Oʻzbekiston Respublikasi Prezidentining 2008-yil 2-iyundagi “2008-2012-yillarda Oʻzbekiston Respublikasida bolalar suv sportini rivojlantirishning moddiy-texnik bazasini mustaxkamlashga doir koʻshimcha chora-tadbirlar toʻgʻrisida”gi PQ-883-sonli qarorn ijrosi toʻgʻrisida (384-son)
06.06.2008
Toshkent shahar hokimining
Qarori
Oʻsib kelayotgan yosh avlodni jismoniy tarbiya va sportning suv turlari bilan shugʻullanishga yanada ommaviy jalb etish, suzish havzalari tarmogʻini kengaytirish, ularning moddiy-texnik bazasini mustahkamlash, foydalanish texnik holatini zamonaviy standartlarga va xavfsizlik talablariga muvofiqlashtirish hamda Oʻzbekiston Respublikasi Prezidentining 2008-yil 2-iyundagi PQ-883-sonli qarori ijrosini taʼminlash maqsadida qaror qilaman:
1. Oʻzbekiston Respublikasi Prezidentining 2008-yil 2-iyundagi “2008 — 2012-yillarda Oʻzbekiston Respublikasida bolalar suv sportini rivojlantirishning moddiy-texnik bazasini mustahkamlashga doir qoʻshimcha chora-tadbirlar toʻgʻrisida”gi PQ-883-sonli qarori ijro uchun qabul qilinsin.
2. 2008 — 2012-yillarda suzish havzalarini rekonstruksiya qilish hamda mukammal taʼmirlash Dasturi 1-ilovaga va 2008-yilda suzish havzalarini rekonstruksiya qilish hamda mukammal taʼmirlash manzilli dasturi 2-ilovaga* muvofiq tasdiqlansin.
* 2-ilova berilmaydi.
3. Xoʻjalik birlashmalari va korxonalarning ular tomonidan 2008-yilda Bolalar sportini rivojlantirish jamgʻarmasi Toshkent shahar filialiga 2008-yil uchun nazarda tutilgan loyihalarni, suzish havzalarini rekonstruksiya qilish hamda mukammal taʼmirlash ishlarini moliyalashtirish qoʻshimcha homiylik yordamini yoʻnaltirish mablagʻlari hisobidan amalga oshirilishi inobatga olinsin.
4. Suzish havzalarini rekonstruksiya qilish hamda mukammal taʼmirlash ishlarini olib borish boʻyicha buyurtmachi vazifasi “Yagona buyurtmachi xizmati” injiniring kompaniyasi zimmasiga yuklansin.
5. Toshkent shahar Iqtisodiyot va ijtimoiy rivojlantirish masalalari majmuasi (B.I. Tohirov), Iqtisodiyot bosh boshqarmasi (Z.N. Toʻychiyev), Moliya bosh boshqarmasi (M.M. Mirmaxmudov), Madaniyat va sport ishlari bosh boshqarmasi (R.M. Xamidov), Bolalar sportini rivojlantirish jamgʻarmasi Toshkent shahar filiali (A.I. Tolipjonov), Arxitektura va qurilish bosh boshqarmasi (S.S. Azizov), ToshkentboshplanLITI loyiha instituti (V.A. Akopdjanyan), “Yagona buyurtmachi xizmati” injiniring kompaniyasi (A.R. Xasan-Xodjayev) va tuman hokimliklari:
5.1. Suzish havzalarini rekonstruksiya qilish hamda mukammal taʼmirlashning tasdiqlangan parametrlari belgilangan muddatlarda samarali va sifatli bajarilishi taʼminlansin.
5.2. Har yili Investitsiya dasturi loyihasi va qurilishlarning manzilli roʻyxatlarini shakllantirishda suzish havzalarining aniq soni va roʻyxati, ularni rekonstruksiya qilish hamda mukammal taʼmirlash boʻyicha ishlar, zarur uskuna va anjomlar bilan jihozlashni moliyalashtirish hajmlari belgilangan holda koʻrsatilsin.
6. Oʻzbekiston Respublikasi Davlat Arxitektura va qurilish qoʻmitasi tomonidan xorijiy andoza hamda xalqaro standartlarga mos keladigan suzish havzalarining uchta namunaviy loyihasi ishlab chiqilganligi va tasdiqdan oʻtganligi maʼlumot uchun qabul qilinsin.
7. Suzish havzalarini rekonstruksiya qilish hamda mukammal taʼmirlashning asosiy mezoni ularning foydalanish-texnik holatini zamonaviy standartlarga va foydalanish xavfsizligi talablariga mos holga keltirish hisoblanishi hamda mazkur qarorga muvofiq pudrat qurilish ishlari faqat budjet tashkilotlari balansida boʻlgan havzalarda olib borilishi belgilab qoʻyilsin.
8. “Yagona buyurtmachi xizmati” injiniring kompaniyasi (A.R. Xasan-Xodjayev), Bolalar sportini rivojlantirish jamgʻarmasi Toshkent shahar filiali (A.Y. Tolipjonov), Qurilish va investitsiya dasturlari departamenti (A.A. Azamov) 2008-yil uchun nazarda tutilgan obyektlar boʻyicha quyidagilarni taʼminlasin:
2008-yil 15-iyungacha boʻlgan muddatda — suzish havzalarini rekonstruksiya qilish hamda mukammal taʼmirlash boʻyicha loyiha ishlarini va davlat ekspertizasi oʻtkazilishini yakunlash;
2008-yil 1-avgustgacha boʻlgan muddatda — ijtimoiy soha obyektlarini qurish boʻyicha ixtisoslashtirilgan pudrat tashkilotlari orasida suzish havzalarini rekonstruksiya qilish hamda mukammal taʼmirlash ishlari ijrochilarini saralab olish boʻyicha tanlov savdolari oʻtkazilishini nihoyasiga yetkazish;
tanlov savdolari natijalari tasdiqlangandan soʻng oʻn kun muddatda — tanlov savdolari gʻoliblari bilan pudrat shartnomalari tuzish va obyektlarni rekonstruksiya qilish hamda mukammal taʼmirlash uchun moliyalashni ochish.
9. Quyidagilar:
1-ilovada koʻrsatilgan parametrlarga qatʼiy rioya qilgan holda rekonstruksiya qilinishi hamda mukammal taʼmirlanishi lozim boʻlgan suzish havzalarini bir toifadagi qayta tiklash ishlaridan boshqa toifaga oʻtkazish;
moliyalanish manbaidan qatʼi nazar, namunaviy loyihalar qoʻllanilmasdan va tasdiqlangan qurilish normalari hamda standartlariga, shuningdek foydalanish xavfsizligi talablariga muvofiq boʻlmagan suzish havzalarini qurish, rekonstruksiya qilish va mukammal taʼmirlash qatʼiyan taqiqlansin.
10. Toshkent shahar davlat arxitektura va qurilish nazorati inspeksiyasi (T.I. Nabiyev):
10.1. Manzilli dasturga kiritilgan suzish havzalarini rekonstruksiya qilish hamda mukammal taʼmirlash boʻyicha loyiha hujjatlari va ishlarning sifati ustidan arxitektura-qurilish nazoratini amalga oshirsin.
10.2. Suzish havzalarini rekonstruksiya qilish hamda mukammal taʼmirlash Dasturini amalga oshirishda qatnashayotgan pudratchi tashkilotlar tomonidan buyurtmachi bilan tanlov savdolari natijalari boʻyicha tuzilgan shartnomalarda koʻrsatilgan qurilish va mukammal taʼmirlash ishlarining sifatli bajarilishi boʻyicha qatʼiy monitoring olib borish taʼminlansin.
11. Mazkur qarorning ijrosini nazorat qilish Toshkent shahar hokimining birinchi oʻrinbosari R.J. Usmonov va Toshkent shahar hokimining oʻrinbosari B.I. Tohirov zimmalariga yuklansin.
Hokim A. TOʻXTAYEV
Toshkent sh.,
2008-yil 6-iyun,
384-son
Shahar hokimining 2008-yil 6-iyundagi 384-sonli qaroriga 1-ILOVA
Toshkent shahrida 2008 — 2012-yillarda suzish havzalarini rekonstruksiya hamda mukammal taʼmirlash
DASTURI