Soliq maslahatchilarining malakasini oshirish tartibi toʻgʻrisidagi nizomni tasdiqlash haqida (2343-son)

17.03.2012

OʻZBEKISTON RESPUBLIKASI MOLIYA VAZIRINING

buyrugʻi

[Oʻzbekiston Respublikasi Adliya vazirligi tomonidan 2012-yil 17-martda roʻyxatdan oʻtkazildi, roʻyxat raqami 2343]

Oʻzbekiston Respublikasi “Soliq maslahati toʻgʻrisida”gi Qonunining 14-moddasiga (Oʻzbekiston Respublikasi Oliy Majlisi palatalarining Axborotnomasi, 2006-y., № 9, 497-modda) va Oʻzbekiston Respublikasi Vazirlar Mahkamasining 2007-yil 20-martdagi 55-son “Soliq maslahati sohasini rivojlantirish chora-tadbirlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2007-y., 12-son, 111-modda) muvofiq buyuraman:

1. Soliq maslahatchilarining malakasini oshirish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Vazir R. AZIMOV

Toshkent sh.,

2012-yil 29-fevral,

23-son

Oʻzbekiston Respublikasi moliya vazirining 2012-yil 29-fevraldagi 23-son buyrugʻiga ILOVA

Soliq maslahatchilarining malakasini oshirish tartibi toʻgʻrisidagi

NIZOM

Mazkur Nizom Oʻzbekiston Respublikasi “Soliq maslahati toʻgʻrisida”gi Qonunining 14-moddasiga (Oʻzbekiston Respublikasi Oliy Majlisi palatalarining Axborotnomasi, 2006-y., 9-son, 497-modda) va Oʻzbekiston Respublikasi Vazirlar Mahkamasining 2007-yil 20-martdagi 55-son “Soliq maslahati sohasini rivojlantirish chora-tadbirlari toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2007-y., 12-son, 111-modda) muvofiq soliq maslahatchilarining malakasini oshirish tartibini belgilaydi.

I. Umumiy qoidalar

1. Oʻzbekiston Respublikasining “Soliq maslahati toʻgʻrisida”gi Qonuniga muvofiq soliq maslahatchilari oʻz malakalarini oshirib borishlari shart.

2. Soliq maslahati sohasidagi kasbiy bilimlarni, mahoratni va koʻnikmalarni yangilab borish va chuqurlashtirish soliq maslahatchilarining malakasini oshirish deb eʼtirof etiladi.

3. Soliq maslahatchilarining malakasini oshirish belgilangan tartibda soliq maslahatchilarini tayyorlash boʻyicha maxsus oʻquv kursi boʻyicha oʻqitishni amalga oshiruvchi davlat va nodavlat taʼlim muassasalari (keyingi oʻrinlarda taʼlim muassasalari deb yuritiladi) tomonidan amalga oshiriladi.

4. Soliq maslahatchilarining malakasini oshirish mazkur Nizomga 1-ilova qilingan oʻquv dasturi asosida oʻtkaziladi.

5. Soliq maslahatchilarining malakasini oshirish taʼlim muassasalarida soliq maslahatchilarining malakasini oshirish maxsus kurslarida taʼlim olish yoʻli bilan amalga oshiriladi.

II. Taʼlim muassasalarida soliq maslahatchilarining malakasini oshirish

6. Malaka oshirish taʼlim muassasasi va soliq maslahatchisi yoki soliq maslahatchilari tashkiloti oʻrtasida tuzilgan shartnoma asosida amalga oshiriladi.

7. Soliq maslahatchilarining malakasini oshirish har yili 1-aprelga qadar, 2012-yilda esa — 2012-yilning 1-iyuniga qadar amalga oshiriladi.

8. Taʼlim muassasasi tomonidan soliq maslahatchilarining malakasini oshirish maxsus kurslarini oʻtaganligi toʻgʻrisida sertifikat beriladi.

9. Har yili 15-aprelgacha Oʻzbekiston Respublikasi Moliya vazirligiga quyidagilarni:

soliq maslahatchilari tashkilotlari — mazkur Nizomning 2-ilovasiga muvofiq shaklda soliq maslahati boʻyicha faoliyatni amalga oshiruvchi soliq maslahatchilari toʻgʻrisida va soliq maslahatchilarining malaka oshirishdan oʻtishi haqida axborotni;

soliq maslahatchilari tashkilotining shtatida boʻlmagan soliq maslahatchilari — malaka oshirish maxsus kurslarini oʻtaganligi toʻgʻrisidagi sertifikat nusxalarini taqdim etadilar.

III. Yakuniy qoidalar

10. Soliq maslahatchilarining malakasini oshirish ikkinchi oliy yoki oʻrta maxsus, kasb-hunar maʼlumotini olish deb qaralmaydi.

11. Mazkur Nizom Oʻzbekiston Respublikasi Oliy va oʻrta maxsus taʼlim vazirligi bilan kelishilgan.

Oliy va oʻrta maxsus taʼlim vaziri B. XODIYEV

2012-yil 29-fevral

Soliq maslahatchilarining malakasini oshirish tartibi toʻgʻrisidagi nizomga 1-ILOVA

Soliq maslahatchilarining malakasini oshirish kursi

DASTURI

1-boʻlim. Iqtisodiy munosabatlarni tartibga solishning huquqiy asoslari (8 soat)

1-mavzu. Oʻzbekiston Respublikasi qonunchilik hujjatlaridagi oʻzgarishlar tahlili.

2-mavzu. Oʻzbekiston Respublikasi qonunchilik hujjatlarining alohida normalarini qoʻllash boʻyicha muammoli masalalar va mavjud amaliyot.

3-mavzu. Vaziyatli masalalar.

2-boʻlim. Soliq huquqi, yuridik va jismoniy shaxslarga soliq solish (10 soat)

1-mavzu. Oʻzbekiston Respublikasining soliq toʻgʻrisidagi qonunchilik hujjatlaridagi oʻzgarishlar tahlili.

2-mavzu. Soliq solish sohasidagi qonunchilik hujjatlarining alohida normalarini qoʻllash boʻyicha muammoli masalalar va mavjud amaliyot.

3-mavzu. Vaziyatli masalalar.

3-boʻlim. Buxgalteriya hisobi va hisobot (7 soat)

1-mavzu. Oʻzbekiston Respublikasining buxgalteriya hisobi toʻgʻrisidagi qonunchilik hujjatlaridagi oʻzgarishlar tahlili.

2-mavzu. Buxgalteriya hisobi sohasidagi qonunchilik hujjatlarining alohida normalarini qoʻllash boʻyicha muammoli masalalar va mavjud amaliyot.

3-mavzu. Vaziyatli masalalar.

Soliq maslahatchilarining malakasini oshirish tartibi toʻgʻrisidagi nizomga 2-ILOVA

Soliq maslahati boʻyicha faoliyatni amalga oshiruvchi soliq maslahatchilari toʻgʻrisida va soliq maslahatchilarining malaka oshirishdan oʻtishi haqida

AXBOROT

Soliq maslahatchilari tashkiloti ___________________________________________________________________________________________________________________________________________________________ (toʻliq nomi) STIR _____________ T/r Soliq maslahatchining F.I.O. Soliq maslahatchining STIR Ishga qabul qilingan sana/ yoki shartnoma raqami va sana Malaka oshirish maxsus kurslarida oʻquv oʻtkazilgan sana Taʼlim muassasasini toʻliq nomi Soliq maslahatchilari tashkilotining shtatida boʻlgan soliq maslahatchilari 1. 2. 3. 4. …. Fuqarolik-huquqiy xarakterdagi shartnoma boʻyicha ishlayotgan soliq maslahatchilari 1. 2. 3. 4. ….. Soliq maslahatchilari tashkilotining rahbari _______________ (imzo) _______________________________________ (F.I.O.)