Oʻzbekiston Respublikasi Konstitutsiyasi qabul qilinganligining besh yilligi munosabati bilan amnistiya toʻgʻrisida (PF-1885-son)

03.12.1997

Oʻzbekiston Respublikasi Prezidentining

Farmoni

Oʻzbekiston Respublikasi Konstitutsiyasi qabul qilinganligining besh yilligi munosabati bilan hamda, insonparvarlik tamoyiliga amal qilib, Konstitutsiyaning 93-moddasi 20-bandiga asosan qaror qilaman:

1. Ozodlikdan mahrum qilish, shuningdek ozodlikdan mahrum etish bilan bogʻliq boʻlmagan jazolardan quyidagi mahkumlar ozod qilinsin:

a) ikkinchi jahon urushi qatnashchilari va ularga tenglashtirilgan shaxslar, shuningdek Chernobil AESidagi halokat oqibatlarini bartaraf qilishda qatnashgan shaxslar;

b) ayollar, shuningdek 60 yoshdan oshgan erkaklar;

v) voyaga yetmagan yoshida jinoyat sodir etgan shaxslar;

g) birinchi va ikkinchi guruh nogironlari.

2. Birinchi marta qasddan sodir etgan jinoyatlari uchun uch yilgacha muddatga ozodlikdan mahrum etilgan yoki ozodlikdan mahrum etish bilan bogʻliq boʻlmagan jazolarga hukm qilingan, shuningdek, ehtiyotsizlik oqibatida sodir etilgan jinoyatlar uchun besh yilgacha muddatga ozodlikdan mahrum etilgan shaxslar jazodan ozod qilinsin.

3. Birinchi marta hukm qilingan quyidagi shaxslar jazoning qolgan qismini oʻtashdan ozod qilinsin:

a) besh yilgacha ozodlikdan mahrum qilingan va tayinlangan jazo muddatining kamida toʻrtdan bir qismini oʻtaganlar.

b) yetti yilgacha ozodlikdan mahrum qilingan va tayinlangan jazo muddatining kamida uchdan ikki qismini oʻtaganlar;

v) oʻn yilgacha ozodlikdan mahrum qilingan va tayinlangan jazo muddatining kamida toʻrtdan uch qismini oʻtaganlar.

4. Mazkur Farmonning birinchi moddasida qayd etilgan shaxslar tomonidan sodir etilgan jinoyatlar, shuningdek ijtimoiy xavfi katta boʻlmagan jinoyatlar yuzasidan olib borilayotgan tergov ishlari va sudda koʻrilmagan ishlar harakatdan tugatilsin.

5. Ehtiyotsizlik oqibatida sodir etgan jinoyatlari uchun besh yildan ortiq muddatga ozodlikdan mahrum etilgan shaxslarga — oʻtalmagan jazo qismi yarmiga qisqartirilsin.

6. Birinchi marta oʻn yilgacha muddatga ozodlikdan mahrum etilgan va jazo muddatining kamida yarmini oʻtagan mahkumlar manzil-koloniyalarga oʻtkazilsin.

7. Oʻzbekiston Respublikasi Jinoyat kodeksining 247, 248-moddalarida, 270-moddasining 2, 3-qismlarida, 271, 272, 273-moddalarida koʻrsatilgan jinoyatlarni sodir etganlarga, oʻta ogʻir jinoyatlar uchun hukm qilinganlarga, oʻta xavfli retsidivistlarga, shuningdek uyushgan guruh yohud jinoiy uyushma tarkibida jinoyat sodir etganlarga nisbatan ushbu Farmonning 1—4, 6-moddalari qoʻllanilmasin.

8. Jazoni oʻtash tartibini buzgan mahkumlarga, shuningdek ilgari amnistiya yoki afv etish tartibida jazodan ozod etilgan shaxslarga nisbatan Farmon tatbiq etilmasin.

9. Farmon matbuotda eʼlon qilingan kundan kuchga kiradi va toʻrt oy mobaynida ijro etiladi.

Oʻzbekiston Respublikasining Prezidenti I. KARIMOV

Toshkent sh.,

1997-yil 3-dekabr,

PF-1885-son