Angren” MIZ Direksiyasini tashkil etsin va “Angren” maxsus industrial zonasi faoliyatini tashkil etish boʻyicha qaror qabul qilsin, unda “Angren” maxsus industrial zonasi toʻgʻrisidagi Nizom hamda “Angren” maxsus industrial zonasi Maʼmuriy kengashi haqidagi Nizomni tasdiqlash nazarda tutilsin.

10. Oʻzbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligi Moliya vazirligi, Adliya vazirligi hamda boshqa manfaatdor vazirliklar va idoralar bilan birgalikda bir oy muddatda qonun hujjatlariga ushbu Farmondan kelib chiqadigan oʻzgartish va qoʻshimchalar toʻgʻrisida Vazirlar Mahkamasiga takliflar kiritsin.

11. Mazkur Farmonning ijrosini nazorat qilish Oʻzbekiston Respublikasining Bosh vaziri Sh.M. Mirziyoyev zimmasiga yuklansin.

Oʻzbekiston Respublikasi Prezidenti I. KARIMOV

Toshkent sh.,

2012-yil 13-aprel,

PF-4436-son

Oʻzbekiston Respublikasi Prezidentining 2012-yil 13-apreldagi PF-4436-son Farmoniga 1-ILOVA

“Angren” erkin iqtisodiy zonasiga kiruvchi hududlar

ROʻYXATI

I. Angren shahri

II. Ohangaron shahri

III. A-373 avtomobil yoʻlidan shimol tomonda Ohangaron va Angren shaharlari oʻrtasidagi uchastkada joylashgan hudud (78 — 101 km qismi), Alisher, Azimota, Uvoq, Chirish, Geolog, Yangi Kuchbuloq, Sogʻlom aholi punktlari bundan mustasno, va:

janub tomondan — A-373 avtomobil yoʻli (78 — 101 km qismi) bilan;

sharq tomondan — Qorabov daryosi qayirining oʻng tomoni bilan;

shimol tomondan — Oqchasoy jilgʻasi qayirining soʻl tomonidan Angren sanoat magistral kanali (ASMK) boʻylab 3 km, soʻngra shimol tomonga 500 kV EUL “Yangi Angren IES-PS Oʻzbekiston” (500 kV EUL) gacha, keyin 500 kvV EUL boʻylab Alisher aholi punkti orqali 4-sugʻorish quvuri (SQ)gacha va soʻngra suv quvuri boʻylab 500 kV EUL bilan kesishgungacha, keyin sharqqa qarab 500 kV EUL boʻylab Achchiqsoy jilgʻasigacha, keyin shimolga qarab Achchiqsoy jilgʻasi 2-SQ bilan kesishgungacha, soʻngra 2-SQ boʻylab Uvoq aholi punkti orqali sharqqa tomon u Qurtoshsoy jilgʻasi bilan kesishgungacha, soʻngra Qurtoshsoy jilgʻasi boʻylab shimolga qarab u Olmaliq KMKning Angren ruda boshqarmasi gidroqatlamiga olib boradigan avtomobil yoʻli bilan kesishgungacha, keyin ushbu avtomobil yoʻli boʻylab sharqqa tomon Chirishsoy jilgʻasigacha, keyin u 500 kV EUL bilan kesishgunigacha janubga tomon, soʻngra 500 kV EUL boʻylab u “Qizil Olma” koniga olib boruvchi avtomobil yoʻli bilan kesishgunigacha shimoli-sharqqa tomon, keyin koʻrsatib oʻtilgan avtomobil yoʻli boʻylab janubi-sharqqa tomon Sogʻlom aholi punkti chegarasigacha, keyin sharqqa tomon Qorabov daryosigacha chegaralangan hudud.

Izoh: “Angren” erkin iqtisodiy zonasiga kiruvchi hududlar va uning chegaralari, zarur hollarda, Oʻzbekiston Respublikasi Vazirlar Mahkamasining qarori bilan oʻzgartirilishi mumkin.