Viloyatda 2009-2013-yillarda aholining reproduktiv salomatligini mustahkamlash, sogʻlom bola tugʻilishi, jismoniy va maʼnaviy barkamol avlodni voyaga yetkazish borasidagi ishlarni yanada kuchaytirish va samaradorligini oshirish chora-tadbirlari dasturi toʻgʻrisida (150-son)

20.07.2009

Toshkent viloyati hokimining

Qarori

Aholining reproduktiv salomatligini yanada mustahkamlash, sogʻlom bola tugʻilishi va uni tarbiyalash uchun zarur shart-sharoitlarni yaratish, jismoniy va maʼnaviy yosh avlodni voyaga yetkazish maqsadida, shuningdek Oʻzbekiston Respublikasi Prezidentining 2009-yil 13-apreldagi “Ona va bola salomatligini muhofaza qilish, sogʻlom avlodni shakllantirishga doir qoʻshimcha chora-tadbirlar toʻgʻrisida”gi PQ-1096-son hamda 2009-yil 1-iyuldagi “2009 — 2013-yillarda aholining reproduktiv salomatligini mustahkamlash, sogʻlom bola tugʻilishi, jismoniy va maʼnaviy barkamol avlodni voyaga yetkazish borasidagi ishlarni yanada kuchaytirish va samaradorligini oshirish chora-tadbirlari Dasturi toʻgʻrisida”gi PQ-1144-son qarorlari ijrosini taʼminlash maqsadida qaror qilaman:

1. Oʻzbekiston Respublikasi Prezidentining 2009-yil 1-iyuldagi “2009 — 2013-yillarda aholining reproduktiv salomatligini mustahkamlash, sogʻlom bola tugʻilishi, jismoniy va maʼnaviy barkamol avlodni voyaga yetkazish borasidagi ishlarni yanada kuchaytirish va samaradorligini oshirish chora-tadbirlari Dasturi toʻgʻrisida”gi PQ-1144-son qarori ijro uchun qabul qilinsin.

2. Viloyatda 2009 — 2013-yillarda aholining reproduktiv salomatligini mustahkamlash, sogʻlom bola tugʻilishi, jismoniy va maʼnaviy barkamol avlodni voyaga yetkazish borasidagi ishlarni yanada kuchaytirish va samaradorligini yanada oshirish chora-tadbirlari Dasturi ilovaga muvofiq tasdiqlansin hamda Dastur:

aholining reproduktiv salomatligini mustahkamlash tizimini takomillashtirish, sogʻlom bola tugʻilishi uchun zarur shart-sharoitlarni yaratishga;

tugʻruqqa yordam koʻrsatish, onalik va bolalikni muhofaza qilish muassasalari hamda onalar va bolalarga tibbiy yordam koʻrsatuvchi sogʻliqni saqlash birlamchi boʻgʻini muassasalarining moddiy-texnika bazasini yanada mustahkamlashga;

aholi oʻrtasida sogʻlom bola tugʻilishi va ularni tarbiyalash, yoshlarda sogʻlom va ahil oila qurishga, sogʻlom turmush tarzini olib borishga intilishni shakllantirish boʻyicha tushuntirish ishlarini kuchaytirishga;

bolalar va oʻsmirlarni jismoniy jihatdan bekamu koʻst kamol toptirish, jismonan baquvvat va maʼnan barkamol yosh avlodni shakllantirish uchun zarur shart-sharoitlarni taʼminlashga;

onalik va bolalikni muhofaza qilish sohasida faoliyat koʻrsatayotgan tibbiyot xodimlarining malakasini oshirish, onalar va bolalarga koʻrsatilayotgan tibbiy yordam sifatini yaxshilashga yoʻnaltirilganligi eʼtirof etilsin.

3. Toshkent viloyati hokimining 2009-yil 20-apreldagi 95-son qaroriga muvofiq tashkil etilgan viloyat komissiyasi zimmasiga Dastur bajarilishi monitoringi va uni tashkil qilish vazifasi yuklansin.

Shahar va tumanlarda hokimlar boshchiligida tegishli hududiy komissiyalar tuzilsin, ularning zimmasiga Dasturda koʻzda tutilgan tadbirlar viloyat hududlarida toʻliq hajmda va belgilangan muddatlarda soʻzsiz bajarilishini taʼminlash uchun shaxsiy javobgarlik yuklansin.

4. Viloyat komissiyasi raisi oʻrinbosari S. Abdullayev:

bir hafta muddatda tegishli viloyat davlat boshqaruvi organlari, shahar va tuman hokimliklari tomonidan nodavlat notijorat tashkilotlari bilan birgalikda aholining reproduktiv salomatligini mustahkamlash, sogʻlom bola tugʻilishi, jismoniy va barkamol avlodni voyaga yetkazish boʻyicha hududiy hamda tarmoq dasturlari ishlab chiqilishi va qabul qilinishi taʼminlansin;

Dasturdagi tadbirlar toʻliq va oʻz vaqtida bajarilishi boʻyicha hududiy davlat boshqaruv organlari va nodavlat notijorat tashkilotlari darajasidagi ishlarning muvofiqlashtirilishi tashkil qilinsin, Dasturga kiritilgan tadbirlarning amalga oshirilishi ustidan tizimli nazorat oʻrnatsin;

har chorak yakunlari boʻyicha tasdiqlangan tadbirlar Dasturining bajarilishi toʻgʻrisida viloyat hokimiga axborot berib borsin.

5. Viloyat Sogʻliqni saqlash boshqarmasi (A. Axmedov):

bir hafta muddatda, ayniqsa viloyatning olis hududlarida, fertil yoshidagi ayollarni tibbiy koʻrikdan oʻtkazish va sogʻlomlashtirish sifatini oshirish boʻyicha aniq chora-tadbirlarni ishlab chiqib, tasdiqlasin;

ikki hafta muddatda, xususan tugʻilish, onalar va chaqaloqlar oʻlimi yuqori darajada boʻlgan hududlarda akusher-ginekologlar, neonatologlar, pediatrlar, bolalar ginekologlari bilan taʼminlanganlik holatini tahlil qilsin va tegishli takliflar tayyorlasin;

aholining reproduktiv salomatligini mustahkamlanishi, onalar va bolalar salomatligi muhofaza qilinishini taʼminlash borasidagi ish natijalariga koʻra har yili shahar va tuman sogʻliqni saqlash organi rahbarlari va mutaxassislarini attestatsiyadan oʻtkazilishini tashkil qilsin.

6. Viloyat Xotin-qizlar qoʻmitasi, “Mahalla” jamgʻarmasi (R. Sheraliyev), “Kamolot” yoshlar ijtimoiy harakati kengashi (Sh. Qoʻchqorov) viloyat boʻlimlari birgalikda ikki hafta muddatda viloyat aholisi orasida, ayniqsa xotin-qizlar va nikohdan oʻtuvchi yoshlar orasida sogʻlom oila qurish, sogʻlom bolalar tugʻish va tarbiyalash masalalari yuzasidan tizimli asosda tushuntirish ishlarini tashkil qilish boʻyicha aniq chora-tadbirlar qoʻshma tadbirini ishlab chiqib, tasdiq uchun kiritsinlar.

7. Viloyat hokimi matbuot kotibi (R. Aripov) Dasturning maqsad va vazifalari keng koʻlamda tushuntirib borilishini, uning amalga oshirilishi, tadbirlar Dasturida nazarda tutilgan tugʻuruqqa yordam koʻrsatish muassasalarining moddiy-texnika bazasini rivojlantirish va mustahkamlash, onalar va bolalar salomatligi muhofaza qilinishini, jismonan sogʻlom hamda maʼnan barkamol yosh avlodning tugʻilishi va tarbiyalanishini taʼminlash borasidagi chora-tadbirlarning amalga oshirilishiga tegishli boshqaruv organlari va ularning hududiy boʻlinmalari, mahalliy davlat hokimiyati organlari, shuningdek nodavlat notijorat tashkilotlarining aniq hissasi muntazam yoritib borilishini taʼminlasin.

8. Mazkur qaror ijrosini nazorat qilishni oʻz zimmamda qoldiraman.

Hokim R. XOLMATOV

Toshkent sh.,

2009-yil 20-iyul,

150-son

Toshkent viloyati hokimining 2009-yil 20-iyuldagi 150-sonli qaroriga ILOVA

Viloyatda 2009 — 2013-yillarda aholining reproduktiv salomatligini mustahkamlash, sogʻlom bola tugʻilishi, jismoniy va maʼnaviy barkamol avlodni voyaga yetkazish borasidagi ishlarni yanada kuchaytirish va samaradorligini yanada oshirish chora-tadbirlari

DASTURI

“TASDIQLANGAN” Toshkent viloyati hokimi R. Xolmatov 20.06.2009-yil

Toshkent viloyatida aholi reproduktiv salomatligini mustahkamlash, ona va bola salomatligini muhofaza qilish, har tomonlama barkamol avlodni hayotga keltirish va shakllantirish maqsadida jamoatchilikni tibbiy madaniyati va savodxonlik darajasini oshirishga qaratilgan keng koʻlamli axborot-targʻibot ishlarini olib borish boʻyicha chora-tadbirlar

DASTURI