Ilmiy-texnologik hamkorlik toʻgʻrisida

05.05.2011

Oʻzbekiston Respublikasi Hukumati bilan Turkmaniston Hukumati oʻrtasida

Bitim

Oʻzbekiston Respublikasi Hukumati va Turkmaniston Hukumati, bundan keyin Tomonlar deb ataluvchilar,

Oʻzbekiston Respublikasi Hukumati bilan Turkmaniston Hukumati oʻrtasida fan, texnika va axborot sohasidagi hamkorlik toʻgʻrisida 1996-yil 16-yanvardagi Bitimga amal qilib,

Tomonlar davlatlari fani, texnikasi va texnologiyalarini rivojlantirishning ustuvor yoʻnalishlari boʻyicha ilmiy-texnologik sohadagi qoʻshma innovatsion faoliyatga davlat yordami zarurligini eʼtirof etib,

innovatsiyalar va texnologik taraqqiyot sohasida ikki tomonlama aloqalarning muhim ekanini anglab, ularni ikkala davlat iqtisodiyotini rivojlantirishda muhim va zarur omil deb hisoblab,

bunday oʻzaro aloqalar davlatlar va ularning xalqlari oʻrtasidagi hamkorlikni mustahkamlashga yordam koʻrsatishiga, shuningdek oʻzaro manfaatli savdo-iqtisodiy aloqalarning rivojlanishi uchun uzoq muddatli asos yaratishiga qatʼiy ishongan holda, quyidagilar toʻgʻrisida kelishib oldilar:

quyidagilar toʻgʻrisida kelishib oldilar:

1-modda

Tomonlar teng huquqlilik va oʻzaro manfaat prinsiplari asosida oʻz davlatlarining milliy qonunchiligiga muvofiq ilmiy-texnologik sohadagi hamkorlikni amalga oshiradilar.

2-modda

Tomonlar oʻrtasidagi ilmiy-texnologik hamkorlik ularning milliy manfaatlari asosida quyidagi asosiy yoʻnalishlar boʻyicha amalga oshiriladi:

— ilmiy-texnologik soha — dasturlar, loyihalar va ularni moliyalashtirish mexanizmlarini ishlab chiqish;

— energetika, shu jumladan energiyadan samarali foydalanish, tiklanadigan energiya manbalari va yangi texnologiyalar;

— qishloq va suv xoʻjaligi, sogʻliqni saqlash va atrof muhitni muhofaza qilish;

— fan, texnologiyalar va muhandis-konstruktorlik ishlari sohasidagi hamkorlikning boshqa oʻzaro kelishilgan yoʻnalishlari.

3-modda

Ushbu Bitim doirasidagi hamkorlik quyidagi shakllarda amalga oshirilishi mumkin:

— chuqur ilm talab qiladigan va resurslarni tejaydigan texnologiyalarni yaratish va oʻzlashtirish boʻyicha birgalikdagi ilmiy-tadqiqot dasturlarini, loyihalarini amalga oshirish;

— ochiq ilmiy-texnikaviy maʼlumot va innovatsion texnologiyalarni almashish;

— birgalikdagi ilmiy-tadqiqot, tajriba-konstruktorlik va texnologik ishlarni bajarish;

— ilmiy tadqiqotlar va sanoat ishlanmalarini amalga oshirish uchun olimlar va mutaxassislarni almashish;

— texnika va texnologiyalarning yangi turlarini yaratish;

shuningdek, Tomonlarning oʻzaro kelishuvi boʻyicha boshqa shakllarda.

4-modda

Tomonlar oʻz davlatlari milliy qonunchiligiga, shuningdek Tomonlarning ular ishtirokchilari boʻlgan intellektual mulk boʻyicha xalqaro shartnomalar va bitimlardan kelib chiquvchi majburiyatlariga tegishlicha rioya etgan holda sanoat ishlanmalari va yangi texnologiyalar sohasida birgalikdagi innovatsion faoliyatni ragʻbatlantiradilar.

Ushbu maqsadda tadqiqotlar va ishlanmalar natijalarini joriy etish va birgalikda oʻzlashtirishdan manfaatdor boʻlgan ilmiy-tadqiqot markazlari, oliy oʻquv yurtlari, korxonalar va tashkilotlar oʻrtasida aloqalar oʻrnatish qoʻllab-quvvatlanadi.

5-modda

Tomonlar oʻzlari va ularning vakillari tomonidan ushbu Bitim asosida olingan ilmiy, muhandis-konstruktorlik va texnologik maʼlumotlarni boshqa Tomonning yozma roziligisiz har qanday uchinchi tomonga bermaslik majburiyatini oladi.

Ushbu Bitim doirasida hamkorlik davomida olingan birgalikdagi ilmiy tadqiqotlar natijalari va boshqa maʼlumotlar, davlat yoki boshqa qonun muhofazasidagi sir hisoblanishi sabablariga, shuningdek tijorat yoki ishlab chiqarish sabablariga koʻra oshkor qilinishi mumkin boʻlmaganlardan tashqari, oʻzaro kelishuv boʻyicha ularni topshirishning hammaga maʼqul usullaridan foydalanish yoʻli bilan va Tomonlar davlatlarining amaldagi milliy qonunchiligiga muvofiq dunyo ilmiy jamoatchiligi uchun ochilishi mumkin.

6-modda

Ushbu Bitim qoidalarini muvofiqlashtirish va amalga oshirish uchun quyidagilar Tomonlarning ijroiya organlari boʻlib hisoblanadi:

Oʻzbekiston Respublikasi tomonidan — Oʻzbekiston Respublikasi Vazirlar Mahkamasi Fan va texnologiyalarni rivojlantirishni muvofiqlashtirish qoʻmitasi;

Turkmaniston tomonidan — Turkmaniston Fanlar akademiyasi.

Vakolatli organlarning nomlari yoki vazifalari oʻzgarganda Tomonlar diplomatik kanallar orqali oʻz vaqtida xabardor qilinadi.

7-modda

Tomonlarning ijroiya organlari, zaruriyatga qarab, hamkorlikning ustuvor yoʻnalishlarini belgilash, ushbu Bitimni amalga oshirish hamda birgalikdagi loyiha va dasturlarni roʻyobga chiqarish jarayonini muhokama qilish uchun uchrashuvlar oʻtkazadilar, shuningdek oʻzaro ahamiyatga ega boʻlgan masalalar boʻyicha maslahatlashuvlar oʻtkazadilar.

8-modda

Tomonlar oʻrtasida ushbu Bitim qoidalarini talqin qilish yoki qoʻllashga taalluqli ixtiloflar yuzaga kelganda, Tomonlar ularni muzokaralar va maslahatlashuvlar yoʻli bilan hal etadilar.

9-modda

Ushbu Bitim Tomonlar ishtirokchisi boʻlgan boshqa xalqaro shartnomalardan kelib chiquvchi huquq va majburiyatlarga daxl qilmaydi.

10-modda

Tomonlarning oʻzaro kelishuvi boʻyicha ushbu Bitimga uning ajralmas qismi boʻlib hisoblanuvchi alohida bayonnomalar bilan rasmiylashtiriladigan oʻzgartish va qoʻshimchalar kiritilishi mumkin.

11-modda

Ushbu Bitim Tomonlar tarafidan uning kuchga kirishi uchun zarur boʻlgan davlat ichki protseduralarining bajarilgani toʻgʻrisidagi soʻnggi yozma xabarnoma olingan kundan boshlab kuchga kiradi.

Ushbu Bitim kuchga kirgan kundan boshlab Oʻzbekiston Respublikasi Hukumati bilan Turkmaniston Hukumati oʻrtasida fan, texnika va axborot sohasidagi hamkorlik toʻgʻrisida 1996-yil 16-yanvardagi Bitimning 3-moddasi 2 va 5-xatboshilarining qoidalari oʻz kuchini yoʻqotadi.

Ushbu Bitim besh yil muddatga tuziladi va agar Tomonlardan hech biri navbatdagi besh yillik davr tugashidan kamida olti oy oldin boshqa Tomonga oʻzining ushbu Bitimning amal qilishini toʻxtatish maqsadi toʻgʻrisida yozma xabarnoma yubormasa, kelgusi besh yillik davrlarga uzaytiriladi.

Toshkent shahrida 2011-yil 5-mayda har biri oʻzbek, turkman va rus tillarida boʻlgan ikki asl nusxada tuzildi, bunda barcha matnlar bir xil kuchga ega.

Ushbu Bitim qoidalarini talqin qilishda ixtiloflar yuzaga kelganda rus tilidagi matn ustuvor kuchga ega boʻladi.

(imzolar)