Fundamental va amaliy tadqiqotlar ilmiy-texnika dasturlarini shakllantirish va amalga oshirish tartibi toʻgʻrisidagi nizomga oʻzgartirish va qoʻshimcha kiritish haqida (1705-2-son)

06.03.2012

OʻZBEKISTON RESPUBLIKASI VAZIRLAR MAHKAMASI HUZURIDAGI FAN VA TEXNOLOGIYALARNI RIVOJLANTIRIShNI MUVOFIQLAShTIRISh QOʻMITASI OʻZBEKISTON RESPUBLIKASI MOLIYA VAZIRLIGI OʻZBEKISTON RESPUBLIKASI OLIY VA OʻRTA MAXSUS TAʼLIM VAZIRLIGI OʻZBEKISTON RESPUBLIKASI IQTISODIYOT VAZIRLIGI OʻZBEKISTON RESPUBLIKASI FANLAR AKADEMIYASINING

Qarori

[Oʻzbekiston Respublikasi Adliya vazirligi tomonidan 2012-yil 6-martda roʻyxatdan oʻtkazildi, roʻyxat raqami 1705-2]

Oʻzbekiston Respublikasi Prezidentining 2011-yil 30-dekabrdagi PQ–1675-son “Oʻzbekiston Respublikasining 2012-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida”gi qaroriga muvofiq, (Oʻzbekiston Respublikasi qonun hujjatlari toʻplami, 2012-y., 52-son, 561-modda) Oʻzbekiston Respublikasi Vazirlar Mahkamasi huzuridagi Fan va texnologiyalarni rivojlantirishni muvofiqlashtirish qoʻmitasi, Moliya vazirligi, Oliy va oʻrta maxsus taʼlim vazirligi, Iqtisodiyot vazirligi va Fanlar akademiyasi qaror qiladilar:

1. Oʻzbekiston Respublikasi Vazirlar Mahkamasi huzuridagi Fan va texnologiyalarni rivojlantirishni muvofiqlashtirish qoʻmitasi, Moliya vazirligi, Oliy va oʻrta maxsus taʼlim vazirligi, Iqtisodiyot vazirligi va Fanlar akademiyasining 2007-yil 25-apreldagi 2, 44, 81, 5-3-6/3 va 2/4-sonli qarori (roʻyxat raqami 1705, 2007-yil 28-avgust) (Oʻzbekiston Respublikasi qonun hujjatlari toʻplami, 2007-y., 35-36-son, 362-modda) bilan tasdiqlangan Fundamental va amaliy tadqiqotlar ilmiy-texnika dasturlarini shakllantirish va amalga oshirish tartibi toʻgʻrisidagi nizomga ilovaga muvofiq oʻzgartirishlar va qoʻshimcha kiritilsin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Fan va texnologiyalarni rivojlantirishni muvofiqlashtirish qoʻmitasi raisi Sh. SALIXOV

Toshkent sh.,

2012-yil 3-fevral,

1-son

Moliya vaziri R. AZIMOV

Toshkent sh.,

2012-yil 3-fevral,

15-son

Oliy va oʻrta maxsus taʼlim vaziri B. XODIYEV

Toshkent sh.,

2012-yil 3-fevral,

42-son

Iqtisodiyot vaziri G. SAIDOVA

Toshkent sh.,

2012-yil 3-fevral,

1-son

Fanlar akademiyasi prezidenti Sh. SALIXOV

Toshkent sh.,

2012-yil 3-fevral,

3/2-son

Oʻzbekiston Respublikasi Vazirlar Mahkamasi huzuridagi Fan va texnologiyalarni rivojlantirishni muvofiqlashtirish qoʻmitasi, Moliya vazirligi, Oliy va oʻrta maxsus taʼlim vazirligi, Iqtisodiyot vazirligi va Fanlar akademiyasining 2012-yil 3-fevraldagi 1, 15, 42, 1, 3/2-son qaroriga ILOVA

Fundamental va amaliy tadqiqotlar ilmiy-texnika dasturlarini shakllantirish va amalga oshirish tartibi toʻgʻrisidagi nizomga kiritilayotgan oʻzgartirishlar va qoʻshimcha

1. 6-banddagi “Qoʻmitaning” degan soʻz “Vazirlar Mahkamasi huzuridagi Fan va texnologiyalarni rivojlantirishni muvofiqlashtirish qoʻmitasining (keyingi oʻrinlarda Qoʻmita deb yuritiladi)” degan soʻzlar bilan almashtirilsin.

2. 28-band quyidagi mazmundagi ikkinchi va uchinchi xatboshilar bilan toʻldirilsin:

“Ilmiy loyihalarga ajratiladigan budjet mablagʻi miqdorining 95 foizi tadqiqot davri mobaynida, ilmiy loyihani amalga oshirishda mehnat sarfi va moddiy xarajatlarni qoplash uchun ajratiladi.

Ilmiy loyihaga ajratiladigan budjet mablagʻining qolgan 5 foizi ilmiy-tadqiqot natijasi ishlab chiqarishga yoki ilmiy-pedagogik jarayonga tatbiq etish uchun ilmiy loyihani amalga oshirish natijalari ekspertizadan oʻtkazilib buyurtmachi tomonidan qabul qilganidan soʻng ajratiladi”.

3. 37-bandda:

uchinchi xatboshidagi “tugallanadigan yilning oʻn birinchi” degan soʻzlar “hisobot yili oʻninchi” degan soʻzlar bilan almashtirilsin;

toʻrtinchi xatboshidagi “yilning oʻn birinchi” degan soʻzlar “yil oʻninchi” degan soʻzlar bilan almashtirilsin.

4. 38-banddagi “oʻn birinchi” degan soʻzlar “oʻninchi” degan soʻz bilan almashtirilsin.

5. Mazkur oʻzgartirishlar va qoʻshimcha Oʻzbekiston Respublikasi Sogʻliqni saqlash vazirligi, Qishloq va suv xoʻjaligi vazirligi va Xalq taʼlimi vazirligi bilan kelishilgan.

Sogʻliqni saqlash vaziri A. IKRAMOV

2012-yil 3-fevral

Qishloq va suv xoʻjaligi vaziri Z. ROʻZIYEV

2012-yil 3-fevral

Xalq taʼlimi vaziri T. ShIRINOV

2012-yil 3-fevral