Umumiy ovqatlanish korxonalari tomonidan alkogolli mahsulotlar sotish tartibini takomillashtirish chora-tadbirlari toʻgʻrisida (89-son)

28.03.2012

Oʻzbekiston Respublikasi Vazirlar Mahkamasining

qarori

Vazirlar Mahkamasining “Chakana savdo va umumiy ovqatlanish sohasida “Alkogol va tamaki mahsulotlarining tarqatilishi hamda isteʼmol qilinishini cheklash toʻgʻrisida”gi Oʻzbekiston Respublikasi Qonunini amalga oshirish chora-tadbirlari haqida” 2012-yil 7-martdagi 65-son qaroriga muvofiq Vazirlar Mahkamasi qaror qiladi:

1. Belgilab qoʻyilsinki:

umumiy ovqatlanish korxonalari tomonidan alkogolli mahsulotlar faqat alkogolli mahsulotlarni sotish huquqi uchun ruxsat guvohnomalari asosida sotiladi;

umumiy ovqatlanish korxonalari tomonidan alkogolli mahsulotlarni sotish huquqi uchun qonun hujjatlarida belgilangan miqdorda yigʻim undiriladi, tushgan mablagʻlar keyinchalik Oʻzbekiston Respublikasi Moliya vazirligi tomonidan tasdiqlangan tartibda taqsimlanadi.

2. Umumiy ovqatlanish korxonalari tomonidan alkogolli mahsulotlarni sotish huquqi uchun ruxsat guvohnomalari berish funksiyalari Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi alkogolli mahsulotlar bilan chakana savdo qilish huquqi uchun ruxsat guvohnomalari berish boʻyicha maxsus komissiyalarga yuklansin.

3. Umumiy ovqatlanish korxonalari tomonidan alkogolli mahsulotlarni sotish huquqi uchun ruxsat guvohnomasi berish tartibi toʻgʻrisidagi Nizom ilovaga muvofiq tasdiqlansin.

4. Oʻzbekiston Respublikasi Davlat soliq qoʻmitasi umumiy ovqatlanish korxonalari tomonidan ushbu qaror talablariga izchil rioya etilishi yuzasidan qatʼiy nazoratni taʼminlasin hamda alkogolli mahsulotlarni sotishda huquq buzilishlariga yoʻl qoʻygan shaxslarni javobgarlikka tortish choralarini koʻrsin.

5. “Davlat belgisi” davlat-ishlab chiqarish birlashmasi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining buyurtmanomalari boʻyicha tegishli himoyalanish darajalariga ega boʻlgan maxsus blankalarda alkogolli mahsulotlarni sotish huquqi uchun ruxsat guvohnomalarining zarur miqdorda tayyorlab berilishini taʼminlasin.

6. Oʻzbekiston Respublikasi Moliya vazirligi manfaatdor vazirliklar va idoralar bilan birgalikda qonun hujjatlariga mazkur qarordan kelib chiquvchi oʻzgartirish va qoʻshimchalar toʻgʻrisida bir oy muddatda Vazirlar Mahkamasiga takliflar kiritsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov zimmasiga yuklansin.

Oʻzbekiston Respublikasining Bosh vaziri Sh. MIRZIYOYEV

Toshkent sh.,

2012-yil 28-mart,

89-son

Vazirlar Mahkamasining 2012-yil 28-martdagi 89-son qaroriga ILOVA

Umumiy ovqatlanish korxonalari tomonidan alkogolli mahsulotlarni sotish huquqi uchun ruxsat guvohnomasi berish tartibi toʻgʻrisida

Nizom

I. Umumiy qoidalar

1. Ushbu Nizom umumiy ovqatlanish korxonalari tomonidan alkogolli mahsulotlarni sotish huquqi uchun ruxsat guvohnomasi (keyingi oʻrinlarda ruxsat guvohnomasi deb ataladi) berish tartibini belgilaydi.

2. Umumiy ovqatlanish korxonalari alkogolli mahsulotni sotishni faqat:

ushbu Nizomga muvofiq berilgan ruxsat guvohnomasi;

belgilangan tartibda roʻyxatdan oʻtkazilgan, fiskal xotiraga ega boʻlgan nazorat-kassa mashinasi qonun hujjatlarida nazarda tutilgan hollarda esa onlayn nazorat-kassa mashinasi yoki virtual kassa;

yongʻinga qarshi, sanitariya normalari va qoidalariga muvofiq boʻlgan omborxonalarga va asbob-uskunalarga ega boʻlgan oʻzining yoki ijaraga olingan umumiy ovqatlanish obyekti mavjud boʻlganda amalga oshiradilar. Bunda umumiy ovqatlanish obyektlari taʼlim, sport va diniy muassasalar hududlarida, jamoat transporti bekatlarida, davolash-profilaktika va sport-sogʻlomlashtirish muassasalari hududida, ushbu muassasalar va ishlab chiqarish korxonalari oshxonalarida joylashmagan boʻlishi kerak.

3. Ruxsat guvohnomasi berish (amal qilish muddatini 10 kungacha toʻxtatib turish, shuningdek amal qilish muddatini toʻxtatish, uni bekor qilish yuzasidan sud tartibotini boshlash) toʻgʻrisidagi qaror Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari huzuridagi alkogolli mahsulotlarni chakana sotish huquqi uchun ruxsat guvohnomalari berish boʻyicha maxsus komissiyalar (keyingi oʻrinlarda Komissiya deb ataladi) tomonidan qabul qilinadi.

Hujjatlarni qabul qilish, ular boʻyicha Komissiya xulosalari va qarorlari loyihalarini tayyorlash tuman (shahar) hokimliklari huzuridagi alkogolli mahsulotlarni chakana sotish huquqi uchun ruxsat guvohnomalari olishga oid hujjatlarni koʻrib chiqish komissiyalari (keyingi oʻrinlarda ishchi organ deb ataladi) tomonidan amalga oshiriladi.

Umumiy ovqatlanish korxonalari tomonidan alkogolli mahsulotlarni sotish huquqi uchun qonun hujjatlarida belgilangan miqdorda yigʻim undiriladi, tushgan mablagʻlar keyinchalik Oʻzbekiston Respublikasi Moliya vazirligi tomonidan belgilangan tartibda taqsimlanadi.

4. Ruxsat guvohnomasi har bir umumiy ovqatlanish obyekti uchun arizada koʻrsatilgan muddatga, lekin koʻpi bilan ikki yil muddatga, ushbu Nizomga 1 va 2-ilovalarga muvofiq sxema va shakl boʻyicha beriladi.

41. Mehmonxonalarga, mehmonxonaga tegishli boʻlgan va uning ichida joylashgan, yashovchilarga alkogolli mahsulotlarni sotishni amalga oshiruvchi barcha umumiy ovqatlanish korxonalariga (bar, mini-bar, kafe, restoran) bitta ruxsat guvohnomasi beriladi.

II. Ruxsat guvohnomasi olish uchun zarur boʻlgan hujjatlar

5. Ruxsat guvohnomasi olish uchun umumiy ovqatlanish korxonasi oʻzi joylashgan joydagi ishchi organga quyidagi hujjatlarni taqdim etadi:

ruxsat guvohnomasi olish uchun ariza, unda umumiy ovqatlanish korxonasining tashkiliy-huquqiy shakli va nomi, uning joylashgan joyi (pochta manzili), bankning nomi va bankdagi hisob-kitob raqami koʻrsatiladi;

umumiy ovqatlanish korxonasining davlat roʻyxatidan oʻtkazilganligi toʻgʻrisidagi guvohnoma nusxasi;

ruxsat guvohnomasi olish uchun ariza berish vaqtiga kelib shaharlarda — bazaviy hisoblash miqdorining kamida 100 baravari miqdorida hamda qishloq joylarda va uzoq togʻli tumanlarda — bazaviy hisoblash miqdorining kamida 50 baravari miqdorida shakllantirilgan ustav fondining mavjudligini tasdiqlovchi hujjat nusxasi. Agar ustav fondi pul shaklida shakllantirilgan boʻlsa — bu toʻgʻridagi tasdiqlovchi hujjat xizmat koʻrsatuvchi bank tomonidan beriladi. Ustav jamgʻarmasi boshqacha mulk bilan shakllantirilgan taqdirda ushbu mulkka egalik huquqini, uning qiymatini va uning ustav fondiga kiritilishini tasdiqlovchi hujjat taqdim etiladi;

xizmat koʻrsatuvchi bankning bank plastik kartochkalaridan toʻlovlarni qabul qilish boʻyicha hisob-kitob terminalining mavjudligi toʻgʻrisidagi maʼlumotnomasi;

arizada koʻrsatilgan muddatga muvofiq ruxsat guvohnomasi berilganligi uchun yigʻim toʻlanganligini tasdiqlovchi bank hujjatining nusxasi.

Ishchi organ ruxsat guvohnomasi berish uchun boshqa vakolatli organlarda mavjud boʻlgan zarur hujjatlar va axborotlarni belgilangan tartibda oʻzaro axborot hamkorligi yoʻli bilan, shu jumladan elektron tarzda mustaqil ravishda oladi, ushbu bandda nazarda tutilgan hujjatlar va axborotlar bundan mustasno.

6. Umumiy ovqatlanish korxonasidan ushbu Nizomning 5-bandida nazarda tutilmagan hujjatlarning taqdim etilishini talab qilishga yoʻl qoʻyilmaydi.

7. Hujjatlar ishchi organga bevosita yoxud ularning olinganligi toʻgʻrisidagi bildirishnoma bilan pochta aloqasi vositalari orqali taqdim etiladi.

Hujjatlar ishchi organning masʼul shaxsi tomonidan roʻyxat boʻyicha qabul qilinadi, roʻyxatning nusxasi hujjatlar qabul qilingan sana toʻgʻrisidagi belgi qoʻyilgan holda ariza beruvchiga topshiriladi (yuboriladi).

Taqdim etilgan maʼlumotlarning ishonchliligi uchun umumiy ovqatlanish korxonasi — ariza beruvchi javob beradi.

III. Arizalarni ishchi organ tomonidan koʻrib chiqish tartibi

8. Ishchi organ taqdim etilgan hujjatlarni 5 ish kuni mobaynida oʻrganib chiqadi va ularning ishonchliligini, shuningdek ushbu Nizomda nazarda tutilgan talablarga muvofiqligini aniqlaydi.

9. Ishchi organning barcha aʼzolari tomonidan bir ovozdan qaror qabul qilingan taqdirda ruxsat guvohnomasi berish toʻgʻrisida Komissiyaga taklif kiritiladi.

Ishchi organ tomonidan Komissiyaga ijobiy xulosa kiritilgan taqdirda, xulosa bilan bir vaqtda, umumiy ovqatlanish korxonasi tomonidan alkogolli mahsulotlarni sotish va naqd tushumni banklar kassasiga topshirishning prognoz hajmlari taqdim etiladi, ularga har chorakda ishchi organ tomonidan tuzatishlar kiritiladi.

IV. Ishchi organ xulosasini koʻrib chiqish va ruxsat guvohnomasini berish yoki berishni rad etish toʻgʻrisida qaror qabul qilish tartibi

10. Komissiya ishchi organ tomonidan taqdim etilgan hujjatlarni 10 ish kun mobaynida oʻrganib chiqadi va Komissiyaning barcha aʼzolari tomonidan bir ovozdan qaror qabul qilingan taqdirda ruxsat guvohnomasi berish toʻgʻrisida qaror qabul qiladi.

Qaror qabul qilingandan soʻng Komissiya umumiy ovqatlanish korxonasini qabul qilingan qaror toʻgʻrisida 3 ish kuni mobaynida xabardor qiladi.

11. Ruxsat guvohnomasi Komissiya raisi tomonidan imzolanadi.

Ruxsat guvohnomasi blankalari qatʼiy hisobot beriladigan hujjatlar hisoblanadi, hisobga olish seriyasiga, tartib raqamiga, himoyalanganlik darajasiga ega boʻladi.

Komissiya raisi ruxsat guvohnomasi blankalaridan maqsadli foydalanilishi, ularning saqlanishi va hisobga olinishi yuzasidan shaxsan javob beradi.

Ruxsat guvohnomasi blankalarining hisobi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan, Berilgan ruxsatnomalarni roʻyxatga olish daftarida yuritiladi.

12. Quyidagilar ruxsat guvohnomasi berishning rad etilishi uchun asoslar hisoblanadi:

ruxsat guvohnomasi berish uchun zarur boʻlgan hujjatlarning toʻliq hajmda taqdim etilmaganligi;

ariza beruvchining ushbu Nizom talablariga nomuvofiqligi;

taqdim etilgan hujjatlarda ishonchsiz yoki notoʻgʻri maʼlumotlarning mavjudligi.

Ruxsat guvohnomasi berishning boshqa asoslar boʻyicha, shu jumladan maqsadga muvofiq emasligi sabablari boʻyicha rad etilishiga yoʻl qoʻyilmaydi.

Umumiy ovqatlanish korxonasi ruxsat guvohnomasi berishning rad etilishi toʻgʻrisidagi qaror yuzasidan qonun hujjatlarida belgilangan tartibda shikoyat bildirish huquqiga ega.

13. Aniq sabablari koʻrsatilgan holda ruxsat guvohnomasi berishning rad etilishi toʻgʻrisidagi qaror yozma shaklda, Komissiya raisining imzosi bilan umumiy ovqatlanish korxonasiga beriladi (yuboriladi). Ushbu qarorda rad etishga sabab boʻlgan kamchiliklarni tugatish va hujjatlarni takroran taqdim etish uchun yetarli boʻlgan muddat koʻrsatiladi.

Litsenziya talabgorining ruxsat guvohnomasi berish toʻgʻrisidagi arizasini qayta koʻrib chiqishda ilgari ruxsat guvohnomasi berishni rad etish toʻgʻrisidagi bildirishnomada koʻrsatilmagan yangi asoslar boʻyicha ushbu guvohnomani berishni rad etishga yoʻl qoʻyilmaydi.

V. Ruxsat guvohnomasini qayta rasmiylashtirish, uning amal qilish muddatini uzaytirish, dublikat berish

14. Umumiy ovqatlanish korxonasi qayta tashkil etilganda, uning nomi yoki joylashgan joyi (pochta manzili) oʻzgarganda umumiy ovqatlanish korxonasi yoki uning huquqiy vorisi qayta roʻyxatdan oʻtkazilgandan keyin bir hafta muddatda umumiy ovqatlanish korxonasi joylashgan joydagi ishchi organga ruxsat guvohnomasini qayta rasmiylashtirish toʻgʻrisida ariza berishi, arizaga koʻrsatilgan maʼlumotlarni tasdiqlovchi hujjatlarni ilova qilishi kerak.

Yangidan vujudga kelgan yuridik shaxsni davlat roʻyxatidan oʻtkazish sanasida ruxsat guvohnomasiga ega boʻlgan umumiy ovqatlanish korxonalari qoʻshib yuborilgan taqdirda, ruxsat guvohnomasini ushbu bandning birinchi xatboshida nazarda tutilgan tartibda qayta rasmiylashtirishga yoʻl qoʻyiladi.

Ruxsat guvohnomasidagi mavjud maʼlumotlar mazkur bandning birinchi va ikkinchi xatboshilarida nazarda tutilmagan hollarda oʻzgartirilgan taqdirda, ruxsat guvohnomasi umumiy ovqatlanish korxonasining tegishli hujjatlar ilova qilingan arizasi boʻyicha qayta rasmiylashtiriladi.

Bu holda ruxsat guvohnomasi qayta rasmiylashtirilgungacha umumiy ovqatlanish korxonasi alkogolli mahsulotlar sotishni ilgari berilgan ruxsat guvohnomasi asosida amalga oshiradi.

15. Ruxsat guvohnomasini qayta rasmiylashtirishda tegishli oʻzgartirishlar Berilgan ruxsatnomalarni roʻyxatdan oʻtkazish daftariga kiritiladi. Ruxsat guvohnomasini qayta rasmiylashtirish umumiy ovqatlanish korxonasining zarur hujjatlar ilova qilingan holda ruxsat guvohnomasini qayta rasmiylashtirish toʻgʻrisidagi arizasi tushgan vaqtdan boshlab 5 ish kuni mobaynida ishchi organ tomonidan amalga oshiriladi.

16. Ruxsat guvohnomasining amal qilish muddatini uzaytirish umumiy ovqatlanish korxonasining arizasi boʻyicha amalga oshiriladi.

Ruxsat guvohnomasining amal qilish muddatini uzaytirish toʻgʻrisidagi ariza ishchi organga ruxsat guvohnomasining amal qilish muddati oʻtishidan 15 kun oldin berilishi kerak.

Ruxsat guvohnomasining amal qilish muddatini uzaytirish yoki muddatini uzaytirishni rad etish toʻgʻrisidagi qaror ruxsat guvohnomasi berish uchun nazarda tutilgan tartibda qabul qilinadi.

17. Yoʻqolgan yoki yaroqsiz holga kelgan, muddati oʻtmagan ruxsat guvohnomasining oʻrniga umumiy ovqatlanish korxonasi arizasi boʻyicha dublikat berilishi mumkin.

VI. Ruxsat guvohnomasining amal qilishini toʻxtatib turish, toʻxtatish va uni bekor qilish

18. Davlat soliq xizmati organlarining taqdimnomasi boʻyicha Komissiya tomonidan ruxsat guvohnomasining amal qilish muddatini 10 kundan ortiq boʻlmagan muddatga toʻxtatib turish toʻgʻrisidagi qaror umumiy ovqatlanish korxonasida alkogolli mahsulotlarni sotish qoidalari buzilganligi, shu jumladan naqd pul tushumini inkassatsiya qilish (banklarga topshirish)dagi buzilishlar aniqlangan taqdirda qabul qilinadi.

19. Ruxsat guvohnomasining amal qilishi taʼmirlash ishlari bajarilishi munosabati bilan, shuningdek boshqa shunga oʻxshash hollarda vaqtincha toʻxtatib turilganda umumiy ovqatlanish korxonasi bu toʻgʻrida Komissiyani va davlat soliq xizmati organini yozma shaklda xabardor qilishi kerak.

20. Ruxsat guvohnomasining amal qilishi:

umumiy ovqatlanish korxonasi tomonidan alkogolli mahsulotlarni umumiy ovqatlanish korxonalarida sotish qoidalari muntazam ravishda yoxud bir marta qoʻpol buzilgan taqdirda;

qonun hujjatlarida belgilangan boshqa hollarda sud tartibida toʻxtatilishi mumkin.

21. Ruxsat guvohnomasi uning qalbaki hujjatlardan foydalangan holda olinganligi holati aniqlanganda, shuningdek qonun hujjatlarida nazarda tutilgan boshqa hollarda qonun hujjatlarida belgilangan tartibda bekor qilinishi mumkin.

VII. Ushbu Nizomning buzilganligi uchun javobgarlik

22. Ushbu Nizomning buzilishida aybdor boʻlgan shaxslar qonun hujjatlarida belgilangan tartibda javob beradilar.

Umumiy ovqatlanish korxonalari tomonidan alkogolli mahsulotlarni sotish huquqi uchun ruxsat guvohnomasi berish tartibi toʻgʻrisidagi Nizomga 1-ilova

Umumiy ovqatlanish korxonalari tomonidan alkogolli mahsulotlarni sotish huquqi uchun ruxsat guvohnomasi berish

SXEMASI

Umumiy ovqatlanish korxonalari tomonidan alkogolli mahsulotlarni sotish huquqi uchun ruxsat guvohnomasi berish tartibi toʻgʻrisidagi nizomga 2-ILOVA

Izoh: Ruxsat guvohnomasi har bir umumiy ovqatlanish obyektiga alohida beriladi.