Toshkent shahrida hududiy sanoat yarmarkasini oʻtkazishni tashkil etish masalalari toʻgʻrisida (166-son)

26.03.2008

Toshkent shahar hokimining

Qarori

Ishlab chiqarish kooperatsiyasini yanada rivojlantirish, xoʻjalik yurituvchi subyektlarga buyurtmalar portfelini shakllantirishga koʻmaklashish, mavjud imkoniyat va rezervlardan kengroq foydalanish orqali mahalliy tarzda ishlab chiqarilayotgan mahsulot turlari va xajmlarini koʻpaytirish hamda Respublika sanoat yarmarkasi va kooperatsion birjasini oʻtkazish boʻyicha doimiy faoliyat koʻrsatuvchi tashkiliy koʻmitaning 2008-yil 17-martdagi 02/1-995-sonli yigʻilish bayoni topshiriqlari ijrosini taʼminlash maqsadida qaror qilaman:

1. Toshkent shahrida hududiy sanoat yarmarkasini oʻtkazishni tashkil etish boʻyicha tashkiliy guruh tarkibi 1-ilovaga* hamda chora-tadbirlar rejasi 2-ilovaga* muvofiq tasdiqlansin.

2. Iqtisodiyot bosh boshqarmasi (Z.N. Toʻychiyev), Savdo-sanoat palatasi Toshkent shahar boshqarmasi (Sh.S. Mirzayev), Tashqi iqtisodiy aloqalar, investitsiyalar va savdo boshqarmasi (O.S. Alimov):

bir hafta muddat ichida hududiy sanoat yarmarkasini oʻtkazish joyi aniqlansin va oʻrnatilgan tartibda taklif kiritilsin;

hududiy sanoat yarmarkasida ishtirok etuvchi yirik biznes korxonalari, kichik va xususiy biznes subyektlarining roʻyxati ishlab chiqilsin;

hududiy sanoat yarmarkasi yakuni boʻyicha 3-ilovadagi* shakl asosida tuzilgan shartnomalar va oʻtkazilgan taqdimot toʻgʻrisida maʼlumot Respublika sanoat yarmarkasi va kooperatsion birjasini oʻtkazish boʻyicha doimiy faoliyat koʻrsatuvchi tashkiliy qoʻmitasiga taqdim etilsin.

* 1— 3 ilovalar berilmaydi.

3. Toshkent shahar hokimining maʼnaviy-maʼrifiy masalalar boʻyicha yordamchisi (A.M. Ikromov), Axborot xizmati (X.I. Muxamedov), oʻtkaziladigan hududiy sanoat yarmarkasining maqsad va vazifalari toʻgʻrisida ommaviy axborot vositalarida keng yoritilishi tavsiya etilsin.

4. Mazkur qarorning ijrosini nazorat qilish Toshkent shahar hokimining oʻrinbosari B.I. Tohirov zimmasiga yuklatilsin.

Hokim A. TOʻXTAYEV

Toshkent sh.,

2008-yil 26-mart,

166-son