Savdo vakolatxonalarini oʻzaro taʼsis etish toʻgʻrisida

05.05.2011

Oʻzbekiston Respublikasi Hukumati bilan Turkmaniston Hukumati oʻrtasida

Bitim

Oʻzbekiston Respublikasi Hukumati va Turkmaniston Hukumati, bundan keyin Tomonlar deb ataluvchilar,

har ikki mamlakat oʻrtasida savdo-iqtisodiy munosabatlarni rivojlantirishga koʻmaklashishni istab,

oʻz davlatlari iqtisodiyotining dunyo xoʻjalik tizimiga integratsiyalashuviga intilib,

xalqaro huquqning umumeʼtirof etilgan normalari va prinsiplariga hamda Oʻzbekiston Respublikasi va Turkmaniston milliy qonunchiliklariga rioya etgan holda,

quyidagilar toʻgʻrisida kelishib oldilar:

1-modda

Oʻzbek Tomoni Ashxobod shahrida Oʻzbekiston Respublikasi Savdo vakolatxonasini taʼsis etadi, Turkman Tomoni esa Toshkent shahrida Turkmaniston Savdo vakolatxonasini taʼsis etadi.

2-modda

Savdo vakolatxonalari quyidagi asosiy vazifalarni bajaradilar:

a) Oʻzbekiston Respublikasi bilan Turkmaniston oʻrtasida savdo-iqtisodiy aloqalarni rivojlantirishga koʻmaklashish;

b) joylashish mamlakatida ikki mamlakat oʻrtasidagi savdo va iqtisodiy hamkorlikning boshqa turlariga taalluqli barcha masalalarda oʻz davlatlarining manfaatlarini ifodalash;

v) oʻz mamlakati davlat organlarini joylashish mamlakatidagi iqtisodiy sharoitlar va uning tashqi iqtisodiy faoliyat sohasidagi qonunchiligi toʻgʻrisida xabardor qilish, shuningdek joylashish mamlakatining manfaatdor organlariga oʻz mamlakati toʻgʻrisida shunday axborot taqdim etish;

g) oʻz mamlakatlarining yuridik va jismoniy shaxslariga ularning joylashish mamlakatining yuridik va jismoniy shaxslari bilan savdo, iqtisodiy va ilmiy-texnikaviy hamkorlik boʻyicha aloqalar oʻrnatishi va bitimlarni amalga oshirishida yordam koʻrsatish.

3-modda

Savdo vakolatxonalari oʻz mamlakatlarining Hukumatlari nomidan ish koʻradi va boshqa Tomon davlatidagi oʻz davlati elchixonasining tarkibiy qismi hisoblanadi.

Savdo vakili va uning oʻrinbosarlari, shuningdek savdo vakolatxonasining maʼmuriy-texnik personali umumeʼtirof etilgan xalqaro hujjatlarda chet el diplomatik vakolatxonalarining diplomatik va maʼmuriy-texnik personali aʼzolariga nisbatan oʻrnatilgan imtiyoz va immunitetlardan foydalanadilar.

Savdo vakolatxonasining xizmat va turar joy binolari, uning mol-mulki va arxivlari xalqaro huquqqa muvofiq diplomatik vakolatxonalarning xizmat va turar joy binolari, mol-mulki va arxivlariga berilgan immunitet va imtiyozlardan foydalanadi.

Savdo reyestri toʻgʻrisidagi qoidalar Tomonlarning Savdo vakolatxonasiga nisbatan tatbiq qilinmaydi.

4-modda

Savdo vakolatxonalarining taʼsis etilishi Oʻzbek va Turkman jismoniy va yuridik shaxslarining, xususan, savdo-iqtisodiy va ilmiy-texnikaviy hamkorlikni amalga oshirish bilan bogʻliq bitimlarni tuzish va bajarish maqsadida bir-biri bilan bevosita munosabatlarda boʻlish huquqlariga daxl qilmaydi.

Savdo vakolatxonalari jismoniy va yuridik shaxslarning majburiyatlari boʻyicha javobgar boʻlmaydi, jismoniy va yuridik shaxslar esa savdo vakolatxonalarining majburiyatlari boʻyicha javobgar boʻlmaydi.

5-modda

Savdo vakolatxonalarining faoliyati bilan bogʻliq sarf-xarajatlar Tomonlar davlatlaridan har birining amaldagi qonunchiligiga muvofiq ular tomonidan moliyalashtiriladi.

6-modda

Ushbu Bitim qoidalarini talqin qilish va qoʻllashda Tomonlar oʻrtasida yuzaga kelgan bahs va ixtiloflar maslahatlashuvlar va muzokaralar yoʻli bilan hal etiladi.

7-modda

Tomonlarning oʻzaro kelishuvi boʻyicha ushbu Bitimga uning ajralmas qismi boʻlib hisoblanuvchi alohida bayonnomalar bilan rasmiylashtiriladigan oʻzgartish va qoʻshimchalar kiritilishi mumkin.

8-modda

Savdo vakolatxonalari Tomonlar davlatlarining yoki uchinchi mamlakatlarning fuqarolari orasidan xizmatchilarni yollashlari va bunday xizmatchilarga oʻz davlatining qonunchiligi asosida mehnat haqi toʻlashlari mumkin.

Shu bilan birga Savdo vakolatxonasi joylashish davlatining qonunchiligida koʻzda tutilgan ijtimoiy kafolatlarning eng kichik darajasini taʼminlaydi.

9-modda

Ushbu Bitim Tomonlarning uning kuchga kirishi uchun zarur boʻlgan davlat ichki protseduralarining bajarilganligi toʻgʻrisidagi soʻnggi yozma xabarnomasi olingan kundan boshlab kuchga kiradi.

Ushbu Bitim bir Tomon uning amal qilishini toʻxtatish niyati toʻgʻrisidagi boshqa Tomonning rasmiy xabarnomasini olgan kundan boshlab olti oy tugagunga qadar amal qiladi.

Toshkent shahrida 2011-yil 5-mayda har biri oʻzbek, turkman va rus tillarida ikki asl nusxada tuzildi, bunda barcha matnlar bir xil yuridik kuchga ega.

Ushbu Bitim qoidalarini talqin qilish maqsadida rus tilidagi matndan foydalaniladi.

(imzolar)